FIZARAN̈A 8

Mialà amy Fivavahagna Diso, Magnaraha Fivavahagna Marigny

1. Mikasiky fivavahagna, ino raha tsy maintsy fidin’olo?

JESOSY nivolagna: “Lagniany tsy dia araiky aminakahy manohitry zaho.” (Matio 12:30) Dikan’izegny na atsika miaraka amy Jehovah, na amy Satana. Ankamaraozan’olo mieritreritry fa iken’ny Zagnahary fanompoagna ataony, kanaifa Baiboly mivolagna fa Satana “mamitaka tany jiaby misy olo.” (Apokalypsy 12:9) An-tapitrisany olo mino fa manompo Zagnahary, kanaifa raha taigna marigny, Satana Devoly tompoen-drô! Olo tsy maintsy mifidy: Na izy hanompo Jehovah “Zagnaharin’ny fahamarignana”, na Satana “Jaolahy amy vandy.”—Salamo 31:5; Jaona 8:44.

Mialà amy fivavahagna diso

2. Ino agnisan’ny faomba ampiasain’i Satana beky olo tsy hanompo Jehovah?

² Fanapahan-kevitry taigna tsara salakady hahazoagna rady amy Jehovah mifidy hanompo izy. Satana tsy faly amin’olo manompo Zagnahary, kay ataony raha ampanahiragna irô. Izy mandrisiky olo hagnadrohadro na hanohitry an-taigna, kay havagna ndraiky kamarady fo taigna ampiasainy amy zegny. Jesosy nampitandrigny karaha ty: “Havan’olo fo hanjary fahavalony.”—Matio 10:36.

3. Ino raha hataonao izikoa havanao na kamaradinao tsy tia anao manompo Zagnahary?

³ Akôry eky ataonao izikoa anao tôjy raha karaha zegny? Maro olo mahay fa diso fivavahagnanany, kanaifa tsy mety miala ao irô, fôtony mety mieritreritry fa mamadiky fianakaviagna izikoa magnano zegny. Mba mety edy eritreritry karaha zegny va? Izikoa hainao iziôty fa misy sasany amin-dry havanao marikitry mifima jamala, tsy hazavainao amin-drô fa ratsy raha ohanin-drô io? Tsy mety izikoa anao ndraiky handaiha hifima miaraka amin-drô, sa karakôry?

4. Ino raha nivolagnin’i Josoa tamin-drô Isiraelita mikasiky fivavahagna tamin’andra zegny?

⁴ Nirodognon’i Josoa hiala tamy fivavahagna diso ndraiky faomban-drazagna irô Israelita aby io. Izy nivolagna: “Iziô io, matahaora Jehovah, manompoa izy amy fahitsiagna ndraiky fahamarignana; aria zagnahary nitompoen’ny razagnanarô tandaforen’ny Jordana ndraiky ta Ejipta tagny, kaila manompoa Jehovah.” (Josoa 24:14) Josoa tsy nivadiky tamy Jehovah, kaila Jehovah nitahy izy. Jehovah mitahy atsika koa, izikoa atsika tsy mivadiky aminany.—2 Samoela 22:26.

Fampianaragna Marigny Ndraiky Diso

Zagnahary telo mitambatra araiky: Maro fivavahagna mampianatra fa Zagnahary io telo mitambatra araiky. Mivolagna irô fa “samy Zagnahary zegny na ny Baba, na ny Zanaka [Jesosy] na ny Fagnahy Masigny, kanaifa Zagnahary araiky fo fa tsy telo.”

Tsy hita agnaty Baiboly volagna “telo mitambatra araiky” zegny, sady tsisy fivolagnana koa ao fa Zagnahary “taokagna kanaifa olo telo.” Jehovah zaraiky fo Zagnahary. Karaha ty volagnin’ny 1 Korintianina 8:6: “Amitsika ndraiky Zagnahary taokagna fo, ny Baba.” Jehovah farany agnabo. Jesosy ndraiky tsy Zagnahary fa “Zanaka Zagnahary.” (1 Jaona 4:15) Fagnahy masigny io koa tsy Zagnahary, fa angôvo hindesiny magnano raha.—Asan’ny Apostoly 1:8; Efesianina 5:18.
Fagnahy: Maro fivavahagna mampianatra fa izio raha tsy mety maty agnatin’olo araiky. Baiboly ndraiky mivolagna fa fagnahy zegny angôvo mamelogno vatagna; izio tsy mahavita magnano raha izikoa misintaka amy vatagna. Volagniny ao koa fa olo maty tsy mahavita magnano raha eky.—Mpitoriteny 9:10; Jakoba 2:26.
Môtrobe: Fivavahagna diso mampianatra fa ampijaligny tsisy farany agnaty môtrobe fagnahin’olo ratsy fagnahy. Baiboly ndraiky mivolagna fa “olo maty tsisy raha hainy.” (Mpitoriteny 9:5) Baiboly koa mivolagna fa “Zagnahary fitiavagna.” (1 Jaona 4:8) Izy tsy mampijalijaly olo agnaty môtrobe zegny.

