Incwadi KaYobhi Inokukunceda Xa Ulungisa Umntu

1-2. Yintoni eyayixake abahlobo abathathu bakaYobhi noElihu?

ZIYAKHAWULEZA ukusasazeka iindaba kubantu baseMpuma. Indoda eyaziwa ngokuba sisityebi, uYobhi, ilahlekelwe yiyo yonke into enayo. UElifazi, uBhiledadi noTsofare, abangabahlobo bakaYobhi, bathi bakuva ukuba kwenzeke ntoni kuye baye eUtse ukuze bamthuthuzele. Kodwa ukufika kwabo babona into abangakhange bayilindele.

² Khawube nombono wayo le nto. Yonke into abenayo uYobhi ayisekho. Iigusha, iinkomo, iinkamela needonki zakhe ezininzi azisekho. Kubulewe abantwana nezicaka zakhe ezininzi. Nendlu abaswelekele kuyo abantwana bakhe ingamabhodlo. Phezu kwazo zonke ezi zinto zibuhlungu, naye uyagula. Umzimba wakhe ugcwele ngamathumba abuhlungu. Esekude, la madoda abona uYobhi elusizi ehleli eluthuthwini. Enza ntoni? Afika ahlale, kude kudlule iintsuku eziyi-7 engathethi kwanto kule ndoda ingcungcuthekayo. (Yobhi 2:​12, 13) Kufika nomfana onguElihu ahlale ecaleni kwawo. Ekugqibeleni uYobhi uyathetha. Uqalekisa usuku awazalwa ngalo, anqwenele nokufa. (Yobhi 3:​1-3, 11) Kucacile ukuba uyaludinga uncedo. Into ethethwa ngala madoda nendlela ayithetha ngayo, iza kubonisa ukuba angabahlobo bakaYobhi nyhani na, nokuba amkhathalele na.

3. Yintoni esiza kuthetha ngayo?

³ UYehova waphefumlela uMoses ukuba abhale izinto ezathethwa nezenziwa ngabahlobo bakaYobhi abathathu noElihu. Kubonakala ngathi ezinye izinto ezazithethwa nguElifazi zaziphefumlelwe yidemon. Kanti ezazithethwa nguElihu zaziphefumlelwe nguYehova. (Yobhi 4:​12-16; 33:​24, 25) Yiloo nto kwincwadi kaYobhi kukho awona macebiso mahle nawona angalunganga. Into ebalulekileyo esinokuyifunda kwincwadi kaYobhi yindlela enokusinceda ngayo xa kufuneka silungise umntu. Okokuqala, siza kuthetha ngezinto ezimbi ezathethwa nezenziwa ngabahlobo bakaYobhi abathathu, emva koko sithethe ngezinto ezintle awazithethayo nawazenzayo uElihu. Siza kubona nokuba amaSirayeli ayenokuncedwa njani yincwadi kaYobhi, nokuba thina inokusinceda njani.

BAMLUNGISA NJANI UYOBHI ABAHLOBO BAKHE?

4. Kwakutheni ukuze abahlobo abathathu bakaYobhi bangakwazi ukuyenza into ababezimisele ukuyenza? (Jonga nomfanekiso.)

⁴ IBhayibhile ithi abahlobo abathathu bakaYobhi ‘baya kumthuthuzela’ emva kokuba bevile ngezinto ezimbi ezamehlelayo. (Yobhi 2:11) Kodwa ngenxa yezizathu ezithathu, zange bafike benze loo nto. Esokuqala, bakhawuleza bacinga ukuba bayasazi isizathu sokuba uYobhi ehlelwe zezo zinto. Ngokomzekelo, babecinga ukuba uYobhi wohlwaywa ngenxa yezinto ezimbi azenzileyo.a (Yobhi 4:7; 11:14) Esesibini, izinto ezininzi awazithethayo loo madoda zange zimncede uYobhi, zazingekho ntle futhi zamshiya ekhathazeke kakhulu. Ngokomzekelo, omathathu la madoda athetha izinto ezazivakala ngathi zilungile, zabe zingancedi nganto. (Yobhi 13:12) Kwada kwakabini uBhiledadi ethetha kakubi noYobhi, emxelela ukuba uthetha kakhulu. (Yobhi 8:2; 18:2) NoTsofare wathetha krwada noYobhi, esithi ‘usisiphukuphuku.’ (Yobhi 11:12) Esesithathu, nangona kusenokwenzeka ukuba babengamngxolisi, kodwa babethetha naye ngendelelo, bemphoxa, bemtyhola nokumtyhola. (Yobhi 15:​7-11) Eyona nto yayibalulekile kula madoda, yayikukubonisa ukuba ikhona into embi ayenzileyo uYobhi, kunokumthuthuzela okanye aqinise ukholo lwakhe.

