“Anao Valera Mare”!

1-2. Akôry hahavy atsika hahita fa atsika ten̈a misy valerany amy Jehovah?

SASANY amy mpanompon’i Jehovah mahatsapa fa irô tsisy valerany. Mety baka tamy raha nataon’olo tamindrô mahavy irô mahatsapa karaha zen̈y. Izikoa anao efa navy nahatsapa karaha zen̈y, akôry ahitanao fa anao ten̈a misy valerany amy Jehovah?

² Mety han̈ampy anao mandiniky tantara amy Baiboly, ahitan̈a karakôry tian’i Jehovah itondrasan̈a olo. Jesosy Zanany nan̈isy fôtiny olo ndreky nan̈aja olo fo. Fan̈anaovany zen̈y ahitan̈a fa izy ndreky Babany ten̈a man̈isy valerany olo mahatsapa ten̈a tsisy dikany. (Jaona 5:19; Heb. 1:3) Amy lahatsoratra ty atsika handiniky: 1) Karakôry nan̈ampian’i Jesosy olo hahita fa irô misy valerany, aviô 2) Karakôry hahavy anao resy lahatra fa anao valera mare amy Zan̈ahary.​—Hag. 2:7.

KARAKÔRY NAN̈AMPIAN’I JESOSY OLO HAHITA VALERANDRÔ?

3. Karakôry nataon’i Jesosy nan̈ampy irô Galilianin̈y nila fan̈ampian̈a taminany?

³ Tamy dia fahatelo nataon’i Jesosy nandeha ta Galilia, naro olo nivory taminany tiô, nitandren̈y izy ndreky nitahany. Jesosy nivolan̈a: “Irô olo aby io nampijalian̈a baka iô tsy nasian̈a fôtiny foeky, karaha ataon’ny ôndrikôndriky tsisy mpiambin̈y in̈y.” (Mat. 9:36) Irô mpitondra fivavahan̈a aby io tsy nan̈isy fôtiny olo foeky, ndreky nivolan̈a irô “olo voaozon̈o” foeky. (Jaona 7:47-49) Fa Jesosy ndraiky tsara fan̈ahy tamindrô, ke nanokan̈a fotoan̈a nampianatra irô ndreky nitaha aretin̈indrô. (Mat. 9:35) Aviô, izy koa nan̈ano raha nan̈ampian̈a olo maro, ke izy nampiofan̈a apostolinany aby io han̈ano asa fitorian̈a, aviô nan̈amia fahifan̈a irô hitaha olo marary ndreky nalemy.​—Mat. 10:5-8.

4. Ino raha ianarantsika baka amy fomba nitondrasan’i Jesosy irô olo tsy nijiren’ny fiaraha-monin̈y aby io?

⁴ Jesosy ten̈a tsara fan̈ahy ndreky nan̈isy fôtiny olo aby io. Zen̈y nan̈aboahany fa ten̈a valera aminany ndreky Babany irô olo ailikilikin’ny fiaraha-monin̈y aby io. Ke izikoa anao manompo Jehovah ke mieritreritry fa anao tsisy valerany, diniha karakôry nitondrasan’i Jesosy irô olo tihahay raha momba izy aby io. Fan̈anaovanao raha zen̈y han̈ampy anao hahita fa anao ten̈a misy valerany amy Jehovah.

5. Koràn̈a ino raha nahazo man̈angy araiky nifanôjy Jesosy ta Galilia.

⁵ Jesosy tsy vitan’ny nampianatra irô olo aby io fo fa izy koa nijery olo tsiaraikiaraiky. Ohatra, tamin’izy nanompo ta Galilia, izy fanôjy man̈angy araiky nijaly mare, fôtony nandeha lio lava tan̈atin’ny 12 taon̈o. (Mar. 5:25) Ke tamy Lalàn̈a, izy naloto, ke tsy nahazo nan̈aton̈o olo. Aviô, zay olo nipetapetaka taminany, lôso naloto koa. Ke man̈angy io tsy dia nifanerasera tamin’olo. Aviô, izy koa tsy nahazo niaraka tamin’olo nanompo Jehovah tamy synagoga ndreky tsy nahazo nan̈ano fety niaraka tamindrô. (Lev. 15:19, 25) Ke man̈angy io tsy vitan’ny narary fo fa nahatsapa ten̈a tsisy valerany.​—Mar. 5:26.