Fagnontaniagna: Ino raha ampianarin’ny Baiboly maomba Zagnahary telo mitambatra araiky, fagnahy, boaka iô môtrobe?

Iroa raha jiaby nampiasaigna tamy fivavahagna diso

Magnangy magnoro raha nampiasainy misy ifandraisany amy fagnanovagna mazy

5. Nagnino tôkony iroatsika aody jiaby nampiasaitsika?

⁵ Iroa aody jiaby na fiambigny aigny zegny, na pairatra, na ravaka na raha hafa. Tôkony hatao ankitigny raha zegny beky hita fa atsika matoky Jehovah.

6. Nataon-drô Kristianigny tamy voanalohany tagny karakôry bokin-drô mikasiky aody jiaby?

⁶ Iritriraita raha nataon-drô Kristianigny tamy voanalohany tagny irô koa fa nanapa-kevitry hagnaraka fivavahagna marigny. Baiboly mivolagna karaha ty: “Mpagnano aody maro namory bokin-drô, boaka iô niroan-drô hitan’ny mason’olo jiaby tiô.”—Asan’ny Apostoly 19:19.

7. Ino raha tôkony hataotsika izikoa demony aby io mampijaly atsika ndraiky?

⁷ Mpagnano aody sasany na mpamosavy aifa nanomboko nanompo Jehovah, mety mbala ampijalin’ny demony fo. Izikoa zegny raha mahazo anao, kahia mare agnaragna Jehovah amy vavaka. Izy hagnampy anao.—Ohabolana 18:10; Jakoba 4:7.

8. Akôry tôkony fihivairan’ny Kristianigny sampy ndraiky sary masigny ampiasaigna amy fivavahagna diso?

⁸ Zay olo ti hanompo Jehovah tsy mahazo mikajy aody na mampiasa sampy, na sary masigny. Kristianigny marigny mandaiha amy ‘finoagna fa tsy fahitagna.’ (2 Korintianina 5:7) Irô magnaja lalàgnan’ny Zagnahary mandraova fampiasagna sary laira mivavaka.—Eksodosy 20:4, 5.

Miaraha amy mpivavaka amy Jehovah

9. Karakôry atao volagnin’ny Baiboly beky atsika misy jery fo?

⁹ Baiboly mivolagna: “Zay dia araiky amin’olo misy jery hisy jery.” (Ohabolana 13:20) Beky atsika misy jery fo, mila miaraka amy Vavolombelogn’i Jehovah. Irô io magnaraka lalagna mengo amy fiaignana tsisy farany.—Matio 7:14.

10. Amy faomba karakôry agnampian’ny Vavolombelogn’i Jehovah anao hanompo Zagnahary?

¹⁰ Vavolombelogn’i Jehovah tia olo. Irô magnampy olo ti hahay ny marigny mikasiky Baiboly hahazo fiaignana tsisy farany. Irô koa afaka magnampy anao amy fianaragna Baiboly maimaim-poagna. Irô hamaly fagnontaniagnanao, boaka iô hagnaboaka aminao faomba agnarahagna raha volagnin’ny Baiboly amy fiaignana.—Jaona 17:3.

11. Akôry faomba agnampian’ny fivoriagna kristianigny anao?

¹¹ Amy fivoriagnan-drô, atao amy Efitragno Fanjakagna, anao hianatra raha maro mikasiky lalàgnan’i Jehovah. Hitombo fagniriagnanao hagnaraka fivavahagna marigny amy zegny. Hampianarigny anao agny koa faomba agnampiagna olo hafa hahay ny marigny boaka amy Baiboly.—Hebreo 10:24, 25.

12. Amy faomba karakôry agnampian’ny vavaka anao hanompo Zagnahary?

¹² Arakaraka ianaranao maomba sitrapôn’i Jehovah ndraiky fikasagnanany, hanjary hitombo fahaizagna aifa nanagnanao, boaka iô hahay mare fo fankafizanao lalàgnanany feno fitiavagna. Tôkony hampitombosinao koa fagniriagnanao hagnano raha maharavoravo izy ndraiky fagnirianao tsy hagnano raha alany. Aza adigna fa anao mety mangataka fagnampiagna amy Jehovah amy vavaka beky hagnano ny tsara ndraiky tsy hagnano ny ratsy.—1 Korintianina 6:9, 10; Filipianina 4:6.

