Ukoyisa USathana Nemisebenzi Yakhe

“Mthobeleni ngoko uThixo. Mchaseni ke uMtyholi, wonibaleka.”—YAKOBI 4:7.

1. ‘Isandla sabangendawo’ siluchaphazele njani uluntu namhlanje?

UYOBHI wayechan’ ucwethe xa wathi: “Ihlabathi linikelwe esandleni sabangendawo.” (Yobhi 9:24) Yaye ngoku sijamelene nawona maxesha anomngcipheko kuyo yonke imbali yabantu. Ngoba? Ngenxa yokuba le ‘yimihla yokugqibela’ yokuba uSathana esebenzisa iidemon alawule lo mhlaba. Akumangalisi ukuba, beqhutywa nguSathana, ‘abantu abangendawo noosiyazi, bahambela phambili ebubini, belahlekisa, belahlekiswa.’ (2 Timoti 3:1, 13) Ngaphezu koko, iintshutshiso, ukungabikho kokusesikweni, izenzo zenkohlakalo, ulwaphulo-mthetho, iingxaki zezoqoqosho, ukugula ngokungaginyisi mathe, amahlaba okwaluphala, ukudandatheka—ezi zinto nezinye ezingakumbi zinokusongamela.

2. Sinokuhlangabezana njani neentlaselo zikaSathana namhlanje?

² Utshaba olukhulu, uSathana uMtyholi, uluhlasela ngamandla uluntu yaye uqinisa ngokukodwa kubanquli bakaThixo bokwenyaniso. Usukelo lwakhe kukulukuhla bonke abo basenokuba ngabagcini bengqibelelo bangazisondezi kuThixo aze abarhuqele entshabalalweni kunye naye nezithunywa zakhe eziziidemon. Noko ke, siyaqinisekiswa ukuba, ukuba siyanyamezela sigcine ingqibelelo, uMtyholi uya kusibaleka. NjengoYesu, ‘sinokufunda ukululamela’ uThixo ngobunzima esibuvayo, size ngobabalo Lwakhe, sifumane ubomi obungunaphakade.—Hebhere 5:7, 8; Yakobi 4:7; 1 Petros 5:8-10.

3, 4. (a) Ziziphi izilingo zangaphandle uPawulos ekwafuneka ajamelane nazo? (b) UPawulos wayexhalabele ntoni njengomdala ongumKristu?

³ Kwanompostile uPawulos wavavanywa ngeendlela ezininzi. Echaza izinto ezazimenza afaneleke njengomlungiseleli kaKristu, wabhala: “Ndingongaphezulu mna, ngokubulaleka okugqithiseleyo, ngemivumbo egqithe emgceni, ngokuba sezintolongweni ngokugqithiseleyo, ngokuba sekufeni futhi. KumaYuda ndazuza kahlanu imivumbo emashumi mane kwaphuke mnye. Kukathathu ndibethwa ngeentswazi, okunye ndaxulutywa ngamatye, ndaphukelwa ngumkhombe kathathu, ndenze ubusuku nemini enzulwini; ndithi ndingongaphezulu ngokuhamba okufuthi, ngeengozi zemilambo, ngeengozi zezihange, ngeengozi zamakowethu, ngeengozi zeentlanga, ngeengozi phakathi komzi, ngeengozi entlango, ngeengozi elwandle, ngeengozi phakathi kwabazalwana ababuxoki; ngokubulaleka nangemigu, ngokungabi nakulala okufuthi, ngokulamba nokunxanwa, ngokuzila ukudla okufuthi, ngengqele nobuze.