6. Karakôry nampajanga man̈angy nandeha lio lava io?

⁶ Tian’ny man̈angy nijaly io Jesosy hitaha izy, fa izy ndraiky tsy direkty nan̈aton̈o Jesosy. Nan̈ino? Izy nety nen̈atra noho ny aretin̈inany io. Na koa izy nety navozo tsao hiroasin’i Jesosy, noho izy nisefasefaka tamin’olo marobe io. Ke ino raha nataony? Izy zisty nitosy lamban’i Jesosy ambelan̈a fo, aviô izy resy lahatra fa raha nataony io efa hampajanga izy edy. (Mar. 5:27, 28) Ten̈a nisy vokany tsara finoan̈anany io, ke izy janga ankitin̈y. Jesosy baka tiô nan̈ontany, azôvy olo nitosy lambanany. Man̈angy io direkty namosa. Ke karakôry nataon’i Jesosy baka tiô?

7. Karakôry fomba nitondrasan’i Jesosy man̈angy nijaly be io? (Marka 5:34)

⁷ Jesosy tsara fan̈ahy ndreky nan̈aja man̈angy. Hitany baka fa man̈angy io “navozo sady nangôrohôro.” (Mar. 5:33) Ke Jesosy tsara fan̈ahy mare ndreky nankahery man̈angy io. Ndray izy aby nikaiky man̈angy io “zanako.” Volan̈a zen̈y nahitan̈a fa Jesosy tsy vitan’ny nan̈aja izy fo fa tsara fan̈ahy ndreky tia izy koa. (Vakia Marka 5:34.) Tamin’io zaraiky fo ahitan̈a amy Baiboly ao fa Jesosy nikaiky man̈angy “zanako.” Mety nampiasa volan̈a io izy, fôtony hitany fa man̈angy io navozo mare. Misora nahivankivan̈a man̈angy io baka tiô. Izikoa Jesosy tsy nankahery izy, izy nety janga ndraiky, fa izy mbala nan̈amelo-ten̈a fo. Ke Jesosy tsy vitan’ny tihampajanga izy fo fa, tiany ho hainy koa fa izy zanaka ten̈a valera mare amy Babany be fitiavan̈a an-dan̈itry an̈y.

8. Ino aby raha sarotro natrefin’ny ranabavy araiky baka a Brezily?

⁸ Amy ziôty koa, misy mpanompon’i Jehovah sasany mijaly baka amin’ny aretin̈y, ke raha zen̈y misy vokany amy fihetseham-pôndrô koa. Karaha zen̈y Maria,a ranabavy mpisava lalan̈a baka a Brezily. Rango izy vo teraka, izy fa tsisy vity ndreky tsisy tan̈ana ankavia. Ho izy: “Zaho nampijalin’ny tsaiky ta lekolinay tan̈y fo baka tamin’ny antsanaka io. Ndray zaho aby namezandrô an̈aran̈a ratsy mare. Firaka amin’ny havako koa mbala nan̈avakavaka zaho.”

9. Akôry nahaizan’i Maria fa izy ten̈a valera amy Jehovah?

⁹ Ino fo raha nan̈ampy Maria? Izikoa izy fa nanjary Vavolombelon̈on’i Jehovah, irô mpiara-manompo aby io nankahery ndreky nan̈ampy izy hahita karakôry fiheveran’i Jehovah izy. Ho izy: “Naro ranadahy ndreky rahavavy nan̈ampy zaho. Ke amy fônaka jiaby, zaho man̈ano mersy Jehovah, noho izy nan̈amia zaho fianakavian̈a ara-pan̈ahy tsara be karaha ty.” Ke irô rahalahy ndreky ranabavy aby io nan̈ampy Maria hahita fa izy ten̈a valera amy Zan̈ahary.

10. Ino raha nahazo Maria Magdalena, aviô karakôry raha tsapany? (Zahava koa sary.)

¹⁰ Diniha koa fomba nataon’i Jesosy nan̈ampy Maria Magdalena. Izy efa navy nisy demony fito aby! (Lioka 8:2) Irô demony aby io tsy maintsy nahavy izy tafan̈ano raha hafahafa. Ke izy nilifilifasan’olo. Man̈angy io mety nahatsapa nijaly mare, navozo, tsisy olo tia ndreky nan̈ampy. Nadoson’i Jesosy demony nampijaly izy io, aviô Maria lôso mpan̈ara-dia Jesosy. Karakôry koa nataon’i Jesosy nan̈ampy Maria hahita fa izy ten̈a valera tamy Zan̈ahary?