Fianakaviagna miaraka mamaky Baiboly — Amy Faomba Karakôry ahafahanao magnaraka fivavahagna marigny?

13. Ino raha tôkony hataonao beky Jehovah ravoravo?

¹³ Izikoa fa mandaiha fotoagna, mahay maro raha hainao mikasiky Zagnahary. Hitanao amy zay fa ilaigny manolo-taigna aminany ndraiky atao batisa manjary Vavolombelogn’i Jehovah. Ravoravo Jehovah anao koa manjary olonany. (Ohabolana 27:11) Ho agnisan’olo sambatra ivolagnan’ny Zagnahary karaha ty anao: “Zaho hidôko amin-drô ndraiky hiaraka amin-drô; zaho ho Zagnaharin-drô, boaka iô irô hanjary olonakahy.”—2 Korintianina 6:16.

Vôsotro Boaka Tamin-drô Demony aby io Zaho

Tamin’andra aligny tandraraiky zay zaho nandry niaraka vadiko, zaho naharegny feo nikaiky agnaranakahy in-telo aby. Boaka iô hitako nitraisaka plafaon’ny tragno, kay nisy raha boribory karaha laboly mirehitry zay latsaka tamy kibonakahy. Vadiko ndraiky tamy zegny tsisy raha hitany foeky. Zaho boaka tiô nararirary tagnatin’ny fanjava maromaro.

Tsiaota fanjava tafaran’izigny, feo igny nikaiky zaho ndraiky. Karaha tagnaty rano laligny be tragno tamy zegny. Nisy bibilava naventy niboaka boaka tagnaty rano io tao, nandaiha nandady tamy tagnanakahy. Namango nahifiko izy fa tsy nety niala. Navozo be zaho tamy zegny. Bibilava ndraiky rano igny boaka tiô tsy hita eky. Nantreky nare be tamy rapaka tragno zaho. Tagnatin’ny laira maro zaho tsy nahatsiaro taigna. Regniko boaka iô feo igny nivolagna taminakahy fa mila mandaiha amy toby misy mpagnasitragna an-tanàna eto zegny zaho. Nagnontaniako raha io agnaranany. Izy nivolagna fa “tômpon’ny hariagna fa tsy manan-janaka” dikan’ny agnarany. Izy nagnamia toky fa angôvo amaizany hampanjary mpagnarivo zaho.

Nisy olo marary, boaka lavitry ndraiky mipaitraka marikitry tragnonay, navy taminakahy hitaha. Mbala tsendriky avy amy tragnonakahy irô, aifa hitako boaka amy fitaratranakahy manaokana. Izikoa olo igny fa avy, failan-tagnananany fo tanako ahaizako aretigny na raha manahiragna izy ndraiky aody tôkony hamiagna izy. Fagnahy io fo koa mivolagna aminakahy vaola alaiko amin’olo aby io.

Zaho tamy zegny nahazo vaolabe fôtony zay olo mitaha aminakahy mahivagna aby. Nanjary “tômpon’ny hariagna” marigny zaho, fa kanaifa tamy zegny zaho vo nahay dikan’ny “tsy manan-janaka” zegny. Isaka zaho mavaisatra zanako fagnarakaraka, maty fo araiky zôkin’izigny. Tsiaota aby zanako naty tagnatin’ny 12 taogno nanompoako fagnahy io.

Zaho nanomboko nivavaka tamy Zagnahary tamy fônakahy jiaby beky izy hagnampy zaho. Ndraiky andra, nisy Vavolombelogn’i Jehovah nikonkogno tamy tragnonakahy. Zaho isan’andra iô mandroaka irô, fa tamy diany araiky io ndraiky zaho nitandregny irô tsarabe. Izikoa fa nandaiha koragna, haiko tamy zay fa kaiky zaho ty manompo demony! Zaho boaka tiô tapa-kevitry tsy hagnano aody eky.

Raha io koa fa nivolagniko tamy raha mpoavy aminakahy igny, nisiahiny zaho tamy vava nataoko. Kanaifa nambarako izy: “Zaho fa tsy mila anao eky.”

Niroako raha jiaby nampiasaiko tamy sikidy. Nianatra Baiboly tamy Vavolombelogn’i Jehovah zaho, nanjary mpanompon’i Jehovah, natao batisa tamy taogno 1973. Iziô io zaho manan-janaka dimy salama vatagna tsy marary. Nanjary Vavolombelogn’i Jehovah vita batisa koa vadiko tafara tatỳ.—Nitantarain’i Josephine Ikezu.

Fagnontaniagna: Akôry nahafaka magnangy araiky tamy demony?