Ra Nge Par Be’ Ni Fager Rom, Ma Thingar Mu Mang Reb E Fager

Fager e ba’ rogon ko t’ufeg. Ra yoor murung’agen Jehovah ni ngam fil, ma ra ga’ iyan feni t’uf rom. Nap’an nra ilal e t’ufeg rom ngak Got, maku ra ilal rogon ni ga ra adag ni nguum pigpig ngak. Re n’ey e ra pug e tafinay rom ni ngam mang reb i gachalpen Jesus Kristus. (Matthew 28:19) Ma ga ra chag ko fare tabinaw nib falfalan’ ni aram e Pi Mich Rok Jehovah, ma ga ra un ko pi fager rok Got ni manemus. Mang e thingar mu rin’?

Thingar mu dag nib t’uf Got rom ni ra um fol ko pi motochiyel rok. “Baaray fan ni nge t’uf Got rodad, fan e ngad folgad ko pi motochiyel rok; ma pi motochiyel rok e gathi rib mo’maw.”​—1 John 5:3.

Mu rin’ e tin ni kam fil. Bay reb e fanathin ni weliy Jesus ni aray rogon. Be’ nib gonop e toy e naun rok nga daken e war. Ma be’ nib balyang e toy e naun rok nga daken e yan’. Ma nap’an ni yib e nifeng nib gel, ma fare naun ntoy nga daken e war e de puth, machane fa binem ntoy nga daken e yan’ e puth ni rib ga’ lingan. Gaar Jesus piin kar rung’aged fare machib rok mi yad fol riy e yad ra bod fa en nib gonop nitoy e naun nga daken e war. Ma piin ni ur rung’aged e machib rok ma dar folgad riy e bod fare moon nib balyang ni dimow nga daken e yan’.Bin ngan ko gali pumoon ney e ga baadag ni ngam bod?​—Matthew 7:24-27.

Ognagey. Fan e re n’ey e ngam man ku Jehovah u fithik’ e meybil ngam mog ngak ni ri ga baadag ni ngam rin’ e tin ba m’agan’ ngay ni manemus. Ra ngan rin’ fiti laniyan’ Got ma ga be dag ni gur reb i gachalpen Jesus Kristus.—Matthew 11:29.

Taufe. “Mu sakiy ngan taufenagem ma ga wenignagem nga fithingan me chuweg e denen rom.”​—Acts 22:16.

Ngam mang reb e pi tapigpig rok Got ni polo’. “Yugu demtrug e tin ga be rin’ ma ga maruweliy u polo’ e yaal rom ni ga be rin’ ni fan ngak Jehovah, ma gathi girdi’.”​—Kolose 3:23.