Abantu Abaselula Bayabuza
Ndinokuyiphucula Njani Imithandazo Yam?
“Xa uxakeke gqitha ngumsebenzi wesikolo, wempangelo, ngabahlobo nentsapho, maxa wambi uyalibala ngoyena mntu ubalulekileyo—uThixo.”—UFaviola, oneminyaka eli-15 ubudala, eUnited States.
“THANDAZANI ngokungapheziyo.” (1 Tesalonika 5:17) “Emthandazweni zingisani.” (Roma 12:12) “Zaziseni izibongozo zenu kuThixo.” (Filipi 4:6) Ukuba ungumKristu, kusenokwenzeka ukuba uzazi kakuhle ezo zibhalo. Kusenokwenzeka ukuba uyaqonda nokuba umthandazo yeyona ndlela imangalisayo yokuncokola. Khawucinge nje ngoku—nanini na, emini okanye ebusuku, unokuthetha noThixo uSomandla! IBhayibhile ithi: “Uyasiva.”a—1 Yohane 5:14.
Sekunjalo, njengoselula okhankanywe ngasentla, unokukufumanisa kunzima ukuthandaza. Ukuba kunjalo, yintoni onokuyenza? Eli nqaku liza kukunceda (1) uyazi ingxaki ebangela kungabi lula ukuthandaza, (2) ukuzenzela usukelo ngokuphathelele imithandazo yakho (3) nendlela onokuyicombulula ngayo loo ngxaki.
Okokuqala yazi ingxaki. Yintoni ebangela kube nzima ukuthandaza? Bhala impendulo yakho ngezantsi.
․․․․․
Inyathelo elilandelayo kukuzenzela usukelo. Ngezantsi, phawula usukelo onokuzibekela lona okanye ulubhale kwindawo ethi “Olunye”
□ Ndingathanda ukuthandaza rhoqo.
□ Ndingathanda ukungaphindaphindi into enye xa ndithandaza.
□ Ndingathanda ukuthandaza ngokusuka entliziyweni.
□ Olunye ․․․․․
Ukucombulula Ingxaki
Umthandazo ufana nocango ongaluvula nanini na. Kodwa ke, ulutsha oluninzi luthi aluwuvuli ngokuthe rhoqo nangokulula loo mnyango. Ukuba kunjalo nakuwe, unganikezeli! Sele uyibonile ingxaki waza wazibekela usukelo. Ngoku kufuneka ufumane isitshixo ukuze uvule loo mnyango. Nazi iingxaki onokujamelana nazo, kwakunye nezinto onokuzenza ukuze uzicombulule.
◼ Ingxaki: UKULIBALA. “Maxa wambi ngenxa yokuxakeka gqitha, uyalibala ukuthandaza.”—UPreeti, oneminyaka engama-20 ubudala, eBritani.
Isicombululo: “Hlalani nikuphaphele ngokungqongqo ukuba indlela enihamba ngayo ingabi njengeyabantu abangezozilumko kodwa ibe njengeyezilumko, nizongele ixesha, ngenxa yokuba imihla ingendawo.”—Efese 5:15, 16.
Icebiso: Kusengaphambili, khetha ixesha oza kuthandaza ngalo suku ngalunye. Usenokude ulibhale phantsi, kanye njengokuba ulibhala phantsi ixesha ofanele ulikhumbule. UYoshiko oneminyaka eli-18 ubudala ohlala eJapan uthi: “Ukuba andizibekeli ixesha lokuthandaza, ndixakeka gqitha zezinye izinto.”
◼ Ingxaki: IZIPHAZAMISO. “Andikwazi ukunikela ingqalelo koko ndikuthethayo xa ingqondo yam izula.”—UPamela, oneminyaka eli-17 ubudala, eMexico.
Isicombululo: “Umlomo uthetha ngokuphuphuma kwentliziyo.”—Mateyu 12:34.
