Fan̈ampian̈a Olo Tatran’ny Antambo An̈atin’ny Ady

Amin’ny andra farany iziôty, atsika efa man̈ampo fa “haharen̈y fa hisy lagera amy tany isan-karazany an̈y.” (Matio 24:6) Irô rahalahintsika aby io ten̈a mandalo raha sarotro baka amin’ny ady. Fa ndray zen̈y, irô mahazo fan̈ampian̈a ten̈a ilaindrô fo. Ten̈a nankahery atsika Vaovao Farany Baka amy Filan-kevi-pitantan̈ana (2022) #3 in̈y. Nikoran̈iny tao baka fan̈ampian̈a nazondrô rahalahy tan Eropy Antin̈iana vokatran’ny ady tan Ukraine. Ino raha natao mba han̈ampian̈a irô tatran’ny antambo, ndray mbala tan̈atin’ny ady mare faritry io? Ino vokatran’izen̈y tamindrô rahalahintsika tan Ukraine?

Ino raha nilain̈y baka iô akôry nan̈atantirahan̈a zen̈y?

Tamin’ny 24 Fevrie 2022, nanomboko ady tan Ukraine. Andran’izin̈y fo, niken’ny Komitin’ny Mpandrindra han̈aboahan̈a vola han̈ampian̈a irô rahalahintsika tan Ukraine. Direkty nivanga raha azony nivangain̈a tan-toeran̈a tiô sampan̈an’i Ukraine ke nanomboko nizara fan̈ampian̈a. Nanendry Komitin’ny Vonjy Rano Vaky 27 birôn’ny sampan̈a han̈ano zen̈y.

Ankoatran’izen̈y, direkty nan̈ano raha koa Foiben’ny Vavolombelon̈on’i Jehovah, ke nizaha ino fan̈ampian̈a mety namian̈a mba han̈ampian̈a irô tan Ukraine. Komitin’ny Mpandrindra ndreky Asa Fan̈anaovan̈a Pirinty amy Filan-kevi-pitantan̈ana nivolan̈a fa Sampan-draharahan’ny Fivangan̈a Entan̈a Eran-tany mila miaraka miasa amy solonten̈an’ny sampan̈an’i Ukraine ndreky Pologne. Zen̈y natao mba hitondrasan̈a fan̈ampian̈a ndreky handaminan̈a asa atao. Isan’andra irô amy Sampan-draharahan’ny Fivangan̈a Entan̈a, Fandifasan̈a Entan̈a, aviô Sampan-draharahan’ny Lalàn̈a baka amy sampan̈a io nivory niaraka tamy rahalahy araiky an̈isan’ny Komitin’ny Sampan̈an’i Ukraine ndreky rahalahy an̈isan’ny Sampan-draharahan’ny Fivangan̈a Entan̈a Eran-tany mba handaminan̈a asa mila atao.

Jay Swinney baka amy Sampan-draharahan’ny Fivangan̈a Entan̈a Eran-tany nivolan̈a karaha ty: “Nizahanay antsendriky ino raha nilain̈y. Tianay han̈amia irô hanin̈y ndreky raha madinidiniky efa fampiasaindrô, koa fa miseky na manasa. Nizahavanay ino raha nilain̈y, nefa mbala araiky amy problemo fo zen̈y. Tsy maintsy nidinihinay koa akôry atao hitondrasan̈a entan̈a aby io an Ukraine an̈y amy fotoan̈an’ny ady mbala maresaka be io, kanefa mila atao farany malaky raha zen̈y, aviô olo mitondra izio mila alain̈y antoko fa tsy ho azon-draha.”

Tamy 9 Marsy 2022 vo ten̈a hay ino aby fan̈ampian̈a nilain̈y. Nisy karton nasian̈a foto-tsakafo, hanin̈y tsy mora robaka, sardine, voan-draha, vary, ndreky zarikô, aviô nasian̈a raha madinidiniky ilain̈y lera miseky ndreky manasa, karaha ataony savôn̈o ndreky taratasy findesin̈y an-kabone. Kadiriny 270 000 ariary isaka olo tamy fotoan̈a zen̈y fan̈ampian̈a mahadin̈y fanjava araiky. Mandeha an-drivony aby rahalahintsika mila fan̈ampian̈a ke niken’ny Komitin’ny Mpandrindra han̈aboahan̈a volabe han̈ampian̈a olo tatran’ny antambo. Fa ino raha tôkony hatao baka tsy ho azon-draha irô rahalahy aby han̈atitry fan̈ampian̈a aby io?

