Israelita aby io Tsy Nitana Volan̈andro

Jehovah nivolan̈a tamy Mosesy: ‘Manongà aminaka amy bongo atỳ anao. Hisoratiko amy vato fisaka lalàn̈anaka, baka io hamiako anao.’ Nanonga bongo io Mosesy, ke nidoko tan̈y 40 andra ndreky 40 alin̈y. Tamy zen̈y Jehovah nanoratra Didy Folo tamy vato fisaka aroe, baka io namiany Mosesy iro io.

Koa fa elaela, sambarandro Israelita aby io nan̈adin̈a iro Mosesy. Iro amy zay nivolan̈a taminy Arona: ‘Zahay mila olo hitariky zahay. Han̈amboara Zan̈ahary atsika!’ Arona nivolan̈a: ‘Amia atỳ basy volamenanaro.’ Niravan̈iny volamena jiaby, baka io niasany sariny zanaka aomby. Olo jiaby nivolan̈a: ‘Zanaka aomby io Zan̈ahary nitondra atsika baka ta Ezipta!’ Iro nanompo zanaka aomby volamena io, ke iro nan̈ano fetibe. Tsy mety ma zen̈y? Ia, fotony iro efa nivolan̈a fa iro hanompo Jehovah zaraiky fo. Iro nivadiky tamy volan̈a nataondro.

Hitany Jehovah raha nataondro io, ke izy nivolan̈a tamy Mosesy: ‘Mijotsoa amindro an̈y anao. Iro tsy man̈araka volan̈anaka, fa iro manompo zan̈ahary tsy izy.’ Mosesy nijotso, nitondra vato fisaka aroe in̈y.

Izy koa fa nahainarikitry toby tio, izy naharen̈y olo aby io nihira. Zahavany iro fa mitsinjaka, baka io mandohaliky amy sariny zanaka aomby io. Neloko mare Mosesy. Natrekiny tamy tany vato fisaka aroe in̈y, ke torotoro. Baka tio nitorotoroeny koa zanaka aomby io. Izy amy zay nan̈ontany Arona: ‘Ino loatra ma raha nivolan̈indro taminao nahavy anao nan̈ano raha karaha ty?’ Arona nivolan̈a tamy Mosesy: ‘Basy eky zay. Jerindro olo aby io efa tsy vaovao aminao. Iro nila zan̈ahary, ke niravan̈iko volamenandro jiaby, ke zanaka aomby io raha niboaka baka tao!’ Arona tsy tokony ho nan̈ano zen̈y. Mosesy nimpody tamy bongo tan̈y ndraiky, nangataka tamy Zan̈ahary han̈ambela hadisovan̈anolo aby io.

Nambelany Jehovah hadisovan̈anolo nan̈araka volan̈anany. Iro Israelita aby io ten̈a tokony nan̈eky volan̈a Mosesy, fotony izy nirahiny Jehovah nitariky iro.