Ividiyo Ebalaselisa Indlela Ebalulekileyo Yezonyango
Iingcali zomthetho nezempilo zinikela ingqalelo engakumbi kwiimbono namalungelo esigulana. Oku kuye kwavelisa iindlela kunye neenkqubo ezintsha zokunyanga anokungenelwa kuzo amaNgqina kaYehova. (IZe. 15:28, 29) Ividiyo ethi Transfusion-Alternative Health Care—Meeting Patient Needs and Rights inikel’ ingqalelo kulo mba. Yibukeleni, nize nixubushe oko niye nakufunda.—Phawula: Ngenxa yokuba le vidiyo iquka imifanekiso emifutshane yotyando, abazali bafanele basebenzise ingqiqo xa beyibukela nabantwana abancinane.
(1) Kutheni oogqirha bekuhlolisisa ngokutsha ukutofelwa kwegazi? (2) Chaza iintlobo ezintathu zotyando oluntsokothileyo eziye zenziwa ngaphandle kwegazi. (3) Ehlabathini lonke bangaphi oogqirha bezamayeza nabotyando abaye babonisa ukukulungela ukunyanga izigulana ngaphandle kwegazi? Kutheni bekulungele ukwenjenjalo? (4) Yintoni edizwe luphengululo lwakutshanje olwenziwe zizibhedlele ngokusetyenziswa kwegazi? (5) Ziziphi iingozi zonyango ezibangelwa lutofelo-gazi? (6) Sisiphi isigqibo eziye zafikelela kuso iingcali ezininzi ngokuphathelele iingenelo zokusetyenziswa kweendlela ezizezinye ngaphandle kotofelo-gazi? (7) Ibangelwa yintoni i-anemia? Iyingozi kangakanani kubantu? Yintoni enokwenziwa ukuze ithintelwe? (8) Zinokuveliswa njani iiseli ezibomvu zegazi emzimbeni wesigulana? (9) Ziziphi iinkqubo ezisetyenziswayo ukuze kuncitshiswe ukopha xa kusenziwa utyando? (10) Ngaba iinkqubo zonyango ezingasebenzis’ igazi zinokusetyenziswa ebantwaneni abancinane nakwiimeko zongxamiseko? (11) Nguwuphi omnye wemigaqo esisiseko eyamkelekileyo kwezonyango? (12) Kutheni kubalulekile ukuba amaKristu azikhethele uhlobo lonyango olungasebenzisi gazi kwangaphambili? Singakwenza njani oku?
Ukwamkela unyango oluboniswe kule vidiyo sisigqibo ubani azenzela sona ngokuvisisana nesazela esiqeqeshwe yiBhayibhile. Ngaba sele usenzile isigqibo ngokuphathelele izinto ezinokusetyenziswa kuwe nakubantwana bakho endaweni yegazi? Amalungu entsapho yakho angengomaNgqina afanele aziswe ngezigqibo zakho kwanezizathu zokuba ugqibe ngolu hlobo.—Bona “Imibuzo Evela Kubafundi” kwiMboniselo kaJuni 15 nekaOktobha 15, 2000.