Taratasy faharoe nisoratin’i Petera
3 Rahalahy ndreky ranabavy tiako aby, ty taratasy faharoe nisoratiko aminarô, ary karaha tamin’ny araiky voanalohany in̈y, zaho mampatsiaro anarô raha efa hainarô amy zen̈y anarô hahay handiniky tsarabe. 2 Amy zen̈y koa ho azonarô onon̈o raha nambarandrô mpaminan̈y masin̈y aby io, ndreky didy nambarandrô apôstôly* aby io taminarô. Irô didy aby io baka tamy Tômponarô sady Mpan̈avotro anarô. 3 Ty antsendriky raha tsara hainarô: Amin’andra farany, hisy mpan̈adroadro han̈ano zay raha tsy manjary tiandrô hatao.* 4 Irô hivolan̈a: “Izy karaha efa nampan̈anten̈a fa izy mbala himpody. Ke aia fo ma izy? Vandy areriky! Rango tamy fotoan̈a nifatesandrô dadilahibentsika aby io, tsisy raha niova aby, fa raha jiaby mbala mitovy tsisy ny hafa tamy fotoan̈a namoraon̈ana donia ty.”
5 Kinia ataondrô sary tsy hay fa efa rango ela nisian’ny lan̈itry, aviô nisy tany koa niboaka baka tan̈aty rano sady nidôko tan̈ivon’izio tiô, nohon’ny beko namezan’ny Zan̈ahary. 6 Irô raha aby io nampiasain̈a nandripahan̈a olo tamy fotoan̈an’izen̈y,* tamy tany ty dobon-drano. 7 Ary mbala baka amy beko namezan’ny Zan̈ahary fo koa hahavy lan̈itry ndreky tany misy amy ziôty io handeha hiroan̈a. Zan̈ahary nanaokana irô io amin’andra hitsaran̈a ndreky handripahan̈a irô olo ratsy fan̈ahy aby io.
8 Kanefa ty raha tsy mila adin̈anarô, rahalahy ndreky ranabavy tiako aby: Andra araiky amy Jehovah karaha arivo taon̈o amin’olombelon̈o, aviô arivo taon̈o amin’olombelon̈o karaha andra araiky aminany. 9 Jehovah tsy ela man̈atanteraka raha nampan̈antin̈ainy, eraka fahitan’olo sasany izy, fa izy mahari-draha aminarô, fôtony tsisy olo tiany ho ripaka foeky, fa tiany hibebaka aby olo jiaby. 10 Andran’i Jehovah io ho avy mira mpangalatra. Amin’andra zen̈y, lan̈itry hanjavon̈o ke haresaka karaha feom-baratra* in̈y fanjavaon̈any. Ho ravan̈a aby raha efa may aby io, tsy ino zen̈y fa raha nahafôron̈o lan̈itry ndreky tany, ke tany ndreky asa jiaby amy zio habolain̈y.
11 Ke, fôtony raha jiaby io ho ravan̈a aby, diniha tsarabe man̈ano akôry fitondran-ten̈anarô ndreky ino raha tôkony hataonarô. Anarô tsy maintsy masin̈y, aviô tsy maintsy aboakanarô amy raha ataonarô fa anarô tsy mivadiky amy Zan̈ahary, 12 sady hiambin̈y ndreky tsy han̈adoso an̈atin’ny jery fa ho avy* andran’i Jehovah. Amin’andra zen̈y, lan̈itry hiravan̈iny amy môtro, baka iô raha jiaby amy zio himana nohon’ny hafanan̈a mare loatra. 13 Kanefa eraka raha nampan̈antin̈ainy, atsika miambin̈y lan̈itry vaovao ndreky tany vaovao hanjakan’ny fahamarin̈ana.
14 Ke, fôtony anarô miambin̈y raha aby zen̈y, rahalahy ndreky ranabavy tiako aby, ataova zay raha vitanarô amy zen̈y anarô hadio amason’ny Zan̈ahary, ndreky ho hitany fa tsisy tasy ndreky tsisy tsin̈iny, aviô mihavan̈a tsara aminany. 15 Baka iô, tsaraova fa faharetan̈an’ny Tômpontsika* io mitondra fan̈avaotan̈a. Mitovy amy zen̈y koa raha nisoratin’i Paoly rahalahy tiantsika in̈y taminarô, eraka fahendrena namezan’ny Zan̈ahary izy. 16 Izy bakà nikoran̈a momba raha aby zen̈y tan̈atin’ny taratasy jiaby nisoratiny. Kanefa, sarotro hay raha sasany voasoratra tamy taratasy aby io, ke irô io nivoàndrô olo tsy mahay raha* sady tsy miôrin̈y tsara aby io. Ary tsy raha aby io fo nivoàndrô, fa firaka amin’ny andininy hafa amy Soratra Masin̈y ao koa. Baka amy zen̈y hahavy irô ho ripaka.
17 Ke, fôtony efa hainarô tsialohaloha raha zen̈y, rahalahy ndreky ranabavy tiako aby, anarô mitandrema fo tsao anarô ho voataon̈ondrô olo mpandika lalàn̈a aby io han̈araka hevitrindrô. Izikoa zen̈y bakà ny raha misy, anarô hanjary tsy hiôrin̈y tsara amy finoan̈a eky. 18 Ataova fo raha hahavy Jesosy Kristy Tômpontsika sady Mpan̈avotro atsika hampitombo hatsaram-pan̈ahy miavaka haboakany amintsika, aviô ampitombosa fo raha efa hainarô momba izy. Irarian̈a izy hahazo voninahitry rango ziô firaka mandrakizay! Ameny.