Diniha Jesosy Mpisôron̈obe Mahay Mahinakinaka Atsika Io

1-2. a) Nan̈ino ma Jehovah nan̈iraka Zanany nandeha tambony tany teto? b) Ino raha hidinihintsika amy lahatsoratra ty? (Hebreo 5:7-9)

EFA kadiriny 2 000 taon̈o zay lôso, Jehovah Zan̈ahary nan̈iraka Zanany ten̈a tiany nandeha tambony tany teto. Nan̈ino? An̈abon’ny raha jiaby, hankafaka olo amy fahotan̈a ndreky fahafatesan̈a ndreky han̈adoso raha ratsy jiaby vokatran’ny raha nataon’i Satana diany teto. (Jaona 3:16; 1 Jaona 3:8) Fa hain’i Jehovah koa fa fiain̈anan’i Jesosy tamin’izy olombelon̈o teto, nan̈oman̈a izy hanjary Mpisôron̈obe mahay mahinakinaka atsika. Jesosy nanomboko nan̈ano andraikitrinany zen̈y tafaran’ny batisanany, tamy taon̈o 29.a

² Amy lahatsoratra ty, atsika handiniky fa fiain̈anan’i Jesosy tambony tany teto nan̈ampy izy hanjary Mpisôron̈obe mahay mahinakinaka. Ke izikoa mazava amintsika tsarabe fa izy “natao lavorary” amin’ny andraikitrinany io, ho moramora amintsika han̈aton̈o Jehovah, ndray atsika kivy baka amy fahotan̈a nataontsika na fahalimian̈antsika.​—Vakia Hebreo 5:7-9.

NAVY TAMBONY TANY TETO ZANAKA ZAN̈AHARY TEN̈A TIANY

3-4. Ino ivolan̈ana fa niovaova fiain̈anan’i Jesosy tamin’izy navy tambony tany teto?

³ Maro amintsika iziô miatriky fiovoan’ny fiain̈ana, karaha ataon’ny lôso miala tran̈ontsika fa mandeha mifindra lavitry be, na miala fianakavian̈a ndreky kamarady. Mety ho sarotro fiovoan’ny fiain̈ana karaha zen̈y. Fa tsisy olo niovaova fiain̈ana karaha Jesosy. Tan-dan̈itry tan̈y, izy anjely voanalohany ndreky faran’ny an̈abo tamin’ny anjely jiaby. Aviô izy ten̈a tian’i Jehovah, ke ravoravo fo izy nanompo ‘tankavanan̈an’ny’ Zan̈ahary. (Sal. 16:11; Ohab. 8:30) Fa Filipianina 2:7 mivolan̈a fa “nialany raha jiaby nanan̈any.” Dikan’izen̈y, nialany toeran̈a an̈abo nanan̈any tan-dan̈itry tan̈y, fa izy nandeha niaraka niain̈y tamin’olo tsy lavorary tambony tany teto.

⁴ Diniha koa fiain̈anan’i Jesosy tamin’izy vo teraka. Hita baka tamy raha namezan’ny oloben’i Jesosy, tafaran’izy vo teraka in̈y fa olo nitarimy izy io olo tsy nanan̈a. (Lev. 12:8; Lioka 2:24) Aviô Heroda Mpanjaka ratsy fan̈ahy koa fa nahay fa Jesosy teraka, izy nila hamono Jesosy. Baka hilifasan̈a Heroda io, raimandrenin’i Jesosy nitondra izy nilefa ta Ezipty, ke nidôkodôko tan̈y hely. (Mat. 2:13, 15) Ten̈a tsy nira fiain̈anan’i Jesosy talohan’ny naviany tambony tany teto raha zen̈y!

5. Ino raha hitan’i Jesosy tamin’izy tambony tany teto, aviô nan̈ino raha zen̈y nan̈oman̈a izy tamin’ny andraikitrinany Mpisôron̈obe io? (Zahava koa sary.)

⁵ Tamy Jesosy tambony tany teto, hitany jalin’olo nan̈odidin̈y izy. Hain’i Jesosy koa karakôry maty havan̈a zen̈y, fôtony izy tsy maintsy nahita olo naty, an̈atin’izen̈y Josefa babany nitarimy izy. Tamin’izy nitory koa, izy nahita olo boka, jamba, nalemy, ndreky raimandreny naty zanaka, ke izy ten̈a nahinakinaka irô. (Mat. 9:2, 6; 15:30; 20:34; Mar. 1:40, 41; Lioka 7:13) Marin̈y ndraiky fa efa hitany jalin’olo tambony tany teto rango izy tan-dan̈itry tan̈y. Fa izy navy tambony tany teto nahita tsarabe, karakôry olo mijaly zen̈y. (Isaia 53:4) Fiain̈anan’i Jesosy tambony tany teto nahaizany jalin’olo ndreky hirifirin’ny mijaly zen̈y. Aviô Jesosy nahay kajo, kivy, nalahelo, karaha olombelon̈o jiaby fo.

