Abo Bahlala Emiqolombeni Kule Mihla
NGUMBHALELI KAVUKANI! ELESOTHO
NGABA bakho abantu abahlala emiqolombeni kumhla wethu? Siye safumana abanye eLesotho, ubukumkani obusezintabeni kumazantsi eAfrika. Ilali yabo, iHa Kome, ikwisithuba seekhilomitha ezingama-60 ukusuka eMaseru, idolophu elikomkhulu yaseLesotho, emazantsi eeNtaba ezinkulu zaseMaluti. Ngeenyanga zehlobo, ezi ntaba zidla ngokugqunywa ziintyatyambo ezibomvu eziqaqambileyo. Njengoko ngokuqhelekileyo kusithiwa ziired-hot pokers [iKniphofia caulenses], ezi ntyatyambo zintle zifanelana kakuhle nohlaza lwaloo ndawo.
Apha iintsapho ezininzi zisaphila ngendlela ekwakuphilwa ngayo kwiinkulungwane ezidluleyo. Eneneni zakha izindlu zazo ngaphakathi emiqolombeni ekwezo ntaba. Udonga olungqingqwa lwangaphambili lwenziwe ngezinti nezinye izinto ezifana neengcongolo. Olu donga lugqunywa ngomxube wodaka nobulongwe. Lo mxube ukhusela kubusika obubandayo baseLesotho, apho ubushushu buhamba buye kutsho ngaphantsi kweqondo lokukhenkceka. Ngaphakathi kukho indawo ethande ukutshona emgangathweni ebizwa ngokuba yi-ifo, gama elo elithetha “iziko,” elibangela ubushushu xa kubanda.
Uphahla, udonga lwangasemva neendonga ezisemacaleni ngokuqhelekileyo zonke zenziwa lilitye lomqolomba. Nakuzo kufakwa udaka nobulongwe, yaye nyaka ngamnye ziyahlaziywa. Oku kufaka umbala kuze kuthambise ilitye. Izikhumba zenkomo zisetyenziselwa ukuhombisa ngaphakathi kuphinde kwenziwe oomandlalo bokulala kwangazo.
Undwendwe lwaseNtshona luya kufumanisa indlela yobomi engokwesithethe nehlaziya ngendlela eyahlukileyo. Ngokuqhelekileyo kunxitywa iingubo ezimibalabala neminqwazi etsolo eyenziwe ngengca. Ngokufuthi uya kubona amakhwenkwe angabelusi ahamba ngeenyawo esalusa imihlambi yawo. Uya kubona amadoda elali esebenza kumasimi ombona okanye esidl’ imbadu namanye amadoda.
Maxa wambi uya kubona nezinto zobugcisa bala maxesha. Ukubonakala kwenqwelo-ntaka maxa wambi neenqwelo-mafutha ezitsala ngaw’ omane ezithwele abakhenkethi kuyinto ethandwa kakhulu ngabancinane nabakhulu kule lali. Ubukhulu becala kuphekelwa phandle ngeembiza ezimnyama zentsimbi ezimilenze mithathu ezibekwa emlilweni. Ngenxa yokunqaba kweenkuni, kubaswa ngobulongwe benkomo obomileyo, iingcongolo, neentsasa. Izixhobo zasekhaya ezixhaphakileyo kwezi zindlu zisemqolombeni ziquka ilitye lokuguba lakudala elicola umbona nomthi wokubonda isidudu.
ILesotho idume ngemizobo yabaThwa, efumaneka kwimiqolomba eyahlukeneyo nasematyeni akulo lonke elo. AbaThwa baba ngabokuqala ukuhlala kwimiqolomba yaseHa Kome. Imizobo yabo ibonisa imisebenzi emininzi, ukususela ekulobeni kusetyenziswa amaphenyane neminatha ukuya kutsho kwimidaniso emikhulu apho bonke abo bayenzayo bebonakala benxibe izigqubuthelo zobuso ezibenza babengathi zizilwanyana. Le mizobo ikwabonisa nezilwanyana, ezinjengeemfene, iingonyama, iimvubu, nempofu, eyeyona nyamakazi inkulu. Uninzi lwemizobo ekwimiqolomba yaseHa Kome iye yacimeka. Sekusele nje imizila ebonisa ubuchule bokuzoba babaThwa.
Kukho iqela lamaNgqina kaYehova elenza umsebenzi wokushumayela kummandla ongekude eHa Kome. Maxa wambi bayabatyelela aba bantu bahlala emiqolombeni. La maNgqina asoloko esamkelwa ngokuphakelwa isidudu sasekuhlaleni esibizwa ngokuba yimotoho. Abaninzi eHa Kome balwamkela ngomdla uncwadi lweBhayibhile. Basoloko bebonisa uxabiso ngolu ncwadi ngokunikela ngemifuno, amaqanda, okanye ngezinye nje izinto ezinjengeminikelo eya kumsebenzi wamaNgqina wokufundisa.
Abo bahlala emiqolombeni kule mihla banoxabiso olunzulu ngeBhayibhile yaye bayathanda ukubuza imibuzo emininzi ephathelele ubomi, ukufa neenkolelo zabo ezingokwesithethe. Umsebenzi wamaNgqina anenzondelelo kuloo mmandla uye waphumela ekuqhutyweni kwezifundo zeBhayibhile eziliqela. Ngale ndlela, imbewu yenyaniso iye yafumana umhlaba ochumileyo ezintliziyweni zaba bantu bathobekileyo.—Mateyu 13:8.
[Imaphu ekwiphepha 26]
(Ukuba ufuna inkcazelo ehlahlelwe kakuhle, yiya kwimpapasho)
IHA KOME