Eran-tany Ahitan̈a Olo Manafiky Mitondra Basy​—Ino Raha Koran̈iny Baiboly Momba Zen̈y?

Tamy Zie 2022, farandraha naro eky olo kafiry nampiasa fitaovan̈a findesin̈y miady, eran-tany, izikoa fa nanafiky:

• “Famonoan̈a pan̈ano politiky araiky ten̈a malaza ta Japon tan̈y [Shinzo Abe Premie Ministry taloha] ten̈a nan̈akorontan̈a firenena salakady nampiasaloha olo eran-tany, intsaka eky firenenan’i Japon, fôtony mahalan̈a fo amindrô an̈y misy raha karaha zen̈y, aviô lalàn̈andrô sarôtiny mare amy resaka fampiasan̈a basy.”​—10 Zie 2022, The Japan Times.

• “Taitry mare olo ta Danemark izikoa fa nahafaty olo telo aby, lelahy nitondra basy nanafiky tany fivarotan̈a ta Copenhague.”​—4 Zie 2022, Reuters.

• “Afriky Atsimo: Olo 15 naty izikoa fa nisy lelahy nitondra basy nitifitifitry olo tan̈aty bara araiky tamy tanànan’i Soweto.”​—10 Zie 2022, The Guardian.

• “Tandrerekin’ny tamin’ny 4 Zie, mandilatra 220 olo avoatifitry ke naty tamy fetim-pirenana ta Etazonỳ tan̈y, izikoa fa nisy olo nitondra basy nanafiky.”​—5 Zie 2022, CBS News.

Atsika ma afaka man̈anten̈a fa andra araiky an̈y, mety tsy ho hisy eky hakafirianan̈a karaha zen̈y? Ino raha volan̈in’ny Baiboly momba zen̈y?

Tsy hisy eky olo kafiry

Koran̈in’ny Baiboly fa atsika iziô miain̈y amin’ny “andra farany”, ke olo amy ziôty farandraha kafiry eky, masiaka mare salakady mahivantan̈ana. (2 Timoty 3:1, 3) Hakafirianan̈a karaha zen̈y mahavy olo maro mavozo. (Lioka 21:11) Ndray izy man̈ano zen̈y, Baiboly mampan̈anten̈a fa ho avy fotoan̈a tsy hisian’ny olo kafiry, ke ‘olo hipetraka amy tany milamin̈y hanjakan’ny fiadanan̈a ndreky amy tany tsy isian’ny asaloha foeky, baka iô amy tany fangalan̈a ain̈y tsisy mpanabataba.’ (Isaia 32:18) Akôry han̈afoan̈ana hakafirianan̈a io?

Zan̈ahary han̈adoso olo ratsy fan̈ahy ndreky han̈afoan̈a fitaovan̈a jiaby findesin̈y miady

• ‘Olo ratsy fan̈ahy hadoso tsy ho hisy ambony tany eky.’​—Ohabolana 2:22.

• “Ataony [Zan̈ahary] raha tsy hisian’ny ady eky eran-tany. Tapatapahany zanapaly aviô potipotehiny saboa; ravan̈iny amy môtro sarety findesin’ny maramila mandeha lagera.”​—Salamo 46:9.

Ampianarin’ny Zan̈ahary hiain̈y am-pilaminan̈a olo jiaby eran-tany ke tsy ho hisy eky hakafirianan̈a

• “Irô tsy handratra na handroba-draha amy bongonaka masin̈y, fôtony ho feno fahaizan̈a ny marin̈y momba Jehovah tany ty, karaha ataon’ny rano mandrakotro jia ambanin’ny ranomasin̈y.”​—Isaia 11:9.

• Ndray iziô, Zan̈ahary efa mampianatra olo eran-tany tsy ho kafiry ndreky tsy hampiasa fitaovan̈a findesin̈y miady, aviô mampianatra irô ‘hanefy sabatrandrô hatao lasarỳ, baka io saboandrô hivoandrô meso fanapahan̈a tahon’ny rezain.’​—Mika 4:3.

Baiboly mampan̈anten̈a donia araiky milamin̈y tsisy raha havozoan̈a, ke anao koa tihahazo fan̈ampin’ny fan̈azavan̈a momba zen̈y, vakia lahatsoratra “Ho Foana ve ny Tahotra Indray Andro Any?”

Anao koa tihahay raha maro momba tsy fisian’ny hakafirianan̈a zen̈y eky, vakia lahatsoratra “Ela ny Ela ka Hilamina Ihany ny Tany!”