Akory Hataony Lelahy Hifankazatra Tsarabe amy Zanany Lelahy?

“ANAO mahay raha Papa ay. Taia ma nahaizanao izio?” Asa anao mba efa navy nan̈ontaniany zanakanao karaha zen̈y? Anao mety mahatsiaro misy dikany mare izikoa volan̈iny karaha zen̈y. Fa hahairavoravo fo anao izikoa zanakanao man̈araka fan̈anaran̈a ataonao aminany, ke nahatsara izy raha zen̈y.a​—Ohabolana 23:15, 24.

Nahainiova ma fiheveranao zanakanao lelahy izioty fotony efa mahaibe izy, sa mbala karaha taloha fo? Ke akory tokony hataonaro, baka anao hifankazatra tsara fo? Alohany hamaliantsika zen̈y, atsika handiniky problemony babanolo sasany.

Problemo telo fohitany lelahy mananjanaka

1. TSISY LETAN: Ny raha misy amy tany maro, babany tsaiky ten̈a mampidriky vola an̈atiny tokantran̈o, ke mahalan̈a iro midoko antran̈o azony asa. Amy tany sasany, mahalan̈a fo babany tsaiky mba miaraka amy zanany. Karaha ataony raha hita tamy fan̈adikadin̈ana natao ta Fransy tan̈y, tsy ampy 12 minity isanandra lera iarasany babany tsaiky amy zanany.

DINIHA BAKA TY: Mba firy lera ma iarahanao amy zanakanao isanandra? Sorata baka lera laninao iarahan̈a aminany an̈atiny herin̈iandra an̈abo io, na 15 andra ho avy io. Ho hitanao fa karaha tsy marin̈y raha nisoratinao io.

2. RATSY TARIMY TAMY MBALA HELY: Lelahy sasany mety tsy dia nijireny babany izy taloha tan̈y. Karaha zen̈y Jean-Marie, a Fransy an̈y. Ho izy: “Zahay roeny papako nahalan̈a fo mba niaraka. Tsy nampoiziko foeky problemo baka tamizio. Efa zaho mananjanaka izioty, hitako karaha nanjary sarotro aminaka mikoran̈a raha tsara amy zanako lelahy.” Fa misy koa olo fankazatra tsara tamy babany fa tafara iro nanjary tsy dia mifandray eky. Karaha ty ho Philippe, lelahy 43 taon̈o: “Tsiary ndraiky naboakany babako taminaka fa zaho tiany, ke izioty nanjary sarotro mare aminaka koa man̈aboaka amy zanako lelahy fa tiako izy.”

DINIHA BAKA TY: Asa fifandraisany babanao taminao nanjary misy vokany amy fifandraisanao amy zanakanao lelahy? Izio ma anao mangala tahaka toetry tsarany babanao sa toetry ratsinany?

3. TSY MAHAY MAN̈ANATRA TSAIKY: Amy tany sasany, tsy andraikitry maventy amy lelahy man̈abe zanany zen̈y. Ohatra, karaha ty baka nikoran̈iny Luca, tsaiky araiky tombo tan Eropy andrefa tan̈y: “Maro olo taminay tan̈y nieritreritry fa fitarimian̈a tsaiky zen̈y asany man̈angy.” Misy koa efa kolontsain̈y foeky babany tsaiky mila masiaka ndreky mentitry mare amy zanany. Efa tsy maintsy karaha zen̈y fo. Karaha zen̈y raha navoa George, tombo tan Afriky. Ho izy: “Aminay an̈y anao tsy mahita babany tsaiky mba misaoma miaraka amy zanany zen̈y. Manjary mihen̈y zen̈y fahifan̈andro izikoa iro man̈ano ambaka zen̈y. Safe baka amy zen̈y nahavy zaho izioty nanjary tsy mahay miaraka amy zanako lelahy foeky koa.”

DINIHA BAKA TY: Amy tany misy anaro an̈y, ino honolo andraikitriny babany tsaiky? Iro ma mihevitry fa fitarimian̈a tsaiky zen̈y andraikitriny mamany tsaiky zaraiky fo? Iro ma mandrisiky babany tsaiky han̈aboaka fitiavan̈a amy zanany lelahy sa raha tsy azo atao foeky raha zen̈y amindro?

Ke izikoa zen̈y olan̈a hitanao na misy hafahafanizen̈y koa, ino hevitry? Diniha baka sosokevitry aby ty:

Miarasa amindro rango iro mbala hely

Efa voajan̈ahary amy tsaiky lelahy tia mangala tahaka babany. Ke araraota raha zen̈y, rango zanakanao io mbala hely. Fa karakory ma han̈anaovan̈a zen̈y? Ombian̈a anao mety miaraka aminany?

