1921 Zato Taon̈o Rôso Zay!

“INO asa manokan̈a tokony hifantaohantsika amy taon̈o ho avy?” Zen̈y fan̈ontanian̈a napetraka tamy Pianatra Baiboly, tamy Tilikambo Fiambesan̈a (angiley), tamy 1^er Zanvie 1921. Lahatsoratra io baka tio nanon̈ono Isaia 61:1, 2. Izio nampatsiaro iro fa andraikitrindro, mitory vaovao tsara. Karaha ty ho andininy io: ‘Jehovah nan̈ôsotro zaho han̈ambara vaovao tsara aminolo manetry ten̈a. Izy nan̈iraka zaho han̈ambara taon̈o haboahany Jehovah fankasitrahan̈a ndreky han̈ambara andra han̈anaovany Zan̈aharintsika valifaty.’

PITORY TSY NAVOZOVOZO

Ho vitandro Pianatra Baiboly aby io han̈ano asa fitorian̈a io izikoa iro tsy mavozovozo. Iro baka tsy vitany mila mitory “vaovao tsara” aminolo “manan̈a fô tôrotôro” fo fa, mila man̈ambara “andra han̈anaovany Zahan̈ary valifaty” aminolo ratsy fan̈ahy koa.

Mipetraka a Kanada i Rahalahy J. Hoskin. Ndray nisy fan̈injehan̈a, tsy navozovozo foeky izy nitory. Taminy 1921, izy nitraotro tamy pastera metôdisty zay. Karaha ty ho izy tamy pastera io: “Hikoran̈a raha momba Soratra Masin̈y atsika io, ke tokony hilamin̈y fo koran̈antsika. Ary ndray misy raha tsy mampitovy hevitry atsika, mety hajanon̈ontsika fo koran̈a, tsisy malo.” Fa tsy zen̈y ny raha nisy. Ho Rahalahy Hoskin: “Mbala tsy ampy firy minity zahay nikoran̈a, efa narampiny pastera io angovo jiaby varavaran̈anany. Ke sambarako ho latsaka foeky la vitre.”

Nandroton̈o mare pastera io nivolan̈a: “Ino ma tsy handihananao aminolo tsy mivavaka an̈y?” Nitana ten̈a mare Rahalahy Hoskin tsy hivolan̈a. Karaha ty ho izy tan̈aty jerinany, izy koa fa niala tio: “Ary efa zen̈y edy raha nataoko tiô!”

Kiakanandranizin̈y, mbala nankaratsy Rahalahy Hoskin fo pastera io tamy toriteninany. Karaha ty ho rahalahintsika io: “Nampitandreminy iro olo aby io fa mbala tsiary nisy olo pamitaka tsy manjary mandilatra zaho zen̈y tamy tanàna io, ke tokony tifirin̈y zen̈y foeky zaho.” Rahalahy Hoskin ndraiky tsy taitry aby. Nanohy nitory fo izy sady ten̈a nahita vokatra. Ho izy: “Mbala tsiary nahita haravoan̈a bebenizen̈y zaho tamy fanompoan̈a. Olo sasany nivolan̈a taminaka: ‘Haiko fa olony Zan̈ahary ankitin̈y anao!’ Nivolan̈a koa iro fa von̈ono han̈ampy zaho zen̈y iro izikoa misy raha mety han̈ampian̈a, amy zen̈y ho ampy fo raha ilaiko.”

FIANARAN̈A MANOKAN̈A NDREKY FIANARAMPIANAKAVIAN̈A

Akory nataondro Pianatra Baiboly aby io nan̈ampy olo lian̈a baka iro handroso? Nan̈aboaka lahatsoratra fianaran̈a Baiboly iro, tamy gazety Fotoam-pahasambarana.a An̈isanizen̈y lahatsoratra Fianaran̈a Baiboly Natao Niny Tanora. Nisy fan̈ontanian̈a natao hidinihiny raimandreny niaraka tamy zanakandro tamizio tao. Nampirisihin̈y “raimandreny hamaky fan̈ontanian̈a aby io miaraka amy zanakandro, baka io han̈ampy iro hahita valiny amy Baiboly ao.” Sasany tamy fan̈ontanian̈a aby io natao han̈ampian̈a tanora hahay raha tsotsotra mikasiky Baiboly, karaha ataony: “Firy boky amy Baiboly ao?” Sasany ndraiky natao han̈ampian̈a iro hasaky hitory, karaha ataony: “Efa tokony hampoiziny ten̈a Kristianin̈y ma fa mety hiatriky fan̈injehan̈a izy?”

