Akôry Han̈aboahanao fa Anao Mankasitraka Vidim-pan̈avotan̈a?

1-2. Tôkony hifaorse atsika han̈ino vidim-pan̈avotan̈a nataon’i Jesosy in̈y, aviô nan̈ino? (2 Korintianina 5:14, 15) (Zahava koa sary.)

IZIKOA anao tavela tan̈atin’ny tran̈obe rokatra, aviô nisy olo nan̈avotro anao baka tao, anao ma tsy hahatsiaro manan̈a adidy amin’olo nan̈avotro anao io? Hay be fa anao tsy maintsy han̈ano mersy izy. Han̈ano raha koa anao han̈aboahan̈a fa anao ten̈a mankasitraka ndreky tsy han̈adin̈a raha nataony io.

² Karaha nazavain̈a tamy lahatsoratra talohan’ity in̈y, atsika tsy mahavita man̈avotro ain̈intsika tômpiny amy fahotan̈a nilovaintsika. Fa kanefa, vidim-pan̈avotan̈a namian’i Jesosy in̈y mahavita man̈avotro atsika, ke hazahoantsika 1) familan-keloko baka amy fahotan̈antsika, 2) fan̈antinan̈a ho afaka amy fahotan̈a nilovaintsika, baka iô 3) mampihavan̈a atsika amy Zan̈ahary. Ke vokany, atsika afaka man̈anten̈a hiain̈y mandrakizay amy donia vaovao amezan’i Jehovah. Vidim-pan̈avotan̈a io man̈aboaka tsarabe fitiavan’i Jesosy olombelon̈o. Izy efa tia olombelon̈o edy, talohan’izy navy tambony tany teto. (Ohab. 8:30, 31) Karaha ty nikoran̈in’ny apostoly Paoly: “Fitiavan̈an’i Kristy mifaorse zahay.” (Vakia 2 Korintianina 5:14, 15.) Dikan’izen̈y, fitiavan̈an’i Jesosy tôkony handrisiky atsika han̈aboaka fa atsika ten̈a mankasitraka vidim-pan̈avotan̈a io.

3. Nan̈ino mety tsy ho mira fomba han̈aboahan’olo fankasitrahan̈a vidim-pan̈avotan̈a ?

³ Akôry han̈aboahanao fa anao mankasitraka vidim-pan̈avotan̈a io? Mety tsy ho mira amy nin’olo hafa valiny. Ohatra, misy olo telo handeha amy tany araiky fo, fa irô io baka tamy tanàna samy hafa. Tsy ho mira lalan̈a imboandrô. Karaha zen̈y koa, “lalan̈a” imboanao na koa tanjon̈o ataonao han̈aboahan̈a fa anao mankasitraka vidim-pan̈avotan̈a, miankin̈y amy karakôry fifandraisanao amy Jehovah amy ziôty. Handiniky momba olo telo atsika amy lahatsoratra: 1) Mpianatra Baiboly, 2) Kristianin̈y vita batisa, aviô 3) Kristianin̈y efa tsy mivory eky.

MPIANATRA BAIBOLY

4. Nan̈ino atsika mivolan̈a fa hitan’i Jehovah ezaka ataondrô mpianatra Baiboly aby io?

⁴ Izikoa anao fa mianatra Baiboly, anao nandray tsara vaovao tsara io man̈aboaka fa anao efa an̈isan’olo tahômin’i Jehovah hifandray aminany. (Jaona 6:44; Asa. 13:48) “Jehovah mpandiniky fôn’olo.” Dikan’izen̈y hitany anao mifen̈y mianatra raha momba izy, aviô izy ravoravo mahita fandrosoan̈a ataonao ndreky anao mifen̈y miova baka han̈arahan̈a fitsipikinany. (Ohab. 17:3; 27:11) Ke baka amy vidim-pan̈avotan̈a mahavy anao lôso mahavita mifandray tsarabe amy Jehovah. (Rom. 5:10, 11) Aza adin̈a foeky raha zen̈y.

