Resy Lahatra ma Anao fa Ten̈a Misy Ankitin̈y Zan̈ahary Pamôron̈o Zen̈y?

1. Ino aby raha nampianarin̈y anao momba Zan̈ahary Pamôron̈o?

IZIKOA anao teraka tan̈atiny fahamarin̈ana, mety mbo hely anao efa nianatra momba Jehovah. Nampianarin̈y anao fa izy Pamôron̈o. Nampianarin̈y anao koa fa manan̈a toetry maro tsara izy, avio hivoany paradisa tany ty.​—Gen. 1:1; Asa. 17:24-27.

2. Ino mahavy olo sasany tsy mino fisiany Zan̈ahary Pamôron̈o?

² Maro olo mivolan̈a fa Zan̈ahary zen̈y tsisy. Amindro, Pamôron̈o zen̈y tsisy foeky fa navinavy ho azy fo fiain̈ana. Raha manampahin̈ana maro garamidany aby io zen̈y ho iro, baka tamy raha madiniky nivoatra tsihelihely tan̈atiny fotoan̈a lava be. Sasany aminolo mivolan̈a zen̈y manampahaizan̈a mare. Ke mety hivolan̈a iro fa izikoa siansy edy zahavan̈a, Baiboly io tsy marin̈y. Olo tsy mahay raha na olo bado na olo mora ribiriben̈a fo zen̈y mino fisiany Pamôron̈o io, ho iro.

3. Nan̈ino ma anao ten̈a mila mankafatra finoan̈anao?

³ Izio ma raha volan̈indro manampahaizan̈a aby io mety hahavy atsika hisalasala momba fisiany Pamôron̈o be fitiavan̈a? Diniha antsendriky ino antony mahavy anao mino fa Jehovah ankitin̈y Pamôron̈o. Miankin̈y amy zen̈y ahaizanao mamaly fan̈ontanian̈a io. Mino ma anao fa Jehovah ankitin̈y Zan̈ahary Pamôron̈o, fotony zen̈y raha nambaranolo taminao? Sa anao nangala fotoan̈a nandiniky porofo mankamarin̈y zen̈y? (1 Kor. 3:12-15) Ke na efa ela atsika nanjary Vavolombelon̈o Jehovah na vo tsy ela, atsika mila mankafatatra finoan̈antsika fo. Atsika koa man̈ano zen̈y, tsy ho voafitaka foeky atsika ndray misy olo mivolan̈a fa diso raha ampianariny Baiboly. (Kol. 2:8; Heb. 11:6) Han̈ampy atsika lahatsoratra ty, ke handiniky raha telo aby ty atsika: 1) Ino mahavy olo maro tsy mino fisiany Pamôron̈o? 2) Akory mety hahavy anao ho resy lahatra fa Jehovah ankitin̈y Zan̈ahary namôron̈o atsika? 3) Ino raha mety hataonao baka ho fatatra fo finoan̈anao?

INO MAHAVY OLO MARO TSY MINO ZAN̈AHARY?

4. Koa zahan̈a Hebreo 11:1, miôrin̈y aminino ma ten̈a finoan̈a?

⁴ Misy olo mihevitry fa dikany manan̈a finoan̈a zen̈y, mino raha tsisy porofo. Kanefa izikoa Baiboly zahavan̈a, tsy marin̈y zen̈y. (Vakia Hebreo 11:1.) Hazavainy Baiboly fa ten̈a finoan̈a zen̈y miôrin̈y amy porofo mazava. Maro iziô raha tsy hita maso kanefa ten̈a misy. An̈isanizen̈y Jehovah ndreky Jesosy, baka io Fanjakan̈any Zan̈ahary. (Heb. 11:3) Nanjary Vavolombelon̈o Jehovah manampahaizan̈a araiky momba simỳ (chimie). Ho izy: “Zahay tsy minomino be fahatàny. Zahay koa mandiniky porofo amezany siansy.”

