Mijanòna Marikitry Jehovah

1, 2. Azovy ten̈a mahavita miaro atsika?

OHATRA anao tatrany andra ratsy amy lalan̈a. Lan̈itry mahiziky mare, misy tselatra isaka teteky, baka io misy difibaratra. Tsy ela amy zay, latsaka mare mahalen̈y. Anao mitady tany hialofan̈a. Misora ravoravo mare anao, izikoa mahita tany tsy leny ndreky mahaloko anao tsarabe!

² Mira zen̈y raha misy izioty. Mahairatsy fo fiain̈ana erantany. Anao mety han̈ontany karaha ty: ‘Aia tany mety hahavotro zaho?’ Karaha ty nisoratiny pan̈ano Salamo: “Zaho hivolan̈a amy Jehovah karaha ty: ‘Anao hataoko fialofan̈a ndreky fiarovan̈a fatatra. Anao Zan̈aharinaka fo hatokisako.’ ” (Salamo 91:2) Jehovah ten̈a mahavita man̈avotro atsika amy raha manahiran̈a atsika, baka io koa izy mampan̈anten̈a atsika fa ho tsara fiain̈ana aminy amaray an̈y.

3. Karakory ataontsika mialoko amy Jehovah?

³ Karakory mety hataony Jehovah miaro atsika? Izy mahavita man̈ampy atsika, na ino na ino raha manahiran̈a atsika, baka io koa izy mbala mahery mandilatra olo mety mampijaly atsika. Ndray mbala misy raha ratsy mety mahazo atsika izioty, matoky tsarabe atsika fa jaly jiaby mbala hadosony Jehovah. Baiboly mankahery atsika karaha ty: “Aza miala amy fitiavany Zan̈ahary.” (Joda 21) Atsika mila mijanon̈o marikitry Jehovah fo, baka izy han̈ampy atsika an̈atiny andra sarotro ty. Karakory han̈anovantsika zen̈y?

TIAVA ZAN̈AHARY

4, 5. Ino aby ahitan̈a fa Jehovah tia atsika?

⁴ Mila misaintsain̈y fitiavany Jehovah atsika, izikoa tihijanon̈o marikitry izy fo. Aleva onon̈o raha jiaby nataony Jehovah tamintsika. Baka aminany tany tsara ipitrahantsika ty, raha maniry ndreky biby isankarazany. Atsika amiany hanin̈y masiro ndreky rano igiahan̈a. Baka amy Baiboly ao koa Jehovah mampianatra atsika an̈aranany ndreky toetrinany maro tsara. Mbala mandilatra zen̈y, izy nan̈amia atsika Jesosy, Zanany ten̈a tiany, han̈amia atsika ain̈inany. (Jaona 3:16) Baka amy soron̈o nataony Jesosy io mahavy atsika man̈anten̈a raha tsara aminy amaray an̈y.

⁵ Jehovah nan̈amia Fanjakan̈any Mesia. Izio fitondrasan̈a andan̈itry an̈y, ke tsy ho ela izio han̈adoso jaly jiaby. Fanjakan̈a io han̈ano tany jiaby ty hanjary paradisa. Olo jiaby amy zen̈y hiadan̈a ndreky ho sambatra tsisy farany. (Salamo 37:29) Tia atsika koa Jehovah, fotony izy mampianatra fomba fiain̈ana ten̈a tsara. Izy mikaiky atsika hivavaka aminany, ke von̈ono fo hitandren̈y atsika. Jehovah ten̈a tia atsika tsiaraikiaraiky.

6. Karakory tokony hamalianao fitiavany Jehovah anao?

⁶ Akory tokony hamalianao fitiavany Jehovah anao? Aboaha izy fa anao mankasitraka raha jiaby nataony taminao. Raha mampalahelo, maro olo tsy mankasitraka Jehovah. Mira zen̈y koa nataonolo, tamy Jesosy tambony tany teto. Tandraraiky izy nitaha olo boka folo. Iro koa fa janga, araiky fo mba nan̈ano mersy izy. (Lioka 17:12-17) Tiantsika han̈ano mersy karaha lelahy araiky io. Tokony han̈ano mersy Jehovah fo atsika isanandra.