5. Akôry mety han̈arehan’ny mpianatra Baiboly raha koran̈in’ny Filipianina 3:16?

⁵ Izikoa anao mpianatra Baiboly, akôry han̈aboahanao fa anao ten̈a mankasitraka vidim-pan̈avotan̈a? Fomba araiky mety han̈anaovan̈a zen̈y, man̈araka torohevitrin’i Paoly tamy Filipianin̈y aby io: “Na ino na ino raha efa vitantsika tamy fanompoan̈a Zan̈ahary, alô atsika tsy ho vôly fa mbala han̈ano karaha zen̈y” fo. (Fil. 3:16) Misy Baiboly koa mandika izio karaha ty: “Atsika mila tsy vôly man̈araka lalan̈a efa imboantsika amy ziôty.” Ke eraka torohevitry zen̈y, aza ambela hisy raha foeky hisakana dianao amy lalan̈a mandeha amy fiain̈ana.​—Mat. 7:14; Lioka 9:62.

6. Ino raha mety hataon’ny mpianatra Baiboly, izikoa sarotro amindrô hiova? (Deoteronomia 30:11-14) (Zahava koa sary.)

⁶ Akôry izikoa sarotro aminao man̈eky fampianaran̈an’ny Baiboly vo baka nianaranao? Man̈anaova fikarohan̈a momba izio, baka iô mivavaha amy Jehovah baka izy han̈ampy anao hahatakatra tsarabe izio. (Sal. 86:11) Ke izikoa hitanao mbala sarotro aminao fo han̈eky fampianaran̈a io, ambilà hely antsendriky izio, fa aza vôly mianatra Baiboly. Fa karakôry fo izikoa sarotro aminao miala amy raha araiky efa mahazatra anao, kanefa izio tsy mamparavoravo Jehovah? Aleva onon̈o fa Jehovah tsy man̈iraka atsika han̈ano raha tsy ho vitantsika foeky. Ho vitanao fo hiain̈y mifan̈araka amy fitsipikinany. (Vakia Deoteronomia 30:11-14.) Jehovah mampan̈anten̈a fa han̈ampy anao. (Isaia 41:10, 13; 1 Kor. 10:13) Ke anao aza rivan̈a. Aza raha sarotro atrefinao fo raha dinihinao, fa miniminia koa irô hatsaran̈a maro efa namezan’i Jehovah anao, an̈isan’izen̈y vidim-pan̈avotan̈a. Ke arakarakan’ny itombosan’ny fitiavanao Jehovah, ho hitanao fa “didinany io tsy mavesatra.”​—1 Jaona 5:3.a

7. Ino raha mety iritriretin’ny tanora tarimin’ny raimandreny amy fahamarin̈ana?

⁷ Akôry ndraiky anarô tanora nitarimin̈y an̈atin’ny fahamarin̈ana? Anarô koa mba mpianatra Baiboly. Ndray izy aby, anarô ny ten̈a tôkony hampianarin’ny raimandreninarô. Karaha ty koran̈in’ny Baiboly: “Man̈atòn̈a Zan̈ahary anarô, fa izy han̈aton̈o anarô.” (Jak. 4:8; 1 Tan. 28:9) Izikoa anao mifen̈y mifandray marikitry amy Jehovah, izy koa hifandray marikitry aminao. Amy Jehovah anao tsy zisty olo man̈arakaraka raimandreninao fo. Izy mitaon̈o olo tsiaraikiaraiky, an̈isan’izen̈y olo tsiaraikiaraiky tarimin’ny raimandrenindrô amy fahamarin̈ana. Ke ino ma nahavy anao lôso afaka mifandray marikitry amy Jehovah io? Baka amy vidim-pan̈avotan̈a raha zen̈y. Ke aza atao raha tsisy dikany foeky kadô maventy namezany anao io. (Rom. 5:1, 2) Alohan’ny anao han̈aton̈o Fahatsiarovan̈a amy taon̈o ty, miniminia ino aby hatsaran̈a azonao baka amy nifatesan’i Jesosy io. Ke irarian̈a raha zen̈y handrisiky anao hanakatra tanjon̈onao fan̈araka, baka han̈aboahan̈a amy Jehovah fa anao ten̈a mankasitraka vidim-pan̈avotan̈a namezany tamin’ny alalan’ny Zanany io.b