5. Yintoni awayenzayo uYobhi ngenxa yendlela abamlungisa ngayo abahlobo bakhe?

⁵ Ayothusi ke into yokuba zingazange zimncede uYobhi izinto abahlobo bakhe ababezithetha. Kunoko zamshiya ebuhlungu. (Yobhi 19:2) Unokusiqonda isizathu sokuba afune ukuzithethelela. Loo nto yamenza akacinga kakuhle, waza wathetha nezinto awayengamele azithethe. (Yobhi 6:​3, 26) Abahlobo bakaYobhi babengacingi ngendlela uYehova acinga ngayo, futhi zange babe novelwano kuye. Ngenxa yaloo nto, bavuma ukusetyenziswa nguSathana. (Yobhi 2:​4, 6) Eli bali lalinokuwanceda njani amaSirayeli? Linokusinceda njani thina namhlanje?

6. Yintoni ababenokuyifunda abadala bakwaSirayeli kubahlobo bakaYobhi abathathu abenza izinto ezingalunganga?

⁶ Ayenokuncedakala njani amaSirayeli? Xa uYehova wanika amaSirayeli imithetho yakhe, wakhetha abadala ukuba babengabagwebi, nokuba bawancede ayithobele loo mithetho. (Dut. 1:​15-18; 27:1) Loo madoda ayemele amamele kakuhle ngaphambi kokuba acebise okanye agwebe. (2 Kron. 19:6) Enye into, kwakufuneka abuze, angacingi ukuba azi yonke into. (Dut. 19:18) Kwakufuneka loo madoda akwaSirayeli athethe kakuhle nabantu abaye kucela uncedo kuwo. Ngoba? Xa umntu ekubona ukuba udikiwe, usenokungakuxeleli eyona ndlela aziva ngayo. (Eks. 22:​22-24) Ezi zezinye zezinto ezazinokufundwa ngabadala bakwaSirayeli kwibali likaYobhi.

7. Ngaphandle kwabadala, ngoobani abanye ababenokulungisa umntu kwaSirayeli? Lalinokubanceda njani ibali likaYobhi? (IMizekeliso 27:9)

⁷ Yayingengobadala kuphela ekwakufuneka balungise umntu kwaSirayeli. Nawuphi na umSirayeli, omncinci okanye omdala, indoda okanye ibhinqa, wayenokumlungisa umhlobo wakhe odinga ukuncedwa asondele kuYehova okanye ayeke into erongo ayenzayo. (INdu. 141:5) Loo nto yenziwa ngumntu ongumhlobo nyhani. (Funda iMizekeliso 27:9.) Kubahlobo bakaYobhi abathathu, amaSirayeli ayenokufunda ukuba yintoni omele ungayithethi nomele ungayenzi xa ulungisa umntu.

8. Ziintoni ekufuneka singazenzi xa silungisa umntu? (Jonga nemifanekiso.)

⁸ Sinokuncedakala njani thina? Thina maKristu siyafuna ukubanceda abazalwana noodade xa beneengxaki. Kodwa ukuze sikwazi ukubanceda, kufuneka singayenzi into eyenziwa ngabahlobo bakaYobhi abathathu. Okokuqala, kufuneka silumkele ukugqiba ngento singayazi, siqiniseke nokuba sazi yonke into ngaphambi kokuba sithethe. Okwesibini, akufunekanga silungise umntu ngokwendlela thina esizibona ngayo izinto, njengokuba uElifazi wenzayo, kodwa kufuneka sisebenzise iLizwi LikaThixo. (Yobhi 4:8; 5:​3, 27) Okwesithathu, masingathethi kakubi naye okanye simgxeke. Ezinye izinto ezazithethwa nguElifazi nabahlobo bakhe zaziyinyani, kangangokuba enye yazo yacatshulwa ngomnye umbhali weBhayibhile. (Thelekisa uYobhi 5:13 nama-1 Korinte 3:19.) Sekunjalo, izinto ezininzi ababezithetha ngoThixo zazibubuxoki futhi zazimkhathaza uYobhi, ngoko uYehova wathi khange bathethe nyani. (Yobhi 42:​7, 8) Xa simlungisa kakuhle umntu, soze sithethe izinto eziza kwenza uYehova abonakale ngathi akanangqiqo okanye akabathandi abakhonzi bakhe. Ngoku makhe sithethe ngento esinokuyifunda kuElihu.