⁴ “Ndingasazibali zona izinto ezingaphandle kwezo, ndingungelwe imihla ngemihla kukuwaxhalela onke amabandla kaThixo. Ngubani na okha aswele amandla, ndingasweli mandla nam? Ngubani na okha akhutyekiswe, ndingatshiseki mna?” (2 Korinte 11:23-29) Ngaloo ndlela, uPawulos wagcina ingqibelelo xa wayejamelene nokutshutshiswa nezinye iimvavanyo zangaphandle, yaye njengomdala ongumKristu, wayekuxhalabele ngokunzulu ukomeleza abazalwana noodade ababuthathaka ebandleni, ebanceda bagcine ingqibelelo. Onjani ukuba mhle umzekelo kubadala abangamaKristu namhlanje!

Ingqibelelo Xa Sitshutshiswa

5. Yintoni enokusinceda xa sitshutshiswa ngokungqalileyo?

⁵ USathana usebenzisa waphi amacebo ukuze aphule ingqibelelo yethu? Njengokuba kuboniswe ngasentla, enye yezona ndlela zikaSathana zenkohlakalo yintshutshiso engqalileyo, kodwa lukho uncedo. Eyabase-Efese 6:10, 11 isiluleka ithi: “Yomelelani eNkosini, nasekuqineni kokomelela kwayo. Xhobani sonke isikrweqe sikaThixo, ukuze nibe nako ukumisa nibuchase ubuqhinga boMtyholi.”

6. Kunokuboniswa njani ukuba amaNgqina kaYehova ‘oyise agqithisa’?

⁶ Ngokufuthi kule mihla yokugqibela, amaNgqina kaYehova kuye kwafuneka ajamelane nezilingo. Ngaloo ndlela, sinokutsho la mazwi kunye noPawulos: “Kwezo zinto zonke, sisuka soyise sigqithisele, ngaye owasithandayo.” (Roma 8:37) Oku kungqinwa yingxelo yengqibelelo yamaNgqina kaYehova kwiinkampu zoxinaniso zaseJamani, eOstriya, ePoland, naseYugoslavia ebudeni bolawulo lwamaNazi phakathi kowe-1933 nowe-1945, ngaphantsi kwengcinezelo yobuKomanisi kwiMpuma Yurophu phakathi kowe-1945 nowe-1989, nasebudeni bentshutshiso ebithwaxa iinxalenye zeAfrika noMbindi noMzantsi Merika kumaxesha akutshanje.

7. Yiyiphi imizekelo echukumisayo yengqibelelo ekwiingxelo ezivela e-Ethiopia?

⁷ AmaNgqina kaYehova ase-Ethiopia ebengumzekelo ochukumisayo wengqibelelo phakathi kowe-1974 nowe-1991. Omnye umgcini-mabanjwa owayethanda ezobupolitika waxelela omnye umzalwana owayevalelwe entolongweni oku: “Kubhetele ukukhulula iingonyama kumzi wogcino-zilwanyana kunokukhulula nina bantundini!” Aba batshutshisi bakhohlakeleyo babathuthumbisa abakhonzi bakaYehova, yaye emva kweminyaka eliqela inkundla yezibheno yayalela ukuba babulawe. Umzimba womnye umzalwana wabekwa ukuba ubonwe nguwonke wonke njengomzekelo wokulumkisa abanye. Abanye abazalwana ababhenayo kwisigwebo sokufa bakhululwa yinkundla enolwazelelelo, ibe abanye baba ‘boyisi’ bathembekileyo babeneenxalenye kucwangciso lweNdibano YeSithili “Yemfundiso Yobuthixo” eAddis Ababa ebutsheni bowe-1994.a—Yohane 16:33; thelekisa eyoku-1 kwabaseKorinte 4:9.

