Taratasy faharoe nisoratin’i Petera
2 Tamy vahoakan’Israely tan̈y nisy mpaminan̈y sandoko, ary karaha zen̈y koa fa ho hisy mpampianatra sandoko koa aminarô ao. Irô io hisitrisitriky hanangana antokom-pinoan̈a* mampisaratsaraka.* Ho sakindrô foeky tsy han̈eky araiky* nankafaka irô, ke zen̈y hahavy irô ho ripaka, ary malaky koa. 2 Sôsoko zen̈y, maro olo hangala tahaka irô ke tsy ho men̈atra foeky han̈ano raha tsy manjary.* Baka amy raha ataondrô zen̈y hahavy olo hankaratsy lalan̈an’ny fahamarin̈ana. 3 Irô io tsy mety afa-pô, ke irô hampiasa fitaka misy han̈araraotan̈a anarô. Kanefa, efa tapaka letry ela andra han̈asazian̈a irô sady izio tsy ho tara, baka iô irô tsy maintsy haripaka.
4 Tsy nirekireky foeky Zan̈ahary nan̈asazy irô anjely nanota aby in̈y, ke irô natsipiny tan̈atin’ny Tartara.* Ao irô nigadrainy an̈atin’ny hiziky mare,* sady miambin̈y fitsaran̈a irô. 5 Aviô koa, izy tsy nisalasala foeky nan̈asazy donia araiky taloha tan̈y, fa izy niaro Noa, tsy azôvy zen̈y fa araiky nitory momba fahamarin̈ana, ndreky olo fito hafa koa, tamin’izy nandefa safodrano nandravan̈ana donia araiky feno olo tsy navozo Zan̈ahary. 6 Nisaziany koa olo tamy tanànan’i Sodoma ndreky Gomora. Ia, nandatsahany môtro tanàna aby io, ke jôfo foeky tavela. Raha zen̈y nataony hampitandreman̈a lan̈iany olo tsy mavozo* Zan̈ahary, misy hahaizandrô raha miambin̈y irô amin’ny hoavy. 7 Nan̈avotro Lota koa izy. Izio olo marin̈y. Lota io nalahelo mare nahita fa irô olo aby tamy tanàna io tao ratsy fan̈ahy sady ratsy fitondran-ten̈a.* 8 Lelahy marin̈y io bakà niaraka niain̈y tamindrô olo ratsy fan̈ahy be aby io, aviô hitany sady ren̈iny raha nataondrô, ke isan’andra izy nalahelo mare sady nijaly jery. 9 Hitantsika baka amy zen̈y fa, Jehovah mahay man̈avotro olo tsy mivadiky aminany amy fitsapan̈a mahazo irô. Hainy koa manaokan̈a olo tsy marin̈y amy zen̈y irô io haripaka amin’andra fitsaran̈a, 10 intsaka eky fa olo tsy man̈aja olo manan̈a fahifan̈a, ndreky mitady handoto nôfotron’olo hafa.*
Irô masaky raha tsy sakin’olo salakady be mokon-doha, ke irô tsy mavozo foeky mankaratsy irô olo manan̈a voninahitry aby io.* 11 Kanefa ndray anjely aby io mahery salakady matanjaka mare mandilatra olombelon̈o, irô io tsy man̈ameloko ndreky tsy manihitihy irô mpampianatra sandoko aby io, fôtony irô anjely aby io man̈aja* Jehovah. 12 Irô olo aby io karaha biby tsy mandiniky, bikoan’ny fan̈irian̈andrô, sady teraka baka hisambôrin̈y ndreky hivonen̈a, ke raha tsy haindrô aby hankaratsiandrô. Irô io ho ripaka, fôtony irô man̈ano raha tsy manjary. 13 Irô hisazian̈a nohon’ny raha ratsy ataondrô.
Ravoravo irô mihinan̈a, ndreky migiaka, aviô man̈eram-pô mandavỳ, ndray amin’andra matsan̈a lahy be in̈y. Irô io karaha tasy ndreky loto mandoto fiangonan̈a, aviô lera irô man̈ano fety miaraka aminarô, ravoravo irô mampianatra raha diso misy hamitahan̈a anarô. 14 Irô raha miasa tihandiadia vady fo,* aviô tsy vitandrô foeky tsy hanota zen̈y. Tsy basin’izen̈y fa mbala tahômindrô han̈ano karaha irô koa irô olo malemy finoan̈a* aby io. Irô* tsy mety afa-pô fa mbala tihan̈ano raha ratsy fo. Irô io voaozon̈o. 15 Irô niala tamy lalan̈a mahitsy, ke irô very lalan̈a. Irô nan̈ara-dia* mpaminan̈y Balama, zanakan’i Beora. Balama io tia nahazo karama baka tamy fan̈anaovan̈a raha tsy marin̈y. 16 Izy nanarin̈y fôtony tsy pare raha nataony. Ndraiky nivolan̈a* foeky borìky nitingenin’ny mpaminan̈y io, misy hanakanan̈a izy tsy han̈ano halifahan̈a tseky hataony.
17 Irô olo aby io karaha lohatany ritry ndreky zavon̈o tsofin’ny tsiko maresaka in̈y. Hiziky gomon̈o raha miambin̈y irô. 18 Karaha matomboko mare volan̈a aboakandrô, kanefa tsisy dikany aby. Irô mitady hitaon̈o irô olo aby vo tsy ela nisaraka tamin’olo man̈ano raha ratsy, ke ataondrô raha hahavy irô olo aby io han̈eram-pô amy fan̈irian̈a ratsin’ny nôfotro.* Aviô irô tsy men̈atra foeky man̈ano raha tsy manjary. 19 Irô mampan̈anten̈a fa irô hankafaka irô olo aby io, kanefa ndray irô tompon’ain̈y fo andevon’ny fahalotoan̈a. Andevon’araiky* maharesy izy bakà araiky resy. 20 Izikoa misy olo niala tamy fahalotoan̈an’ny donia ty, fôtony izy nanjary nahay tsarabe Jesosy Kristy Tômpontsika sady Mpan̈avotro atsika, kanefa izy baka iô mbala nimpody tamy raha efa nialany aby in̈y ke izy resindrô io, ho ratsiratsin’ny tamy voanalohany iafarany. 21 Sitrany aby izy tsy nahay ny marin̈y momba fahamarin̈ana,* tozay izy nahay izio kanefa miala amy didy namezan’ny Zan̈ahary izy.* 22 Tanteraka amindrô ankitin̈y raha volan̈in’ny ohabolan̈a ty: “Amboa nandoa mbala nimpody nihinan̈a loanany ndraiky koa, aviô komankory* efa nampisehan̈a mbala nimpody nihôsi-gaodra ndraiky koa.”