Karakôry Atao Man̈amia Torohevitry?

1. Azôvy aby mila man̈amia torohevitry? Hazavà.

AKÔRY fahitanao man̈amia torohevitry zen̈y? Olo sasany ravoravo, fa sasany ndraiky misalasala ndreky mahatsiaro tsy mahazo ain̈y foeky. Fa ndray zen̈y, atsika jiaby tsy maintsy han̈amia torohevitry olo ndraikindraiky. Nan̈ino? Fôtony Jesosy nivolan̈a fa olo ten̈a mpianatranany mifankatia. (Jaona 13:35) Ke fomba araiky han̈aboahantsika fifankatiavan̈a zen̈y, atsika man̈amia torohevitry irô rahalahy ndreky ranabavintsika aby io, izikoa ilain̈a. Volan̈a Zan̈ahary man̈ambara fa “naman̈a tsara” zen̈y “tsy misalasala man̈amia torohevitry”, ke irô hahaiho mpinaman̈a fo.​—Ohab. 27:9.

2. Mila mahavita man̈ino irô anti-pan̈ahy aby io? Nan̈ino? (Zahava koa efajoro “Torohevitry amy Fivorian̈a Andavanandra.”)

² Anti-pan̈ahy ten̈a mila mahay man̈amia torohevitry tsara. Jehovah nan̈iraka Jesosy nanendry irô hikarakara fiangonan̈a. (1 Pet. 5:2, 3) Fomba araiky an̈anaovandrô zen̈y, man̈amia torohevitry miôrin̈y amy Baiboly, amy kabaro ataondrô amy fiangonan̈a. Irô koa mila man̈anatra ôndrikôndriky tsiaraikiaraiky, an̈isan’izen̈y irô niala andiany. Akôry hahavitan’ny anti-pan̈ahy ndreky atsika jiaby man̈amia torohevitry tsara?

3. a) Karakôry hahavy atsika ho mpan̈amia torohevitry mahay? (Isaia 9:6; zahava koa efajoro “Aleva Tahaka Jesosy Izikoa fa Man̈amia Torohevitry.”) b) Ino raha hidinihintsika amy lahatsoratra ty?

³ Ho maro raha haintsika momba fan̈amezan̈a torohevitry tsara, izikoa atsika mandiniky irô olo koran̈in’ny Baiboly, sirto Jesosy. An̈isan’ny an̈aram-boninahitry ikahian̈a izy “Mpanolo-tsain̈y Mahagaga.” (Vakia Isaia 9:6.) Amy lahatsoratra ty atsika handiniky ino raha mety hataontsika, izikoa misy olo mangataka torohevitry amintsika, ndreky ino koa raha ataontsika lera atsika tsy maintsy man̈amia torohevitry, kanefa olo tsy nangataka zen̈y tamintsika. Atsika koa handiniky nan̈ino ten̈a raha maventy man̈amia torohevitry amy fotoan̈a mety ndreky amy fomba mety tsara.

LERA MISY OLO MANGATAKA TOROHEVITRY AMINTSIKA

4-5. Izikoa misy olo mangataka torohevitry amintsika, ino antsendriky fan̈ontanian̈a mila valiantsika? Man̈ameza ohatra.

⁴ Izikoa misy olo mangataka torohevitry amintsika, ino raha voanalohany hataontsika? Atsika mety hahatsiaro ilain̈a, ke mety efa direkty tihan̈ano raha. Fa tsara atsika man̈ontany ten̈a antsendriky: ‘Zaho ma ten̈a tsara toeran̈a han̈amia torohevitry olo io amy raha ty?’ Ndraikindraiky fomba ten̈a tsara han̈ampian̈a izy, man̈ambara izy azôvy olo ten̈a tôkony hahavita han̈amia tari-dalan̈a izy amy raha itadiavany torohevitry io.