8. USathana uzame njani ukusebenzisa “ukutshayelwa kweentlanga”?

⁸ USathana akaphumelelanga ukwaphula ingqibelelo yabazalwana noodade abanyanisekileyo abanjalo ngokubahlasela ngokungqalileyo. Ngoko, ngawaphi amanye amaqhinga awasebenzisayo? ISityhilelo 12:12 sithi ngale mihla yokugqibela: “Yeha, abo bawumiyo umhlaba nolwandle! ngokuba uhlile weza kuni uMtyholi, enomsindo omkhulu, esazi nje ukuba ixesha analo lincinane.” Ekubeni engaphumelelanga ukutshabalalisa abantu bakaThixo abanyanisekileyo ngokubatshutshisa, esemsindweni uzama ukubulala ngogonyamelo amaqela abantu ephela, ngokungathandabuzekiyo ezimisele ukutshabalalisa kunye nabantu bakaYehova. Ngaloo ndlela kuye kwenziwa oko kubizwa ngokuba kukutshayelwa kweentlanga kwiinxalenye zelizwe elalisakuba yiYugoslavia, yaye kuye kwazanywa ukubulawa kohlanga lonke eLiberia, eBurundi naseRwanda.

9. Kutheni amaqhinga kaSathana ngokufuthi engaphumeleli? Nikela imizekelo.

⁹ Noko ke, ngokufuthi xa uSathana esebenzisa amacebo akhe isikhuni sibuya nomkhwezeli, kuba ukubandezeleka okubangelwa nguSathana kuye kuncede abantu abantliziyo zinyanisekileyo baqonde ukuba ekuphela kwethemba abanalo lisekelwe kuBukumkani bukaThixo, obuvakaliswa ngamaNgqina kaYehova ngenzondelelo. (Mateyu 12:21) Eneneni, abantu abanomdla bayathontelana ukungena eBukumkanini! Ngokomzekelo, kwilizwe elithwaxwa lukruthakruthwano laseBosnia naseHerzegovina, xa bekusenziwa iSikhumbuzo sokufa kukaYesu, ngoMatshi 26, 1994, bekukho abantu abali-1 307, abangama-291 ngaphezu kwababekho kunyaka ongaphambili. Kufikelelwa incopho entsha kwinani labebekho eSarajevo (414), eZenica (223), eTuzla (339), eBanja Luka (255) nakwezinye iidolophu. Kwilizwe eliselumelwaneni laseCroatia kwabakho incopho entsha yababekho yama-8 326. Ugonyamelo obeluwangqongile alukhange luwathintele amaNgqina kaYehova kuloo mazwe ekuthobeleni umthetho ‘wokwazisa ukufa kweNkosi, ide ifike.’—1 Korinte 11:26.

KwiRwanda Ethwaxwa Lukruthakruthwano

10, 11. (a) Kwenzeke ntoni kwiRwanda ekuthiwa lilizwe lobuKristu? (b) Bathini abavangeli basemazweni abathembekileyo?

¹⁰ Ngowe-1993, eRwanda, apho bekukho abavakalisi boBukumkani abangama-2 080, ngabantu abangama-4 075 ababekho kwiNdibano Yesithili “Yemfundiso Yobuthixo”, kwaza kwabhaptizwa abangama-230. Kwaba, abali-142 bafaka izicelo zenkonzo yobuvulindlela bobuncedani ngoko nangoko. Inani lezifundo zeBhayibhile eziqhutywayo lantinga laya kutsho kuma 7 655 ngowe-1994—ngokucacileyo uSathana akazange athande xa zininzi kangako! Nangona uninzi lwabemi balapha lusithi lungamaKristu, iintlanga zalapho zaqalisa ukubulalana. IL’Osservatore Romano yaseVatican yavuma yathi: “Oku kukutshatyalaliswa ngokupheleleyo kohlanga lonke, ngelishwa namaKatolika abekek’ ityala ngako.” Kufe amadoda, abafazi nabantwana abaqikelelwa kwisiqingatha sesigidi, yaye abamalunga nezigidi ezibini basele bengenamakhaya okanye benyanzeleke ukuba babhace. Elondoloze ukuba ngoondilele kwawo ngokungenalugonyamelo, amaNgqina kaYehova azame ukuhlala ndawonye. Amakhulu abazalwana noodade wethu abulawa. Kodwa kwelinye ibandla elinabavakalisi boBukumkani abangama-65, ekwabulawa kulo abali-13, inani labeza kwiintlanganiso landa laya kutsho kwi-170 ngoAgasti 1994. Uncedo oluvela kumaNgqina akwamanye amazwe lwaluphakathi kolokuqala ukufika. Sithandazela abo basindileyo.—Roma 12:12; 2 Tesalonika 3:1, 2; Hebhere 10:23-25.

