Landela Umzekelo Wookumkani

“Wothi . . . azikhuphelele encwadini umbhalo walo mthetho . . . Umele uhlale kuye, awufunde imihla yonke yobomi bakhe.”—DUTERONOMI 17:18, 19.

1. UmKristu usenokufuna ukufana nabani?

KUNOKWENZEKA ukuba akuzange uphuphe nokuphupha ungukumkani okanye ungukumkanikazi. Nguwuphi umKristu othembekileyo okanye umfundi weBhayibhile onqwenela ukuba negunya lasebukhosini, njengoKumkani othembekileyo uDavide, uYosiya, uHezekiya okanye uYehoshafati? Kanti unako yaye ufanele ube njengabo ubuncinane kwinkalo enye ebalulekileyo. Yiyiphi loo nkalo? Yaye kutheni ufanele ufune ukuba njengabo kuloo nkalo?

2, 3. UYehova wabona ntoni kusengaphambili ngokuphathelele ukumkani ongumntu, yaye ukumkani onjalo wayemele enze ntoni?

² Ngemihla kaMoses, ngaphambi kokuba uThixo avumele amaSirayeli ukuba abe nokumkani ongumntu, wabona kusengaphambili ukuba abantu Bakhe babeya kuba nomnqweno wokufuna ukumkani. Ngoko ke, waphefumlela uMoses ukuba aquke imiyalelo ehambisana noku kumnqophiso woMthetho. Le yayiyimiyalelo eyayisiya kookumkani.

³ UThixo wathi: “Xa uthe ekugqibeleni wafika kulo ilizwe akunika lona uYehova uThixo wakho, . . . wathi, ‘Mandizimisele ukumkani njengazo zonke iintlanga ezindijikelezileyo’; wozimisela ukumkani aya kumnyula uYehova uThixo wakho. . . . Wothi xa athe wahlala etroneni yobukumkani bakhe, azikhuphelele encwadini umbhalo walo mthetho . . . Umele uhlale kuye, awufunde imihla yonke yobomi bakhe, ukuze afunde ukumoyika uYehova uThixo wakhe nokuwagcina onke amazwi alo mthetho nale mimiselo ukuba ayenze.”—Duteronomi 17:14-19.

4. Imiyalelo kaThixo kookumkani yayiquka ntoni?

⁴ Eneneni, ukumkani uYehova awayeza kumkhethela abanquli bakhe wayefanele azenzele umbhalo onokuwufumana kwiBhayibhile yakho. Wayeya kwandula ke ukumkani awufunde imihla ngemihla, ngokuphindaphindiweyo. Esi yayingesosicengcelezo nje. Yayikukufundisisa, yaye kwakufuneka kufeze injongo ethile eluncedo. Lo kumkani wayeya kuxhaswa nguYehova ukuze akwazi ukwenza ufundisiso olunjalo aze abe nesimo sengqondo esihle. Kwakhona kwakufuneka afundisise loo mibhalo iphefumlelweyo ukuze abe ngukumkani onempumelelo nonobulumko.—2 Kumkani 22:8-13; IMizekeliso 1:1-4.

Funda Njengokumkani

5. Ziziphi iinxalenye zeBhayibhile uKumkani uDavide awayefanele azikhuphele aze azifunde, yaye wayevakalelwa njani ngoku?

⁵ Ucinga ukuba kwakuza kufuneka enze ntoni uDavide xa wayeza kuba ngukumkani kwaSirayeli? Kaloku, kwakuza kufuneka azenzele umbhalo weencwadi zePentatiki (Genesis, Eksodus, Levitikus, Numeri, Duteronomi). Cinga indlela ekunokuba kwabetheleleka ngayo oku engqondweni nasentliziyweni kaDavide xa wasebenzisa amehlo nezandla zakhe xa wayekhuphela uMthetho. Kusenokwenzeka ukuba, kwanoMoses wayibhala ngesandla sakhe incwadi kaYobhi kwakunye neNdumiso 90 neyama-91. Ngaba uDavide wayikhuphela nale mibhalo? Kusenokwenzeka. Kwakhona, kusenokwenzeka ukuba kwakukho nencwadi kaYoshuwa, yaBagwebi nekaRute. Ngoko unokubona ukuba uKumkani uDavide wayenenxalenye enkulu yeBhayibhile ekwakufanele ayifunde aze ayiqonde. Yaye unesizathu sokukholelwa ukuba wakwenza oko, kuba phawula oko wakuthethayo ngoMthetho kaThixo, ngoku ofumaneka kwiNdumiso 19:7-11.