Nisy koa lahatsoratra hafa natao ninolo efa nahay raha maromaro momba Baiboly. Fan̈ontanian̈a tamizio tao nandrisiky olo mamaky izio handiniky tsarabe. Hitandro tamy boky voanalohany amy Fianarana ny Soratra Masina (angiley), valiny fan̈ontanian̈a aby zen̈y. Andrivony olo nahita hatsaran̈a baka tamy lahatsoratra aby zen̈y. Fa tamy 21 Desambra 1921, nisy filazan̈a natao tamy gazety Fotoam-pahasambaran̈a. Nambara tamizio tao fa tsy han̈aboaka lahatsoratra aroe aby io eky fandaminan̈a. Ino nahavy fan̈ovoan̈a tampotampoko zen̈y?

NISY BOKY VAOVAO NABOAKA

Boky *Ny Harpan’Andriamanitra*

Marky pazy ahitan̈a tany handeha vakian̈a

Karty hely misy fan̈ontanian̈a

Hitandro rahalahy nitariky fandaminan̈a fa maro olo tokony mbala hampianarin̈y Baiboly, fa izy fo mila atao amy fomba voalamin̈y. Ke nisy boky vaovao naboaka tamy Novambra 1921. Titranizio Ny Harpan’Andriamanitra (fransay). Namian̈a araiky taminany io lan̈iany olo lian̈a, avio iro nandifasan̈a raha fianaran̈a Baiboly manokan̈a. Izio nan̈ampy iro hahay fikasan̈any Zan̈ahary han̈amia olombelon̈o fiain̈ana mandrakizay. Nan̈ano akory fandehany fianaran̈a io?

Namezan̈a karty hely araiky lan̈iany olo nangala boky io. Tamy karty io tao nahitan̈a pazy fahafiry amy boky io tokony hivakiany. Namezan̈a karty hely hafa koa olo io herin̈iandra man̈araka, ke fan̈ontanian̈a momba raha tamy pazy nivakiany in̈y tamizio tao. Nisoratra tamy farany ambany tamy karty io koa pazy fahafiry amy boky io tokony hivakiany man̈araka.

Karaha zen̈y fo raha natao tan̈atiny efatra fanjava. Nahazo karty vaovao fo olo lian̈a, isaka herin̈iandra. Lan̈iany fiangonan̈a narikitry tiô nandefa izio taminany, ke izio nalefandro tamy La Poste. Matetiky pitory efa natoe na tsy afaka niboaka tran̈o nikarakara karty aby io. Nahazo hatsaran̈a baka tamy zen̈y i Ranabavy Thayle, rahavaviny Anna Gardner, ranabavy baka Millvale, a Etazonỳ an̈y. Ranabavy Thayle io nisy antsa ke tsy afaka nandehandeha. Ho Anna: “Nanjary nahavita nampitombo fanompoan̈anany i Thayle, izikoa fa niboaka boky Ny Harpan’Andriamanitra in̈y.” Izikoa fa vita firaka tamy farany fianaran̈a nataonolo lian̈a io tamy boky io, nisy pitory baka tamy fiangonan̈a nandeha namangy olo io tantran̈o, han̈ampy izy hampitombo raha efa hainy momba Baiboly.

MBALA NARO ASA NIAMBIN̈Y IRO

Tamy farany taon̈o, Rahalahy J. Rutherford nandefa taratasy tamy fiangonan̈a jiaby. Karaha ty ho izy: “Ten̈a nahavita be tamy fitorian̈a atsika tamy taon̈o ty, ke maro vokatra tsara azontsika, mandilatrany efa nazontsika letrizay.” Kanefa, karaha ty koa ho izy: “Mbala maro asa miambin̈y atsika! Ke ampirisiha olo han̈ampy atsika aminy asa ten̈a tsara io.” Narehany Pianatra Baiboly volan̈anany zen̈y. Tsy navozovozo foeky iro nitory momba Fanjakan̈any Zan̈ahary. Ten̈a niavaka raha vitandro tamy taon̈o 1922.

Naman̈a Tsy Navozovozo

Iro Pianatra Baiboly aby io ten̈a nifankatia, fotony iro nifan̈ampy fo. Iro io tsy navozovozo fa ten̈a “rahalahy von̈ono han̈ampy amy fotoan̈a jiaby.” Zen̈y raha ho hitantsika amy tantara fan̈araka ty.—Ohab. 17:17.

Nisy fandripahan̈a olo tamy tanànany Tulsa, ta Oklahoma tan̈y, tamy talata 31 May 1921. Nisy lelahy amerikain jôby araiky nitsahoenolo namopoko viavy amerikain malandy, ke nigadra lelahy io. Tafaranizen̈y, nisy vazaha lahy mandilatra 1 000 niady tamy lelahy amerikain jôby vitsivitsy. Nanjary adibe raha zen̈y ke nahateky ziska tamy tanànanolo jôby, ta Greenwood tan̈y. Tran̈o ndreky labotìky mandilatra 1 400 nivakianolo ndreky niroanolo. Mety anjatony lastio olo naty taminio, kanefa 36 fo nivolan̈iny tatitry.