¹¹ Ngokungathi kungommangaliso, abavangeli basemazweni abathathu abebeseRwanda basinda. Babhala bathi: “Siyaqonda ukuba abazalwana bethu ehlabathini lonke kuye kwafuneka bajamelane neemeko ezifanayo okanye ezimbi ngakumbi, yaye siyazi ukuba konke oku kungumqondiso wemihla yokugqibela yale nkqubo ingendawo. Sekunjalo, xa ubani ebandakanyekile, uye azibone ngokwenene izibakala yaye oku kumenza ayiqonde indlela obuxabiseke ngayo ubomi. Izibhalo ezithile zibaluleke ngakumbi kuthi ngoku, yaye sikhangele phambili ngolangazelelo kwixesha apho izinto zangaphambili zingasayi kubuya zithi qatha entliziyweni. Okwakalokunje sifuna ukuqhubeka sixakekile enkonzweni kaYehova.”

Abagcini Bengqibelelo Abaselula

12, 13. (a) Liliphi ikhondo lokugcina ingqibelelo omnye oselula awalithabathayo? (b) Ulutsha lwethu lunokulufumana phi ukhuthazo namhlanje?

¹² UYesu wabonisa ukuba abo balahlwayo ngamalungu eentsapho zabo ngenxa yenyaniso baya kubuyekezwa “kalikhulu.” (Marko 10:29, 30) Kwaba njalo ngoEntellia, intombazana eneminyaka elishumi ubudala yakumantla eAfrika, eyalithanda igama likaThixo—uYehova—iqala ukuliva. Yafundisisa namaNgqina kaYehova ibe ihamba imizuzu engama-90 xa isiya kwiintlanganiso naxa ibuya, nangona intsapho yayo echasileyo ngokufuthi yayiyitshixela ngaphandle xa ibuya. Xa yayineminyaka eli-13 ubudala, yaqalisa ukushumayela kwindlu ngendlu, ibe intsapho yakowayo yaqinisa ukuchasa. Ngenye imini izalamane zayibopha izandla neenyawo zaza zayilalisa elangeni elaligqats’ ubhobhoyi iiyure ezisixhenxe, zimane ziyigalela ngamanzi angcolileyo. Zayibetha kanobom, ziyityhaphaza elinye iliso, zaza ekugqibeleni zayigxotha ekhaya. Noko ke, yafumana umsebenzi esibhedlele yaza ekugqibeleni yaphumelela ekubeni ngumongikazi. Xa yayineminyaka engama-20 ubudala yabhaptizwa yaza kwangoko yabhalisa njengovulindlela ongumncedani. Ichukumisekile yingqibelelo yayo, intsapho yakowayo iyamkele ekhaya kwakhona, yaye abasithoba kuyo bamkele izifundo zeBhayibhile zamakhaya.

¹³ UEntellia wakhuthazwa kakhulu yiNdumiso 116, ngokukodwa Nd 116 indinyana 1-4, aye wayifunda izihlandlo ezininzi: “Ndiyamthanda, ngokuba uYehova eliva ilizwi lam, ukutarhuzisa kwam. Ngokuba endithobele indlebe yakhe, ndiya kumnqula ngemihla yam yonke. Izintya zokufa zandijikela, iingxingongo zelabafileyo zandifumana, ndafunyanwa ziimbandezelo nesingqala. Ndanqula ke igama likaYehova, ndathi, Yehova, ndiya kukhunga, siza umphefumlo wam!” UYehova uyayiphendula imithandazo enjalo!