Izikoa fa misy raha ataonao, iraha man̈ano koa zanakanao lelahy io, izikoa mbala mety ho vitany izio. Ohatra, izikoa misy asa ataonao, iraha tahitahiny anao. Izikoa anao mamafa tran̈o, amia famafa koa izy mba mamafa. Izikoa ndraiky anao hitsabo folera, amia angady hely koa izy mba mangady. Anao koa man̈ano karaha zen̈y aminany, ho ravoravo izy hangala tahaka raha ataonao. Ke nata mety elaela asa ataonaro io vo vita, efa tsara edy zen̈y, fotony anaro mba afaka mifampikoran̈a tsara. Sady anao koa amy zen̈y mba mahavita mampianatra izy toetry tsara. Karaha zen̈y raha nisy taloha tan̈y. Baiboly tamy zen̈y nandrisiky babany tsaiky hiaraka man̈ano raha fataondro isanandra, ke iro mizaha hevitry hikoran̈ana amindro fo ndreky hampianaran̈a iro. (Deoteronomia 6:6-9) Mbala tsara arehan̈a fo torohevitry zen̈y firaka izioty.

Fa sosoko zen̈y koa, tsara anao izikoa mba manokana fotoan̈a iarasan̈a misaoma amy zanakanao. Izio tsy raha zisty hamparavoravo izy fo fa arakany fikarohan̈a natao, hanjary tsy havozovozo koa izy, avio hianatra raha vaovao izikoa anao miaraka misaoma aminany.

Fa mbala tsara mandilatra zen̈y vokan, izikoa babany tsaiky miaraka misaoma amy zanany. Misy pikaroko araiky zay, Michel Fize an̈arany, nivolan̈a karaha ty: “Tsaiky lelahy mazoto mikoran̈a amy babany, izikoa iro miaraka misaoma.” Amy fotoan̈anizio koa babany afaka man̈aboaka fitiavan̈a amy zanany, amy raha volan̈iny ndreky amy raha ataony. Sady mampianatra zanany han̈aboaka fitiavan̈a koa baka izy amy zen̈y. Karaha ty nivolan̈iny André baka an Allemagne: “Tamy zanako lelahy mbala hely, niaraka nisaoma zahay roe. Nitolon̈iko izy, ke mba nianatra nan̈ano karaha zen̈y taminaka koa izy.”

An̈isany fotoan̈a mety hankamafisany baba araiky fiarasan̈a amy zanany, lera iro alohany hoandry. Ohatra, tsara izikoa amakianao tantara araiky amy Baiboly izy. Avio, tandrin̈esa tsarabe izy, izikoa misy namparavoravo izy na nampalahelo izy taminy andra io ke tantarainy aminao. Izikoa anao man̈ano ambaka zen̈y, ho zatra mikoran̈a aminao izy, ndray izy efa mahaibe.

Tahaoma miaraka man̈ano raha tianao izy

Misy tsaiky lelahy sasany tsy tihikoran̈a foeky, nata papany fa mikatsiky koran̈a aminany. Ke izikoa ohatrandraha anao man̈ontany raha izy, fa izy karaha milefalefa fo, aza iritriretin̈y fa tsy nahefa hikoran̈a aminao foeky izy. Mety fomba fikoran̈anao aminany fo nahavy izy nan̈ano zen̈y, ke izikoa ivoanao fomba fikoran̈anao aminany, izy mety hikoran̈a fo.

Misy lelahy araiky baka a Fransy, Jacques an̈arany. Ndraikindraiky hitany sarotro aminany mikoran̈a amy zanany, Jérôme an̈arany. Ino raha nataony? Nivoany fomba nitaritany koran̈a taminany. Nitahominy nisaoma laboly izy. Karaha ty ho Jacques: “Zahay koa fa baka nisaoma in̈y, zahay nangala fipitrahan̈a tamy gazon tamy sisiny tio. Naro raha nikoran̈iny zanako taminaka, fotony zahay roe zaraiky fo tio. Ke izikoa fa natetiky zahay niaraka nisaoma in̈y, nanjary fankahazo koran̈a tsara zahay.”

Izikoa ndraiky zanakanao tsy tia laboly, ino hevitry? Karaha nataony André, tsy adin̈any iro roeny zanany miaraka mizaha lakintan̈a. Ty raha nivolan̈iny: “Zahay zatra nipetrapetraka tamy sezy taminy haramanjanay aminy andra alin̈y manintsy be in̈y. Nan̈ano palto zahay, avio niaraka nigiaka dite sady mizaha lan̈itry. Zahay amy zay nikoran̈a momba Pamoron̈o lakintan̈a aby io. Nikoran̈a momba fiain̈ananay manokan̈a koa zahay. Tsisy raha tsy nikoran̈inay.”​—Isaia 40:25, 26.

