Ziqhelise Ukwenza Izinto Kakuhle, Uya Kusikelelwa Ngokuyintabalala
1. Kutheni kuyingenelo ukuhlola ucwangciso lwakho lwezinto zokomoya?
1 Kusenokwenzeka ukuba xa wawusiba ngumKristu, kwafuneka uziqhelise ukwenza izinto ezininzi ezakhayo ngokomoya ezinjengokufunda iBhayibhile, ukuya kwiintlanganiso zamaKristu, ukuya entsimini nokuthandaza. Ngenxa yokuba uYehova ewusikelela umzamo owenzayo, uye wakhula ngokomoya. Mhlawumbi ngoku sele kudlule iminyaka eliqela ubhaptiziwe. Ngaba usaqhubeka uzenza izinto ezakhayo ngokomoya owaziqhelisa zona xa wawusiba ngumKristu?
2. Singenelwa njani ngokufunda iBhayibhile imihla ngemihla?
2 Hlola Ucwangciso Lwakho Lokomoya: Ngaba kusisiqhelo kuwe ukufunda inxalenye yeLizwi likaThixo mihla le? Uya kusikeleleka ngokwenene xa usenjenjalo. (Yosh. 1:8; INdu. 1:2, 3) KuSirayeli wamandulo, ukumkani ngamnye kwakufuneka afunde umbhalo woMthetho “imihla yonke yobomi bakhe.” Wayefumana ntoni ngaloo nto? Wayesiba nentliziyo ethobekileyo aze afunde ukumoyika uYehova ukuze angaphambuki kwimiyalelo Yakhe. (Dut. 17:18-20) Nanamhlanje ke, ufundo lweBhayibhile luyasinceda ukuba sihlale singenasiphako yaye simsulwa kweli hlabathi lingendawo nelonakeleyo. Lukwasinceda ukuba sibuxhobele ngokupheleleyo ubulungiseleli bethu.—Fil. 2:15; 2 Tim. 3:17.
3. Ziziphi iintsikelelo esizifumanayo ngokuya rhoqo kwiintlanganiso?
3 UYesu waziqhelisa ukuya kwindlu yesikhungu, apho kwakuxutyushwa iZibhalo. (Luka 4:16) Alithandabuzeki elokuba loo nto yamomeleza ukuze ajongane namanzithinzithi awayeza kuhlangabezana nawo. Nathi iyasomeleza imfundo yokomoya ‘nokukhuthazana’ esikufumana kwiintlanganiso zebandla. (Roma 1:12) Ukuhlanganisana nabazalwana bethu kuyasinceda ukuba sinyamezele iingxaki ezikhoyo kule mihla yokugqibela. (Heb. 10:24, 25) Ngaba kuselisiko lakho ukubakho kuzo zonke iintlanganiso?
4. Kusinceda njani ukuya entsimini veki nganye?
4 Ingxelo ephefumlelweyo ithi abapostile babeshumayela iindaba ezilungileyo “imihla yonke etempileni nakwizindlu ngezindlu.” (IZe. 5:42) Nangona sisenokungakwazi ukushumayela imihla yonke, kutheni singaziqhelisi ukubandakanyeka kuhlobo oluthile lobulungiseleli veki nganye? Xa sisenjenjalo, ngokuqinisekileyo siya kuba nobuchule ekusebenziseni iLizwi likaThixo, sifumane namava amnandi entsimini.
5. Kutheni kubalulekile ukuthandaza kuYehova rhoqo?
5 Umprofeti uDaniyeli wasikelelwa kakhulu ngokukhonza uYehova “rhoqo” bonke ubomi bakhe. Oku kwakuquka ukuziqhelisa ukuthandaza kuYehova rhoqo. (Dan. 6:10, 16, 20) Ngendlel’ efanayo, njengoko sisondela kuYehova rhoqo ngomthandazo onyanisekileyo, uya kusisikelela ngomoya wakhe oyingcwele. (Luka 11:9-13) Ukongezelela koko, uYehova uya kusabela ngokusondela kuthi, asivumele ukuba sibe nobuhlobo obusondeleyo naye. (INdu. 25:14; Yak. 4:8) Onjani wona umvuzo! Ngoko ke, ngamana singazama ngandlela zonke ukuba nocwangciso oluhle lwezinto zokomoya size sifumane iintsikelelo ezivela kuYehova.