6. Sinokuqiniseka njani ukuba uYesu, njengokhokho wakhe uDavide wayenomdla kwiZibhalo?

⁶ UDavide Omkhulu—uYesu, uNyana kaDavide—walandela umzekelo ofanayo. Yayilisiko likaYesu ukuya kwindlu yesikhungu veki nganye. Apho wayephulaphula xa kufundwa iZibhalo aze azicacise. Ukongezelela koko, ngesinye isihlandlo uYesu walifunda ngokuvakalayo esidlangalaleni waza walicacisa iLizwi likaThixo. (Luka 4:16-21) Akunzima ukubona ukuba wayeqhelene neZibhalo. Khawuzifundele nje ingxelo yeencwadi zeVangeli, uze uphawule indlela ekuxhaphake ngayo ukuva amazwi kaYesu athi “kubhaliwe kwathiwa” okanye ngezinye iindlela ebhekisela kwiingxelo zeZibhalo. Ngokomzekelo, kwiNtshumayelo yakhe yaseNtabeni ebhalwe nguMateyu, uYesu wacaphula kwiZibhalo zesiHebhere izihlandlo ezingama-21.—Mateyu 4:4-10; 7:29; 11:10; 21:13; 26:24, 31; Yohane 6:31, 45; 8:17.

7. UYesu wayehluke njani kwiinkokeli zonqulo?

⁷ UYesu walandela isiluleko esikwiNdumiso 1:1-3 esithi: “Unoyolo umntu ongahambanga ngecebo labangendawo, . . . kodwa oyoliswa ngumthetho kaYehova, efunda emthethweni wakhe ngesandi esiphantsi imini nobusuku. . . . Konke akwenzayo kuya kuphumelela.” Hayi indlela okwahluke ngayo oku kwiinkokeli zonqulo zomhla wakhe, ‘ezazizihlalise esihlalweni sikaMoses’ kodwa ezaziwutyeshela “umthetho kaYehova”!—Mateyu 23:2-4.

8. Kwakutheni ukuze ukufunda nokufundisisa iBhayibhile kweenkokeli zonqulo zamaYuda kube lilize?

⁸ Noko ke, abanye basenokudideka xa befunda indinyana esenokuchazwa ngokungathi uYesu wayengakukhuthazi ukufundisiswa kweBhayibhile. KuYohane 5:39, 40, sifunda oko uYesu wakuthethayo kwabathile ngemihla yakhe: “Niyaziphengulula iZibhalo, ngenxa yokuba nicinga ukuba ngazo niya kuba nobomi obungunaphakade; yaye zona zizo kanye ezinikela ubungqina ngam. Ukanti anifuni kuza kum ukuze nibe nobomi.” Ngala mazwi uYesu wayengathi kumaYuda awayemphulaphule makayeke ukufundisisa iZibhalo. Kunoko, wayewabonisa ukunganyaniseki nokungalungelelani kwawo. Ayeqonda ukuba iZibhalo zazinokuwakhokelela kubomi obungunaphakade, kodwa kwaezi Zibhalo ayeziphengulula zazinokuwakhokelela kuMesiya, uYesu. Sekunjalo, akazange amamkele. Ngaloo ndlela ukufundisisa kwawo kwakungeyonzuzo kuba ayenganyanisekanga, engafundiseki.—Duteronomi 18:15; Luka 11:52; Yohane 7:47, 48.