14. AmaNgqina asePoland ayibonise njani ingqibelelo ebalaseleyo?

¹⁴ Ngokufanayo nangomhla kaYesu, ngokufuthi uSathana usebenzise impambano yonqulo ukuze aphembelele intshutshiso—kodwa akaphumelelanga. Umzekelo wabazalwana bethu basePoland ubalasele, njengokuba uchazwe kwi-1994 Yearbook of Jehovah’s Witnesses. Kwanolutsha kwafuneka luzingqine lungabagcini bengqibelelo. Ngowe-1946 omnye oselula onjalo yayiyintombazana eyayineminyaka eli-15 ubudala eyaxelelwa oku: “Yenza nje kuphela umqondiso wamaKatolika womnqamlezo. Kungenjalo uza kudibana nembumbulu!” Igcine ingqibelelo, yarhuqelwa ehlathini, yathuthunjiswa ngokumanyumnyezi, yaza yadutyulwa.—Thelekisa uMateyu 4:9, 10.

Amanye Amacebo Obuqili KaSathana

15, 16. (a) Yiyiphi inkqubo kaSathana yobudemon, ibe sinokumxhathisa njani? (b) Kutheni kungeyomfuneko ukuba abantu bethu abaselula bakhubeke?

¹⁵ Inkqubo kaSathana yobudemon ithi “lawula okanye utshabalalise”! Uxhobe waf’ amacala ngezixhobo ezininzi eziyingozi. Akumangalisi ke ngoko ukuba umpostile uPawulos alumkise athi: “Umzamo wethu asingowokuzamana negazi nenyama; ngowokuzamana nazo izilawuli, nawo amagunya, nazo iziphatha-hlabathi zobumnyama balo eli phakade, nayo imikhosi yomoya abakhohlakeleyo kwezasezulwini iindawo. Ngenxa yoko, qubulani sonke isikrweqe sikaThixo; ukuze nibe nako ukuchasa ngomhla ombi, nithi nikufezile konke, nime nimi.” (Efese 6:12, 13) Ukunqwenela izinto eziphathekayo, ukuzonwabisa okuthoba isidima nenkcazelo yobuxoki, umculo onobusathana, ingcinezelo yoontanga esikolweni, ukusebenzisa kakubi iziyobisi, nokunxila—nayiphi na kwezi inokubonakalisa ubomi bethu. Ngenxa yoko, umpostile uhlabela mgama aluleke athi: “Ngaphezu kwezo zinto zonke, qubulani ikhaka lokholo, lona nothi ngalo nibe nako ukuzicima zonke iintolo ezinomlilo zakhe ongendawo.”—Efese 6:16.

¹⁶ Oku kubonakala kuyimfuneko ngokukhethekileyo namhlanje ngenxa yomculo owothusayo uSathana azalise eli hlabathi ngawo. Kwiimeko ezithile unxulumene ngqo nobuSathana. Ingxelo yeofisi yengqonyela yamapolisa kwiNqila yaseSan Diego (U.S.A.) ithi: “Apha bekukho ikonsathi apho iqela lomculo beliculisa abantwana abali-15 000 iculo elinegama elithi ‘Natas’—elithi Satan xa libhalwe ukususela ekugqibeleni.” UbuSathana buchazwa njengomngxuma ulutsha olukhubeka luwele kuwo “ngenxa yokuba belubhadula lungazi ukuba maluye phi, lunomsindo yaye lulodwa.” Nina lutsha olusebandleni lamaKristu, akuyomfuneko ukuba nikhubeke! UYehova unilungiselela izixhobo zokomoya iintolo zikaSathana ezingasayi kuze zigqobhoze kuzo.—INdumiso 16:8, 9.