5. Nan̈ino olo maro tsy mino fa Zan̈ahary niasa raha jiaby?

⁵ Maro porofo ahitan̈a fa ten̈a misy ankitin̈y Zan̈ahary niasa raha jiaby zen̈y. Kanefa, maro olo tsy man̈eky fa misy izy, fotony iro tsiary nandiniky porofo aby zen̈y. Karaha zen̈y iziô nambarany Robert. Izy iziô efa Vavolombelon̈o Jehovah. Ho izy: “Zaho taloha nihevitry fa tsisy foeky Pamôron̈o zen̈y, fotony raha zen̈y tsy nampianarin̈y ta lekoly. Efa zaho 22 taon̈o, tamy zaho nianatra Baiboly tamy Vavolombelon̈o Jehovah, vo nahay fa misy Zan̈ahary. Hitako marin̈y tsarabe porofo naboakandro, ke zen̈y nahavy zaho resy lahatra.”b—Zahava “Hafatra Matomboko Handeha amy Raimandreny.”

6. Ino mahavy olo sasany tsy mino Zan̈ahary?

⁶ Sasany ndraiky tsy mino fisiany Zan̈ahary Pamôron̈o, fotony iro zen̈y tsy mino raha tsy hitany masondro. Ny raha mahagaga, misy raha tsy hitany masondro kanefa inoandro. Ohatra: Tsiko. Tsisy olo afaka mahita tsiko, kanefa izio ten̈a misy. Karaha zen̈y tsarabe finoan̈a koran̈iny Baiboly ao, fotony finoan̈a io “fan̈amezan̈a porofo mazava momba raha ten̈a misy, kanefa tsy hitany maso.” (Heb. 11:1) Izikoa olo araiky tihandiniky porofo aby zen̈y, izy mila mahafoe fotoan̈a ndreky angovo. Kanefa maro olo tsy von̈ono han̈ano zen̈y, ke iro mivolan̈a fa Zan̈ahary zen̈y tsisy.

7. Izio ma izikoa fa olo manampahaizan̈a efa tsy mino Zan̈ahary edy? Hazavà.

⁷ Karaha Robert araiky nikoran̈intsika tio in̈y, misy manampahaizan̈a direkty man̈atsoaka hevitry fa Zan̈ahary Pamôron̈o zen̈y tsisy, fotony raha zen̈y tsiary nampianarin̈y iro taminy iniversite. Fa iro koa fa baka nandiniky porofo, iro nanjary resy lahatra fa Zan̈ahary ankitin̈y niasa raha jiaby.c Maro siantifìky nanjary nahay Jehovah ndreky nanjary tia izy. Karaha nataondro siantifìky aby io, atsika koa mila mankafatra finoantsika Zan̈ahary, na ino na ino fianaran̈a vitantsika. Tsisy olo afaka man̈ano zen̈y amy plasintsika.

INO RAHA HAN̈AMPY ANAO HAHAIHO RESY LAHATRA FO?

8-9. a) Ino raha handeha hidinihintsika iziô? b) Ino mahatsara anao mianatra raha momba zavaboary?

⁸ Hainao fa Zan̈ahary ankitin̈y niasa raha jiaby. Akory mety hankafataranao finoan̈anao zen̈y? Ty misy fomba efatra.

⁹ Mianatra momba zavaboary. Hanan̈a finoan̈a matanjaka anao izikoa manokan̈a fotoan̈a handinihan̈a zavaboary. Karaha ataony biby, raha maniry, baka io lakintan̈a. (Sal. 19:1; Isaia 40:26) Arakarakany ianaranao momba raha aby zen̈y, hahaiho resy lahatra fo anao fa Jehovah ankitin̈y niasa raha jiaby. Maro boky ndreky gazety efa naboakany fandaminan̈a man̈azava tsipiriany momba raha niasainy Jehovah. Ke vakia ndreky ianara fo fitaovan̈a aby zen̈y, ndray hitanao sarotro. Ianara zay raha mety hianaranao momba Pamôron̈o. Maro koa video momba zavaboary naboaka tamy fivoriambeny vondroparitry tatoato. Aza adin̈a mizaha video aby in̈y, amy jw.org ao.