Tamy 13 Marsy, nisy andran̈a natao ke rahalahy aroe baka tamy sampan̈an’i Pologne nan̈atriky hanin̈y tamy toeran̈a fikajian̈a entan̈a marikitry Lviv, an Ukraine. Andra vitsivitsy talohan’ny nandihanandrô, irô rahalahy tamy sampan̈an’i Pologne ndreky Ukraine nan̈ampy irô tamy fan̈oman̈ana diandrô. Sampan̈an’i Pologne nikarakara taratasy nilain̈y baka hahafahan̈a mitsaka sisin-tany mandeha an Ukraine. Tsy maintsy nasian̈a soratra mazava tsarabe koa tomabily nindesindrô, baka ho hay fa izio tomabily mitondra fan̈ampian̈a. Sampan̈an’i Pologne koa niaraka niasa tamindrô rahalahy tan Ukraine tao, misy hahitan̈a aia lalan̈a ten̈a malaky, izikoa efa tafiditry an Ukraine ao irô mirahalahy. Nioman̈a tsarabe irô rahalahy jiaby, ke noho ny fitahian’i Jehovah, tsy ampy andra araiky tafaran’ny naviandrô ta Lviv, efa avoarasa tamy Komitin’ny Vonjy Rano Vaky edy fan̈ampian̈a. Ke tafimpody tsarabe ta Pologne irô rahalahy aroe in̈y.

Marin̈y fa nilamin̈y tsarabe andran̈a natao in̈y, kanefa fan̈ampian̈a tsy ampy taonina araiky izy naterin̈y in̈y. Kadiriny 200 taonina, fan̈ampian̈a ilaindrô. Akôry atao baka ho voatatitry ndreky ho voarasa farany malaky fan̈ampian̈a marobe zen̈y?

‘Hanolo-ten̈a an-tsitrapô vahoakanao’

Izikoa fa nivolan̈iny tamy jw.org tao raha navoa irô rahalahintsika tan Ukraine tan̈y, olo maro eran-tany tihitondra fan̈ampian̈a nindrô. Olo maro baka lavitry nan̈ano fan̈amezan̈a niny asa man̈eran-tany ataon’ny Vavolombelon̈on’i Jehovah, fotôny haindrô fa ampiasain̈y amy fomba tsara fan̈amezan̈a aby io. Afaka nan̈amia fotoan̈andrô, angovondrô baka iô fanan̈anandrô koa irô olo baka tamy firenena hafa man̈odidin̈y. Ty misy ohatra:

Misy entan̈a nifon̈ôsin̈y mandeha ampolon’ny arivo nikarakaraindrô mpiasa an-tsitrapô baka ta Pologne, baka iô koa irô tsaiky aby io nan̈ano karty hely misy sary natao tamy tan̈ana. Karaha ty nivolan̈in’i Bartosz Kościelniak miasa amy Sampan-draharahan’ny Fividianan̈a Entan̈a amy sampan̈an’i Pologne: “Efa matetiky zaho namaky Salamo 110:3 ‘hanolo-ten̈a an-tsitrapô vahoakan’i’ Jehovah. Ke iziô zaho foeky nahita irô mpiasa an-tsitrapô an-jatony direkty navy sady vôn̈ono hiasa. Ten̈a hitako fa marin̈y ankitin̈y raha koran̈in’ny andininy io.”

Misy Vavolombelon̈on’i Jehovah araiky manan̈a loziny maventy, ke izy nan̈amia kamionany hampiasain̈a ndreky niantoko lesansy. Karaha ty nivolan̈iny baka iô: “Tiako Jehovah ndreky irô rahalahiko aby io ke iziô fotoan̈a han̈aboahako raha zen̈y. Haravoan̈a tsisy ambaka izy ninaka mba afaka man̈ampy.” Kadiriny mandilatran’ny 7 700 litara iô lesansy natao fan̈amezan̈a. Nampiasa fotoan̈andrô, angôvondrô irô rahalahy aby io, ke dia kadiriny 48 000 kilômetara nataondrô tamy tomabily hitondrasan̈a fan̈ampian̈a.