Icebiso: Ukuba ingqondo yakho iyabhadula njengoko uthandaza, zama ukwenza imithandazo emifutshane—de ukwazi ukunikela ingqalelo. Elinye icebiso: Thandazela izinto ezibalulekileyo kuwe. UMarina oneminyaka eli-14 ubudala, ohlala eRashiya uthi: “Xa ndandikwishumi elivisayo, ndaqonda ukuba xa sithandaza sincokola noThixo. Oku kwandenza ndakwazi ukuveza iingcinga neemvakalelo zam emthandazweni.”
◼ Ingxaki: UKUPHINDAPHINDA INTO ENYE. “Xa ndithandaza ndiphindaphinda into enye.”—UDupe, oneminyaka eli-17 ubudala, eBenin.
Isicombululo: “Ngokuqinisekileyo ndiya kucamngca ngayo yonke imisebenzi yakho, ndizixhalabise ngezenzo zakho.”—INdumiso 77:12.
Icebiso: Ukuba imithandazo yakho ayinantsingiselo, suku ngalunye bhala phantsi intsikelelo enye oyifumeneyo. Wandule ubulele uYehova ngaloo ntsikelelo. Kwenze oku kangangeveki, yaye uya kube sele uthandazele izinto ezisixhenxe ezahlukahlukeneyo. Oku unokukwenza nakwizinto ozenza mihla le. UBruno oneminyaka engama-21 ubudala, ohlala eBrazil, uthi: “Xa ndithandaza ndiye ndizame ukuthetha ngezinto ezenzeke ngolo suku.” USamantha, oneminyaka eli-18 ubudala, ohlala eUnited States naye wenza okufanayo. Uthi: “Ndizama ukukhumbula yonke into eyenzeke namhlanje eyahlukileyo kwezinye iintsuku, ndize ndithandaze ngezo zinto. Oku kuyandinceda ndingaphindaphindi into enye xa ndithandaza.”b
◼ Ingxaki: UKUTHANDABUZA. “Ndakhe ndathandazela ingxaki endandinayo esikolweni, kodwa ayizange iphele. Eneneni, kwavela iingxaki ezingakumbi. Ndaqiqa ngelithi, “Ndisathandazela ntoni? UYehova akandiphulaphuli!”—UMinori, oneminyaka eli-15 ubudala, eJapan.
Isicombululo: “Kunye nesihendo eso [uYehova uThixo] uya kwenza nendlela yokuphuma ukuze nikwazi ukusinyamezela.”—1 Korinte 10:13.
Icebiso: Into esiqiniseke ngayo kukuba uYehova ‘nguMphulaphuli wemithandazo.’ (INdumiso 65:2) Ngoko emva kokuthandaza ngaloo mbandela, yiqonde imeko okuyo. Kunokuba ulindele impendulo oyifunayo, khangela enye impendulo mhlawumbi esele ifikile. Isibakala sokuba usanyamezele njengomKristu oku kunokuthetha ukuba uYehova sele ewuphendulile umthandazo wakho—kungekhona ngokuphelisa loo ngxaki kodwa ngokukunika amandla ukuze ukwazi ukuyinyamezela.—Filipi 4:13.
◼ Ingxaki: IINTLONI. “Ndiba neentloni xa ndicinga ngoko kuza kuthethwa ngabantwana endifunda nabo xa bendibona ndithandaza ngaphambi kokuba nditye isidlo sasemini.”—UHikaru, oneminyaka eli-17 ubudala, eJapan.
Isicombululo: “Yonke into inexesha layo”—INtshumayeli 3:1.
Icebiso: Ngoxa abantu benokukhuthazeka xa bekubona uthandaza, akukho mfuneko ukucel’ injezu ebantwini. Ngokomzekelo, uNehemiya wenza umthandazo entliziyweni phambi kukaKumkani uArtashashta, yaye akukho ngxelo ebonisa ukuba lo kumkani wayembona ukuba uNehemiya uyathandaza. (Nehemiya 2:1-5) Nawe unokuthandaza entliziyweni xa uthetha noYehova ngaphandle kokunikela ingqalelo engakumbi kwisiqu sakho.—Filipi 4:5.
