Taratasy faharoe nisoratin’i Petera
1 Zaho Simona Petera, mpanompo sady apôstôlin’i Jesosy Kristy, manoratra taratasy ty amindrô olo aby nahazo fampianaran̈a marin̈y sady valera* mare karaha lay nazonay. Atsika jiaby nahazo raha zen̈y, fôtony Zan̈aharintsika io marin̈y, ary karaha zen̈y koa Jesosy Kristy Mpan̈avotro atsika.
2 Irarian̈a ho be ankitin̈y hatsaram-pan̈ahy miavaka* haboakan’ny Zan̈ahary aminarô ndreky fiadanan̈a hamezany anarô, fôtony hainarô tsarabe Zan̈ahary ndreky Jesosy Tômpontsika. 3 Angôvon’ny Zan̈ahary bakà nan̈amia atsika* raha jiaby nilaintsika misy hahavitantsika manompo Izy.* Ia, baka amin’ny angôvo io nahaizantsika ny marin̈y momba Zan̈ahary, tsy azôvy zen̈y fa Araiky nikaiky atsika. Izy be voninahitry sady tsara toetry. 4 Baka amindrô raha aby io nan̈amezany atsika* fampan̈antinan̈a valera mare sady ten̈a maventy, amy zen̈y baka amy fampan̈antinan̈a aby io hahavy anarô hanjary fan̈ahy karaha Zan̈ahary. Nan̈ano zen̈y izy, fôtony anarô niala tamy raha tsy manjary fataon’olo amy donia ty. Irô olo aby io bakà manan̈a fan̈irian̈a ratsy.
5 Ke nohon’izen̈y, ataova zay raha vitanarô amy zen̈y anarô hanan̈a finoan̈a fo, han̈ano raha tsara fo,* tsy vôly hampitombo fahaizanarô ny marin̈y,* 6 hahafehy ten̈a fo, hiaritry fo, tsy hivadiky amy Zan̈ahary foeky,* 7 tsy vôly hankatia rahalahy jiaby, aviô hifen̈y fo ho tia olo jiaby. 8 Izikoa bakà anarô mifen̈y mare hanan̈a irô toetry aby io sady hanan̈a irô io maro, anarô han̈ano raha mifan̈araka amy fahaizanarô ny marin̈y momba Jesosy Kristy Tômpontsika io, ke anarô hamokatra fa tsy hipetrapetraka.
9 Olo araiky tsy manan̈a irô toetry aby io mira olo gila, fôtony izy man̈apỳ maso baka tsy hahita hazavan̈a,* aviô nadin̈any fa izy efa nidiovin̈y nafaka tamy fahotan̈anany taloha. 10 Ke anarô rahalahy aby, mifen̈a han̈ano erakan’ny vitanarô, amy zen̈y anarô tsy hivadiky fa ho an̈isan’olo nikahian’ny Zan̈ahary sady nifidìny fo. Izikoa bakà anarô mifen̈y man̈ano raha aby zen̈y, tsisy andra hampalavo anarô. 11 Ia, ho be ankitin̈y hatsaran̈a ho azonarô, ke anarô hambela hidriky amy Fanjakan̈an’i Jesosy Kristy Tômpontsika sady Mpan̈avotro atsika. Fanjakan̈anany io maharitry mandrakizay.
12 Zen̈y mahavy zaho vôn̈ono fo hampatsiaro anarô raha aby zen̈y, ndray anarô efa mahay irô io sady efa miôrin̈y tsarabe amy fahamarin̈ana nianaranarô. 13 Ary izikoa zaho mbala an̈atin’ny tran̈olay* ty fo, zaho tsy vôly hampatsiaro anarô raha aby zen̈y, fôtony raha zen̈y adidinaka. 14 Haiko bakà fa tran̈olainaka ty efa tsy ho ela hadoso, eraka raha efa nambaran’i Jesosy Kristy Tômpontsika mazava tsarabe taminaka. 15 Ke zaho tsy vôly han̈ano zay raha azoko atao misy hampatsiaraovan̈a anarô, amy zen̈y ndray zaho efa tsy iô, ho azonarô onon̈o fo raha aby zen̈y.
16 Anarô nikoran̈anay momba angôvon’i Jesosy Kristy Tômpontsika ndreky momba fimpodianany. Ary tsy baka tamy tantara tsy marin̈y niforôn̈iny tan-kafitsian̈a nangalanay hevitry momba raha nambaranay, fa zahay tômpin’ain̈y foeky nahita maso voninahitrinany. 17 Izy bakà namezan’ny Zan̈ahary Babantsika haja ndreky voninahitry, tamy Zan̈ahary be voninahitry io nivolan̈a taminany karaha ty: “Io Zanako, tiako mare izy, sady ten̈a mamparavoravo zaho raha ataony.” 18 Ia, zahay naharen̈y irô volan̈a baka tan-dan̈itry aby io, tamy zahay niaraka taminany tamy bongo masin̈y tan̈y.
19 Ke atsika mahaimatoky fo fa ho tanteraka aby faminanian̈a jiaby efa nambaran’ny Zan̈ahary. Mila dinihinarô tsarabe raha aby zen̈y, karaha atao mandiniky lalampon̈o mirehitry amy tany mahiziky in̈y, tsy aia zen̈y fa an̈atin’ny fônarô ao, parapikiahan’ny andra ndreky parapiboahan’ny lakintambe.* 20 Hainarô tsarabe bakà fa, tsisy natà araiky amy faminanian̈a aby amy Soratra Masin̈y ao baka amin’ny hevitrin’olombelon̈o. 21 Fôtony tsiary ndraiky nisy faminanian̈a baka tamy sitrapôn’olombelon̈o, fa fan̈ahy masin̈y nitariky* irô ke nahavy irô nan̈ambara volan̈a baka tamy Zan̈ahary.