Nan̈ino Atsika Mila Vidim-pan̈avotan̈a?

1-2. Mila havotan̈a amin’ino atsika, aviô nan̈ino? (Romanina 7:22-24) (Zahava koa sary.)

DINIHA baka ty. Nisy tran̈o be rokatra, ke nisy lelahy araiky tavela tao. Izy tsy naty fa izy tsy nafaka nihetsiky, fôtony nitindrian’ny karokatra raha. Kehany raha vitany, nandronton̈o, baka ho hisy olo avy han̈avotro izy.

² Mira raha mahazo lelahy tavela an̈atin’ny tran̈o rokatra io raha mahazo atsika tsiaraikiaraiky. Amy karakôry? Adama koa fa tsy nan̈araka volan̈an’ny Zan̈ahary, izy nanjary mpanota. Izy baka tiô namindra fahotan̈a io tamy taranakanany. Ke olo jiaby nanjary mpanota. Atsika tsy mahavita man̈avotro ain̈intsika, mira lelahy tavela an̈atin’ny tran̈o rokatra in̈y fo. Apostoly Paoly nan̈azava tsarabe raha momba atsika mpanota io, tamy taratasy nalefany tamy Romanin̈y aby io. (Vakia Romanina 7:22-24.) Ke izy nangataka baka avotan̈a ‘amy vatan̈a mitariky izy amy fahafatesan̈a’ io. Paoly nandova fahotan̈a, ke tsy maintsy naty. (Rom. 6:23) Karaha Paoly fo, atsika koa nandova fahotan̈a. Mila olo han̈avotro atsika!

3. Ino aby raha azontsika baka amy vidim-pan̈avotan̈a io?

³ Fa raha nikoran̈in’i Paoly io ndraiky ahitan̈a fa nata atsika mpanota, atsika mbala misy fan̈antinan̈a. Izy koa fa baka nan̈ontany: “Azôvy han̈avotro zaho amy vatan̈a mitariky zaho amy fahafatesan̈a ty?”, izy nivolan̈a: “Isaoran̈a Zan̈ahary, fôtony izy nampiasa Jesosy Kristy Tômpontsika.” (Rom. 7:25) Tian’i Paoly koran̈iny io, Jesosy nan̈ano vidim-pan̈avotan̈a in̈y.a Izio mahavita man̈avotro atsika ke azahoan̈a 1) familan-keloko amy fahotan̈antsika, 2) mankafaka atsika amy fahotan̈a nilovaintsika in̈y, aviô 3) mampihavan̈a atsika amy Mpamôron̈o atsika. Atsika koa mandiniky raha aby zen̈y, hahaihitombo fo fitiavantsika Jehovah, “Zan̈ahary man̈amia fan̈antinan̈a” io. (Rom. 15:13) Hahaihankasitraka Jesosy fo koa atsika, fôtony “Zanany io nankafaka atsika izikoa fa nan̈efa vidim-pan̈avotan̈a.”​—Kol. 1:14.

VIDIM-PAN̈AVOTAN̈A AZAHOAN̈A FAMILAN-KELOKO

4-5. Nan̈ino atsika jiaby mila vidim-pan̈avotan̈a? (Mpitoriteny 7:20)

⁴ Mila vidim-pan̈avotan̈a atsika baka ho voavela fahotan̈antsika. Olombelon̈o jiaby tsy lavorary samy manota aby, na amy raha volan̈indrô na amy raha ataondrô. (Vakia Mpitoriteny 7:20.) Fahotan̈a sasany maventy. Ohatra, tamy Lalàn̈an’i Mosesy, nila nivonen̈a olo araiky koa nandiadia vady ndreky namono olo. (Lev. 20:10; Nom. 35:30, 31) Fahotan̈a maro ndraiky tsy maventy be karaha zen̈y, fa irô io mbala fahotan̈a fo. Ohatra, ho Davida mpanoratra salamo: “Zaho hitandrin̈y tsarabe baka tsy hanota amy raha volan̈iko.” (Sal. 39:1) Ke zen̈y man̈aboaka fa ndraikindraiky, ndray amy raha volan̈intsika atsika manota.​—Jak. 3:2.

