Report Ko Piin Ni Ma Wereg E Thin Ko Gil’ilungun Got

Kan Lek Kanawoen Jehovah u Fithik’ e Sobutan’

“MGAYED Jehovah, gimed e piin ni gimed ba sobut’an’.” Aram e pong ni yog Zefaniah ni profet 26 e chibog faram, ma ka yibe pi’ e re pong nem u ga’ngin e fayleng ko ngiyal’ ney. (Zefaniah 2:3) Uw rogon ni ngan gay Jehovah? Som’on ma ngan fil morngaagen Jehovah Got ni kari mus ni ir e bin riyul’ e Got nib fas.​—Jeremiah 10:10; John 17:3.

Machane gathi ke mus ni ngan fil morngaagen Got ma aram e ke felan’ Got ngom. Ya nge yog ni nge fel’ be’ u wan’ Got ma thingari fol ko tin ni ke fil. Uw rogon? Faanra puluwnag e lem rok nge ngongol rok ko motochiyel rok Got, ni bod ni rin’ be’ u Suriname.​—Efesus 4:22-24.

Eddy e reb e sensey ni ke pag 30 e duw rok, ma ba adag ni nge nang e fulweg ko boch e deer ni aray rogon: ‘Susun uw rogon e teliw ko ngiyal’ ney?’ nge ‘Bible ni ba ke babyor nkakrom e bpuluw ko science ko ngiyal’ ney fa?’ Nap’an ni yib e Pi Mich Rok Jehovah nga tafen mar pied e fulweg ko pi deer ney u rogon ni bpuluw ko Bible me tiyan’ Eddy ngay. Ke yoloy boch e thin nga but’ ni nge yog ni nge fl’eg i yaliy e n’en ni ke yog e Pi Mich Rok Jehovah.

Kafram ma ke un Eddy nga baraba’ i teliw ni kan fil ngak ni ke n’igin Got ni nge yib e girdi’ ko gamanman ni ape. Ere nap’an ni pi’ e Pi Mich fare babyor ni Life​—How Did It Get Here? By Evolution or by Creation? ngak me ri adag. Ke felan’ u rogon ni weliy fare babyor u morngaagen rogon ni kan sunmiy urngin ban’en. Ma aram me fil e Bible, me mich u wan’ ni ke pirieg e thin nriyul’!

Ma chiney e ke yib e skeng ngak. Ke par Eddy u reb e naun ni yad boch e girdi’ ma yugu yad ma mororo’ ma dar yul’yul’gad. Ere thingari mel’eg ban’en: nge fol ko pi girdi’ nem ni yad be par fa nge digey e re ngongol nem me par nrogon ni ma n’uf Got. Ba gonop Eddy ya ke mel’eg e bin tomur. Daki chag ko girdi’ nib kireb me chuw ko re naun nem.​—1 Korinth 15:33, 34.

Tomren ni tabab Eddy ni nge un ko pi muulung u lan e Kingdom Hall mab papey ni ke mon’og iyan. Miki mon’og rogon e munmad rok nge rogon i yarmiy piyan lolugen ma ke tabab ni nge weliy ngak e pi fager rok nge girdi’ rok u morngaagen e tin ni be fil. Ma munmun me ri gel e falfalan’ rok ya kan pag ni nge un i wereg fare “thin nib fel’” u mit e tabinaw iyan. (Matthew 24:14; Acts 20:20) Ma nap’an e December 1996 kan taw ko rofen ni ke sonnag ya ke un ko taufe u fithik’ e ran ni be yip’ fan ni ke ognag ir ngak Jehovah.

Gubin e duw ma bokum miriay e piin nib yul’yul’ e yad ma fol ko fare pong ni be piningrad ni ngar “gayed Jehovah.” Ma aram e yad ma guy nib riyul’ e thin ko Proverbs 22:4 ni be gaar: “Um par ni bay madgun [Jehovah] u wun’um, ma ba sobut’an’um, me yoor ban’en rom, ma ga par ni yibe ta’ fam.” Arrogon piin nib t’uf rorad e thin riyul’ ni yad ma lek kanawoen Jehovah e yad ma un ko pi flaab nem e chiney ma ke l’agan’rad ko ngiyal’ ni bay yib nga m’on ni yad ra un ko flaab u fayleng ndariy n’umngin nap’an.​—Psalm 37:29.

[Map ko page 18]

(Mu guy e re ke babyor ney ni ngam nang rogon yaan e re n’ey.)

Day ni Caribbean

SURINAME

GUYANA

FRENCH GUIANA

BRAZIL

[Credit Line]

Yaan e fayleng: Mountain High Maps® Copyright © 1997 Digital Wisdom, Inc.