17. Ukudandatheka ngokweemvakalelo kunokoyiswa njani?

¹⁷ Iintolo ezinomlilo zikaSathana zenzelwe ukufikelela iimvakalelo. Lusebenzisa iingcinezelo zobomi, ezinjengokugula emzimbeni okanye udandatheko olugqithiseleyo, utshaba lwethu lusenokubangela abathile bazive bengento yanto. Ubani usenokudimazeka ngenxa yokuba engakwazi ukuchitha iiyure ezininzi enkonzweni kaThixo okanye ngenxa yokuphoswa zezinye zeentlanganiso zebandla. Inyameko enothando yabadala nabanye abazalwana noodade abanobubele isenokuba luncedo ekoyiseni uxinezeleko olunzima. Hlala ukhumbula ukuba uYehova uyabathanda abakhonzi bakhe abathembekileyo. (1 Yohane 4:16, 19) INdumiso 55:22 ithi: “Umthwalo wakho wulahlele kuYehova; yena wokuzimasa; akayi kuliyekela ilungisa lishukunyiswe naphakade.”

18. Ngawaphi amaqhinga kaSathana abathile abamele balwe nawo?

¹⁸ “Amaqhinga” kaSathana obuqili kutshanje abonakele ngenye indlela. Kumazwe athile abantu abadala abaninzi baye bafikelwa ziingcinga ezidlulisela ingcamango yokuba ngoxa babengabantwana baxhatshazwa ngamahlelo obusathana. Zivela phi ezo ngcamango? Phezu kwalo nje uphando olubanzi, iimbono zeengcali zehlabathi zahluka kakhulu. Bambi bazigqala iingcinga ezinjalo njengeenkumbulo zezinto ezenzeka ngokwenene, abanye bazigqala njengentelekelelo—mhlawumbi ebangelwa lunyango oluthandabuzekayo—yaye abanye bazigqala njengemibono ebangelwa zizinto ezenzeka ebuntwaneni.

19. (a) Ziziphi iingcinga ekwafuneka uYobhi alwisane nazo? (b) Abadala banokuwulandela njani umzekelo kaElihu?

¹⁹ Kubangela umdla ukuba umkhonzi kaThixo uYobhi kwakufuneka alwisane “neengcinga eziphazamisayo” uSathana awayezidlulisela ngoElifazi noTsofare. (Yobhi 4:13-18; 20:2, 3, thelekisa iNW.) Ngaloo ndlela uYobhi ‘wakhathazeka,’ nto leyo eyambangela ‘wabhuda’ ‘ngezidandathekiso’ ezazithwaxa ingqondo yakhe. (Yobhi 6:2-4; 30:15, 16) UElihu ezolile wamphulaphula uYobhi waza ngokunyaniseka wamnceda wabona imbono kaYehova yobulumko ngemicimbi. Ngokufanayo namhlanje, abadala abaqondayo babonisa inyameko yabo kwababandezelekileyo ngokungongezeleli “ingcinezelo” (NW) kwabanjalo. Kunoko, njengoElihu, babaphulaphula ngomonde baze basebenzise ioli ethambisayo yeLizwi likaThixo. (Yobhi 33:1-3, 7; Yakobi 5:13-15) Ngaloo ndlela nabani na omvakalelo zakhe ziphazanyiswe ziinkxwaleko, enokuba zezokwenene okanye uyazicingela, okanye ‘owoyikiswa ngamaphupha nemibono’ njengokuba wayenjalo uYobhi, unokufumana intuthuzelo yeZibhalo ebandleni.—Yobhi 7:14; Yakobi 4:7.