⁵ Diniha baka raha nivolan̈inao ndreky nataonao. Efa navy nisy raha ma nivolan̈inao na nataonao ke nanin̈enanao? Hay be fa ia aby valin-teninao tamy fan̈ontanian̈a io. Baiboly mivolan̈a: “Atsika koa mivolan̈a fa ‘atsika tsisy fahotan̈a’, atsika mamitaka ten̈a, sady tsy an̈atintsika foeky fahamarin̈ana.”​—1 Jaona 1:8.

6-7. Baka amin’ino mahavy Jehovah afaka man̈ambela fahotan̈antsika? (Zahava koa sary.)

⁶ Baka amy vidim-pan̈avotan̈a io mahavy Jehovah afaka man̈ambela fahotan̈antsika. (Efes. 1:7) Fa zen̈y ndraiky tsy midika fa tsy jiren’i Jehovah foeky atsika ndray manota. Halan’i Jehovah izikoa atsika manota. (Isaia 59:2) Lavorary fan̈anaovany ny rariny, ke mila raha izy baka hahafahany mamela helokontsika.

⁷ Lalàn̈an’i Mosesy nan̈iraka irô Israelita aby io nan̈ano sôron̈o biby, baka nandrakofan̈a fahotan̈andrô. (Lev. 4:27-31; 17:11) Sôron̈o aby zen̈y kandindon̈on’ny sôron̈o maventy handeha hataon’i Jesosy ndreky hatsaran̈a baka amy zen̈y. Sôron̈o nataony io nahavy Jehovah afaka man̈ambela fahotan̈antsika. Hain’i Paoly tsarabe karakôry valeran’ny sôron̈o nataon’i Jesosy io. Ahitan̈a zen̈y tamy raha nisoratiny tamindrô Kristianin̈y ta Korinto. Izy koa fa baka nikoran̈a fahazaran̈a ratsy nanan̈andrô taloha, ho izy tamindrô: “Anarô efa nisasàn̈a madio; anarô efa nankamasin̈iny; aviô anarô efa nambara fa marin̈y tamin’ny an̈aran̈an’i Jesosy Kristy Tômpo ndreky tamy fan̈ahin’ny Zan̈aharintsika.”​—1 Kor. 6:9-11.

8. Izikoa anao fa mioman̈a han̈aton̈o Fahatsiarovan̈a, ino aby raha mety hiritriretinao?

⁸ Izikoa anao fa mioman̈a han̈aton̈o Fahatsiarovan̈a amy taon̈o ty, mangalà fotoan̈a iritriretanao hatsaran̈a azonao baka amy familan-kelokon’i Jehovah. Ohatra, noho ny vidim-pan̈avotan̈a io, anao efa tsy mila man̈amelo-ten̈a eky tamy fahotan̈a vitanao taloha tan̈y, izikoa anao efa nibebaka. Akôry ndraiky izikoa sarotro aminao man̈eky zen̈y? Anao aby mety tafieritreritry: ‘Haiko ndraiky Jehovah mamela heloko, fa tsy vitako man̈ambela ain̈inaka.’ Izikoa anao karaha zen̈y, tsarova ty: Jehovah zaraiky fo manan̈a fahifan̈a mamela heloko, baka iô izy nan̈amia fahifan̈a Zanany hitsara atsika. Jehovah tsy man̈ambela anao na olo hafa hanapa-kevitry azôvy mahazo famindram-pô baka aminany ndreky azôvy tsy mahazo. Baiboly mivolan̈a: ‘Izikoa atsika mandeha amy mazava, karaha [Jehovah] mandeha amy mazava, ... lion’i Jesosy Zanany man̈adio atsika ho afaka amy fahotan̈a jiaby.’ (1 Jaona 1:6, 7) Atsika afaka matoky zen̈y karaha ataontsika matoky raha hafa ampianarin’ny Baiboly. Vidim-pan̈avotan̈a io hahafahan’i Jehovah mamindra fô amintsika, ke Baiboly mivolan̈a fa izy “vôn̈ono han̈ambela hadisovan̈a.”​—Sal. 86:5.