Baka amy fahafoizan-ten̈a ndreky fitiavan̈andrô rahalahy ndreky ranabavintsika aby io, tamy 28 marsy, 15 andra tafaran’ny andran̈a voanalohany natao in̈y, fan̈ampian̈a mandeha 100 taonina navy tan Ukraine tan̈y. Naterin̈y tan̈y hanin̈y ndreky raha madinidiniky fampiasain̈y lera miseky ndreky manasa, aviô fitaovan̈a fitahan̈a. Ten̈a tsy natity irô rahalahy ndreky irô mpamatsy entan̈a, ke nanjary nihen̈y be vola nilain̈y hividianan̈a ndreky han̈ateran̈a irô fan̈ampian̈a aby io. Fan̈ampian̈a mandilatran’ny 190 taonina, efa nalefan’ny Vavolombelon̈on’i Jehovah tan Ukraine firaka amy ziôty. Ino vokatran’izen̈y tamindrô rahalahintsika aby io?

“Hitanay tao koa fitiavan̈anarô!”

Izikoa fa navy ta Lviv fan̈ampian̈a aby in̈y, direkty nirasain’ny Komitin’ny Vonjy Rano Vaky tamindrô tatran’ny antambo. Tanàna maro nan̈ateran̈a fan̈ampian̈a, sasany aby mandeha 1 300 kilometara miala baka a Lviv. Mbala nandany fotoan̈a maro asa zen̈y ndray efa nalamin̈y tsara.a

Markus Reinhardt, an̈isan’ny Komitin’ny Sampan̈an’i Ukraine nivolan̈a karaha ty: “Tamin’ny ady ty, rahalahy maro nahatsapa fa Jehovah ten̈a tia irô aviô mahatsara fo man̈araka tari-dalan̈a amezan’ny fandaminan̈a, ndray mbala tsisy antambo. Ohatra, nampirisihin̈y olo jiaby hikajy hanin̈y ndreky rano ampiasain̈y an̈atin’ny herin̈iandra vitsivitsy. Karaha ty nivolan̈in’i Anton, anti-pan̈ahy a Kyiv ao momba tari-dalan̈a io: ‘Man̈oman̈a atsika hiatriky raha sarotro fandaminan̈an’i Jehovah, ke zahay ten̈a mankasitraka zen̈y. Ten̈a nan̈avotro zahay fanan̈ana hanin̈y ndreky rano, baka iô radiô.’ Noho ny fan̈arahandrô rahalahy aby io tari-dalan̈a io, nanjary nanan̈a fotoan̈a nandaminan̈a fan̈ampian̈a olo tatran’ny antambo birôn’ny sampan̈a.”

Akôry tsapandrô rahalahintsika aby io koa fa navy fan̈ampian̈a io? Nivolan̈a raha tan̈atin’ny fondrô i Mykola ndreky Zinaida mipetraka a Kharkiv: “Ten̈a tsapanay tamy fônay lalin̈y tao fitiavanarô zahay. Mankasitraka anarô tamin’ny hanin̈y ndreky aody. Ten̈a tan̈an’i Jehovah foeky nikarakara raha ten̈a nilainay.” Karaha ty koa nivolan̈in’i Valentyna mipetraka a Kharkiv: “Koa fa nipoaka ady, nisy filaharan̈a be tamy mpivarotro. Matetiky anao tsy mahavita mividy raha ilainao. Hitan’i Jehovah ndreky hainy tsarabe raha zen̈y. Nanendry ranadahy aby io izy hizara fan̈ampian̈a isaka tokantran̈o, ndreky raha ten̈a nilainay ankitin̈y tan̈atin’ny karton tao! Lera anao efa tsisy raha vita karaha ty vo tsapanao fa, ten̈a mikarakara anao manokana Jehovah ndreky fandaminan̈anany. ... Navy tamy fotoan̈any ndreky ten̈a nilainay fan̈ampian̈a aby io.”