Fa karakory fo basy izikoa saoma tiany zanakanao hatao io tsy tianao? Anao mila milefitry. (Filipianina 2:4) Karaha ty baka nivolan̈iny Ian, baka Afriky Atsimo: “Zaho ten̈a tia man̈ano spaoro, kanefa Vaughan zanako lelahy tsy tia izio. Ninany ropilany ndreky ordinatera fo raha mahasofy izy. Ke zaho nifen̈y mare mba ho tia raha aby io koa. Avio zahay niaraka nan̈ano saoma mitondra avion, aminy ordinatera. Zahay koa fa nan̈ano karaha in̈y, nanjary nazoto nikoran̈a taminaka fo zanako io.”

Ataova raha hahavy izy hatoky ten̈a

“Papa, papa, zahava baka ty!” Asa anao mba efa nivolan̈any zanakanao karaha zen̈y, izikoa misy raha nanjary hainy? Mety izy mbala hely fo mivolan̈a zen̈y, fotony tiany anao hidera izy amy raha hainy io. Fa izikoa izy efa be, mety efa tsy han̈ano karaha zen̈y eky. Ndray zen̈y ny raha misy, mbala mila midera izy fo anao, baka izy hanjary olobe matotro.

Jehovah modely amy zen̈y. Diniha fo baka raha nataony tamy zanany araiky, Jesosy. Tamy zen̈y baka Jesosy hanomboko han̈ano raha farany miavaka tamy fiain̈ananany tambony tany teto. Jehovah nivolan̈a taminany: “Io Zanako ten̈a tiako sady zaho koa mankasitraka izy.” (Matio 3:17; 5:48) Babany tsaiky mila man̈asazy ndreky man̈anatra zanaka. (Efesianina 6:4) Fa kanefa, asa anao mba mahay midera izy koa nohony raha tsara nivolan̈iny na raha nataony?

Mankasitraka zanaka ndreky man̈aboaka fitiavan̈a zanaka io mety ho sarotro amy lelahy sasany. Antony mety mahavy zen̈y baka, mety tsy nan̈ano zen̈y tamindro raimandrenindro. Izikoa karaha zen̈y raha nahazo anao, anao mila mifen̈y mare fo han̈ano raha hahavy zanakanao hatoky ten̈a. Akory mety han̈anaovanao zen̈y? Mety man̈ano karaha Luca ndreky Manuel zanany lelahy 15 taon̈o nikoran̈intsika tan̈abo tarỳ in̈y anao. Karaha ty baka ho Luca: “Misy lera Manuel irahiko man̈ano asa antran̈o, fa zaho man̈iraka izy mikaiky zaho fo izikoa izy mila tahitahian̈a. Fa matetiky izy zaraiky fo efa mahavita izio, ke afapo izy sady manjary matoky ten̈a. Izikoa tsara raha nataony, zaho midera izy. Avio, nata tsy arakany nitiavany izy raha io koa fa vita, zaho mbala midera izy fo, fotony izy efa nifen̈y mare.”

Karaha zen̈y koa anao. Ho vitanao koa han̈ampy zanakanao hatoky ten̈a, izikoa anao man̈ampy izy hanakatra tanjon̈o maventy. Fa karakory ndraiky tokony hataonao, izikoa hitanao tsy tatrany malaky erakany niritriretanao izy tanjon̈onany io? Avio karakory koa izikoa tanjon̈o nifidiny tsy mifan̈araka amy tianao, kanefa izio tsy ratsy aby? Anao mila milefitry. Karaha ty baka ho Jacques, araiky nikoran̈intsika tio in̈y: “Zaho mifen̈y mare fo man̈ampy zanako hanan̈a tanjon̈o mety ho takany. Ataoko an̈atiny jerinaka koa fa izio tsy tanjon̈onaka fa ninazy. Raha zen̈y mahavy zaho tsy man̈adin̈a fa mila mifen̈y izy man̈ano erakany vitany, baka tatrany tanjon̈onany io.” Hahavita han̈ampy zanakanao hanakatra tanjon̈onany anao, izikoa mitandren̈y hevitrinany, midera izy amy raha tsara vitany, avio mandrisiky izy hahavita hiatriky problemo.

Fa ndray anao efa mifen̈y mare, problemo io tsy maintsy ho hisy fo. Fa izikoa fa ela ny ela, hanjary ho tiany zanakanao fo miaraka aminao. Tsisy olo tsy tihiaraka aminolo mba man̈ampy izy hahavita hiatriky fiain̈ana baka!

[Lamariky amy pazy ambany]