Nisy rahalahy jôby araiky zay nipetraka ta Greenwood, Richard Hill an̈arany. Karaha ty ho izy: “Taminy alin̈y nisiany mele be io, zahay tampivorian̈a. Naharen̈y tifitry basy tantanàna tan̈y zahay koa fa ravan̈a baka nivory. Mbala naharen̈y tifitifitry fo zahay firaka alin̈y be.” Nahainafana fo fandehandraha tamy maraindrain̈iny robia 1^er Ziain. Ho Rahalahy Hill: “Nisy olo aby zay navy taminay tao, nivolan̈a fa tokony mandeha amy tran̈ompokonolo a Tulsa zahay, baka zahay tsy havoa raha.” Ke nandeha tan̈y Rahalahy Hill ndreky vadiny, niaraka tamy zanakandro dimy mianadahy. Nisy lelahy ndreky man̈angy kadiriny 3 000 tao. Nisy maramila tan̈y nirahiny fanjakan̈a hiaro iro ndreky hampilamin̈y tanàna.

Nisy korazy rahalahy fotsy hoditry araiky, tamy fotoan̈anizen̈y. Arthur Claus an̈arany. Kamarady iro ndreky Rahalahy Hill. Karaha ty ho izy: “Ren̈iko fa nisy mele ta Greenwood. Maro olo namaky ndreky nan̈ôro tran̈onolo. Nandeha tan̈y foeky zaho, fotony tiako ho hay nan̈ano akory naniny namako.”

Arthur Claus ndreky tsaiky 14 nampianariny tamy boky Ny Harpan’Andriamanitra

Arthur koa fa navy tamy tran̈ony Rahalahy Hill tan̈y, izy nahita vazaha lahy nitana basy. Izio jiraniny Rahalahy Hill, sady kamaradiny. Sambarany lelahy io mbala iro pan̈ano lagrevy aby io baka i Arthur, ke nironton̈ony karaha ty: “E manafo! Ino ma dianao amy zaridain̈inolo iô?”

“Izikoa tsy naharesy lahatra izy raha nivolan̈iko taminio” ho Arthur, “efa voatifitry zaho ôtrizay. Nazavaiko taminany fa zaho kamaradiny Hill, ary efa matetiky zaho namangy izy tatỳ.” Vitany Arthur ndreky lelahy io niaro tran̈ony Rahalahy Hill, ke tsisy raha very tao.

Tsy ela, hitany Arthur tamy tran̈ompokonolo tan̈y Rahalahy Hill ndreky vady amanjanakanany. Nambaranolo taminy Arthur fa tsisy olo mahazo miala ao izikoa tsy mahazo lalan̈a baka amy Zeneraly Barrett, fotony izy niandraikitry plasy io. Ho Arthur: “Tsy moramora nikoran̈a tamy zeneraly io. Zahay koa fa fanôjy, zaho nangataka lalan̈a hitondra Rahalahy Hill hiala tamy tran̈ompokonolo io tao. Ho izy taminaka: ‘Dikanizen̈y anao hiaro fianakavian̈anany ndreky han̈amia raha ilaindro?’ Tsy nisalasala foeky zaho nivolan̈a: ‘Ia!’ ”

Niaraka zaho nahazo autorisation, direkty zaho nilomoay nandeha tamy tran̈ompokonolo tan̈y. Naboakako maramila niambin̈y tao taratasy io, ke ho izy taminaka: “Nisin̈iaviny zeneraly ankitin̈y taratasy ty? Anao olo voanalohany nangala olo tato niany.” Hitany Arthur ndreky maramila io Rahalahy Hill ndreky fianakavian̈anany. Nisisisisiky tan̈atiny tomôbiliny Arthur iro, baka io iro nody.

Nindesiny Rahalahy Claus tamy tany azo antoko iro baka tiô. Rahalahy io ten̈a be fitiavan̈a ndreky misy korazy, ke nisy vokany tsara taminolo hafa raha zen̈y. Karaha ty ho izy: “Nanjary nan̈aja Vavolombelon̈o Jehovah i lelahy niaro tran̈ony Rahalahy Hill in̈y. Nisy olo maromaro koa nanjary lian̈a tamy fahamarin̈ana, fotony hitandro fa amintsika vahoakany Jehovah, miran̈a fo olo jiaby. Sady atsika tsy man̈avakavaka olo.”

a Fotoam-pahasambarana io niova Fampiononana (fransay) taminy 1937, baka io Mifohaza! taminy 1946.