KRISTIANIN̈Y VITA BATISA

8. Akôry nataon’ny Kristianin̈y vita batisa nan̈aboaka fa irô mino vidim-pan̈avotan̈a?

⁸ Izikoa anao efa batisa, efa misy fomba maromaro nan̈aboahanao fa anao ten̈a mino vidim-pan̈avotan̈a. Ohatra, anao nan̈ano raha hifandraisan̈a marikitry amy Jehovah ndreky han̈arahan̈a fitsipikinany. Anao koa nan̈araka didin’i Jesosy hampianatra olo, ke nikoran̈a tamindrô raha inoanao. Anao nanokan-ten̈a tamy Jehovah ndreky natao batisa. Efa nisy olo ma nanohitry anao noho ny anao man̈araka fahamarin̈ana? (2 Tim. 3:12) Anao tsy vôly miaritry ndreky tsy mivadiky io man̈aboaka fa anao ten̈a tia Jehovah ndreky mankasitraka vidim-pan̈avotan̈a namezany baka tamy Zanany in̈y.​—Heb. 12:2, 3.

9. Ino raha mila tandreman’ny Kristianin̈y vita batisa?

⁹ Atsika ndray efa vita batisa, misy raha mila tandremantsika. Nan̈ino? Izikoa fa mandeha fotoan̈a, mety ho lôso karaha efa tsisy kôntiny amintsika eky vidim-pan̈avotan̈a io. Karakôry mety hahavy zen̈y? Diniha baka irô Kristianin̈y tamy taonjato voanalohany. Jesosy koa fa baka natsangana tamy maty, hitany fa irô ten̈a nahavita niaritry raha maro. Ke izy nidera irô. Fa kanefa, karaha ty koa ho izy tamindrô: “Fa ty raha han̈amezako tsin̈y anao: Nambelanao hihen̈y fitiavan̈anao tamy voanalohany in̈y.” (Apok. 2:3, 4) Hita baka amy zen̈y fa mety hanjary fahazaran̈a fo fanompoan̈a ataon’ny Kristianin̈y araiky. Ohatra, izy mety mbala mivavaka, mitory, mivory, fa efa fahazaran̈a fo, fa tsy baka amy fônany eky. Ke ino raha mety hataonao, izikoa anao mahatsapa fa efa tsy mare karaha taloha eky fitiavanao Jehovah?

10. Akôry hahavy anao ‘handiniky tsara’ ndreky ‘tsy han̈adoso amy jerinao’ fanompoan̈a ataonao? (1 Timoty 4:13, 15)

¹⁰ Apostoly Paoly nandrisiky Timoty ‘handiniky tsarabe’ ndreky ‘tsy han̈adoso amy jerinany’ fanompoan̈a ataony. (Vakia 1 Timoty 4:13, 15.) Baka han̈arahan̈a torohevitry zen̈y koa, mifen̈a handiniky raha hahavy fanompoan̈anao ho hisy dikany tsarabe, ke han̈ambela ‘fan̈ahy masin̈y hahavy anao hafana fô’ fo. (Rom. 12:11) Ohatra, ataova raha hahavy anao hifantoko tsarabe amy fivorian̈a, ke man̈omàn̈a tsarabe. Na koa ataova raha hazahoan̈a hatsaran̈a maro, izikoa fa man̈ano fianaran̈a manokan̈a. Ke mizahava plasy hahafahanao mifantoko tsara ndreky misaintsain̈y tsarabe raha ianaranao. Izio mira olo tsy vôly manôsoko hazomaty, baka môtro mirehitry fo in̈y. Ke anao koa mila man̈ano raha hahavy anao tsy ho vôly hankasitraka vidim-pan̈avotan̈a ndreky raha jiaby namian’i Jehovah anao. Baka iô koa, an̈atin’ny herin̈iandra vitsivitsy alohan’ny Fahatsiarovan̈a, anao mety misaintsain̈y irô hatsaran̈a maro anan̈antsika amy maha Vavolombelon̈on’i Jehovah atsika. Ke anao hahaihankasitraka vidim-pan̈avotan̈a io fo, fôtony baka amizio mahavy anao hahaihifandray marikitry amy Jehovah.