◼ Ingxaki: UKUZIVA UNGAFANELEKANGA. “UYehova sele ezazi iingxaki zam. Yaye xa ndingakwazi ukumelana nazo, ndivakalelwa kukuba naye sele ekwazi oko! Maxa wambi ndiziva ndingafanelekanga ukuthandaza kuye.”—UElizabeth, oneminyaka engama-20 ubudala, eIreland.
Isicombululo: “Liphoseni [kuThixo] lonke ixhala lenu, kuba unikhathalele.”—1 Petros 5:7.
Icebiso: Xa usenza ufundisiso lobuqu, yenza uphando uze ucamngce ngezi zibhalo zilandelayo: Luka 12:6, 7; Yohane 6:44; Hebhere 4:16; 6:10; 2 Petros 3:9. Ezi ndinyana ziza kunceda uqonde ukuba uYehova ufuna ukuva imithandazo yakho kungakhathaliseki enoba awomelelanga kangako ngokomoya. Umdumisi uDavide—naye owayeneengxaki—ngentembelo wathi “uYehova usondele kwabo baphuke intliziyo; yaye abo bamoya utyumkileyo uyabasindisa.”c—INdumiso 34:18.
Isibakala sokuba uYehova uyayiphulaphula imithandazo yakho sibonisa ukuba unomdla kuwe. UNicole, oneminyaka eli-17 ubudala ohlala eItali, uthi: “UYehova akaceli iingelosi ukuba ziphulaphule imithandazo yethu. Ngokuqinisekileyo, ekubeni eyiphulaphula ngokwakhe imithandazo yethu, uyigqala njengebalulekileyo.”
Amanye amanqaku athi “Abantu Abaselula Bayabuza” afumaneka kwiWeb site ethi www.watchtower.org/ype
[Imibhalo esemazantsi]
a UMdali akaxhomekekanga kumaza omoya ukuze eve, uyakwazi ukuyiva imithandazo esentliziyweni.—INdumiso 19:14.
b Funda inqaku elithi “Imbono Yebhayibhile: UThixo Ukujonga Njani Ukusetyenziswa Kwezinto Zonqulo?” kwiphepha 18.
c Ukuba uvakalelwa kukuba imithandazo yakho ayiphulaphulwa ngenxa yesono esinzulu osenzileyo, thetha nabazali bakho. Kwakhona, ‘biza amadoda amakhulu ebandla [ukuze akuncede].” (Yakobi 5:14) Abadala banokukunceda ube nolwalamano oluhle noThixo.
OMELE UCINGE NGAKO
◼ Ziziphi izinto ezibalulekileyo kuYehova onokuzithandazela?
◼ Ziziphi izinto onokuzithandazela kuYehova ezikhathaza abanye?
[Ibhokisi/Imifanekiso ekwiphepha 28]
OKO KUTHETHWA NGOONTANGA BAKHO
“Umthandazo ufana nokubhala indlela ovakalelwa ngayo kwidayari efundwa nguwe noYehova kuphela.”—UOlayinka, eNigeria.
“Masithi unomhlobo osenyongweni yaye loo mhlobo umphe izipho ezininzi. Kwandule ke ngolunye usuku loo mhlobo ayeke ukuthetha nawe. UYehova uvakalelwa ngaloo ndlela xa uyeka ukuthandaza.”—UChinta, eOstreliya.
“Ndandisoloko ndicinga ukuba kuphosakele ukutyhila iimvakalelo zam. Ukuthandaza kwandinceda ndabona ukuba kufanelekile ukonwaba nokudakumba, nokudideka uze uxelele uYehova indlela ovakalelwa ngayo. Ngoku ndiyakwazi ukusingatha iimvakalelo zam ngendlela efanelekileyo.”—UAmber, eUnited States.
[Umfanekiso okwiphepha 27]
Xa kubonakala ngathi umnyango womthandazo uvalekile, sebenzisa isitshixo esiliLizwi likaThixo, iBhayibhile