9. Nguwuphi umzekelo omhle owamiselwa ngabapostile nabaprofeti bangaphambili?

⁹ Oku kwakwahluke gqitha kubafundi bakaYesu, kuquka nabapostile! Babefundisisa “imibhalo engcwele, enako ukukunika ubulumko obusa [ubani] elusindisweni.” (2 Timoti 3:15) Ngaloo ndlela babefana nabaprofeti bangaphambili abathi “babuzisa ngenkuthalo baza benza nophengululo lwenyameko.” Abo baprofeti abazange balujonge olo phengululo njengento enokwenziwa ngokufundisisa nje isihlandlo esinye kangangeenyanga ezimbalwa okanye unyaka. Umpostile uPetros uthi “baqhubeka behlola,” ingakumbi ngoKristu nangozuko olwalubandakanyeke kwindima yakhe yokusindisa abantu. Kwincwadi yakhe yokuqala, uPetros ucaphula iincwadi ezilishumi zeBhayibhile kangangezihlandlo ezingama-34.—1 Petros 1:10, 11.

10. Kutheni ngamnye kuthi efanele abe nomdla kufundisiso lweBhayibhile?

¹⁰ Ngoko ke, kucacile ukuba ukufundisisa iLizwi likaThixo ngenyameko yayisisabelo sookumkani kuSirayeli wamandulo. UYesu wawulandela lo mzekelo. Yaye ukulifundisisa yayisisabelo sabo baza kulawula noKristu njengookumkani emazulwini. (Luka 22:28-30; Roma 8:17; 2 Timoti 2:12; ISityhilelo 5:10; 20:6) Lo mzekelo wookumkani usabalulekile nanamhlanje kubo bonke abo bajonge phambili kwiintsikelelo emhlabeni phantsi kolawulo loBukumkani.—Mateyu 25:34, 46.

Isabelo Sookumkani Nesakho

11. (a) Kunokuphumela kwiziphi iingozi ukungafundisisi komKristu? (b) Yiyiphi imibuzo ekuya kuba kuhle ukuzibuza yona?

¹¹ Sinokutsho ngokuphandle nangokunyaniseka ukuba umKristu ngamnye wokwenyaniso ufanele azenzele uhlolisiso lweBhayibhile. Oku akwenziwa nje kuphela xa ufundisisa iBhayibhile okwesihlandlo sokuqala namaNgqina kaYehova. Ngamnye kuthi ufanele azimisele ukuphepha ukufana nabathile bomhla kampostile uPawulos abathi ekuhambeni kwexesha balutyeshela ufundisiso lobuqu. Bafunda “izinto eziziziqalelo zezibhengezo ezingcwele zikaThixo,” ‘ezinjengemfundiso esisiqalelo engoKristu.’ Ukanti, abazange baqhubeke nofundisiso lwabo yaye ngaloo ndlela abazange ‘baxhinele ekuqoleni.’ (Hebhere 5:12–6:3) Ngoko ke sisenokuzibuza: ‘Ndivakalelwa njani ngofundisiso lobuqu leLizwi likaThixo, enoba ndisandul’ ukunxulumana nebandla lamaKristu okanye sendinexesha elide? UPawulos wathandazela amaKristu omhla wakhe ukuba aqhubeke ‘esandisa ulwazi lwawo oluchanileyo ngoThixo.’ Ngaba ndibonakalisa umnqweno ofanayo?’—Kolose 1:9, 10.

12. Kutheni kubalulekile ukulithanda iLizwi likaThixo ngokuqhubekayo?

¹² Ukuba nemikhwa emihle yokufundisisa kukwenza ulithande iLizwi likaThixo, nto leyo ebalulekileyo. INdumiso 119:14-16 ithi xa ulifunda rhoqo nangenjongo iLizwi likaThixo uyayoliswa lilo. Kwakhona, oku kuyinyaniso kungakhathaliseki enoba unexesha elingakanani ungumKristu. Ukuze ubone indlela oku kuyinyaniso ngayo, cinga ngomzekelo kaTimoti. Nangona lo mKristu ongumdala wayesele ‘elijoni elihle likaKristu Yesu,’ uPawulos wambongoza ukuba enze unako-nako ‘ekuliphatheni ngokufanelekileyo ilizwi lenyaniso.’ (2 Timoti 2:3, 15; 1 Timoti 4:15) Ngokucacileyo, ukwenza “unako-nako” kuquka ukuba nemikhwa emihle yokufundisisa.