⁵ Diniha baka ohatra ty. Misy namanao araiky marary fatatra mare, ke izy nanomboko nan̈ano fikarohan̈a momba fitahan̈a mety hataony. Izy baka iô nangataka sôso-kevitrinao momba ino fitahan̈a ten̈a mety aminany. Ke anao efa mety tihikoran̈a mare ino hevitrinao momba izio. Fa anao ndraiky tsy manan̈a fahaizan̈a momba fitahan̈a, na tsy nahazo fampiofan̈ana momba aretin̈y nahazo izy io foeky. Ke fomba ten̈a tsara han̈ampianao namanao io, mitahitahy izy hahita olo ten̈a hahavita han̈ampy izy.

6. Nan̈ino atsika mety hifidy hiambin̈y hely antsendriky, alohan’ny han̈amia torohevitry?

⁶ Ndray atsika mahatsapa fa atsika tsara toeran̈a han̈amia torohevitry olo io amy raha tadiaviny io, atsika mety hifidy hiambin̈y hely antsendriky, alohan’ny atsika hamaly raha volan̈iny. Nan̈ino? Fôtony Ohabolana 15:28 mivolan̈a fa “olo marin̈y mieritreritry tsarabe zay vo mamaly.” Akôry ndraiky izikoa atsika mihevitry fa haintsika valiny? Atsika mety mbala mila fotoan̈a fo han̈anaovan̈a fikarohan̈a, hivavahan̈a, aviô hisaintsain̈ana. Izikoa atsika man̈ano zen̈y, atsika hatoky tsarabe fa mifan̈araka amy raha iritriretin’i Jehovah valiny amezantsika. Aleva onon̈o baka karakôry nataon’ny mpaminan̈y Natana.

7. Ino raha ianaranao baka amy mpaminan̈y Natana?

⁷ Mpanjaka Davida nivolan̈a tamy mpaminan̈y Natana fa izy tihan̈ôrin̈y tempolin’i Jehovah. Natana direkty namaly fa izy mahazo man̈ano zen̈y. Fa Natana tôkony nangala fotoan̈a nitandrin̈esan̈a hevitrin’i Jehovah antsendriky. Nan̈ino? Fôtony tsy Davida tian’i Jehovah han̈ôrin̈y tempoly io. (1 Tant. 17:1-4) Hita baka amy zen̈y fa izikoa misy olo mitady torohevitry amintsika, hendry atsika izikoa “tsy ho mekimeky hivolan̈a.”​—Jak. 1:19.

8. Ino koa antony mahavy atsika tôkony hitandrin̈y, izikoa fa man̈amia torohevitry?

⁸ Diniha koa baka antony hafa mahavy atsika hitandrin̈y izikoa fa man̈amia torohevitry olo: Atsika mba an̈isan’ny tômpin’andraikitry izikoa torohevitry namiantsika olo io hahavy izy han̈ano fanapahan-kevitry hisy vokany ratsy aminany. Ke tsara izikoa atsika mandiniky tsarabe antsendriky, alohan’ny han̈amia torohevitry olo.

IZIKOA OLO IO TSY NANGATAKA TOROHEVITRY TAMINTSIKA

9. Alohan’ny anti-pan̈ahy aby io han̈amia torohevitry, ino raha mila alaindrô antoko? (Galatianina 6:1)

⁹ Ndraikindraiky irô anti-pan̈ahy aby io mila man̈amia torohevitry rahalahy na ranabavy araiky lôso “miala lalan̈a” na man̈ano raha tsy mety. (Vakia Galatianina 6:1.) Fan̈azavan̈a momba andininy io mivolan̈a fa olo io “nan̈araka lalan̈a tsy izy, nata izy mety mbala tsendriky nan̈ano fahotan̈a maventy.” Ke tanjon̈ondrô anti-pan̈ahy aby io han̈ampy izy tsy hiala amy lalan̈a mandeha amy fiain̈ana tsisy farany. (Jak. 5:19, 20) Fa baka torohevitrindrô hahômby tsarabe, irô mila mangala antoko tsara, asa ten̈a man̈araka lalan̈a tsy izy ankitin̈y olo io. Jehovah man̈iraka atsika tsiaraikiaraiky han̈ano fanapahan-kevitry miôrin̈y amy feon’ny fieritreretan̈antsika. (Rom. 14:1-4) Karakôry ndraiky izikoa rahalahy araiky ten̈a nan̈araka lalan̈a tsy izy, ke anti-pan̈ahy aby io tapa-kevitry han̈ano raha han̈amezan̈a torohevitry izy?