11-12. Anao ma efa tsisy fan̈ahy masin̈in’ny Zan̈ahary eky izikoa anao ndraikindraiky tsy ten̈a mazoto? Hazavà. (Zahava koa sary.)

¹¹ Ke izikoa ndraikindraiky anao tsy ten̈a mazoto karaha taloha amy fanompoan̈a, aza kivy. Aviô koa, aza mieritreritry fa anao efa tsisy fan̈ahy masin̈in’ny Zan̈ahary. Aleva onon̈o baka raha nikoran̈in’i Paoly momba fanompoan̈anany tamy Kristianin̈y ta Korinto ty: “Ndray faorse an̈anaovako zen̈y, izio ataoko fo fôtony izio efa nankin̈iny taminaka.” (1 Kor. 9:17) Ino ma raha tian’i Paoly koran̈iny?

¹² Paoly koa ndraikindraiky nahatsiaro tsy tihitory. Fa ndray zen̈y, izy tapa-kevitry hanohy fanompoan̈anany, ndray karakôry raha tsapany tamy fotoan̈a zen̈y. Anao koa mety man̈ano karaha nataony zen̈y. Mifen̈a fo ho tapa-kevitry han̈ano ny tsara, ndray anao ndraikindraiky tsy marisiky han̈ano zen̈y. Ke mivavaha, baka anao “han̈iry ndreky hanan̈a angôvo han̈anaovan̈a raha.” (Fil. 2:13) Mifen̈a fo han̈ano fahazaran̈anao ara-pan̈ahy. Ke matokisa fa izikoa fa mandeha fotoan̈a, hahaihitombo fo fitiavanao Jehovah, baka iô anao hahaihazoto fo ndraiky koa.

13. Karakôry hataontsika handini-ten̈a fo, tsao atsika efa tsy ‘amy finoan̈a’ eky?

¹³ Ndraikindraiky, tsara izikoa atsika mandini-ten̈a matetiky, karaha nikoran̈in’i Paoly amy 2 Korintianina 13:5 ty: “Anarô aza vôly mandini-ten̈a misy hahaizanarô izikoa anarô mbala an̈atin’ny finoan̈a sa tsy an̈atiny.” Ohatra, man̈ontania ten̈a: ‘Zaho ma mbala man̈ano voalohan-toeran̈a Fanjakan̈an’ny Zan̈ahary?’ (Mat. 6:33) ‘Hita amy fangalan̈a diandian̈a fidiko ma fa zaho tsy tia raha ratsy?’ (Sal. 97:10) ‘Zaho ma mifen̈y mihavan̈a ndreky miray sain̈y amy mpiara-manompo aby io?’ (Efes. 4:2, 3) Lera amy Fahatsiarovan̈a, io fotoan̈a tsara hisaintsain̈antsika momba vidim-pan̈avotan̈a namezan’i Jehovah atsika io. Amizio koa ahafahantsika mandini-ten̈a tsarabe ndreky man̈ano raha hazahoantsika antoko fo fa atsika velon̈o han̈ano sitrapôn’i Kristy, fa tsy sitrapôntsika tômpiny.c

KRISTIANIN̈Y EFA TSY MIVORY EKY

14. Nan̈ino Kristianin̈y sasany tsy mivory eky?

¹⁴ Kristianiny sasany efa tsy niaraka tamy fiangonan̈a eky tan̈atin’ny fanjava maromaro na taon̈o maromaro foeky. Nan̈ino? Irô mety “resin’ny raha maro mampiasaloha amy fiain̈ana.” (Lioka 21:34) Sasany mety neloko noho ny volan̈a na raha nataon’ny mpiara-manompo. (Jak. 3:2) Misy koa nan̈ano fahotan̈a maventy kanefa mbala misalasala hangataka fan̈ampian̈a. Fa ndray karakôry, ino raha mety hataonao, izikoa anao tafiala amin’ny andian’ny ôndrikôndriky? Tôkony handrisiky anao han̈ino ma vidim-pan̈avotan̈a io?

