Tantara 35

Jehovah Man̈amia Lalàn̈a

FANJAVA aroe nialan-drô Israelita aby io Ejipta, irô navy tamy Bongo Sinay. Horeba koa ikahian̈a izio. Tiô baka Jehovah nivolan̈a tamy Mosesy boaka tamy kakazo maniry nirehitry in̈y. Tiô Israelita aby io nitoby.

Mosesy nanonga tan̈abon’ny bongo tan̈y, fa olo jiaby niambin̈y tambany tiô fo. Mosesy koa fa tan̈abon’ny bongo tan̈y, Jehovah nivolan̈a taminany fa tiany Israelita aby io man̈araka volan̈anany ndreky hanjary olo voataokan̈a ninany. Mosesy koa fa nijotso, nitantarainy tamin-drô Israelita aby io raha nivolan̈in’i Jehovah in̈y. Israelita aby io namaly fa tian-drô hanjary olon’i Jehovah, ke irô nivolan̈a han̈araka volan̈a Jehovah.

Nan̈ano raha mampagaga amy zay Jehovah. Nataony nisy setroko niboaka tamy tendron’ny bongo, baka iô nataony nisy varatra nantsintsin̈y be. Volan̈iny tamin-drô: ‘Zaho Jehovah Zan̈aharinarô nitaondra anarô boaka ta Ejipta.’ Nan̈amia didy amy zay izy: ‘Anarô tsy mahazo manompo zan̈ahary hafa, fa Zaho fo.’

Nisy didy na lalàn̈a sivy hafa koa namian’ny Zan̈ahary Israelita aby io. Navozo olo aby io. Irô nivolan̈a tamy Mosesy: ‘Sitrany anao fo mivolan̈a aminay. Zahay baka mavozo, izikoa Zan̈ahary mivolan̈a aminay, tsao zahay maty.’

Tafaran’izin̈y, Jehovah nivolan̈a tamy Mosesy: ‘Manongà aminakahy an̈abon’ny bongo atỳ. Zaho han̈amia anao vato fisaka aroe nanoratako lalàn̈a tiako tandreman’olo aby io.’ Ke Mosesy nimpody tan̈abon’ny bongo tan̈y. Tan̈y izy, 40 andra, 40 alin̈y.

Maro lalàn̈an’ny Zan̈ahary amian̈a olo aby io. Nisoratan’i Mosesy lalàn̈a aby zen̈y. Zan̈ahary koa nan̈amia Mosesy vato fisaka aroe. Amy zio nanoratan’ny Zan̈ahary lalàn̈a folo nivolan̈iny tamin’olo aby io. Didy Folo ikahian̈a izio.

Misy valerany Didy Folo aby zen̈y. Karaha zen̈y koa lalàn̈a maro hafa namian’ny Zan̈ahary Israelita aby io. Ty araiky amy lalàn̈a aby zen̈y: ‘Tiava amy fônao jiaby, jerinao jiaby, fan̈ahinao jiaby, ndreky angôvonao jiaby, Jehovah Zan̈aharinao.’ Ty koa araiky: ‘Tiava namanao karaha ataonao tia ain̈inao.’ Jesosy Kristy, Zanaka Zan̈ahary koa nivolan̈a fa irô’roe zen̈y didy farany maventy namian’ny Zan̈ahary Israely olonany. Afara an̈y atsika mbala hianatra raha maro mikasiky Zanaka Zan̈ahary ndreky raha nampianariny.

Eksodosy 19:1-25; 20:1-21; 24:12-18; 31:18; Deoteronomia 6:4-6; Levitikosy 19:18; Matio 22:36-40.