13. (a) Unokuzenzela njani ixesha elingakumbi lokufundisisa iBhayibhile? (b) Luluphi uhlengahlengiso onokulwenza ukuze ufumane ixesha elingakumbi lokufundisisa?

¹³ Ukuze ube nemikhwa emihle yokufundisisa, ufanele uziphe ixesha ngokuthe rhoqo lokufundisisa iBhayibhile. Uqhuba njani kule nkalo? Enoba impendulo yakho enyanisekileyo ithini na, ngaba ucinga ukuba uya kuzuza ngokuchitha ixesha elingakumbi kufundisiso lobuqu? Usenokuzibuza: ‘Ndinokulifumana njani ixesha lokwenjenjalo?’ Kaloku, bambi baye bafumana ixesha elifanelekileyo lokufundisisa iBhayibhile ngokuvuka kwasekuseni. Bafunda iBhayibhile kangangemizuzu eli-15 okanye benze ufundisiso lobuqu. Enye into onokuyenza, kukwenza uhlengahlengiso kucwangciso lwakho lweeveki ngeeveki. Ngokomzekelo, ukuba unomkhwa wokufunda iphephandaba okanye ubukele iindaba zangokuhlwa kumabonwakude, ngaba unokukwazi ukungakwenzi oko usuku nje olunye ngeveki? Usenokusebenzisa elo xesha lolo suku ekwandiseni ufundisiso lwakho lweBhayibhile. Ukuba uyayeka ukuphulaphula iindaba usuku olunye uze elo xesha elinokuba yimizuzu engama-30 ulisebenzisele ufundisiso lobuqu, uya kube ufundisise iiyure ezingakumbi ezingama-25 ngonyaka. Khawufan’ ucinge inzuzo onokuyifumana ngokufunda nokufundisisa iBhayibhile iiyure ezingama-25 ezingakumbi! Nali elinye icebiso: Kule veki izayo, hlolisisa izinto ozenzayo ekupheleni kosuku ngalunye. Bona enoba kukho nto ithile unokuyibekel’ ecaleni okanye uyinciphise ukuze ube nexesha elingakumbi lokufunda okanye lokufundisisa iBhayibhile.—Efese 5:15, 16.

14, 15. (a) Kutheni kubalulekile ukuzibekela usukelo lofundisiso lobuqu? (b) Luluphi usukelo onokuzibekela lona lokufunda iBhayibhile?

¹⁴ Yintoni enokwenza ufundisiso lwakho lube lula yaye lube mnandi ngakumbi? Kukuba nosukelo. Unokuzibekela luphi usukelo olusengqiqweni lokufundisisa? Usukelo lokuqala abaninzi abazibekela lona, kukufunda yonke iBhayibhile. Mhlawumbi ukuza kuthi ga ngoku, uye wafunda amacandelo eBhayibhile ngamaxesha athile yaye uye wazuza kuwo. Ngaba ngoku unokuzibekela usukelo lokufunda iBhayibhile iphela? Okokuqala usenokuzenzela usukelo lokufunda iincwadi ezine zeVangeli, wandule ke ugqibezele ukufunda ezinye iZibhalo zamaKristu zesiGrike. Wakuba uzuze ulwaneliseko olufumaneka ngokwenza oku, usukelo lwakho olulandelayo lusenokuba kukufunda iincwadi zikaMoses neencwadi zembali kuquka nekaEstere. Wakuba ukugqibile oko, uya kubona ukuba unako ukuyigqiba yonke iBhayibhile. Elinye ibhinqa elaba ngumKristu xa lalineminyaka enokuba ngama-65 ubudala, labhala ngaphakathi kwiqweqwe leBhayibhile yalo usuku elaqala ngalo ukuyifunda yaye kamva nosuku elayigqiba ngayo ukuyifunda. Ngoku sele liyifunde izihlandlo ezihlanu! (Duteronomi 32:45-47) Yaye kunokuba liyifunde kwikhompyutha okanye kwiphepha eliprintwe kwikhompyutha, laliyifunda iBhayibhile liyibambe ngesandla.