15. Akôry an̈aboahan’i Jehovah fa izy mikarakara ôndrikôndriky niala andiany? (Ezekiela 34:11, 12, 16)

¹⁵ Diniha hely baka raha tsapan’i Jehovah momba irô ôndrikôndriky niala andiany aby io. Izy tsy meloko amindrô ndreky mbala tsy man̈adin̈a irô. Fa izy mitady lan̈iany ôndrikôndriky very. Irô mbala amiany hanin̈y fo ndreky ampiany himpody aminany ndraiky. (Vakia Ezekiela 34:11, 12, 16.) Han̈ano karaha zen̈y aminao koa ma Jehovah? Ia! Matoa anao mbala mandiniky lahatsoratra ty, zen̈y mivolan̈a fa anao mbala manan̈a fô tia fahamarin̈ana. Jehovah nahita raha tsara tamy fônao tamin’izy nitaon̈o anao tamy fahamarin̈ana in̈y, ke tsy ho vitany koa ma hitaon̈o anao himpody aminany ndraiky?

16. Ino han̈ampy ôndrikôndriky very himpody amy Jehovah? (Zahava koa sary.)

¹⁶ Amy bokikely Miverena amy Jehovah in̈y, misy volan̈a mankahery ty: “Matokisa fa Jehovah han̈ampy anao himpody aminany ndraiky. Izy han̈ampy anao baka anao tsy hiady sain̈y ndreky tsy hitana heloko am-pô na tsy han̈amelo-ten̈a eky fa hilamin-tsain̈y. Ke anao baka iô hanjary tihanompo Jehovah miaraka amy mpanomponany ndraiky koa.” Aza adin̈a koa fa irô anti-pan̈ahy aby io vôn̈ono han̈ampy anao. Ke irô ho “mira tany fialofan̈a amy tsiko maresaka be in̈y ndreky tany fialofan̈a amy mahalen̈y miaraka difi-baratra.” (Isaia 32:2) Ke baka ho fankasitrahan̈a vidim-pan̈avotan̈a, man̈ontania ten̈a: ‘Ino aby raha mety hataoko amy ziôty baka zaho “hifandamin̈y” amy Jehovah?’ (Isaia 1:18; 1 Pet. 2:25) Ohatra, akôry izikoa anao mba mandeha mivory amy Tran̈o Fivorian̈a? Akôry izikoa anao mba man̈aton̈o anti-pan̈ahy, ke mangataka fan̈ampian̈a amindrô? Irô aby mety han̈iraka olo hampianatra Baiboly anao an̈atin’ny fotoan̈a vitsivitsy. Matokisa fa Jehovah ten̈a mankasitraka ezaka ataonao, han̈aboahanao fa anao ten̈a mankasitraka vidim-pan̈avotan̈a nataon’ny Zanany in̈y.

INO RAHA HANDEHA HATAONAO?

17-18. Akôry hampiasantsika tsarabe fotoan̈antsika, alohan’ny havian’ny Fahatsiarovan̈a amy taon̈o ty?

¹⁷ Jesosy nivolan̈a fa Babany nandefa izy tatỳ, “amy zen̈y zay olo man̈aboaka fa mino izy tsy ho ripaka fa hahazo fiain̈ana tsisy farany.” (Jaona 3:16) Vidim-pan̈avotan̈a io fomba nataon’i Jehovah baka hankafaka atsika amy fahotan̈a ndreky fahafatesan̈a. Ke tsy mety atsika eky tsy hankasitraka izio. (Rom. 3:23, 24; 2 Kor. 6:1) Ke andra vitsivitsy alohan’ny Fahatsiarovan̈a, mangalà fotoan̈a hisaintsain̈ana fomba nan̈aboahan’i Jehovah ndreky Jesosy fitiavandrô atsika. Ke fitiavan̈andrô zen̈y tôkony hifaorse atsika hahay hankasitraka.

¹⁸ Akôry han̈aboahanao fa anao mahay mankasitraka? Mety tsy ho mira amy nin’olo valiny amezanao. Fa matokisa ndraiky fa Jehovah hitahy ezaka ataonao, fôtony anao mifen̈y han̈ano karaha olo an-tapitrisany manompo izy, ke “tsy ho velon̈o nin’ny ain̈indrô tômpiny eky, fa nin’ny araiky efa naty han̈avaotan̈a irô.”​—2 Kor. 5:15.