AZA VOLY MIAMBIN̈Y!

Fivavahan̈a ma Tokony Hiditry Aminy Ady a Ukraine Io?—Ino ma Raha Koran̈iny Baiboly Momba Zen̈y?

Zahava baka hevitrindro pitariky fivavahan̈a malaza aby io momba ady a Ukraine io:

“Talebeny Fivavahan̈a Ortodoksy a la Russie an̈y, Patriarky Kirill tsisy raha nivolan̈iny foeky momba fanafihan̈a ataony la Russie io … Man̈ano propagandy momba Ukraine fo izy amy legilizindro an̈y, ke raha zen̈y ampiasainy Poutine hankamarin̈ana ady ataony.”—EUobserver, 7 Marsy 2022.
“Patriarky Kirill ... miaro mare la Russie manafiky Ukraine io. Amy rariny tsarabe ho izy fanafihany la Russie Ukraine io. Mbala an̈isany ady atao amy fahotan̈a fo zen̈y izio ho izy.”—AP News, 8 Marsy 2022.
“Tamy tinainy in̈y, Epiphane, prezidany Legilizy Ortodoksy a Kiev, a Ukraine an̈y nitsodrano olo hiady amindro panafiky baka a la Russie aby io. Nivolan̈a koa izy fa famonoan̈a iro maramila rosianin̈y aby io tsy fahotan̈a foeky.”—Jerusalem Post, 16 Marsy 2022.
“Zahay [Konsiliny Legilizy Ndreky Fikambanan̈a Arapivavahan̈a a Ukraine (UCCRO)] manohan̈a tafikiny Ukraine ndreky iro miaraka aminay jiaby. Mitsodrano iro zahay fotony iro miaro Ukraine amy fahavalondro io. Mivavaka nindro zahay.”—Fan̈ambaran̈a nataony UCCROa, 24 Fevrie 2022.

Akory hevitrinao? Fivavahan̈a mivolan̈a fa man̈aradia Jesosy Kristy ma tokony handrisiky olo mivavaka amindro ao handeha ady? Ino raha koran̈iny Baiboly momba zen̈y?

Tantarany fivavahan̈a miditry aminy ady

Hita amy tantara letrizay fa matetiky fivavahan̈a aby io man̈ano mampihavan̈a olo, kanefa iro tsy mandrova olo handeha ady. Iro mankamarin̈y ady ataonolo, avio iro mandrisiky olo hiady foeky. Vavolombelon̈o Jehovah rango efa ela fa nampibaribary fihatsarambelatsihiny fivavahan̈a zen̈y. Ohatra, zahava baka iro raha aby koran̈iny fan̈azavan̈a efa naboakanay aby ty.

“Koran̈iny lahatsoratra ‘Nandiso Fanantenana ny Kroazada” (fransay)”’ fa Fivavahan̈a Katoliky Romanin̈y namono olo olo sady tompinandraikitry tamy famonoan̈a olo taminy an̈arany Zan̈ahary ndreky Kristy.
“Ny Eglizy Katolika ao Afrika” mitantara fa fivavahan̈a io tsy nahavita nampijanon̈o adimpoko ndreky fandripahan̈a firenena araiky.
Lahatsoratra “Ny Fivavahana ve no Diso?”, “Ny Anjara Asan’ny Fivavahana Tamin’ny Ady” (fransay) ndreky “Manohana ny Ady ny Fivavahana” (fransay)” man̈azava akory nataony pitondra fivavahan̈a Katoliky, Ortodoksy, ndreky Protestan nilan̈y tamindro pifahavalo aby io taminy ady maro nisy.

Tokony hanohan̈a ady ma Kristianin̈y?

Raha nampianariny Jesosy: “Tiava namanao, karaha ataonao tia ain̈inao in̈y.” (Matio 22:39) “Tiava fo fahavalonaro.”—Matio 5:44-47.

Diniha baka: Mety ma fivavahan̈a araiky koa man̈ano man̈araka bekony Jesosy mila mifankatia io sady mandrisiky olo mivavaka amindro ao handeha hamono namandro piaramivavaka amy ady koa? Hahitanao valinizen̈y, vakia iro lahatsoratra aby ty: “Ny Tena Kristianina sy ny Ady” (fransay)” ndreky “Misy Mahavita Mitia ny Fahavalony Ve?”