¹⁵ Bambi abasele beyifunde bayigqiba iBhayibhile bathabatha amanye amanyathelo okwenza ufundisiso lwabo lube nenzuzo engakumbi. Enye indlela kukuquka umbandela wokufundisisa okhethiweyo ngaphambi kokufunda iincwadi zeBhayibhile ezilandelelanayo. Kwincwadi ethi “Sonke ISibhalo Siphefumlelwe NguThixo Yaye Siyingenelo” nethi Insight on the Scriptures, ubani usenokufumana inkcazelo engakumbi ngembali, ngohlobo loo ncwadi ebhalwe ngalo neenzuzo esinokuzifumana kwincwadi nganye yeBhayibhile.a

16. Sifanele siphephe ukulandela yiphi imizekelo xa sifundisisa iBhayibhile?

¹⁶ Xa ufundisisa, kuphephe ukwenza oko kwenziwa ngabo bathi bangabaphengululi beBhayibhile. Bagxininisa ngokugqithiseleyo ekuhlalutyeni izibhalo ngokungathi iBhayibhile ibhalwe ngumntu. Bambi bade bazame ukwalatha abantu incwadi nganye ebhalelwe bona okanye bazame ukufumana injongo nembono awayenayo mntu ngamnye awayebhala incwadi ethile. Ukuqiqa kwabantu okunjalo kunokuphumela ekubeni iincwadi zeBhayibhile zigqalwe njengembali nje engabalulekanga okanye ukubonisa nje iindlela eziguquguqukayo zokufundisa ngonqulo. Abanye abaphengululi bathe phithi kukufunda amagama, njengokufunda ngolwimi ezabhalwa ngayo iincwadi zeBhayibhile. Bazixakekisa ngokufundisisa imvelaphi yamagama yaye bacaphula iintsingiselo zamagama esiHebhere nawesiGrike kunentsingiselo yesigidimi sikaThixo. Ngaba ucinga ukuba ukwenjenjalo kunokubangela ubani abe nokholo olunzulu nolunemisebenzi?—1 Tesalonika 2:13.

17. Kutheni sifanele siyigqale iBhayibhile njengenesigidimi sabantu bonke?

¹⁷ Ngaba abaphengululi bafikelela kwizigqibo ezifanelekileyo? Ngaba liyinyaniso elokuba incwadi nganye yeBhayibhile inengongoma enye eyintloko okanye ibhalelwe abantu abathile ngokukhethekileyo? (1 Korinte 1:19-21) Inyaniso ikukuba iincwadi zeLizwi likaThixo zihlala zixabisekile kubo bonke abantu enoba badala kangakanani na okanye banemvelaphi enjani. Enoba incwadi ethile yayibhalelwe umntu othile ekuqaleni, njengoTimoti okanye uTito, okanye iqela elithile, mhlawumbi abaseGalati okanye abaseFilipi, sonke sinako yaye sifanele sizifundisise ezo ncwadi. Zibalulekile kuthi sonke, yaye incwadi ethile isenokuthetha ngemibandela emininzi ize ibe yinzuzo kubantu abaninzi. Eneneni, isigidimi seBhayibhile sisebenza ehlabathini lonke, nto leyo esinceda siqonde isizathu sokuba iguqulelwe kwiilwimi zabantu abasemhlabeni wonke.—Roma 15:4.

Kuzuza Wena Nabanye

18. Njengoko ufunda iLizwi likaThixo, yintoni ofanele ucinge ngayo?

¹⁸ Njengoko ufundisisa, uya kuzuza kakhulu xa ufuna ukuqonda into eseBhayibhileni uze uzame ukufumana unxulumano olukhoyo phakathi kweengongoma ezithile. (IMizekeliso 2:3-5; 4:7) Oko uYehova aye wakutyhila kwiLizwi lakhe kunxulumene ngokusondeleyo nenjongo yakhe. Ngoko ke njengoko ufunda, nxulumanisa iingongoma nesiluleko naloo njongo. Usenokuphonononga indlela isiganeko, ingcamango, okanye isiprofeto esinxulumana ngayo nenjongo kaYehova. Zibuze: ‘Oku kundixelela ntoni ngoYehova? Kunxulumana njani nenjongo kaThixo ephunyezwa ngoBukumkani bakhe?’ Kwakhona usenokuzibuza: ‘Ndinokuyisebenzisa njani le nkcazelo? Ngaba ndinokuyisebenzisa ekufundiseni okanye ekucebiseni abanye ngeZibhalo?’—Yoshuwa 1:8.