Karaha ty koa nikoran̈in’i Yevhen ndreky Iryna, nilefa baka a Mariupol: “Ten̈a mankasitraka anarô zahay fotôny anarô nikarakara ndreky nan̈ampy fianakavian̈anay. Ten̈a navy tamy fotoan̈any tsarabe irô fan̈ampian̈a aby in̈y. Tamy voanalohany zahay nieritreritry fa entan̈a nilain̈y fo tan̈atin’ny karton tao, fa zahay koa fa nan̈abian̈a karton aby io, hitanay tao koa fitiavan̈anarô!”

Misy lera anao ‘maharen̈y ady’ na ‘misy olo mivolan̈a aminao fa misy ady amy tany hafa an̈y.’ Fa ndray iô raha zen̈y, ny raha azontsika antoko, fan̈ahin’i Jehovah nitariky vahoakanany ke afaka nitondra fan̈ampian̈a jiaby zen̈y irô. An̈isan’ny fomba nahavitan̈a zen̈y koa fan̈amezan̈a nataonao tamin’ny asa man̈eran-tany, matetiky izio nalefa baka tamy donate.jw.org tao. Anao ten̈a tsy matity ke ten̈a ankasitrahinay!

Fan̈ampian̈a olo tatran’ny antambo: Nalaky ndreky natao raha tsy hisian’ny problemo araka zay nazo natao

1. 

   24 Fevrie 2022: Niken’ny Komitin’ny Mpandrindra han̈aboahan̈a vola han̈ampian̈a irô rahalahy tan Ukraine, ke afaka nanomboko nitondra fan̈ampian̈a irô tamy sampan̈a tao

2. 

   24 Fevrie-8 Marsy 2022: Sampan̈an’i Ukraine nividy raha sasany tan-tanàna tiô, ke nanomboko nirasa fan̈ampian̈a Komitin’ny Vonjy Rano Vaky. Birôn’ny Sampan̈a koa efa nioman̈a hirasa fan̈ampian̈a baka a Pologne

3. 

   9 Marsy 2022: Niken’ny Komitin’ny Mpandrindra handifasan̈a fan̈ampian̈a tamindrô tan Ukraine

4. 

   10-12 Marsy 2022: Fan̈oman̈ana dia nan̈oharan̈a nan̈atitry hanin̈y ndreky fan̈ampian̈a hafa baka ta Pologne handeha a Lviv, an Ukraine

5. 

   13 Marsy 2022: Nan̈ohatra nandeha nan̈atriky hanin̈y ndreky fan̈ampian̈a hafa baka ta Pologne handeha Lviv, an Ukraine

6. 

   14-16 Marsy: Mpiasa an-tsitrapô an̈isan’ny Sampan-draharahan’ny Fan̈oren̈ana An-toeran̈a nampiasa Tran̈o Fan̈anaovan̈a Fivoriambe marikitry Poznań, an Ukraine, mba hikarakaran̈a irô karton hasian̈a hanin̈y ndreky fitaovan̈a ilain̈y amy fan̈adiovan̈a

7. 

   17 Marsy 2022: Efatra andra tafaran’ny andran̈a in̈y, fan̈ampian̈a 13 taonina nanomboko nindesin̈y tan̈y tamy sisin-tanin’i Ukraine

8. 

   21-27 Marsy 2022: Karaha efa natao taloha in̈y, navory ta Pologne tao fan̈ampian̈a navy tafara, baka iô nalefa tan Ukraine. Nirasain̈y fan̈ampian̈a io tamy tany nandalovan’ny antambo tamin’ny andra io fo

9. 

   28 Marsy 2022: Tan̈atin’ny 20 andra tafaran’ny nazahoan̈a lalan̈a baka tamy Foibe, efa mandilatra 100 taonina hanin̈y ndreky fitaovan̈a ilain̈y amy fan̈adiovan̈a baka iô aody ndreky fitaovan̈a fitahan̈a, navy tan Ukraine tan̈y

Nandefa fan̈ampian̈a mandilatra 190 taonina tan Ukraine Vavolombelon̈on’i Jehovah firaka iziô.