7. Karakory ma ten̈a tokony hitiavantsika Jehovah?

⁷ Mila aboaka amy fiain̈anantsika koa fitiavantsika Jehovah io. Jesosy nivolan̈a tamy pianatranany aby io fa iro tsy maintsy tia Jehovah amy fondro jiaby, ndreky vatan̈andro jiaby ndreky sain̈indro jiaby. (Vakia Matio 22:37.) Ino ma dikanizen̈y?

8, 9. Karakory an̈aboahantsika amy Jehovah fa atsika tia izy?

⁸ Tsy voatery ho ten̈a tia Jehovah olo mivolan̈a tia izy. Mila man̈ano raha atsika, izikoa tia Jehovah amy fontsika jiaby, vatan̈antsika jiaby, ndreky sain̈intsika jiaby. (Matio 7:16-20) Baiboly mampianatra fa atsika koa tia Zan̈ahary, atsika hitandrin̈y didinany. Tsy sarotro man̈ano zen̈y, fotony ‘didinany tsy mavesatra.’—Vakia 1 Jaona 5:3.

⁹ Ho sambatra ndreky ho afapo amy fiain̈ana atsika, izikoa man̈araka volan̈a Jehovah. (Isaia 48:17, 18) Ino raha hahavy atsika hijanon̈o marikitry Jehovah fo? Atsika hizaha zen̈y.

MIJANÒNA MARIKITRY JEHOVAH FO

10. Nan̈ino ma anao mila manohy fianaranao momba Jehovah fo?

¹⁰ Karakory nataonao nahavy anao nanjary kamaradiny Jehovah? Anao koa fa nianatra Baiboly, anao nahay raha maro momba Jehovah, ke nan̈ano raha nihavanan̈a taminany. Fihavan̈anaro io mira motrony hazomaty fo. Mila soron̈iny fo motro io, baka tsy maty. Tsisy ny hafa amy zen̈y koa, anao mila manohy mianatra raha momba Jehovah fo, baka hihavan̈a tsarabe aminany.—Ohabolana 2:1-5.

11. Karakory hahavy raha ampianariny Baiboly ho tafiditry tsarabe an̈aty fonao?

¹¹ Arakaraka ianaranao Baiboly, anao hahita raha maro manaitry, ke miditry tsarabe an̈aty fonao. Aleva onon̈o, nisy pianatra Jesosy aroe nan̈azavany faminanian̈a aby amy Baiboly. Pianatra aby io nivolan̈a: “Tsy karaha nisy motro nizelazela tan̈aty fontsika tao, taminizy nan̈azava tsarabe Soratra masin̈y tamintsika, taminy atsika tamy lalan̈a tan̈y in̈y?”—Lioka 24:32.

12, 13. a) Mety han̈ano karakory fitiavantsika Jehovah? b) Ino raha tokony hataontsika, baka hitombo fo fitiavantsika izy?

¹² Han̈ano karaha iro pianatra Jesosy nan̈azavan̈a tsarabe Soratra Masin̈y in̈y koa anao, izikoa mazava aminao raha koran̈iny Baiboly ao. Zen̈y hahavy anao hahay Jehovah ndreky ho tia izy. Tsy tianao hihen̈y foeky fitiavanao izy io.—Matio 24:12.

¹³ Anao koa fa manjary kamaradiny Zan̈ahary, mila mifen̈y mare fo anao mankafatatra fihavan̈anao aminany. Tohiza fo fianaranao momba Jehovah ndreky Jesosy, baka io diniha ndreky tadiava fo fomba han̈arehan̈a raha nianaranao amy fiain̈ananao. (Jaona 17:3) Anao koa fa mamaky Baiboly, man̈ontania karaha ty: ‘Ino raha ianarako momba Jehovah baka aminizy ty? Akory hitiavako izy amy fonaka jiaby ndreky aminy ain̈inaka jiaby?’—1 Timoty 4:15.

