Russie Manafiky Ukraine
Bônera, tamy maraindrain̈iny 24 Fevrie 2022, maramilany Russie nanomboko nan̈afiky Ukraine, ndray pitondra amy tany maro efa niezaka mare mba tsy hisiany raha karaha zen̈y. Ino eky vokatranizen̈y erantany? Vo tsy ela, António Guterres, sekretera zeneraliny Firenena Mikamban̈a nivolan̈a: “Tsy azontsika sary antsain̈y foeky fijalian̈a ndreky raha ravagna hateraka zen̈y, ndreky vokatrany raha aby zen̈y amy filaminan̈a an Eropy ndreky erantany.”
Izikoa Baiboly zahan̈a, ino ma dikany raha mandalo io?
Jesosy Kristy efa nivolan̈a fa ho hisy “firenena hiady amy firenena, hisy fanjakan̈a hiady amy fanjakan̈a.” (Matio 24:7) Amy karakory ady amy zioty io man̈atanteraka faminanian̈a nivolan̈iny Jesosy? Koa tianao ho hita amy Baiboly valinizen̈y, zahava lahatsoratra “Inona avy ny Famantarana ny ‘Andro Farany’?”
Amy bokiny Apokalypsy ao, ady io nampiran̈iny Baiboly aminolo mitenginy “sevaly mena karaha môtro” baka io izy man̈adoso “filaminan̈a ambony tany.” (Apokalypsy 6:4) Izikoa tianao ho hay amy karakory faminanian̈a zen̈y mahakasiky ady amy zioty io, vakia lahatsoratra “Iza Ireo Mpitaingin-tsoavaly Efatra?”
Bokiny Daniela koa efa nivolan̈a tsialohaloha fa hiady “panjakany avaratra” ndreky “panjakany atsimo.” (Daniela 11:25-45) Zahava video Faminanian̈a Tanteraka: Daniela Toko Faha-11, misy ahitanao nan̈ino volan̈iny fa panjakany avaratra io Russie ndreky firenena panohan̈a izy aby io.a
Apokalypsy koa mikoran̈a momba “adiny andra maventiny Zan̈ahary Araiky Farany Mahery.” (Apokalypsy 16:14, 16) Fa izio fo tsy ady ataony firenena samby firenena karaha hitantsika amy zioty io. Izikoa tianao hahay raha maromaro momba raha handalo aminy hoavy zen̈y, vakia lahatsoratra “Inona no Atao hoe Ady Hara-magedona?”
Nan̈ino anao mbala afaka man̈anten̈a fa ho tsara mare fiain̈ana afara an̈y?
Baiboly mivolan̈a fa Zan̈ahary handeha ‘hampijanon̈o ady amy tany jiaby.’ (Salamo 46:9) Izikoa tianao ho hay hoavy hampan̈antinainy Zan̈ahary io, vakia lahatsoratra “Mbola Hihatsara ve ny Fiainana Amin’ny Hoavy?”
Jesosy nampianatra pan̈aradia izy hivavaka mba haviany Fanjakan̈any Zan̈ahary. (Matio 6:9, 10) Izio fanjakan̈a andan̈itry an̈y. Fanjakan̈a io handeha hampiasainy Zan̈ahary han̈atanteraka sitraponany ambony tany eto. Ke tafiditry amy sitrapony Zan̈ahary zen̈y handeha hampisy filaminan̈a ambony tany. Izikoa tianao ho hay hatsaran̈a hindesiny Fanjakan̈a io aminao, zahava video Karakory ma Fanjakan̈any Zan̈ahary Zen̈y?
An Ukraine an̈y misy Vavolombelon̈o Jehovah mandilatrany 129 000. Karaha Vavolombelon̈o Jehovah amy tany jiaby, iro mangala tahaka Jesosy ke tsy miditry amy politiky avio tsy mandeha miady. (Jaona 18:36) Vavolombelon̈o Jehovah erantany, manohy man̈ambara “vaovao tsara momba Fanjakan̈a io.” Ambarandro olo fa izio zaraiky fo vahaolan̈a amy raha manahiran̈a olombelon̈o, tafiditry amy zen̈y ady. (Matio 24:14) Izikoa tianao ho hay raha hampan̈antinainy Baiboly, azafady mivolàn̈a amy Vavolombelon̈o Jehovah.
a Baka ahaizanao raha maromaro mikasiky faminanian̈a io, zahava lahatsoratra “‘Panjakany Avaratra’ amy Vanimpotoan̈any Farany” ndreky “Azovy ‘Panjakany Avaratra’ amy Zioty?”