Karakory Atao Izikoa Misy Raha Manahiran̈a?

Lelahy ndreky man̈angy koa vo han̈orin̈y tokantran̈o, maro raha mety mampanahiran̈a. Mety ho baka amy fitaizan̈a tsy mira zen̈y, na eritreritry ndreky raha tian̈a tsy mitovy, na raha tsy baka amindro foeky, na mety ho baka amy raha tsy ampoizin̈y.

Ndraikindraiky mety tsy hijirentsika raha manahiran̈a io, fa Baiboly fo mandrisiky atsika handamin̈y izio. (Matio 5:23, 24) Anao koa man̈araka toro lalan̈a an̈aty ao, hahita hevitry ten̈a tsara anao handaminan̈a raha manahiran̈a io.

1 ANARO MILA MIFAMPIKORAN̈A

KORAN̈INY BAIBOLY: “Misy andra ivolan̈ana.” (Mpitoriteny 3:1, 7) Izikoa fa misy raha manahiran̈a, anaro samy mila von̈ono hikoran̈a. Aza asitriky vadinao raha hitanao mety manahiran̈a anao, ke ‘mivolàn̈a ny marin̈y’ fo. (Efesianina 4:25) Anao ndray efa meloko mare, mahaiza fo mifehy ten̈a, ke aza miady amy vadinao. Mahaiza mifidy volan̈a aboaka, amy zen̈y koran̈anaro tsy mivadiky ankany.—Ohabolana 15:4; 26:20.

Ndray tsy tianao raha volan̈iny vadinao, anao mila tsara fan̈ahy aminany ndreky tia izy, baka io man̈aja izy fo. (Kolosianina 4:6) Miaraka misy raha manahiran̈a, efa alamìna edy. Tsara izikoa anaro zatra mifampikoran̈a karaha zen̈y.—Efesianina 4:26.

AKORY AN̈ANOVAN̈A ZEN̈Y?

• Mahaiza mifidy fotoan̈a hikoran̈anaro raha manahiran̈a anaro

• Tandrin̈esa vadinao koa fa mivolan̈a, fa aza tapahin̈y koran̈anany. Koa fa vita ninany, anao amy zay mivolan̈a

2 TANDRIN̈ESA NDREKY ALEVA ONON̈O

KORAN̈INY BAIBOLY: “Mifankatiava mare. ... Irarian̈a anaro han̈amia voninahitry namanaro, alohany iro han̈amia voninahitry anaro.” (Romanina 12:10) Anao ten̈a mila mitandren̈y vadinao. Aleva onon̈o tsarabe hevitrinany, ke mahaiza mahinakinaka, fa aza man̈ambony ten̈a. (1 Petera 3:8; Jakoba 1:19) Aza man̈ano sary mitandren̈y fo. Izikoa mety, ambilà antsendriky raha ataonao, koa fa mivolan̈a raha aminao vadinao. Tandrin̈esa izy, na volàn̈a aminany fa baka io anaro mikoran̈a. Anao tsy ho mora meloko aminany, koa ataonao namanao izy, fa tsy fahavalonao.—Mpitoriteny 7:9.

AKORY AN̈ANOVAN̈A ZEN̈Y?

• Ndray misy tsy tianao raha volan̈iny vadinao, aza malaky mivolan̈a fa tandrin̈esa tsarabe fo izy

• Aleva onon̈o tsarabe raha ten̈a tiany volan̈iny. Diniha koa feonany mivolan̈a aminao, ndreky fomba fikoran̈any aminao

3 HAJÀ HEVITRY TAPAKANARO

KORAN̈INY BAIBOLY: “Asa mare jiaby azahoan̈a tombony, fa izikoa volan̈a fo, tsy ahavitan̈a raha.” (Ohabolana 14:23) Dikanizen̈y, tsy mety izikoa manapakevitry fo fa tsy man̈atanteraka. Ke tokony hajainaro zay raha tapakanaro tamy koran̈anaro. Mila mifen̈y anaro man̈ano zen̈y, ndray mety tsy ho mora aminaro zen̈y. (Ohabolana 10:4) Ho maro hatsaran̈a ho azonaro, izikoa anaro mahay mifan̈ampy.—Mpitoriteny 4:9.

AKORY AN̈ANOVAN̈A ZEN̈Y?

• Mifan̈araha koa amy raha mila hataony tsiaraikiaraiky aminaro mba handaminan̈a raha manahiran̈a io

• Koa fa mandeha fotoan̈a, zahava ndraiky raha efa vitanaro