10-12. Anti-pan̈ahy koa fa man̈amia torohevitry olo tsy nangataka zen̈y, ino raha tôkony hataondrô? Hazavà amin’ny ohatra. (Zahava koa sary.)

¹⁰ Tsy mora amin’ny anti-pan̈ahy aby io man̈amia torohevitry olo tsy nangataka izio. Nan̈ino? Apostoly Paoly nivolan̈a fa olo io mety nahazo lalan̈a tsy izy, kanefa tsy hainy aby. Ke alohan’ny anti-pan̈ahy han̈amia torohevitry, tsara olo io ampiandrô antsendriky, baka ho vôn̈ono handray anatra.

¹¹ Diniha baka ohatra ty. Misy mpambôly araiky handeha hambôly raha amy tany araiky mahery kafan̈a. Ke alohan’ny izy hambôly, tongisiny antsendriky tany io, amy zen̈y malemy ke mora hambolian̈a. Izy baka iô amy zay mambôly raha. Farany amy zay, rozeny izio baka maniry. Karaha zen̈y koa anti-pan̈ahy. Alohan’ny izy han̈amia torohevitry olo tsy nangataka izio, tsara antsendriky ataony raha hahavy olo io ho vôn̈ono handray anatra. Ohatra, anti-pan̈ahy io mitady fotoan̈a mety tsarabe hikoran̈ana amy rahalahy io, ndreky mivolan̈a aminany fa izy miasaloha mare aminany, ke tiany hikoran̈a raha momba izio aminany. Izikoa olo man̈amia torohevitry io malaza be fitiavan̈a ndreky tsara fan̈ahy, ho moramora amin’olo io handray anatra amiany io.

¹² Izikoa irô fa mikoran̈a amy zay, anti-pan̈ahy io mbala man̈ano raha fo hahavy olo io ho vôn̈ono handray anatra, ke mivolan̈a fa olo jiaby samy mety man̈ano hadisovan̈a aby, ke mila torohevitry ndraikindraiky. (Rom. 3:23) Anti-pan̈ahy io mila kalma ndreky man̈aja tsarabe, izikoa fa mikoran̈a andininy man̈aboaka fa izy efa nahazo lalan̈a tsy izy. Lera rahalahy io efa tontohitry fa ten̈a nahazo lalan̈a tsy izy, iô amy zay anti-pan̈ahy io mira “mambôly voan-draha”, ke man̈azava amy fomba tsotra ino raha tôkony hataony, baka han̈itsiany lalan̈anany. Amy farany, anti-pan̈ahy io “mandrôzy” voan-draha nambôliny io. Ke amy fônany jiaby izy midera rahalahy io ndreky mivavaka miaraka aminany.​—Jak. 5:15.

13. Ino raha tôkony hataon’ny anti-pan̈ahy, baka hazahoandrô antoko fa azon’olo tsarabe torohevitry namian̈a izy?

¹³ Ndraikindraiky tsy mira amy raha volan̈in’olo mpan̈amia torohevitry foeky raha ren̈in’olo amian̈a torohevitry io. Ino raha mety hataon’ny anti-pan̈ahy baka hazahoan̈a antoko fa ten̈a nazon’olo raha nivolan̈indrô? Irô tôkony han̈apetraka fan̈ontanian̈a voalanjalanja kanefa am-pan̈ajan̈a. (Mpito. 12:11) Ke valin’ny fan̈ontanian̈a aby io ahitan’ny mpan̈amia torohevitry io izikoa nazon’olo tsarabe torohevitry namian̈a izy io.