VIDIM-PAN̈AVOTAN̈A IO MANKAFAKA ATSIKA AMY FAHOTAN̈A

9. Ankoatran’ny raha ratsy atao, ino koa ma dikan’ny fahotan̈a zen̈y? (Salamo 51:5 ndreky lamariky amy pazy ambany)

⁹ Amy Baiboly, “fahotan̈a” io ivolan̈ana raha ratsy ataontsika baka iô atsika foeky koa mpanota, fôtony rango atsika vo teraka efa nandova fahotan̈a edy. (Vakia Salamo 51:5 ndreky lamariky amy pazy ambany.) Ke noho ny atsika mpanota io mahavy atsika man̈ano raha ratsy. Tsy zen̈y fo fa, izio koa mahavy atsika mora voan’ny aretin̈y, matoe ndreky maty. Ke zen̈y mahavy nata tsaiky vo teraka mbala tsisy raha ratsy nataony, efa mety marary ndreky maty. Zen̈y koa mahavy olo ratsy fan̈ahy ndreky tsara fan̈ahy samy mijaly baka iô maty. Taranaka Adama jiaby baka samy nandova ota aby.

10. Nan̈ano karakôry ma ry Adama ndreky Eva, irô koa fa nanjary mpanota?

¹⁰ Diniha baka vokany, Adama ndreky Eva koa fa nanjary mpanota. Izio nisy vokany ratsy tamy fihetseham-pôndrô. Irô koa fa nanohitry Volan̈a Zan̈ahary, direkty tsapandrô vokatran’ny fandikandrô Lalàn̈an’ny Zan̈ahary ‘efa voasoratra tan̈atin’ny fondrô tao.’ (Rom. 2:15) Tsapandrô fa nisy raha niova tamin’ny ain̈indrô tao, fa izy fo tsy raha tsara. Irô voatery nandrakotro faritry sasany tamy vatan̈andrô ndreky nisitriky Mpamôron̈o. (Gen. 3:7, 8) Komansy tamy zen̈y Adama ndreky Eva vo nahatsapa nan̈amelo-ten̈a, niasaloha, navozo, nangôtsokôtsoko, baka iô nen̈atra. Ke tsy maintsy nampijaly irô raha aby zen̈y firaka irô naty.​—Gen. 3:16-19.

11. Ino vokan’ny atsika mpanota io amintsika?

¹¹ Vokatran’ny fahotan̈a io amintsika, mira vokatran’izio tamindrô fivadiany tamy voanalohany in̈y fo. Noho ny atsika mpanota mahavy atsika marary ndreky mijaly ara-pihetseham-pô io. Ndray atsika mifen̈y karakôry mankatsara fiain̈anantsika, mbala misy problemo fo. Nan̈ino? Fôtony Baiboly mivolan̈a fa atsika nambela ‘hanan̈a fiain̈ana tsisy dikany.’ (Rom. 8:20) Marin̈y raha zen̈y, tsy amintsika tsiaraikiaraiky fo fa amin’olombelon̈o jiaby koa. Ohatra, iritrireta ezaka ataon’olo hankatsaran̈a tontolo iain̈ana, han̈adosoan̈a olo mpan̈ano raha ratsy, hahavy olo jiaby hanan̈a raha ilain̈a amy fiain̈ana, aviô hampisy filaminan̈a amy firenena miady. Ndray karakôry ezaka mety ho vitan’olombelon̈o amindrô raha aby zen̈y, mbala tsy voavaha fo problemo momba irô io. Akôry hahavitan’ny vidim-pan̈avotan̈a io man̈avotro atsika?

12. Ino fan̈antinan̈a azo baka amy vidim-pan̈avotan̈a io?

¹² Vidim-pan̈avotan̈a io man̈amia fan̈antinan̈a atsika, ke “zavaboary jiaby ho afaka amy fan̈andivaozan̈an’ny fahalòvan̈a.” (Rom. 8:21, l.p.a.) Lera amy donia vaovao, hatsaran̈a jiaby baka amy vidim-pan̈avotan̈a io ho tanteraka amy fomba feno, ke atsika ho salama vatan̈a, sain̈y ndreky fô. Baka iô atsika koa tsy hahatsapa man̈amelo-ten̈a, miasaloha, mavozo, mangôtsokôtsoko na koa ho men̈atra. Aviô koa Jesosy Kristy “Andrianan’ny Fiadanan̈a”, araiky nan̈efa vidim-pan̈avotan̈a in̈y hitondra amy zen̈y. Izy han̈ampy atsika hamaha problemo jiaby tsy voavahantsika.​—Isaia 9:6, 7.