14. Nan̈ino ma vavaka io man̈ampy atsika hihavan̈a tsarabe amy Jehovah?

¹⁴ Anao koa manan̈a kamarady ten̈a fankahazo aminao, ke anaro mikoran̈a fo isanandra, anaro tsy hifankafoe. Karaha zen̈y koa anao, izikoa mikoran̈a amy Jehovah isanandra. Hahay hitombo fo fitiavanao izy. (Vakia 1 Tesalonianina 5:17.) Vavaka io kado tsara baka amy Babantsika andan̈itry an̈y. Atsika mila mazoto mikoran̈a aminany. (Salamo 62:8) Atsika tsy tokony han̈ano tsianjery raha araiky fo isaka mivavaka, fa tokony han̈ano vavaka ten̈a misy dikany. Izikoa atsika manohy mianatra Baiboly ndreky mazoto mivavaka, ho tia Jehovah tsarabe atsika.

KORÀN̈A AMINOLO RAHA MOMBA JEHOVAH

15, 16. Fahitanao izy, ino mampiavaka fan̈anovan̈a asa fitorian̈a io?

¹⁵ Atsika koa tihijanon̈o marikitry Jehovah fo, atsika mila mikoran̈a aminolo raha inoantsika. Tombontsoa maventy mikoran̈a raha momba Jehovah io aminolo. (Lioka 1:74) Izio koa andraikitry namiany Jesosy olo ten̈a kristianin̈y jiaby. Ke atsika tsiaraikiaraiky tokony hitory vaovao tsarany Fanjakan̈any Zan̈ahary. Asa anao efa man̈ano izio?—Matio 24:14; 28:19, 20.

¹⁶ Ten̈a raha maventy taminy apostoly Paoly asa fitorian̈a io, ke “harian̈a” nivolan̈any izy. (2 Korintianina 4:7) Mikoran̈a raha momba Jehovah aminolo ndreky mikoran̈a fikasan̈anany io asa ten̈a maventy mety hataonao. Io fomba araiky anompoanao Jehovah, ke ten̈a maventy aminany fan̈anovanao zen̈y. (Hebreo 6:10) Fitorian̈a io mitondra hatsaran̈a aminao ndreky aminolo hitorianao, fotony man̈ampy iro hanjary marikitry Jehovah anao amy zen̈y, sady anao koa han̈ano karaha zen̈y. (Vakia 1 Korintianina 15:58.) Matokisa anao fa tsisy asa mahafapo mandilatra izio!

17. Nan̈ino ma asa fitorian̈a io asa ten̈a meky?

¹⁷ Ten̈a asa meky asa fitorian̈a io. Atsika tokony “hitory volan̈a io”, ke tsy tokony “hijijy tamban̈a” han̈ano izio. (2 Timoty 4:2) Olo mila maharen̈y raha momba Fanjakan̈any Zan̈ahary. Baiboly mivolan̈a: “Efa marikitry andra maventiny Jehovah io! Efa marikitry izio, sady efa man̈aton̈o malaky foeky!” Farany io “tsy mety ho tara favian̈a!” (Zefania 1:14; Habakoka 2:3) Ten̈a efa tsy ho ela Jehovah handravan̈a donia ratsiny Satana ty. Alohanizen̈y fo, atsika mila mampitandrin̈y olo, baka iro mba hifidy hanompo Jehovah koa.

18. Nan̈ino ma atsika tokony hanompo Jehovah miaraka amy namantsika amy fivorian̈a an̈y?

¹⁸ Jehovah tia atsika hanompo izy miaraka aminolo ten̈a kristianin̈y. Baiboly mivolan̈a: “Ke atsika tokony hifan̈amia hevitry baka handrisiky amy fitiavan̈a ndreky asa tsara, ke aza manapatapaka fivorian̈a, karaha sasany efa zatra tsy mivory, fa hifankahery fo, fotony hitanaro tsarabe fa andra io efa marikitry.” (Hebreo 10:24, 25) Atsika tokony hifen̈y mare tsy hanapatapaka fivorian̈a jiaby. Fivorian̈a io mankahery atsika ndreky namantsika.