20. AmaKristu adandathekileyo anokuncedwa njani alondoloze ulungelelwano lwawo lokomoya?

²⁰ Okwangoku umKristu unokuqiniseka ngokuba, ngandlel’ ithile, nguSathana obangela ezi ngcinga zimbi. Ukuba ebandleni kukho abathile ababandezeleke ngale ndlela, baya kuba benza ngobulumko ukujonga imibono enjalo eyoyikisayo njengelinge elingqalileyo likaSathana lokuphazamisa ulungelelwano lwabo lokomoya. Bafuna ukuxhaswa ngomonde nokuqonda okuvela eZibhalweni. Ngokuguqukela kuYehova ngomthandazo nangokungenelwa kuncedo lwabalusi bokomoya, abo babandezelekileyo baya kufumana amandla angaphezu kwaqhelekileyo. (Isaya 32:2; 2 Korinte 4:7, 8) Ngaloo ndlela baya kukwazi ukunyamezela ngokuthembeka baze bangavumeli iingcinga eziphazamisayo zichaphazele uxolo lwebandla. (Yakobi 3:17, 18) Ewe, baya kukwazi ukumchasa uMtyholi, bebonisa umoya ofanayo nalowo waboniswa nguYesu xa wathi: “Suka umke, Sathana.”—Mateyu 4:10; Yakobi 4:7.

21. IZibhalo zilumkisa njani ngeendlela zikaSathana zoboqhophololo?

²¹ Siyazi ukuba injongo kaSathana kukuba ngandlel’ ithile onakalise iingqondo zethu, njengokuba umpostile uPawulos kweyesi-2 kwabaseKorinte 11:3 walumkisayo: “Ndiyoyika ke, hleze kuthi, njengokuba inyoka yamlukuhlayo uEva ngobuqhetseba bayo, zonakaliswe ngokunjalo nani iingqiqo zenu, zimke ekunyaniseni kuye uKristu.” Ukonakala okukhoyo kwenyama yonke, okanye ibutho labantu elahlukanisiweyo noThixo kusikhumbuza impembelelo embi “yaBawisi” abonakeleyo ababengamabhastile anogonyamelo ngomhla kaNowa. (Genesis 6:4, 12, 13, umbhalo osemazantsi weNW; Luka 17:26) Ngoko ke, akumangalisi ukuba uSathana abhenele kwizenzo zobuqili neendlela zobuqhophololo ukuze akhuphe umsindo wakhe, ngokukodwa kubantu bakaThixo.—1 Petros 5:8; ISityhilelo 12:17.

22. Xa uSathana engasekho, sinokulindela ziphi iintsikelelo?

²² Aliveli nokuvela igama likaSathana kwizahluko zokugqibela zencwadi yeBhayibhile kaYobhi. Ucelomngeni lwakhe olungendawo lokuba abantu abanakuyigcina ingqibelelo kuThixo lungqinwe lububuxoki yingqibelelo kaYobhi. Ngokufanayo, kungentsuku zatywala xa “isihlwele esikhulu” sabagcini bengqibelelo ‘siphuma embandezelweni enkulu,’ uSathana uya kuphoswa enzonzobileni. Amadoda nabafazi bokholo, kuquka uYobhi othembekileyo, baya kuthelela eso “sihlwele esikhulu,” ekunandipheni iintsikelelo zeparadisi, ezizuke ngakumbi kunezo uYobhi wabuyekezwa ngazo!—ISityhilelo 7:9-17; 20:1-3, 11-13; Yobhi 14:13.

[Umbhalo osemazantsi]

Imibuzo Yempinda

◻ Nguwuphi umzekelo omhle wengqibelelo owamiselwa nguYobhi, uYesu noPawulos?

◻ Abagcini bengqibelelo bamelene njani noSathana?

◻ Ulutsha lunokuwaxhathisa njani amacebo kaSathana obuqili?

◻ Kunokwenziwa ntoni ukuze kuhlangatyezwane namaqhinga kaSathana?

[Umfanekiso okwiphepha 7]

E-Ethiopia, uMeswat noYoalan ngoku bakhonza uYehova ixesha elizeleyo bexelisa uyise, owabulawayo

[Umfanekiso okwiphepha 7]

UEntellia, umgcini wengqibelelo oselula kumantla eAfrika