11. Karakôry nataon’i Jesosy nan̈ampy Maria Magdalena hahita fa izy valera mare tamy Zan̈ahary? (Zahava koa sary.)

¹¹ Jesosy nikaiky Maria hiaraka tamindrô nandeha nitory.b Ke vokany, Maria afaka naharen̈y Jesosy nampianatra olo. Jesosy koa niboaka tamy Maria tamin’ny andra namilaoman̈a izy. Maria olo voanalohan’ny nikoran̈any tamin’ny andra io. Jesosy aby nan̈iraka Maria nikoran̈a tamin’ny apostolinany aby io fa izy efa velon̈o. Tamy raha jiaby zen̈y, Jesosy nan̈ano raha nahatsapan’i Maria fa izy valera mare tamy Jehovah!​—Jaona 20:11-18.

12. Nan̈ino raha niain̈an’i Lidia nahavy izy nahatsapa fa izy tsisy dikany?

¹² Amy ziôty, maro koa olo maharen̈y mijaly karaha Maria Magdalena in̈y, fôtony tsy jiren’olo. Karaha zen̈y Lidia, ranabavy baka an Espagne ty. Talohan’izy teraka, mamany efa seky han̈adoso izy, ho izy. Aviô tsaroany fa tamin’izy efa tsaiky man̈angy, mamany tsy nijery izy ndreky nanihitihy izy. Ho Lidia: “Tanjon̈onaka tamy fiain̈ana, zaho tiako ho tian’olo. Mamako baka nan̈ano raha hahavy zaho hieritreritry fa zaho olo tsy manjary. Ke zaho navozo tsao tsy ho tian’olo.”

13. Ino raha nan̈ampy Lidia hahita fa izy ten̈a valera amy Jehovah?

¹³ Lidia koa fa nianatra fahamarin̈ana, vavaka ndreky fianaran̈a manokan̈a, aviô hatsaram-pan̈ahindrô mpiara-manompo aby io nan̈ampy izy hahita fa izy ten̈a valera tamy Jehovah. Ho izy: “Vadiko matetiky mivolan̈a aminaka fa izy tia zaho mare. Matetiky izy mampatsiaro zaho irô toetrinaka maro tsara. Mira zen̈y koa raha nataondrô namako aby io taminaka.” Ke misy olo ma an̈y hitanao mila ampian̈a, baka hahita fa izy ten̈a valera amy Jehovah?

ATAOVA MITOVY AMY NIN’I JEHOVAH FOMBA FAHITANAO ANAO

14. Nan̈ino 1 Samoela 16:7 man̈ampy atsika hahita fomba fiheveran’i Jehovah olo? (Zahava koa efajoro “Nan̈ino Valera amy Jehovah Vahoakanany?”)

¹⁴ Aleva onon̈o fa tsy mira amy fomba fahitan’i Jehovah anao fahitan’olo amy donia ty anao. (Vakia 1 Samoela 16:7.) Amy Jehovah, mampisy valera anao, tsy miankin̈y amin’ny hatsaran̈an’ny soranao na vatan̈anao, na toeran̈anao amy fiaraha-monin̈y ndreky fianaran̈a vitanao. (Isaia 55:8, 9) Ke fomba fiheveran’i Jehovah anao fo zahava, fa tsy fomba fiheveran’ny donia ty anao. Baiboly mikoran̈a tantaran’olo nahatsapa ten̈a tsisy dikany, karaha ataon’i Elia, Naomy ndreky Hana. Ke anao koa mamaky tantarandrô io, aleva onon̈o karakôry fitiavan’i Jehovah irô. Anao koa mety mieritreritry raha nandalo tamy fiain̈ananao, ke ahitanao fa Jehovah ten̈a tia anao ankitin̈y. Aviô, anao koa mbala mety mandiniky irô fan̈azavan̈a momba fahatsapan̈a ten̈a ho tsisy dikany, amindrô lahatsoratra naboakan’ny fandaminan̈a.c

15. Nan̈ino ma Daniela “valera mare” tamy Jehovah? (Daniela 9:23)

¹⁵ Aleva onon̈o fa anao tsy mivadiky mahavy anao valera amy Jehovah. Ohatra, tamy Daniela kadiriny 100 taon̈o, izy “reraka mare” sady kivy. (Dan. 9:20, 21) Karakôry nataon’i Jehovah nankahery izy? Izy nan̈iraka anjely Gabriela nampatsiaro izy fa izy “valera mare”, ndreky nivolan̈a taminany fa vavakanany nitandrin̈esan’ny Zan̈ahary. (Vakia Daniela 9:23.) Ino ma nahavy Daniela valera mare tamy Zan̈ahary? Maro tsara toetrinany, fa ten̈a nampiavaka izy, izy olo marin̈y ndreky tsy nivadiky. (Ezek. 14:14) Nisoratin’i Jehovah an̈aty Volan̈anany tantara zen̈y baka hankahirezan̈a atsika. (Rom. 15:4) Jehovah koa mitandren̈y vavakanao. Misy valera aminany mare koa anao, fôtony tia raha marin̈y ndreky tsy mivadiky.​—Mika 6:8, l.p.a.; Heb. 6:10.

