Ngaba Unokulivula Ikhaya Lakho?
1 Kwinkulungwane yokuqala, amaKristu amaninzi avula amakhaya awo ukuze kuqhutywe iintlanganiso zebandla. (1 Kor. 16:19; Kol. 4:15; Filem. 1, 2) Namhlanje amanye amabandla awanazo iindawo ezaneleyo zokuqhubela iSifundo Sencwadi Sebandla neentlanganiso zenkonzo yasentsimini. Oku kusenokubangela ukuba amanye amaqela ezifundo zencwadi zebandla abe nabantu abangama-30 nangaphezulu, nani elo elilidlula lee inani elikhuthazwayo labali-15.
2 Ilungelo Elihle: Ngaba ukhe wacinga ngokuvula ikhaya lakho ukuze kuqhutywe iSifundo Sencwadi Sebandla kulo? Igumbi elikhulu ngokwaneleyo nelicocekileyo, elikhanya ngokwaneleyo, nelibetha umoya linokusetyenziswa. Ekubeni isifundo sencwadi iyintlanganiso yebandla nenxalenye yelungiselelo likaYehova lokufundisa abantu bakhe, ukuba nesifundo sencwadi ekhayeni lakho lilungelo elihle. Abaninzi bathi baye bangenelwa ngokomoya ngokuvula amakhaya abo ngale ndlela.
3 Ukuba ucinga ukuba ikhaya lakho liya kufaneleka, zama ukwazisa abadala. Basenokuba bafuna iindawo ezingakumbi. Ukuba akunakukwazi ukwamkela isifundo sencwadi ekhayeni lakho, ngaba azinakuqhutywa kulo iintlanganiso zenkonzo yasentsimini? Nokuba alikafuneki okwangoku, abadala baya kukuxabisa ukwazi ukuba linokusetyenziswa ikhaya lakho. Unokulinandipha eli lungelo kwixa elizayo.
4 Ukuba Nesimilo: Xa nihlanganisene ekhayeni lomzalwana, nonke nifanele nizihlonele izinto zakhe. Abazali bafanele baqinisekise ukuba abantwana bahlala kuloo ndawo siqhutyelwa kuyo isifundo, bangangeni kwamanye amagumbi. Kwakhona kufanele kucingelwe abamelwane, bangaphazanyiswa ngokungeyomfuneko.—2 Kor. 6:3, 4; 1 Pet. 2:12.
5 KumaHebhere 13:16 sikhuthazwa ukuba singalibali “ukwenza okulungileyo nokwabelana ngezinto nabanye, kuba uThixo uyakholiswa yimibingelelo enjalo.” Ukuvula ikhaya lakho ukuze kuqhutyelwe kulo iintlanganiso zebandla yindlela entle yokwabelana nabanye ngezinto ezilungileyo “nokubeka uYehova ngezinto zakho zexabiso.”—IMize. 3:9.