Ino raha nivolan̈iny Jesosy?: “Fanjakan̈anaka tsy an̈isany donia ty. Fanjakan̈anaka koa an̈isany donia ty, hotrizay fa niady edy iro pan̈aradia zaho aby io baka zaho tsy natolotro tamy Jiosy.” (Jaona 18:36) “Lan̈iany olo mampiasa sabatra hofoatiny sabatra.”—Matio 26:47-52.

Diniha baka: Izikoa Kristianin̈y tsy nahazo niady foeky, nata hiarovan̈a Jesosy in̈y, ke tokony hiady iro amy raha hafa? Vakia lahatsoratra “Mety ve Raha Miady ny Kristianina?” ahitanao akory nataondro Kristianin̈y tsy nivadiky taloha tan̈y nan̈araka raha nataony Jesosy ndreky raha nampianariny Jesosy.

Akory hiafarandro fivavahan̈a milan̈y aminy ady aby io?

Ampianariny Baiboly atsika fa Zan̈ahary tsy man̈eky fivavahan̈a miaboko ho misolo ten̈a Jesosy kanefa tsy man̈araka raha nampianariny Jesosy.—Matio 7:21-23; Titosy 1:16.

Bokiny Apokalypsy man̈ambara hevitriny Zan̈ahary momba iro fivavahan̈a aby io. Iro io tompinandraikitry amy ‘fahafatesanolo maro nivonen̈y tambony tany teto.” (Apokalypsy 18:21, 24) Baka hainao ino antony, vakia lahatsoratra “Iza moa i Babylona Lehibe?”
Jesosy efa nivolan̈a fa fivavahan̈a jiaby tsy ikeny Zan̈ahary io hiravan̈iny nohony asa ratsy ataondro io, tsisy nihafa amy kakazo mamoa voany montraka in̈y. ‘Hikapain̈y iro io, avio hatsipy an̈aty motro’ ho Jesosy. (Matio 7:15-20) Vakia lahatsoratra “Ho Ringana Tsy ho Ela ny Fivavahan-diso!” misy ahitanao akory hamparavan̈a fivavahan̈a diso aby io.

Vavolombelon̈o Jehovah tsy karaha zen̈y

Vavolombelon̈o Jehovah a la Russie ndreky a Ukraine an̈y, ndreky amy tany jiaby, man̈araka bekony Jesosy ke zahay tsy man̈ano politiky foeky ndreky tsy miditry aminy ady foeky. Zen̈y mahavy zahay tsy miditry aminy ady ndreky tsy manohan̈a olo pifahavalo miady foeky, na a Ukraine io na antany hafa. Zahay jiaby tapakevitry fa han̈araka raha inoanay mifototro amy Baiboly io, ke zen̈y mahavy sasany aminay io injehinolo. (Jaona 15:19, 20; 2 Timoty 3:12) Karaha zen̈y ataony fanjakan̈a rosianin̈y izioty. Maro Vavolombelon̈o Jehovah gadraindro amy prizon, avio misy amindro io ampijalindro mare. Tany fivorianay sasany koa nalaindro forse koa. Izikoa tianao hita fan̈azavan̈a momba zen̈y, midira amy www.jw-russia.org.

Zahava video efatra minity Tsy Mivadika ny Vavolombelon’i Jehovah any Irkoutsk na dia Mahery Setra aza Ireo Manao Bemidina ahitanao akory ataony Vavolombelon̈o Jehovah injehin̈y nohony finoan̈andro.
Vavolombelon̈o Jehovah malaza tsy milan̈y amy donia ty foeky. Zahava video Tsy Nivadiky iro Nata Ninjehin̈y ahitanao akory nan̈anaovandro zen̈y tamy faha Nazia ndreky Firaisan̈a Sovietiky taloha.

Azafady zahava amy tranonkalanay ao raha maro momba raha inoanay, an̈atinizen̈y fampan̈antinan̈any Baiboly momba fiain̈ana tsara aminy amaray, efa tsisy ady eky amy zen̈y. (Isaia 2:4; Jeremia 29:11) Aza misalasala hifandray aminay.

Sary nazahoan̈a lalan̈a, baka ankavia mandeha ankahery: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a UCCRO na Konsiliny Legilizy Ndreky Fikambanan̈a Arapivavahan̈a a Ukraine io ahitan̈a fivavahan̈a 15 baka aminy Ortodoksy, Katolika Griky Ndreky Romanin̈y, Protestan ndreky antokompivavahan̈a arapilazantsara ndreky Jiosy, avio Mizilman.