JESOSY NAHINAKINAKA OLO

6. Ino sarin-teny nampiasain’ny mpaminan̈y Isaia, ke mampianatra atsika fa Jesosy mahinakinaka olo? (Isaia 42:3)

⁶ Tamy fanompoan̈anany jiaby tambony tany teto, Jesosy nahinakinaka irô olo tsy niraharahin’olo ndreky nambanimbanin’olo. Nan̈atanteraka faminanian̈a izy tamy zen̈y. Amy Soratra Hebreo ao baka, ndraikindraiky olo matanjaka finoan̈a ndreky fatatra ain̈y, ampiran̈iny amy zaridain̈y araiky mamokatra ndreky kakazo araiky maventy sady an̈abo. (Sal. 92:12; Isaia 61:3; Jer. 31:12) Fa olo masikiny ndreky tsy asian’olo fôtiny, ampitovisiny amy bararata folaka, ndreky ponjan’ny lalampon̈o (na lamesin’ny lalampon̈o) efa hofoaty in̈y. Dikan’izen̈y, raha efa tsy ho mety ampiasain̈y foeky. (Vakia Isaia 42:3; Mat. 12:20) Mpaminan̈y Isaia nahazo fan̈ahy masin̈y nanoratra sarin-teny aby io. Irô io ivolan̈ana fa Jesosy tia ndreky mahinakinaka irô olo hiverin’olo fa tsisy kôntiny.

7-8. Akôry nan̈atantirahan’i Jesosy faminanian̈an’Isaia in̈y?

⁷ Nampiharin’i Matio tamy Jesosy volan̈an’i Isaia ty: “Izy tsy hanôrotôro bararata folaka, aviô ponjan’ny lalampon̈o efa hofoaty tsy hivoneny.” Nahazo hatsaran̈a baka tamy fahagagan̈a nataon’i Jesosy irô olo tsy nasian’olo fôtiny aby io, efa nira bararata folaka ndreky efa tsy nanan̈a fan̈antinan̈a karaha ponjan’ny lalampon̈o efa hofoaty in̈y. Fa nisy lelahy araiky feno habokan̈a koa nitahan’i Jesosy. Sambarany fa tsy ho janga foeky izy ke tsy hahavita hifanerasera amin’ny havany ndreky kamaradiny eky. (Lioka 5:12, 13) Aviô nisy lelahy maren̈iny sady mireki-dela koa nitahany. Nisora ravoravo mare izy nahita olo nikoran̈a ndreky naharen̈y raha nivolan̈in’olo, fôtony izy taloha tsy nahay raha nivolan̈in’olo foeky. (Mar. 7:32, 33) Fa tsendriky jiaby zen̈y.

⁸ Tamy Jesosy tambony tany teto, naro Jiosy nino fa sazy baka tamy fahotan̈a nataondrô na nataon’olobendrô nahavy olo araiky marary na malemy. (Jaona 9:2) Baka amy finoan̈a raha tsy marin̈y karaha zen̈y mahavy olo mijaly ndreky mahatsiaro tsy fôtiny foeky. Fa Jesosy nan̈atanteraka faminanian̈an’Isaia in̈y, ke nitahany irô olo nijaly aby io, aviô nampianariny irô fa Zan̈ahary ten̈a tia irô ndreky mikarakara irô. Ino raha ianarantsika amy zen̈y, momba fiheveran’i Jesosy atsika amin’ny andra iziôty?