10. Man̈ameza ohatra araiky mankamarin̈y fa ten̈a misy ankitin̈y Zan̈ahary Pamôron̈o. (Romanina 1:20.)

¹⁰ Anao koa fa mandiniky zavaboary, diniha tsarabe ino raha ianaranao momba Pamôron̈o. (Vakia Romanina 1:20.) Ohatra, izikoa tsisy masoandra, hofoaty raha manampahin̈ana jiaby ambony tany eto, fotony tsy hahazo hafanan̈a ndreky hazavan̈a. Misy rayons ultraviolets koa alefany masoandra, fa izio tsy din̈inolombelon̈o. Fa nakiry izy, misy karazan̈a gazy matevin̈y na ôzaony mandrakotro tany misy atsika ty. Ke izio miaro atsika amy rayons aby io. Izikoa mahaimaro rayons ultraviolets alefany masoandra, mahaimitombo koa hativen̈any ôzaony io, ke atsika voaro fo. Fahitanao izy, navinavy ho azy ma raha jiaby zen̈y? Sa nisy Pamôron̈o araiky be fitiavan̈a sady ten̈a mahay niasa izio?

11. Aia tany mety hahitanao fan̈azavan̈a han̈ampy anao hatoky tsarabe fa misy ankitin̈y Pamôron̈o? (Zahava “Fitaovan̈a Han̈ampy Anao Hankafatatra Finoan̈anao.”)

¹¹ Hahita fan̈azavan̈a maro momba zavaboary anao, izikoa anao man̈ano fikarohan̈a amy Fanondroana Bokin’ny Vavolombelon’i Jehovah ndreky amy jw.org. Hankafatatra finoan̈anao raha zen̈y. Ke nan̈ino fikarohan̈anao zen̈y tsy komansenao amy lahatsoratra ndreky video “Nisy Namorona Ve?”? Matetiky tsy lava iro io, kanefa ahaizan̈a raha maro momba biby ndreky zavaboary hafa. Koran̈iny ao koa karakory nataondro manampahaizan̈a aby io nangala tahaka zavaboary.

12. Ino aby raha sasany tokony hidinihintsika lera atsika mianatra Baiboly?

¹² Mianatra Baiboly. Taloha, tsy nan̈eky fisiany Pamôron̈o foeky manampahaizan̈a momba simỳ, nikoran̈intsika tamy fehintsoratra faha-4 in̈y. Kanefa niova izy tafara tatỳ. Karaha ty ho izy: “Tsy baka tamy raha nianarako momba siansy fo nahavy zaho iziô mino fisiany Pamôron̈o, fa baka tamy fianarako Baiboly koa.” Mety efa hainao tsarabe raha koran̈iny Baiboly. Kanefa, mila manohy mianatra izio fo anao, izikoa tiho fatatra finoan̈a. (Jos. 1:8; Sal. 119:97) Azonao dinihin̈y iziô, porofo mankamarin̈y raha koran̈iny Baiboly ndreky fomba nampatanteraka faminanian̈a aby ao. Zahava koa nan̈ino mifan̈araka tsarabe raha koran̈inizio. Anao koa man̈ano zen̈y, hahaiho resy lahatra fo anao fa misy ankitin̈y Zan̈ahary be fitiavan̈a sady misain̈y zen̈y, avio Baiboly io baka aminany.d​—2 Tim. 3:14; 2 Pet. 1:21.

