Hatsarà fanompoan̈anao —Mitarita Koran̈a Mety Ahavitan̈a Mitory

Nitariky koran̈a tamy man̈angy samaritanin̈y in̈y Jesosy, ke zen̈y nahavitany nitory tsy arapotoan̈a taminany. Akory koa hahavitantsika hitariky koran̈a aminolo tsy haintsika, hankatsaran̈a fanompoan̈antsika?

• Alohany anao hikoran̈a aminolo, aboaha izy fa anao tsara fan̈ahy. Ndray kajo Jesosy, izy nizaha hevitry tsotra hitaritan̈a koran̈a: Nangataka rano tamy man̈angy in̈y izy. Anao koa mety man̈ano mbalatsara olo hitaritan̈a koran̈a, na mikoran̈a momba toetrandra, na vaovao farany. Aza adin̈a fa hitariky koran̈a tanjon̈onao voanalohany, ke anao mety mivolan̈a zay raha hitanao mety hampikoran̈a izy. Olo io koa tsy mijery koran̈anao, aza rivan̈a fa mangataha korazy amy Jehovah, avio mifindrà aminolo hafa koa.—Ne 2:4; As 4:29.

• Mizahava hevitry fo hampidiran̈a koran̈a momba vaovao tsara, fa aza meky loatra fo. Ambilà lera koran̈a efa mandeha anao vo mampiditry izio. Izikoa anao malaky mampiditry koran̈anizio, mety tsy hanohy koran̈anaro izy, fotony mety tsy ho tiany izio. Anao koa mbala tsendriky tafitory, kanefa koran̈anaro efa tapaka, aza kivy. Izikoa anao tsy masaky mampiditry koran̈a momba vaovao tsara io, mifen̈a fo mitady hevitry baka anao zatra mitariky koran̈a aminolo, ndray tsy hitory tanjon̈onao aminio. [Alifasa video 1, avio iaraha midiniky.]

• Mizahava hevitry fo hikoran̈ana raha inoanao, avio aboaha fa izio ten̈a tafiditry an̈aty fônao, amy zen̈y olo io manjary tihahay momba izio ke izy han̈ontany. Nikoran̈a raha nanaitry man̈angy in̈y Jesosy, baka izy han̈ontany. Izy koa fa nampiditry koran̈a momba vaovao tsara, izy namaly fan̈ontanian̈any man̈angy io. [Alifasa video 2, avio iaraha midiniky; alifasa video 3 avio iaraha midiniky.]