UELIHU WAMLUNGISA NJANI UYOBHI?

9. Emva kokuba bethule abahlobo bakaYobhi, kwakutheni ukuze kufuneke ancedwe? UYehova wamnceda njani?

⁹ Bathi beyeka ukuphikisana uYobhi nabahlobo bakhe, kwabe kukubi. Loo madoda athetha kakhulu kangangokuba izinto awazithethayo zigcwalise izahluko eziyi-28 zeBhayibhile, futhi izinto ezininzi kuzo zazibonisa ukuba ayecaphuka. Ayothusi into yokuba uYobhi engazange ayeke ukukhathazeka. Wayesakudinga yena ukuthuthuzelwa nokulungiswa. UYehova wamnceda njani uYobhi? Wamlungisa esebenzisa uElihu. Kwakutheni ukuze uElihu angakhawulezi athethe? Wathi: “Ndisemtsha, nina nibadala. Ngoko ndiye ndathula kuba ndinihlonipha.” (Yobhi 32:​6, 7) Umfana onguElihu wayesazi le nto yaziwa ngabantu abaninzi namhlanje: Abantu abakhulileyo baye baphila baza bafunda izinto ezininzi, ngoko zininzi izinto abazaziyo ngobomi, ezingaziwayo ngabantu abasebatsha. Kodwa emva kokuba emmamele kakuhle uYobhi nabahlobo bakhe, uElihu zange akwazi ukuthula. Wathi: “Abuyi ngaminyaka kuphela ubulumko, kungayi nangabudala kuphela ukubona into elungileyo.” (Yobhi 32:9) Yeyiphi enye into eyathethwa nguElihu, futhi wayithetha njani?

10. Yintoni awayenzayo uElihu ngaphambi kokuba alungise uYobhi? (Yobhi 33:​6, 7)

¹⁰ Ngaphambi kokuba uElihu alungise uYobhi, waqala wamenza wazola. Wayenza njani loo nto? Waqala wazibamba. Le nto siyazi kuba iBhayibhile ithi ekuqaleni uElihu wacaphuka. (Yobhi 32:​2-5) Sekunjalo, akazange nakanye athethe kakubi noYobhi kuba enomsindo. Endaweni yaloo nto, waba nobubele xa ethetha naye. Ngokomzekelo, wathi kuye: “Jonga! Ndifana nje nawe phambi koThixo wokwenene.” (Funda uYobhi 33:​6, 7.) Emva koko, wamenza waqonda ukuba ebemmamele kakuhle. Phofu wade waziphinda ezona zinto zibalulekileyo kwezo zazithethwa nguYobhi. (Yobhi 32:11; 33:​8-11) Nangamanye amaxesha ke awayemlungisa ngawo uYobhi, wayesenza into efanayo.​—Yobhi 34:​5, 6, 9; 35:​1-4.

11. UElihu wamlungisa njani uYobhi? (Yobhi 33:1)

¹¹ Xa uElihu wayelungisa uYobhi, wamlungisa ngendlela eyayibonisa ukuba uyayihlonipha le ndoda yayithembekile. Ngokomzekelo, xa wayethetha naye wambiza ngegama lakhe, nto leyo ekusenokwenzeka ukuba akazange ayenze wona la madoda mathathu. (Funda uYobhi 33:1.) Mhlawumbi naye wakhumbula ukuba wayekufuna nyhani ukuthetha xa la madoda ayephikisana noYobhi, waza wamvela, wamnika ithuba lokuba naye athethe. (Yobhi 32:4; 33:32) Waphinda wamlumkisa ngendlela engalunganga awayecinga ngayo, wamkhumbuza nokuba uYehova ulumkile, unamandla, ubulungisa nothando olungagungqiyo. (Yobhi 36:​18, 21-26; 37:​23, 24) Indlela awamlungisa kakuhle ngayo yamnceda wakulungela ukuphinda alungiswe, ngoku nguMdali wakhe. (Yobhi 38:​1-3) Indlela uElihu awamlungisa ngayo uYobhi yayinokuwanceda njani amaSirayeli? Inokusinceda njani thina?