9. Akôry han̈azavan’ny Hebreo 4:15, 16 fa Mpisôron̈obentsika io ten̈a mahinakinaka olo tsy lavorary?

⁹ Vakia Hebreo 4:15, 16. Matoky atsika fa Jesosy hahinakinaka atsika fo koa. Ino ma dikan’izen̈y? Olo mahinakinaka olo zen̈y mahay jalin’olo ndreky mihevitry raha tsapan’olo. Dikan’ny volan̈a griky “mahinakinaka olo” zen̈y, miain̈y raha mahazo olo ndreky mahatsapa raha tsapany. (Zahava koa Hebreo 10:34, Paoly amizio mampiasa verba griky mira izio fo.) Fahagagan̈a nataon’i Jesosy in̈y ahitan̈a fa izy ten̈a mahay jalin’olo. Tsy noho ny adidy fo nahavy izy nitaha olo, fa izy tia irô ndreky tihan̈ampy irô. Ohatra, tamin’izy nitaha lelahy boka in̈y anie, vitany nandronton̈o baka lavitry, baka lelahy io janga! Fa izy nan̈aton̈o, nitana lelahy io. Ke nety izy olo voanalohany nitosy lelahy io tan̈atin’izy boka tan̈atin’ny taon̈o maro. Karaha zen̈y koa tamy Jesosy nitaha lelahy araiky maren̈iny in̈y. Nindesiny lavidavitry olo maro izy nitaha izy. Aviô tamy Fariseo araiky tsy nan̈isy fôtiny man̈angy araiky nibebaka, nanasa vitin’i Jesosy tamy ranomasonany ndreky nampamaiky izio tamy fan̈evanany in̈y, narovan’i Jesosy mare man̈angy io. (Mat. 8:3; Mar. 7:33; Lioka 7:44) Jesosy tsy nilefa olo marary ndreky nalemy, aviô irô olo mpanota mare aby io. Ndray izy nandray irô, nahinakinaka irô, ndreky tia irô mare. Matoky koa atsika fa izy ten̈a mahinakinaka atsika.

ALEVA TAHAKA MPISÔRON̈OBENTSIKA IO

10. Ino aby fitaovan̈a ampiasaintsika amy ziôty han̈ampian̈a olo maren̈iny ndreky jamba? (Zahava koa sary.)

¹⁰ Atsika io mpan̈ara-dia Jesosy, ke mifen̈y atsika ho tia olo, mandiniky raha mahazo irô, aviô mahinakinaka, karaha nataon’i Jesosy in̈y. (1 Pet. 2:21; 3:8) Atsika ndray tsy mahavita mitaha olo maren̈iny ndreky jamba, atsika mahavita man̈ampy irô hianatra ndreky hifandray amy Jehovah. Ohatra, irô boky ndreky gazety aby io iziôty, efa misy amy tenin’ny tan̈ana mandilatran’ny 100. Aviô nin’olo tsy mahita tsara aby io koa, misy amy braille amy volan̈a mandilatra 60, ndreky feo man̈azava sary amy video aby io efa amy volan̈a mandilatra 100 aby. Irô fitaovan̈a aby io man̈ampy irô olo maren̈iny ndreky jamba aby io hifandray marikitry amy Jehovah ndreky Jesosy.

11. Karaha nataon’i Jesosy in̈y, akôry koa ataon’ny fandaminan̈an’i Jehovah mahinakinaka karazan̈an’olo jiaby? (Asan’ny Apostoly 2:5-7, 33) (Zahava koa sary.)

¹¹ Fandaminan̈an’i Jehovah mifen̈y mare man̈ampy olo amy tany jiaby hifandray marikitry amy Jehovah. Zahava fo tafaran’i Jesosy nivilômin̈y in̈y, izy nandatsaka fan̈ahy masin̈y, baka olo jiaby nivory tamy fetin’ny Pantekôty naharen̈y vaovao tsara, tamy “volan̈andrô tsiaraikiaraiky.” (Vakia Asan’ny Apostoly 2:5-7, 33.) Fandaminan̈an’i Jehovah koa amy ziôty, man̈araka fitaritan̈an’i Jesosy, ke man̈aboaka boky amy volan̈a mandilatra 1000 aby. Sasany amizio volan̈a fampiasain’olo vitsivitsy fo. Ohatra, sasany amy volan̈a amérindien, olo mipetraka an’Ameriky Avaratra ndreky Ameriky Atsimo fo mampiasa izio. Fa kanefa irô raha aboaka amy volan̈a io, misy amy volan̈a mandilatran’ny 160, baka olo maro maharen̈y vaovao tsara io. Irô raha aboakantsika aby io koa misy amy volan̈a rômania mandilatra 20. Mandeha andrivony andrivony koa olo mampiasa volan̈a aby io nanjary nan̈eky fahamarin̈ana.

12. Ino ma raha ataon’ny fandaminan̈an’i Jehovah nin’olo amin’ny andra iziôty?

¹² Fan̈ampin’ny ezaka ataon’ny fandaminan̈an’i Jehovah baka olo maharen̈y vaovao tsara io, izio koa man̈ampy olo maro mijaly baka amin’ny antambo mandalo. Baka hahavitan̈a zen̈y, misy mpiasa an-tsitrapô mandeha andrivony aby, man̈ampy irô rahalahy ndreky ranabavintsika sahiran̈a aby io. Fandaminan̈a koa man̈ampy olo hahazo toeran̈a tsotra, hahavitandrô miaraka mivory ndreky mianatra raha maro momba fitiavan’i Jehovah irô.

