Hira Man̈ampy Atsika Hahaiharikitry Zan̈ahary

Hira io ten̈a kadô tsara baka amy Jehovah. Izio misy vokany aminy eritreritrintsika, man̈ova fihetsehampontsika, avio izio koa mandrisiky atsika han̈ano raha. Karaha zen̈y tsarabe iro hirantsika aby io, avio mbala mandilatra zen̈y raha vitanizio fotony izio man̈ampy atsika hahaiharikitry Jehovah.

Rango tamy taon̈o 2014, hira mandilatra 70 efa naboakantsika, avio araiky amindro io izioty efa misy amy volan̈a mandilatra 500 farany hely! Ke mety ho loso diniky anao: ‘Azovy ma man̈aboaka hira aby io, avio ino aby raha tafiditry aminy asandro io?’

Akory ahavitan̈a hira aby io?

Amy Sampanasa Momba Feo Ndreky Video misy ekipy mikarakara raha momba hira aby io ndreky man̈aboaka izio. Iro amy Komitiny Fampianaran̈a an̈ivony Filankevipitantan̈ana miandraikitry sampanasa io. Misy rahalahy ndreky ranabavy kadiriny 13 an̈atiny ekipy io. Iro mamoron̈o hira, man̈amboatra feony hira io, avio iro mandamin̈y programo ndreky asa hafa ten̈a ilain̈a mifandray amizio. Misy piasa antsitrapo hafa koa nikeny Komitiny Fampianaran̈a han̈ampy ekipy io aminy asa io, fa iro baka antran̈ondro fo miasa. Misy amindro io pamoron̈o hira, sasany mahay misaoma raha man̈ena, avio pihira. Baka amy tany isankarazany iro piaramanompo amintsika aby io. Iro io ten̈a manetry ten̈a, ke iro von̈ono hampiasa talentandro ndreky fahaizan̈andro, kanefa iro tsy mitady laza na voninahitry baka aminolo.

Akory han̈amboaran̈a hira araiky? Voanalohany, Komitiny Fampianaran̈a nifidy andininteny ioren̈any hira io ndreky fihetsehampo tian̈a haboaka. Ekipy mikarakara hira io amy zay baka io manendry olo hamoron̈o feonkira ndreky hanoratra tononkira. Afaranizen̈y, andramanin̈y alain̈a feo izio. Tandrin̈esany Komitiny Fampianaran̈a io amy zay feonkira io, avio iro man̈amia toromariky fan̈ampiny. Ekipy mikarakara hira io man̈ano fan̈itsian̈a, avio hira io alain̈a feo farany. Amy tany isankarazany hangalan̈a feo iro hira aby io. Misy izio alain̈a amy tran̈ony sampan̈a na antran̈onolo manan̈a fitaovan̈a fangalan̈a feo.

Misy programony ordinatera isankarazany amy zay ampiasaindro rahalahintsika aby io lera iro mamoron̈o hira ndreky mangala feo. Tsy maintsy mampiasa fitaovan̈a isankarazany koa iro, karaha ataony raha man̈ena, sônô ndreky fitaovan̈a hafa mifandray amy zen̈y, avio mikrô. Vangany mikrô araiky fo, efa mahatakatra 100 dolara (amerikain) firaka 1 000 dolara mandilatra. Ke tamy taon̈o 2020, efa ho 116 000 dolara (amerikain) tan̈y lanintsika hivangan̈a fitaovan̈a fangalan̈a feo iro hira aby io.

Karakory natao nitsitsy vola? Ankamarozanolo miasa aminy ekipy mikarakara raha momba hira io piasa antsitrapo miasa baka antran̈o, fa tsy Betelita. Matetiky iro mampiasa programony ordinatera hamoron̈ana hira ndreky han̈aboahan̈a izio, fa tsy avory antany araiky olo marobe mahay misaoma raha man̈ena, baka io iro alain̈a feo.

‘Mankafatatra finoan̈a’

Farandraha tiandro rahalahy ndreky ranabavy aby io eky mitandren̈y iro hirantsika aby io. Karaha ty nambarany Tara, mipetraka an Allemagne: “Izikoa fa misy raha mampiasaloha zaho mare, efa iro hira aby io edy man̈ampy zaho tsy hitotoko. Zaho koa fa mitandren̈y iro hira aby io amy volan̈anaka, karaha Jehovah in̈y mitolon̈o zaho.” Karaha ty koa nambarany Dmitry, rahalahy araiky a Kazakhstan: “Tiako mare mitandren̈y hira, kanefa tsy voatery mandiniky mifan̈araka sa tsy mifan̈araka amy toro lalan̈any Baiboly hira io va karakory. Man̈ampy zaho hifantoko amy raha arapan̈ahy koa iro hirantsika aby io.”

Ty ndraiky raha tsapany Delia, ranabavy araiky mipetraka an Afriky Atsimo, momba iro hirantsika aby io: “Iro io ten̈a mankafatatra finoan̈anaka. Zaho koa fa kivy na misy problemo, tsy maintsy misy hira mifandray amy raha mahazo zaho fo. Ndray farin̈esako feonkira io fo efa mampiova fihetsehamponaka.”

Misy aminy hira aby io koa manjary hira farany tiany piaramanompo. Karaha ty nambarany Lerato, an Afriky Atsimo: “Man̈ampy zaho hangala sary antsain̈y fotoan̈a hitsinako mamako hira ‘Izio ’Fa Ambadiky Ao’ ndreky araiky ‘Ho Avy Donia Vaovao’ in̈y. Isaka zaho mihira iro io, karaha efa hitako izy milomoay man̈aton̈o zaho sady efa von̈ono hitolon̈o zaho.”

Ten̈a nahatsara tsaiky man̈angy araiky mipetraka a Sri Lanka koa araiky taminy hirantsika aby io. Karaha ty nambarany: “Nisiahany papianatra siansinay tamasony tsaiky jiaby zaho fotony zaho Vavolombelon̈o Jehovah. Zaho nanjary navozo, avio tsy haiko foeky raha hivolan̈iko. Zaho koa fa navy tantran̈o, zaho nirahiny mamako hitandren̈y hira ‘Mianara mba Handroso Tsara.’ Hitako baka taminy hira io fa mila man̈ano fikarohan̈a zaho baka ho haiko raha tokony hivolan̈iko. Amarainizin̈y, zaho nikoran̈a tamy papianatra io. Nitandrin̈esany tsarabe zaho, avio nivolan̈a koa izy fa mazava aminany eky raha inoany Vavolombelon̈o Jehovah. Ten̈a mankasitraka fandaminan̈any Jehovah zaho nan̈amia atsika hira maro mankahery aby io.”

Akory ahitan̈a vola han̈amboaran̈a ndreky han̈aboahan̈a iro hira aby io? Baka amy fan̈amezan̈a natokan̈a aminy asa fitorian̈a erantany. Ke misy fomba maromaro mety han̈anaovan̈a zen̈y amy donate.jw.org ao. Ten̈a mankasitraka anaro zahay fotony anaro ten̈a mazoto man̈amia.