13. Man̈ameza ohatra ahitan̈a fa ten̈a mahatsara atsika torohevitry feno fahendrena amy Baiboly ao.

¹³ Anao koa fa mianatra Volan̈a Zan̈ahary, aleva onon̈o nan̈ino mahatsara anao torohevitry amizio ao. Ohatra iziô, efa rango ela Baiboly nampitandrin̈y momba vokadratsiny fitiavambola. (1 Tim. 6:9, 10; Ohab. 28:20; Mat. 6:24) Mbala marin̈y firaka iziô ma fampitandreman̈a zen̈y? Karaha ty koran̈iny boky Miparitaka Karaha Valan̈aretin̈y Fitiavanten̈anolo (angiley): “Vola fo raha an̈atiny jerinolo sasany. Kanefa olo karaha zen̈y ten̈a mora kivy sady tsy ravoravo amy fiain̈ana. Matetiky, olo araiky koa tihahazo vola be, mora idirany asaloha. Maro amindro io manjary tran̈onaretin̈y.” Hitantsika baka amy zen̈y fa ten̈a mahatsara atsika torohevitriny Baiboly man̈iraka atsika tsy ho tia vola. Asa ino torohevitry hafa hitanao nahatsara anao tamy Baiboly tao? Izikoa atsika mankasitraka torohevitry jiaby amy Baiboly ao, hahaiho resy lahatra fo atsika fa Jehovah fo ten̈a mahay raha mahatsara atsika, ke von̈ono fo atsika hitady taridalan̈anany. (Jak. 1:5) Ho sambatra atsika izikoa man̈ano zen̈y.​—Isaia 48:17, 18.

14. Ino raha ho hainao momba Jehovah, anao koa fa mianatra Baiboly?

¹⁴ Hahay Jehovah tsarabe ny ten̈a tanjon̈ontsika koa fa mianatra Baiboly. (Jaona 17:3) Ho hainao toetrinany ndreky ny maha izy izy. Mbala toetrinany aby zen̈y fo koa ho hitanao, anao koa fa mandiniky zavaboary. Fahaizanao toetrinany aby zen̈y hahavy anao ho resy lahatra fa ten̈a misy ankitin̈y izy. (Eks. 34:6, 7; Sal. 145:8, 9) Arakarakany ahaizanao Jehovah, hahavy finoan̈anao ho fatatra. Hitombo koa fitiavanao izy, ke hanjary ho kamarady mare anaro.

15. Ino hatsaran̈a ho azonao izikoa koran̈inao aminolo raha inoanao?

¹⁵ Koràn̈a aminolo raha inoanao. Hahaiho fatatra fo finoan̈anao izikoa anao man̈ano zen̈y. Fa ndraikindraiky olo itorianao mety han̈ontany anao izikoa Zan̈ahary zen̈y misy ankitin̈y. Akory hataonao izikoa tsy azonao antoko raha handeha hivolan̈inao? Man̈anaova fikarohan̈a amy bokintsika aby io misy hahitanao valiny fan̈ontanian̈a io, baka io koràn̈a aminany raha hitanao tao. (1 Pet. 3:15) Mangataha koa fan̈ampian̈a amy pitory zadraharaha. Na ikenolo io fan̈azavan̈a miôrin̈y amy Baiboly nikoran̈inao taminany na tsy ikeny, tsaraova fa mahatsara anao fo fikarohan̈a nataonao aby zen̈y. Hahaiho fatatra fo finoan̈anao. Ary ndray misy olo karaha misy jery na mahay raha mivolan̈a fa Pamôron̈o zen̈y tsisy, anao tsy ho mora voafitakandro.

ANKAFATARA FO FINOAN̈ANAO!

16. Mety han̈ano akory ma finoan̈antsika io izikoa izio tsy ankafatarintsika?

¹⁶ Na firy taon̈o na firy taon̈o nanompoantsika Jehovah, atsika mbala mila mankafatra finoan̈antsika fo. Fotony atsika koa tsy mitandrin̈y, finoan̈antsika io mety hihen̈y. Aza adin̈a fa finoan̈a zen̈y fan̈amezan̈a porofo mazava momba raha ten̈a misy, kanefa tsy hitany maso. Ke raha koa fa tsy hita, mora adin̈a. Zen̈y nahavy Paoly nivolan̈a fa atsika koa tsy ampy finoan̈a, atsika ho ‘mora voafehifehiny fahotan̈a.’ (Heb. 12:1) Ke akory ahaizantsika fa mbala fatatra fo finoan̈antsika?​—2 Tes. 1:3.