13. Ino koa raha hafa mety iritriretinao, lera anao mioman̈a han̈aton̈o Fahatsiarovan̈a amy taon̈o ty?

¹³ Diniha baka han̈ano karakôry fiain̈ananao izikoa anao efa tsy mpanota eky. Miniminia baka isaka anao mifoha maraindrain̈y anao ho salama tsara, aviô anao tsy hiasaloha eky tsao anao ndreky ry havanao ho matin’ny mosary, harary na koa hofoaty. Aviô rango ziôty anao efa milamin-tsain̈y fôtony anao ‘mitana mare fan̈antinan̈a. Izio andrisan’ny ain̈intsika salakady azo antoko ndreky miôrin̈y tsarabe.’ (Heb. 6:18, 19) Karaha ataon’ny andrisa mitana sambo tsy ho fefiky in̈y, fan̈antinan̈antsika Kristianin̈y koa mahavita man̈atanjaka finoan̈anao ndreky man̈ampy anao hiaritry amy zay raha sarotro hatrefinao amy ziôty. Ke matokisa fa Jehovah hanjary “mpamaly hatsaran̈a zay olo mitady izy mare.” (Heb. 11:6) Baka amy vidim-pan̈avotan̈a io zaraiky fo mahavy atsika mahazo fankahirezan̈a amy ziôty ndreky manan̈a fan̈antinan̈a azo antoko momba ny amaray.

VIDIM-PAN̈AVOTAN̈A IO MAMPIHAVAN̈A ATSIKA AMY ZAN̈AHARY

14. Ino vokatran’ny fahotan̈a io amy fifandraisantsika amy Mpamôron̈o, aviô nan̈ino?

¹⁴ Izikoa fa nanota Adama ndreky Eva, olombelon̈o nanjary tsy nifandray marikitry tamy Zan̈ahary eky. Ndray Baiboly aby mivolan̈a fa olombelon̈o jiaby nanjary lavitry Mpamôron̈o. (Rom. 8:7, 8; Kol. 1:21) Nan̈ino? Fôtony baka amy fitsipikin’i Jehovah lavorary mahavy izy tsy milefitry amy fahotan̈a. Karaha ty volan̈in’ny Baiboly momba Jehovah: “Madio loatra masonao ke tsy tia mizaha raha ratsy, baka iô tsy din̈inao foeky mahita raha ratsy.” (Hab. 1:13) Ke fahotan̈a io nanjary nampisy elan̈elan̈a amy Zan̈ahary ndreky olombelon̈o. Ke tsisy olo hahavita hifandray marikitry amy Jehovah, izikoa tsy adoso elan̈elan̈a io, baka iô atsika hampihavan̈iny aminany. Ke vidim-pan̈avotan̈a io mira pô mampihavan̈a atsika amy Zan̈ahary.

15. Nan̈ino ma nety tsarabe nan̈anaovan̈a vidim-pan̈avotan̈a io, aviô ino vokany?

¹⁵ Baiboly mivolan̈a fa Jesosy io “sôron̈o fampihavanan̈a noho ny fahotan̈antsika.” (1 Jaona 2:2) Volan̈a Griky nadika “sôron̈o fampihavanan̈a” io ivolan̈ana “fomba atao mampakalma.” Ke karakôry ma natao nampakalma Jehovah tamy vidim-pan̈avotan̈a? Namparavoravo Jehovah nahita Zanany naty in̈y? Ehe. Fa raha tiany volan̈iny, fan̈amezan̈a vidim-pan̈avotan̈a io nifan̈araka tsara tamy fitsipikin’i Jehovah momba ny rariny. Ke izy ziôty lôso afaka mihavan̈a ndraiky amin’olombelon̈o. (Rom. 3:23-26) Ke afaka ‘nataony’ ho an̈isan’ny olo marin̈y koa olo nanompo izy ke tsy nivadiky taminany, talohan’ny nifatesan’i Kristy. (Gen. 15:1, 6, l.p.a.) Nan̈ino? Fôtony baka tamy vidim-pan̈avotan̈a nahavitany nan̈ano zen̈y. Jehovah efa natoky tsarabe fa Jesosy Zanany hahavita han̈efa izio. (Isaia 46:10) Ke vidim-pan̈avotan̈a io nahavy olombelon̈o nihavan̈a ndraiky amy Zan̈ahary.

