Ukuphucula Ubuchule Bethu Bokushumayela—Ukubonisa Indlela Yokuqhuba Isifundo SeBhayibhile Usebenzisa Incwadi Ethi Okufundiswa YiBhayibhile

Isizathu Sokuba Kubalulekile: Abantu abaninzi basenokungaqondi ukuba sithetha ukuthini xa sisithi siqhuba izifundo zeBhayibhile zasimahla. Basenokucinga ukuba kuza kufuneka bangene kwiklasi ethile okanye bafunde ngembalelwano. Kunokuba ubaxelele nje ngesifundo, kutheni ungababonisi indlela esiqhutywa ngayo? Ngemizuzu nje embalwa, ungakwazi ukubonisa umninimzi indlela ekulula nekuluncedo ngayo ukufunda iBhayibhile. Oku unokukwenza umi nasemnyango.

Indlela Yokukwenza:

Emva kokuzazisa, buza umninimzi ukuba ziintoni ezimxhalabisayo xa ecinga ngekamva.
Mchazele ukuba abantu abaninzi baxhalatyiswa zizinto ezifanayo, uze umbonise iphepha leziqulatho le ncwadi ethi Okufundiswa YiBhayibhile. Mcacisele ukuba le ncwadi inezifundo ekulula ukuziqonda ezibonisa oko kuthethwa yiBhayibhile ngekamva nangeminye imixholo, uze umbuze ukuba nguwuphi umxholo awuthandayo.
Mnike eyakhe incwadi uze umbonise apho ukhoyo umxholo awuthandileyo. Mchazele ukuba imibuzo esekuqaleni kwesahluko iphendulwa kwiziqendu ezikweso sahluko.
Mcele ukuba afunde isiqendu sokuqala ukuba akanangxaki ekwenzeni oko. Wandule ke ufunde umbuzo waso nize nikhangele impendulo yawo kunye. Fundani nize nithethe ngezibhalo ezicatshulweyo ezixhasa impendulo. Mbonise indlela oyikrwelele ngayo impendulo kweyakho incwadi.
Fundani isiqendu sesibini, kodwa ngoku mcele ukuba azame ukuphendula ngamazwi akhe.
Mncome uze wenze amalungiselelo okubuyela ukuze nigqibezele eso sahluko.
Ukuba kubonakala kulungile, mbonise ividiyo ethi Yintoni Eyenziwayo Xa Kufundwa IBhayibhile? eku-jw.org/xh.

Khawulizame Kwakule Nyanga:

Cela kuYehova ngomthandazo ukuba akusikelele ngesifundo seBhayibhile esitsha.—Fil. 2:13.
Zama ukubonisa indlela yokuqalisa isifundo seBhayibhile usebenzisa incwadi ethi Okufundiswa YiBhayibhile, okanye ubonise umninimzi ividiyo ethi Yintoni Eyenziwayo Xa Kufundwa IBhayibhile? nokuba kukanye nje xa usentsimini.