16. Ino han̈ampy anao hahita fa Jehovah io Baba be fitiavan̈a?

¹⁶ Jehovah ataova mira babanao ten̈a tia anao in̈y. Izy tihan̈ampy anao, fa tsy hitsakaraka raha tsy mety ataonao. (Sal. 130:3; Mat. 7:11; Lioka 12:6, 7) Fangalan̈a onon̈o zen̈y nan̈ampy olo maro efa navy nahatsiaro ten̈a tsisy dikany. Ohatra araiky amy zen̈y Ranabavy Michelle, baka an’Espagne. Tan̈atin’ny taon̈o maro vadiny nanihitihy izy. Raha zen̈y nahavy izy nahatsapa ten̈a tsy nijiren̈a ndreky tsisy dikany. Ho izy: “Zaho koa fa mahatsapa ten̈a tsisy kôntiny in̈y, zaho mieritreritry Jehovah man̈onjon̈o zaho, ndreky izy tia zaho mare, aviô miaro zaho.” (Sal. 28:9) Ranabavy Lauraine ndraiky, baka an Afriky Atsimo. Karaha ty ho izy: “Matoa Jehovah tia zaho ndreky nankahery zaho, aviô mbala nan̈ano raha nahavy zaho hifandray aminany fo tan̈atin’ny taon̈o maro zay, ke nampiasa zaho hampianatra olo, dikan’izen̈y zaho valera aminany, ndreky misy kôntiny.”​—Hosea 11:4.

17. Ino raha man̈ampy anao hatoky fa Jehovah mankasitraka anao? (Salamo 5:12) (Zahava koa sary.)

¹⁷ Matokisa fa anao ankasitrahin’i Jehovah. (Vakia Salamo 5:12.) Fankasitrahan’i Jehovah io nampiran̈in’i Davida tamin’ny “ampinga maventy” miaro olo marin̈y. Izikoa anao mieritreritry fa anao tsisy dikany, hiaro anao fahaizanao fa anao ankasitrahin’i Jehovah ndreky izy manohan̈a anao. Ke akôry ahazainao fa anao ankasitrahin’i Jehovah? Erakany efa hitantsika tiô in̈y, Jehovah man̈amia toky anao amy Volan̈anany ao. Aviô koa, izy mampiasa irô anti-pan̈ahy aby io, olo ten̈a namanao, aviô olo hafa koa hampatsiaro anao fa anao misy valerany aminany. Ke akôry tôkony hataonao, izikoa fa misy olo mivolan̈a raha tsara momba anao?

18. Nan̈ino anao tôkony han̈eky teny fideran̈a ataon’olo aminao?

¹⁸ Izikoa olo mahay ndreky tia anao aby io mivolan̈a raha tsara momba anao, aza famaran̈a raha volan̈indrô zen̈y. Aleva onon̈o fa Jehovah mety hampiasa irô io han̈ampy anao hahita fa anao ten̈a ankasitrahiny. Michelle nikoran̈intsika taloha tiô in̈y nivolan̈a: “Zaho lôso natoky tsihelihely irô volan̈a feno hatsaram-pan̈ahy nataon’olo taminaka. Sarotro taminaka ndraiky nino zen̈y, fa haiko fa zen̈y raha tian’i Jehovah hataoko.” Faran-draha nan̈ampy Michelle koa fitiavan̈a ndreky ezaka mare nataondrô anti-pan̈ahy aby io nan̈ampy izy. Izy iziôty mpisava lalan̈a sady mpiasa an-tsitrapô man̈ano asan’ny Betela baka an-tran̈o.

19. Nan̈ino atsika mety matoky fa atsika io misy valerany amy Zan̈ahary?

¹⁹ Jesosy ten̈a tsara fan̈ahy. Ke izy mampatsiaro atsika fa atsika ten̈a misy valerany amy Babantsika an-dan̈itry an̈y. (Lioka 12:24) Ke matokisa fa olo misy valerany fahitan’i Jehovah atsika. Ke irarian̈a atsika tsy han̈adin̈a zen̈y foeky! Aviô koa, irarian̈a atsika han̈ano erakany vitantsika, han̈ampy olo hahita fa irô koa ten̈a valera amy Zan̈ahary.