MAHAVITA MAN̈AMPY ANAO MPISÔRON̈OBENTSIKA IO

13. Ino raha sasany ataon’i Jesosy han̈ampian̈a atsika?

¹³ Jesosy io tsiman̈aja tsara fan̈ahy, ke izy mandiniky raha jiaby ilaintsika, baka atsika hifandray marikitry amy Jehovah fo. (Jaona 10:14; Efes. 4:7) Ndraikindraiky atsika mety ho kivy, ke karaha bararata folaka ndreky ponjan’ny lalampon̈o efa hofoaty in̈y. Mety baka amin’ny atsika marary fatatra mahavy zen̈y, na nan̈ano hadisovan̈a, na tsy fankahazo amin’olo fiangonan̈a araiky amintsika. Na koa sarotro amintsika mieritreritry fan̈antinan̈a anan̈antsika momba ny amaray io, aviô atsika mety hieritreritry problemontsika ndreky jalintsika fo. Aza adin̈a fa Jesosy mahita raha iaretanao ndreky mahay raha jiaby an̈aty fônao an̈y. Jesosy mahinakinaka anao, ke zen̈y mahavy izy tihan̈ampy anao. Ohatra, lera anao mahatsiaro malemy in̈y, izy mety mampiasa fan̈ahy masin̈y han̈amia angôvo anao. (Jaona 16:7; Tit. 3:6) Aviô izy koa mety hampiasa irô ‘lelahy natao kadô’ aby io, ndreky mpiara-manompo aby io hankahery, hanohan̈a ndreky han̈ampy anao.​—Efes. 4:8.

14. Izikoa atsika kivy, ino raha tôkony hataontsika?

¹⁴ Izikoa anao kivy, aleva onon̈o fo Jesosy Mpisôron̈obentsika, aviô diniha mare andraikitrinany zen̈y. Aza adin̈a koa fa tsy han̈amia vidim-pan̈avotan̈a fo dianany tatỳ, fa izy navy tatỳ misy ahaizany tsarabe problemo mahazo atsika olombelon̈o tsy lavorary. Izikoa atsika kivy noho ny fahotan̈a na misy fahalimian̈a, Jesosy vôn̈ono han̈ampy atsika “amy fotoan̈a mety.”​—Heb. 4:15, 16.

15. Koràn̈a tantaran’olo araiky niala tamin’ny andian’ny ôndrikôndrikin’i Jehovah, ke nampian̈a nimpody tamy fiangonan̈a.

¹⁵ Jesosy koa mitariky vahoakanany hifen̈y hitady ndreky han̈ampy irô olo niala tamin’ny andian’ny ôndrikôndrikin’i Jehovah. (Mat. 18:12, 13) Diniha baka Stefano.b Tafaran’ny izy nadoso tsy an̈isan’ny fiangonan̈a tan̈atin’ny 12 taon̈o, izy nanapa-kevitry handeha hivory. Ho izy: “Ten̈a tsy nora taminaka raha zen̈y, fa zaho nandeha fo, fôtony zaho tihanompo Jehovah miaraka amindrô rahalahy ndreky anabaviko aby io ndraiky koa. Irô anti-pan̈ahy aby io nandray zaho tsarabe. Fa ndraikindraiky zaho karaha mahatsapa ten̈a tsy mendriky foeky. Ke zaho efa tseky kivy. Fa irô rahalahy ndreky ranabavy aby io nampatsiaro zaho fa tsy tian’i Jehovah ndreky Jesosy zaho ho kivy. Ke zaho koa fa navoaray, fiangonan̈a jiaby nan̈aboaka fa tia zaho. Aviô vadiko koa nianatra Baiboly, ke zahay iziôty efa miaraka manompo Jehovah.” Ten̈a ravoravo Mpisôron̈obentsika io, izikoa mahita olo mibebaka aby io mahazo fan̈ampian̈a ilaindrô, ke mimpody amy fiangonan̈a!

16. Nan̈ino atsika mankasitraka mare manan̈a Mpisôron̈obe mahay mahinakinaka atsika io?

¹⁶ Tamy Jesosy tambony tany teto, izy nan̈ampy olo faran’ny maro, tamy fotoan̈a mety tsarabe. Iziôty koa atsika matoky fa Jesosy han̈ampy atsika, isaka atsika mila ampian̈a. Aviô amy donia vaovao efa tsy ho ela io koa, izy han̈ampy lan̈iany olo tia man̈araka volan̈an’i Jehovah, ho afaka amy fahotan̈a ndreky tsy fahalavorarian̈a. Ten̈a mankasitraka Jehovah Zan̈ahary atsika, fôtony baka amin’izy be fitiavan̈a ndreky famindram-pônany, izy nan̈ano Zanany ho Mpisôron̈obe, mahay mahinakinaka atsika!