19. Ino raha hahavy atsika ho tia iro rahalahintsika ndreky ranabavintsika amy fivorian̈a an̈y?

¹⁹ Anao koa mivory, anao hahazo naman̈a maro han̈ampy anao hanompo Jehovah. Anao hahita rahalahy ndreky ranabavy isankarazany mifen̈y manompo Jehovah, karaha anao koa. Iro io fo mbala mety ho tafan̈ano raha tsy mety, fotony iro mbala tsy lavorary mira anao koa. Izikoa misy raha zen̈y, mahaiza mamela heloko. (Vakia Kolosianina 3:13.) Toetry tsarandro fo zahava. Anao koa man̈ano zen̈y, anao ho tia iro jiaby ndreky hahay harikitry Jehovah fo.

TEN̈A FIAIN̈ANA

20, 21. Ino ma “ten̈a fiain̈ana zen̈y”?

²⁰ Tiany Jehovah kamaradinany jiaby hahazo fiain̈ana ten̈a tsara. Ampianariny Baiboly atsika fa tsy ho karaha ty fiain̈ana aminy amaray an̈y, fa ho tsara ankitin̈y.

²¹ Atsika amy zen̈y velon̈o, tsy 70 na 80 taon̈o fo, fa ho ‘velon̈o tsisy farany.’ Atsika amy zen̈y tsy harary eky, hiadan̈a, ndreky ho sambatra amy Paradisa tsara mare. Zen̈y mahavy Baiboly mivolan̈a izio “ten̈a fiain̈ana.” Jehovah mivolan̈a fa han̈amia atsika ten̈a fiain̈ana io. Rango izioty atsika mila man̈ano eraka ny vitantsika ‘hitanan̈a mare’ ten̈a fiain̈ana io.—1 Timoty 6:12, 19.

22. a) Akory ma “hitanantsika ten̈a fiain̈ana io”? b) Nan̈ino ma tsy baka aminy angovontsika hazahoan̈a izio?

²² Karakory ma “hitanantsika ten̈a fiain̈ana” io? Atsika tsy maintsy “man̈ano asa tsara”, ke “manankarian̈a aminy asa tsara.” (1 Timoty 6:18) Dikanizen̈y, atsika mila man̈araka raha ianarantsika baka amy Baiboly. Izikoa angovontsika manokan̈a fo, tsy ho vitantsika zen̈y, baka io koa atsika tsy hahazo fiain̈ana tsisy farany foeky. Izio kado baka amy Jehovah, hamiany zay olo tsy mivadiky aminany. Izio an̈isany “hatsarampan̈ahinany tsisy karaha izy.” (Romanina 5:15) Ten̈a tsy matity Jehovah han̈amia kado io lan̈iany olo tsy mivadiky aminany!

23. Nan̈ino ma anao mila mahay mifidy rango izioty?

²³ Man̈ontania karaha ty: ‘Asa zaho ty mba manompo Jehovah eraka fomba tiany hanompoan̈a izy?’ Izikoa anao mahita raha mbala mila ivoan̈a amy fiain̈ananao, aza mijijy tamban̈a man̈ano zen̈y. Mialoko amy Jehovah atsika, izikoa matoky izy ndreky mifen̈y mare man̈araka raha volan̈iny. Izikoa avy farany donia ratsiny Satana ty, izy hiaro olo jiaby tsy mivadiky aminany. Hamiany fiain̈ana tsisy farany amy Paradisa amy zay atsika, fotony zen̈y raha efa nivolan̈iny. Ke izikoa anao mahay mifidy rango izioty, anao mety hahazo ten̈a fiain̈ana io!