19. Kuzuza bani njengoko ubalisela abanye izinto ozifundileyo? Cacisa.

¹⁹ Ukucinga ngabanye nako kukwayinzuzo. Ngoxa ufunda yaye ufundisisa iBhayibhile, uya kufunda izinto ezintsha uze uzibone ngenye indlela izinto. Zama ukuquka ezi zinto kwincoko eyakhayo xa uncokola nentsapho yakho nabanye. Ukuba wenjenjalo ngamaxesha afanelekileyo nangendlela enobulali, ngokuqinisekileyo iincoko ezinjalo ziya kuba yinzuzo. Xa ubalisa ngokunyanisekileyo nangehlombe oko ukufundileyo okanye izinto ozifumanise zibangela umdla kuya kuyenza loo nkcazelo ibangele umdla ongakumbi kwabanye. Ngaphezu koko, kuya kuba yinzuzo nakuwe. Njani? Iingcaphephe ziye zathi umntu uyayikhumbula into ayifundileyo kangangexesha elide ukuba ngoxa isentsha engqondweni yakhe, uyayisebenzisa okanye uyayiphindaphinda, njengoxa eyibalisela abanye.b

20. Kutheni kuyinzuzo ukufunda iBhayibhile ngokuphindaphindiweyo?

²⁰ Sihlandlo ngasinye ufunda incwadi yeBhayibhile, ngokuqinisekileyo uya kufunda into entsha. Uya kuba nomdla kwiindinyana ebezingenantsingiselo ingako ngaphambili kuwe. Uya kuziqonda ngokungakumbi ezi ndinyana. Oku kufanele kubethelele isibakala sokuba, kunokuba iBhayibhile ibe yincwadi nje yabantu, iincwadi zayo zibubutyebi ofanele uzifundisise ngokuphindaphindiweyo uze uzuze kuzo. Khumbula ukuba, ukumkani, njengoDavide, kwakufuneka ‘ayifunde imihla yonke yobomi bakhe.’

21. Nguwuphi umvuzo onokuwulindela ngokwandisa ufundisiso lwakho lweLizwi likaThixo?

²¹ Ewe, abo bazipha ixesha lokufundisisa iBhayibhile ngokunzulu bazuza lukhulu. Bafumana ubuncwane kunye nokuqonda kokomoya. Ulwalamano lwabo noThixo lomelela ngakumbi. Kwakhona baba ziintsika kumalungu entsapho, kubazalwana noodade kwibandla lamaKristu, nakwabo baza kuba ngabanquli bakaYehova.—Roma 10:9-14; 1 Timoti 4:16.

[Imibhalo esemazantsi]

Usakhumbula Na?

• Ookumkani bakwaSirayeli babefanele benze ntoni?

• UYesu nabapostile bamisela wuphi umzekelo ekufundisiseni iBhayibhile?

• Luluphi uhlengahlengiso onokulwenza ukuze wandise ixesha lakho lofundisiso lobuqu?

• Ufanele ube nasiphi isimo sengqondo xa ufundisisa iLizwi likaThixo?

[Ibhokisi ekwiphepha 15]

“Ezandleni Zethu”

“Ukuba sifuna . . . intyilalwazi yeBhayibhile, eyona iphucukileyo ifumaneka kwi-Internet. Kodwa ukuba sifuna ukufunda iBhayibhile, ukuyifundisisa, ukucingisisa ngayo, ukucamngca ngayo, sifanele siyiphathe esandleni, kuba leyo ikuphela kwendlela esinokuyifaka ngayo ezingqondweni nasezintliziyweni zethu.”—Gertrude Himmelfarb, unjingalwazi okumhlala-phantsi, City University, New York.