Yintoni Enokusinceda Sihlale Somelele Elukholweni?
1 Ukususela oko saqalisa ukunxulumana nentlangano kaYehova, inkqubela yethu engokomoya iye yangqineka ingumthombo wovuyo lwethu! Kanti, ukuze siqhubeke ‘simile yaye sakhelwe, yaye sizinzile elukholweni’ ukuqhubeka sikhula ngokomoya kuyafuneka. (Kol. 2: 6, 7) Ngoxa inkoliso iye yenza inkqubela ngokomoya, abanye baye baphambuka ngenxa yokusilela ‘ukuma beqinile elukholweni.’ (1 Kor. 16:13) Sinokukuthintela oku ukuba kungenzeki kuthi. Njani?
2 Imisebenzi Yokomoya Ethe Rhoqo: Yiba nocwangciso olusemagqabini lokomoya entlanganweni kaYehova. Apha iimfuno zethu zokomoya zinyanyekelwa kakuhle gqitha. Iintlanganiso zebandla, iindibano ezincinane, nezinkulu zisikhuthaza ukuba sikhule ngakumbi ngokomoya size sizinze, ukuba sibakho rhoqo ukuze sizuze kuzo. (Heb. 10:24, 25) Ucwangciso oluthe rhoqo lokufundisisa iBhayibhile, amaphephancwadi IMboniselo noVukani!, neencwadi ezixubusha ukutya okuqinileyo kweLizwi likaThixo ziya kwenza iingcambu zethu zokomoya zendele zize zomelele. (Heb. 5:14) Ukuzibekela usukelo lobuqu lwezinto zokomoya size sisebenzele kuzo ngenkuthalo nako kuya kusizisela iingenelo ezihlala zihleli.—Fil. 3:16.
3 Uncedo Oluvela Kwabaqolileyo: Nxulumana nabaqolileyo ngokomoya ebandleni. Bazi abadala, njengokuba bengabokuqala abanokukomeleza. (1 Tes. 2:11, 12) Thabatha nasiphi na isiluleko okanye icebiso abanokulinikela. (Efe. 4:11-16) Kwanezicaka zolungiselelo zinomdla wokunceda abanye ukuze bomelele elukholweni, ngoko ke kulindele ukufumana ukhuthazo kwaba bazalwana.
4 Ngaba ufuna uncedo kubulungiseleli? Thetha nabadala, uze ucele uncedo. Mhlawumbi ungaqukwa kwinkqubo ethi Oovulindlela Banceda Abanye. Ngaba usandul’ ukubhaptizwa? Ukufundisisa incwadi ethi Ubulungiseleli Bethu nokusebenzisa oko ikuquletheyo kuya kukhuthaza inkqubela esa ekukhuleni ngokomoya. Ngaba ungumzali? Bomeleze ngokuqhubekayo ngokomoya abantwana bakho.—Efe. 6:4.
5 Ngokumiliselwa nokuzinza elukholweni, sinandipha ulwalamano olusenyongweni noYehova nonxulumano olusondeleyo nabazalwana bethu. Oku kusenza sikwazi ukumelana nohlaselo lukaSathana, yaye komeleza ithemba lethu lekamva elingunaphakade.—1 Pet. 5:9, 10.