FAN̈ONTANIAN̈ANY TANORA
Akory Han̈ampiany Baiboly Io Zaho?—Fizaran̈a 1: Nan̈ino Anao Tokony Hamaky Baiboly?
“Zaho efa navy namaky Baiboly, fa tsy vitako firaka amparany fotony lava loatra e!”—Briana, 15.
Anao koa ma efa navy nahatsapa karaha zen̈y? Lahatsoratra ty afaka man̈ampy anao!
Nan̈ino ma zaho mila mamaky Baiboly?
Na mieritreritry handeha hamaky Baiboly zen̈y fo ma efa mampakamo anao? Ndraikindraiky mety mampakamo marin̈y. Maventy baka Baiboly io. Soratranany aminio hely, sady izy tsisy sary. Tsy karaha tele ndreky filma foeky.
Fa aleva onon̈o hely baka ty: Izikoa anao nahita boaty misy raha valera efa ela be, tsy mba tianao hita raha an̈atinizio ao?
Baiboly io mira boaty araiky feno raha valera. Amizio ao feno fahendrena ten̈a valera, afaka han̈ampy anao
Han̈ano fanapahankevitry tsara
Hifandray tsara amy raimandreninao
Hahita naman̈a tsara
Handresy asaloha
Nan̈ino ma raha an̈aty boky efa ela be io mbala mety arehan̈a fo firaka amintsika izioty? Fotony ‘Soratra Masin̈y jiaby io baka amy fan̈ahy masin̈y Zan̈ahary.’ (2 Timoty 3:16) Dikanizen̈y torohevitry an̈aty Baiboly ao baka aminolo araiky ten̈a azo antoko.
Amy Baiboly ao feno fahendrena ten̈a valera
Karakory fomba hamakiako izio?
Voanalohany: Ataova mifanesisesy rango amboanalohany. Mba efa hitahitanao amy zen̈y raha tiany Baiboly koran̈iny. Misy fomba maro afaka hamakian̈a Baiboly io. Ty aroe:
Misy 66 boky amy Baiboly ao. Afaka asesinao letry amy bokiny Genesisy vakiteninao, firaka avy aminy Apokalypsy.
Vakiteninao afaka atao mifan̈araka amy fotoan̈a niboahany tantara ao.
Sosokevitry: Ho hitanao amy Raha Niavaka Tamy Fiain̈ana Jesosy, amy bokikely Fitaovan̈a Fianaran̈a Soratra Masin̈y listiny raha maventy nandalo tamy fiain̈anany Jesosy.
Faharoe: Mifidiana tantara araiky amy Baiboly mikoran̈a olo misy problemo mitovy amy ninao. Ohatra:
Anao ma tihahazo naman̈a mety atokisan̈a? Vakia tantarany Jonatana ndreky Davida. (1 Samoela, toko 18-20) Avio diniha ino aby toetriny Davida nahavy Jonatana nikamarady taminany.
Anao ma tihahavita handresy fakampan̈ahy? Vakia tantarany Josefa. Zahava akory nataony nandresy fakampan̈ahy. (Genesisy, toko 39) Avio diniha ino nan̈ampy Josefa handresy fakampan̈ahy.
Tianao ho hay ma akory mety han̈ampiany vavaka io anao? Vakia tantarany Nehemia. (Nehemia, toko 2) Zahava ao porofo fa ten̈a nan̈ampy Nehemia vavaka io.
Sosokevitry: Anao koa fa mamaky Baiboly, mandihana amy toeran̈a mangin̈y, amy zen̈y anao afaka mifantoko tsarabe.
Fahatelo: Fidiana tantara na salamo araiky, vakia izio, baka io diniha akory mety han̈arehanao izio amy fiain̈ananao. Izikoa anao fa baka mamaky, man̈ontania ten̈a karaha ty:
Nan̈ino ma Jehovah nampanoratra izity tan̈aty Baiboly?
Ino toetriny Jehovah na fomba fan̈anaovany raha, ianarako baka aminizity?
Akory mety han̈arehako izity amy fiain̈ananaka?
Sosokevitry: Manàn̈a tanjon̈o! Sorata ombian̈a anao tihanomboko hamaky Baiboly.