TOROHEVITRY AMY FOTOAN̈A METY NDREKY AMY FOMBA METY

14. Atsika ma tôkony han̈amia torohevitry olo, izikoa atsika meloko? Hazavà.

¹⁴ Atsika jiaby samy tsy lavorary, ke mety tafivolan̈a na tafan̈ano raha mampameloko olo. (Kol. 3:13) Volan̈a Zan̈ahary mivolan̈a fa ndraikindraiky misy olo mety han̈ano raha hampameloko atsika. (Efes. 4:26) Fa kanefa, atsika tsy tôkony han̈amia torohevitry olo, izikoa meloko. Nan̈ino? Fôtony “olo araiky koa meloko, tsy hahavita han̈ano ny marin̈y manoloan̈a Zan̈ahary.” (Jak. 1:20) Ke izikoa atsika meloko man̈amia torohevitry olo, atsika mety hampitombo problemo fo. Zen̈y tsy midika fa atsika tsy tôkony hikoran̈a amin’olo nampameloko atsika io hevitrintsika ndreky raha tsapantsika foeky. Fa kanefa, ho pare tsarabe raha volan̈intsika, izikoa miambin̈y atsika efa kalma tsarabe vo mivolan̈a. Diniha baka raha nataon’i Eliho, olo nan̈amia torohevitry tsara i Joba.

15. Ino raha ianarantsika baka amin’i Eliho? (Zahava koa sary.)

¹⁵ Nahafoe andra maro Eliho nitandrin̈esan̈a Joba niaro ten̈a tamy fankaratsian̈a nataondrô olo nan̈ano sary nankahery izy aby io. Eliho nahinakinaka Joba. Fa Eliho nanjary neloko mare tamy Joba, fôtony Joba nivolan̈a raha tsy marin̈y momba Jehovah ndreky nan̈adio ten̈a. Fa Eliho niambin̈y efa kalma vo nan̈amia torohevitry i Joba, aviô najainy tsarabe Joba. (Joba 32:2; 33:1-7) Raha nataon’i Eliho zen̈y mampianatra atsika raha araiky maventy. Ten̈a tsara izikoa man̈amia torohevitry amy fotoan̈a mety ndreky amy fomba mety, aviô mila man̈aja fo ndreky be fitiavan̈a.​—Mpito. 3:1, 7.

AZA VÔLY MAN̈AMIA TOROHEVITRY NDREKY MAN̈EKY ANATRA

16. Ino raha ianaranao baka amy Salamo 32:8?

¹⁶ Andininy ioren̈an’ny lahatsoratra ty mivolan̈a fa ‘Jehovah man̈amia torohevitry, baka iô masonany mitsinjo atsika.’ (Vakia Salamo 32:8.) Zen̈y ahitan̈a fa izy tsy vôly man̈ampy atsika. Izy tsy vitan’ny man̈amia torohevitry atsika fo fa man̈ampy atsika han̈araka izio koa. Izy ten̈a modely tsara amintsika! Lera atsika man̈amia torohevitry olo, irarian̈a atsika hangala tahaka Jehovah, ke tsy vôly hitsinjo olo amiantsika torohevitry aby io, ndreky han̈ano raha erakan’ny vitantsika han̈ampian̈a irô hahômby.

17. Izikoa anti-pan̈ahy aby io man̈amia torohevitry tsara miôrin̈y amy Baiboly, ino raha aboakandrô amy zen̈y? Hazavà. (Isaia 32:1, 2)

¹⁷ Iziôty atsika mila man̈amia ndreky mila vôn̈ono handray torohevitry tsara, mandilatran’ny taloha. (2 Tim. 3:1) Irô anti-pan̈ahy aby io man̈amia torohevitry voafaritry tsara miôrin̈y amy Baiboly, “mira rano mivalan̈a amy tany paiky.” (Vakia Isaia 32:1, 2.) Atsika mankasitraka kamarady mahay raha tiantsika ho ren̈y kanefa mivolan̈a amintsika raha mila ren̈intsika. Irô io mira kadô “pomy volamena an̈atin’ny kapila volafotsy.” (Ohab. 25:11) Ke irarian̈a atsika jiaby tsy ho vôly han̈ano raha hazahoantsika fahendrena, baka hahavita han̈amia ndreky handray torohevitry tsara.