‘Mifen̈a Mare Baka Hiray Sain̈y Fo’
Apostoly Paoly nandrisiky Kristianin̈y ta Efesosy ‘hifandefitry fo noho ny fitiavan̈a, baka hiray sain̈y fo sady hihavan̈a.’—Efes. 4:2, 3.
“Firaisan-tsain̈y” misy amintsika io baka amy fan̈ahy masin̈y. Dikan’izen̈y, izio vokatran’ny angôvon’ny Zan̈ahary. Fa kanefa, eraka nivolan̈in’i Paoly, mila ezaka baka izio ho hisy fo. Ezaka ataon-jôvy aby? Ny marin̈y aminany, Kristianin̈y tsiaraikiaraiky mila ‘man̈ano raha, baka hiray sain̈y fo.’
Ty baka misy ohatra. Izikoa misy olo man̈amia tomabily anao, azôvy tôkony hikarakara izio? Mazava tsarabe valiny. Anao tsy tôkony han̈amia tsin̈y olo nan̈amia kadô io anao, izikoa misy robaka tomabily io, fôtony tsy nikarakarainao.
Karaha zen̈y koa firaisan-tsain̈y misy amintsika io. Izio ndray kadô baka amy Zan̈ahary, atsika tsiaraikiaraiky mila mifen̈y, baka hampisy izio fo. Ke izikoa atsika tsy mihavan̈a amy rahalahy araiky na ranabavy araiky, atsika mila man̈ontany ten̈a karaha ty: ‘Zaho ma man̈ano erakan’ny vitako, baka hisian’ny firaisan-tsain̈y fo?’
‘MIFEN̈A MARE’ BAKA HIRAY SAIN̈Y
Erakany nikoran̈in’i Paoly, ndraikindraiky atsika mila mifen̈y mare baka hampisy firaisan-tsain̈y fo. Ten̈a ilain̈a man̈ano zen̈y, izikoa ohatra misy rahalahy na ranabavy nan̈ano raha tsy tiantsika. Ke izio ma anao tsy maintsy man̈aton̈o olo io fo ndreky mikoran̈a aminany momba problemo io? Tsy voatery. Man̈ontania ten̈a karaha ty: ‘Izio ma hahaihampisy firaisan-tsain̈y zaho koa mikoran̈a izity aminany sa hahaihampiaho problemo io fo?’ Ndraikindraiky, sitrany atao sary tsy hita an̈y fo raha tsy mety nataony io na ambela an̈y fo. Na koa anao direkty mamela heloko.—Ohab. 19:11; Mar. 11:25.
Man̈ontania ten̈a: ‘Izio ma hahaihampisy firaisan-tsain̈y zaho koa mikoran̈a izy ty aminany sa hahaihampiaho problemo io fo?’
Erakany nikoran̈in’ny apostoly Paoly, alô atsika tsy vôly ‘hifandefitry noho ny fitiavan̈a.’ (Efes. 4:2) Misy boky araiky mivolan̈a fa mety adika karaha ty koa izio: “Raisa karaha irô fo irô.” Dikan’izen̈y, mila ikentsika fa irô mpiara-manompo amintsika aby io mpanota, ke man̈ano hadisovan̈a mira atsika fo. Sady atsika jiaby samy mbala mifen̈y ‘hisikiny toetry vaovao.’ (Efes. 4:23, 24) Fa tsisy amintsika ndraiky mahavita man̈ano zen̈y amy fomba lavorary. (Rom. 3:23) Izikoa atsika man̈ano zen̈y, ho moramora amintsika hifandefitry, hamela heloko, aviô ‘hifen̈y mare baka hiray sain̈y fo.’
Izikoa atsika man̈adin̈a ndreky man̈ambela helokon’olo nan̈ano raha tsy mety tamintsika, atsika “hiray sain̈y fo sady hihavan̈a.” Volan̈a griky nadika ‘natambatra’ amin’ny Efesianina 4:3 io, nadika “hozatra” amy Kolosianina 2:19. Izio karazan̈a hozatra matanjaka mampitohy taolan̈a. Mira zen̈y fo, fihavan̈ana ndreky fitiavantsika irô rahalahy ndreky ranabavy aby io, man̈ampy atsika hifandray marikitry amindrô fo, ndray ndraikindraiky misy raha tsy tiantsika ataondrô.
Ke izikoa lera mpiara-manompo tafan̈ano raha tsy tianao, na mampameloko anao, na mampahinihiny anao, mifen̈a han̈ano raha hahavy anao hahay hahinakinaka izy, fa tsy hankaratsiratsy izy fo. (Kol. 3:12) Olo jiaby samy tsy lavorary aby, ke anao koa tsy maintsy efa nan̈ano raha nampameloko olo. Fangalanao onon̈o zen̈y, han̈ampy anao ‘hifen̈y mare baka hiray sain̈y fo.’