17. Akory hahavy finoan̈antsika hatanjaka fo?

¹⁷ Voanalohany, iangavia matetiky Jehovah han̈amia anao fan̈ahy masin̈inany. Ino antony? Fotony finoan̈a io mbala an̈isany vokatrany fan̈ahy. (Gal. 5:22, 23) Tsy ho vitantsika foeky hino fisiany Pamôron̈o ndreky hankafatatra finoan̈antsika fo, izikoa tsy iô fan̈ampiany fan̈ahy masin̈y. Amezany Jehovah fan̈ahy masin̈y atsika, izikoa atsika tsy vôly mangataka izio. (Lioka 11:13) Mety mivavaka karaha ty foeky atsika: ‘Jehovah, ampitombosa finoan̈anay.’​—Lioka 17:5.

18. Izikoa Salamo 1:2, 3 zahan̈a, ino kadô maventy namezany Jehovah atsika?

¹⁸ Fan̈ampinizen̈y, tohiza fo fianaranao manokan̈a. (Vakia Salamo 1:2, 3.) Tamy fotoan̈a nanoratan̈a Salamo io, vitsy fo Israelita nanan̈a Lalàn̈any Zan̈ahary, izy feno. Fa panjaka ndreky pisoron̈o ndraiky nanan̈a izio. Ke isaka fito taon̈o, nivakiandro pisoron̈o aby io tamy vahoaka Lalàn̈any Zan̈ahary. Navorindro iro ‘lelahy, man̈angy, tsaiky, baka io vahiny’ jiaby tan Israely hitandren̈y raha koran̈inizio. (Deot. 31:10-12) Akory fo taminandrany Jesosy? Vitsy fo olo nanan̈a horonambokiny Soratra Masin̈y, ankoatrany tamy Synagoga. Fa amy zioty ndraiky, presky olo jiaby manan̈a Baiboly, na izy feno zen̈y na ampahany amizio. Baiboly io ten̈a kadô maventy baka amy Jehovah! Akory han̈aboahantsika fa mankasitraka izio atsika?

19. Ino raha mila ataontsika izikoa tiantsika ho fatatra fo finoan̈antsika?

¹⁹ Aboakantsika fa mankasitraka Baiboly io atsika, izikoa mamaky izio isanandra ndreky mianatra manokan̈a tsy tapaka. Tsy mety izikoa lera atsika malalaka fo vo man̈ano raha aby io, fa mila ampidirintsika amy programontsika foeky iro io. Miezaka koa atsika man̈aja fotoan̈a efa natokan̈antsika amy zen̈y. Ho fatatra fo finoan̈antsika izikoa atsika man̈ano zen̈y.

20. Tokony ho tapakevitry han̈ino ma atsika?

²⁰ Atsika tsy miran̈a amindro olo hiveriny donia ty fa ‘misy jery ndreky mahay raha’ aby io, fotony atsika manan̈a finoan̈a matanjaka miôrin̈y amy Volan̈a Zan̈ahary. (Mat. 11:25, 26) Hazavainy Baiboly amintsika antony mahavy fiain̈ana mahairatsy fo, ndreky raha handeha hataony Jehovah aminany ty. Ke irarian̈a atsika ho tapakevitry hankafatatra finoan̈antsika fo ndreky han̈ampy olo farany maro, erakany mety ho vitantsika, hino fa ten̈a misy ankitin̈y Zan̈ahary Pamôron̈o zen̈y. (1 Tim. 2:3, 4) Irarian̈a koa atsika tsy ho vôly han̈anten̈a raha koran̈iny Apokalypsy 4:11. Amy leranizen̈y, olo jiaby hidera Jehovah karaha ty: ‘Vain̈y hamezan̈a voninahitry anao, Jehovah, fotony anao niasa raha jiaby.’