12. UYehova wabasebenzisa njani abaprofeti ukuze ancede abantu bakhe? Yayinokubanceda njani amaSirayeli into eyenziwa nguElihu?

¹² Ayenokuncedakala njani amaSirayeli? Ukuze uYehova afundise aze alungise amaSirayeli, wayesebenzisa abaprofeti. Ngokomzekelo, ngexesha laBagwebi, xa wayefuna ukuyalela amaSirayeli wasebenzisa uDebhora, owayenjengomama kuwo. Waphinda wasebenzisa umfanyana onguSamuweli, owayengadinwa kukumkhonza. (ABagwe. 4:​4-7; 5:7; 1 Sam. 3:​19, 20) Kanti ngexesha lookumkani uYehova wayesebenzisa abaprofeti ukuze aqinise ukholo lwabantu bakhe aze alungise abo baphuma endleleni. (2 Sam. 12:​1-4; IZe. 3:24) Into eyenziwa nguElihu ebhalwe kwincwadi kaYobhi yayinokuwanceda amadoda namabhinqa athembekileyo ayazi into amawayithethe, nendlela amele ayithethe ngayo xa elungisa umntu.

13. Thina maKristu sinokubakhuthaza njani abazalwana noodadewethu?

¹³ Sinokuncedakala njani thina? Nathi maKristu sisebenzisa iLizwi LikaThixo, iBhayibhile, ukuze sazise abantu ukuba uThixo uthanda senze ntoni. Siphinda sithethe kakuhle xa sithuthuzela naxa sikhuthaza abazalwana noodade. (1 Kor. 14:3) Abadala bamele baqonde ukuba nokuba abazalwana noodade banomsindo okanye ‘bayabhuda,’ bamele ‘babathuthuzele’ xa bethetha nabo.​—1 Tes. 5:14; Yobhi 6:3.

14-15. Khawenze umzekelo wendlela umdala anokumlinganisa ngayo uElihu xa elungisa umntu.

¹⁴ Khawucinge ngale nto: Umzalwana ongumdala ufumanisa ukuba udade osebandleni lakhe utyhafile. Uhamba nomnye umzalwana, bayokumkhuthaza. Lo dade uyabaxelela ukuba ngoxa eqhubeka esiya kwiintlanganiso nasentsimini, akonwabanga. Uza kuthini lo mdala?

¹⁵ Okokuqala, usenokuzama ukuqonda esona sizathu sokuba lo dade atyhafe. Ukuze asiqonde, kuza kufuneka ammamele kakuhle. Ngaba lo dade ucinga ukuba akanakuthandwa nguThixo? Ngaba utyhafiswa ‘ngamaxhala obomi’? (Luka 21:34) Okwesibini, lo mdala uza kukhangela izinto anokumncoma kuzo lo dade. Kaloku usaqhubeka esiya ezintlanganisweni nasentsimini, nakubeni eziva etyhafile. Okwesithathu, akuyiqonda imeko yakhe nesizathu sokuba atyhafe, umdala uza kusebenzisa iBhayibhile ukuze amncede aqiniseke ukuba uThixo uyamthanda.​—Gal. 2:20.

QHUBEKA UNCEDWA YINCWADI KAYOBHI

16. Ziintoni esinokuzifunda kwincwadi kaYobhi?

¹⁶ Zininzi nyhani izinto esizifunda kwincwadi kaYobhi. Njengokuba sifundile kwinqaku elidlulileyo, le ncwadi ayisifundisi ngesizathu sokuba uThixo evumele ukuba sehlelwe zizinto ezibuhlungu kuphela, isifundisa nendlela yokuzinyamezela. Nanjengoko sivile kweli nqaku, sonke singafunda indlela efanelekileyo yokulungisa abantu, ngokungenzi izinto ezenziwa ngabahlobo abathathu bakaYobhi kodwa silinganise uElihu. Xa uza kulungisa umntu kwixesha lizayo, kutheni ungaqali ngokuphinda ujonge izinto ozifundileyo kwincwadi kaYobhi? Ukuba ugqibele kudala ukufunda le ncwadi inik’ umdla, zimisele ukuphinda uyifunde. Uza kubona ukuba isanceda ngendlela eyayinceda ngayo ngexesha lokubhalwa kwayo.