Fisintahan̈a Ndreky Fisarahan̈a

Amy Jehovah, olo koa fa vita mariazy, tsy tiany hivadiky amy vadiny eky. Izy koa fa nan̈ano vadian̈anolo voanalohany, karaha ty nikoran̈iny: ‘Lelahy hitambatra amy vadiny, ke iro roe hanjary nofotro araiky.’ Jesosy koa nivolan̈a raha mira io, fa izy baka tio nivolan̈a: “Olo koa fa natambatra Zan̈ahary lazioga araiky, tsy tokony hisarahinolo eky.” (Genesisy 2:24; Matio 19:3-6) Amy Jehovah ndreky Jesosy, vadian̈a natao haharitry ela, ke fahafatesan̈a fo raha tokony hampisaraka olo fivadiany. (1 Korintianina 7:39) Vadian̈a io raha masin̈y. Zen̈y mahavy fisarahan̈a io tsy raha ataotao fo. Tsy tiany Jehovah izikoa tsy antony baka amy Soratra Masin̈y mampisaraka olo fivadiany.—Malakia 2:15, 16.

Ino ma raha koran̈iny Soratra Masin̈y mety hisarahan̈a? Tsara haintsika fa Jehovah tsy tia olo mijangajanga ndreky ratsy fitondranten̈a. (Genesisy 39:9; 2 Samoela 11:26, 27; Salamo 51:4) Zen̈y mahavy izy mivolan̈a fa fijangajangan̈a zaraiky fo antony mety hisarahan̈a. (Izikoa tianao ho hay ino aby dikany fijangajangan̈a zen̈y, zahava amy Toko faha- 9, fehintsoratra 7 amy boky ty.) Jehovah tsy man̈amia tsin̈y olo araiky izikoa izy mifidy hijanon̈o amy vadiny nijangajanga, na hisaraka. (Matio 19:9) Mahazo misaraka izy, izikoa zen̈y tiany. Ndray izy man̈ano zen̈y, olo amy fiangonan̈a ao tsy tokony handrisiky izy hisaraka foeky. Mety hangataka amy vadiny han̈ambela hadisovan̈anany araiky nijangajanga in̈y, ke vadiny mety handray izy. Anjarany tsiaraikiaraiky manapakevitry na izy hisaraka na hijanon̈o amy vadiny, fa izy fo tsy maintsy von̈ono han̈eky zay raha hiboaka afaranizen̈y.—Galatianina 6:5.

Misy koa antony maventy mety hahavy Kristianin̈y sasany manapakevitry hisintaka na hisaraka amy vadiny, nata vadiny io tsy nijangajanga. Amy raha karaha zen̈y, Baiboly mivolan̈a fa ‘izy tsy tokony hanambady olo hafa, fa tokony hody amy vadiny.’ (1 Korintianina 7:11) Izy tsy tokony hiaraka aminolo na hanambady olo hafa. (Matio 5:32) Ty misy antony telo mety hahavy olo hisintaka:

Lelahy kinia tsy mamelombady. Misy lelahy kinia tsy mamelon̈o vadiny ndreky zanany, ke iro manjary mijaly mare. Baiboly mivolan̈a karaha ty: ‘Izikoa misy olo tsy man̈amia raha ilainy fianakavian̈anany, izy efa niala amy finoan̈a, ke olo karaha zen̈y ratsy mandilatra olo tsy mino.’ (1 Timoty 5:8) Izikoa lelahy araiky tsy miova, man̈angy io mety hanapakevitry hiala izy antsendriky, ke hangataka taratasy aradalàna baka amy manampahifan̈a mivolan̈a fa izy hisintaka hiarovan̈a zanakandro. Iro antipan̈ahy amy fiangonan̈a tokony hangala toky tsarabe izikoa maharen̈y olo mivolan̈a fa vadiny tsy mamelon̈o izy. Mety ho voaroaka lelahy araiky izikoa izy tsy mety hamelon̈o vadiny ndreky zanany.

Mamopoko vady. Misy lelahy zatra mamopoko vady, ke avozoan̈a tsao hamparary vadiny raha zen̈y na hamono izy foeky. Izikoa Kristianin̈y lelahy io, iro antipan̈ahy amy fiangonan̈a tokony hangala onon̈o tsarabe raha misy. Mety ho voaroaka tsy ho an̈isany fiangonan̈a olo araiky izikoa zatra mamopoko na manihitihy vady.—Galatianina 5:19-21.

Misakana vadiny tsy hifandray amy Zan̈ahary. Mety misy olo hisakana vadiny tsy han̈araka fivavahan̈a marin̈y na koa hanery izy handika lalàn̈any Zan̈ahary foeky. Izikoa zen̈y ny raha misy, mety hangataka fisintahan̈a aradalàn̈a vadiny io baka izy hahavita ‘han̈araka volan̈a Zan̈ahary fa tsy volan̈anolo.’—Asan’ny Apostoly 5:29.

Ndray io raha jiaby zen̈y, atsika tsy tokony handrisiky vady tsy diso io hisaraka amy vadiny. Antipan̈ahy ndreky Kristianin̈y matotro aby io mahavita man̈amia torohevitry tsara, fa iro tsy ten̈a mahay raha jiaby mandalo. Jehovah zaraiky fo mahay zen̈y. Tsy man̈amia voninahitry Zan̈ahary ndreky fanambadian̈a olo araiky izikoa misaraka amy vadiny baka amy raha manahiran̈a madinidiniky amy tokantran̈o. Jehovah tsy mankasitraka olo araiky mitady hisaraka amy vadiny amy fomba karaha zen̈y. Aleva onon̈o raha koran̈iny Baiboly ty: “Tsisy raha misitriky man̈oloan̈a Zan̈ahary, fotony raha jiaby mibaribary ndreky mibolain̈y man̈oloan̈a araiky hitsara atsika.” (Hebreo 4:13) Mety ho hisy Kristianin̈y hanapakevitry hisintaka izikoa hitany fa mafy aminany raha mahazo izy. Kanefa, atsika tsy tokony hitsara izy, fotony ‘samy mbala hitsarainy Zan̈ahary aby atsika jiaby io.’—Romanina 14:10-12.