16. Ino koa raha hafa mbala mila iritriretinao, izikoa anao fa mioman̈a han̈aton̈o Fahatsiarovan̈a amy taon̈o ty? (Zahava koa sary.)

¹⁶ Diniha baka ino hatsaran̈a azonao noho ny anao mihavan̈a tsara amy Zan̈ahary. Ohatra, anao mety mikaiky Jehovah “Babanao”, eraka raha nampianarin’i Jesosy. (Mat. 6:9) Baka iô koa, anao afaka man̈ano izy “Kamaradinao.” Fa lera atsika mikaiky izy “Baba” ndreky “Kamarady”, atsika mila man̈aja izy tsarabe ndreky manetry ten̈a. Nan̈ino? Fôtony noho ny atsika mpanota, atsika tsy vain̈y mifandray marikitry amy Jehovah. Fa noho ny vidim-pan̈avotan̈a zaraiky fo mahavy atsika afaka manan̈a fifandraisan̈a aminany. Jehovah nan̈amia Zanany baka hampety raha zen̈y, fôtony Baiboly mivolan̈a: “Baka tamy lio nalatsan’i [Jesosy] tamin’ny hazofijalian̈a in̈y, nahavy raha hafa jiaby nampihavan̈in’ny Zan̈ahary taminany.” (Kol. 1:19, 20) Ke zen̈y mahavy atsika afaka ho ravoravo mifandray amy Jehovah, nata atsika mbala tsy lavorary.

VIDIM-PAN̈AVOTAN̈A IO MAN̈ABOAKA FA JEHOVAH MAMINDRA FÔ

17. Nan̈ino vidim-pan̈avotan̈a io man̈aporofo fa Jehovah ten̈a mamindra fô? (Efesianina 2:4, 5)

¹⁷ Vidim-pan̈avotan̈a io man̈aporofo fa Jehovah “ten̈a mamindra fô.” “Atsika nivilôminy ... ndray baka tamin’ny hadisovan̈antsika nahavy atsika naty.” (Vakia Efesianina 2:4, 5.) Karaha olo tavela tan̈atin’ny tran̈o rokatra in̈y, ‘lan̈iany olo manan̈a toe-tsain̈y tsara hazahoan̈a fiain̈ana mandrakizay’ io mandronton̈o mitady vonjy, fôtony irô mahay fa irô mpanota ke mila havôtin̈y. (Asa. 13:48) Ke Jehovah man̈ano raha hamalian̈a kaikindrô zen̈y, ke man̈ano raha hahavy irô haharen̈y hafatra momba Fanjakan̈an’ny Zan̈ahary, amy zen̈y irô mahay raha momba izy ndreky Jesosy Zanany. (Jaona 17:3) Izikoa Satana nieritreritry fa fahotan̈an’i Adama ndreky Eva in̈y hahavita hisakana fikasan̈an’ny Zan̈ahary, izy ten̈a diso hevitry.

18. Izikoa atsika fa misaintsain̈y vidim-pan̈avotan̈a, ino koa raha mila alaintsika onon̈o?

¹⁸ Izikoa atsika fa misaintsain̈y irô hatsaran̈a azontsika baka amy vidim-pan̈avotan̈a io, mila alaintsika onon̈o koa antony ten̈a nan̈amezan’i Jehovah izio. Tsy raha zisty hamonjian̈a atsika fo nan̈amezany vidim-pan̈avotan̈a io, fa mila alaintsika onon̈o koa fa izio fomba handaminan’i Jehovah adihevitry nataon’i Satana tamy zaridain̈y Edena in̈y. (Gen. 3:1-5, 15) Baka amy vidim-pan̈avotan̈a io Jehovah mahavita mankamasin̈y an̈aran̈anany ke han̈adio izio amy fankaratsian̈a jiaby nataon’i Satana. Izy koa mankafaka atsika amy fahotan̈a ndreky fahafatesan̈a, ke zen̈y man̈aboaka fa izy Zan̈aharin’ny fitiavan̈a. Baka iô noho ny hatsaram-pan̈ahinany miavaka, nata atsika mbala mpanota, atsika koa ambelany han̈aporofo fa Satana mpavandy. (Ohab. 27:11) Akôry han̈aboahanao fa anao mankasitraka vidim-pan̈avotan̈a? Fan̈ontanian̈a zen̈y hivalintsika amy lahatsoratra fan̈araka.