Mu Filed Ban’en Rok e Pi Profet—Zefaniah
1. Mingiyal’ e mang Zefaniah reb e profet, ma uw rogon nrayog ni ngad folwokgad rok e ngiyal’ ney?
1 Ngiyal’ nem e ke taw nga lukngun e bin medlip e chibog B.C.E., ma ke garer e liyor ni yima tay ngak Baal u Judah. Ka fin nni li’ Amon ni fare Pilung nib kireb ke yim’, ma chiney e Josiah e ir e Pilung. (2 Kron. 33:21–34:1) Ka nap’an e re ngiyal’ i n’em ma aram me mel’eg Jehovah Zefaniah ni nge weliy ko girdi’ murung’agen e pufthin ni bayi fek nga daken fare nam. Yugu aram rogon ni sana yib Zefaniah ko tabinaw ko pilung u Judah, machane de guy rogon ni nge darifannag e thin ni ke yog Jehovah nib togopuluw ngak piyu Judah. (Zef. 1:1; 3:1-4) Ku er rogodad ni gad ma athamgil ni ngad folwokgad rok Zefaniah nda i rus, ma gad ma guy rogon ndab da paged girdien e tabinaw rodad ni ngar magawonnaged e pigpig ni gad ma tay ngak Jehovah. (Matt. 10:34-37) Mang thin e weliy Zefaniah, ma mang angin ni yib?
2. Faanra ngad mageygad ni gad ba fas u nap’an fare rran ko damumuw rok Jehovah, ma mang boch ban’en nthingar da rin’ed?
2 Mu Sulod ngak Jehovah: Kemus ni yigoo Jehovah e rayog ni nge ayuweg e girdi’ u nap’an fare rran ko damumuw rok. Ere, yog Zefaniah ko girdi’ ni ngar sulod ngak Jehovah, mar rin’ed e tin nib mat’aw, mar sobut’niged yad u p’eowchen u m’on ni nge sagaal. (Zef. 2:2, 3) Ku er rogon e ngiyal’ ney. Gad ma folwok rok Zefaniah ni aram e gad ma yog ko girdi’ ni ngar gayed Jehovah. Machane ku er rogodad nthingar da guyed rogon ndab da ‘pied keru’dad’ ngak Jehovah. (Zef. 1:6) Rogon ni gad ma gay Jehovah e aram e gad ma fil e Thin rok, ma gad ma meybil ngak ni nge pow’iydad. Ku gad ma rin’ e tin nib mat’aw ni aram e gad ma athamgil ni nga i par nib beech e ngongol rodad. Ku gad ma sobut’niged gadad u p’eowchen ni aram e gad ma fol ko pi n’en ni ma yog e ulung rok Jehovah ngodad ni ngad rin’ed.
3. Mang fan nsusun e nga i fel’ lanin’dad ko machib ni gad be tay?
3 Ke Yib Angin nib Fel’: Immoy boch e girdi’ nra thilyeged e ngongol rorad u tomuren ni ginangrad Zefaniah. Machane, Josiah e ri thil e lem rok ni bochan e tabab ni nge gay Jehovah u nap’an ni kab bitir. Boch nga tomuren me yog Josiah ni ngan chuweg urngin e liyos u lan e re nam nem. (2 Kron. 34:2-5) Ngiyal’ ney e yugu aram rogon ni bay boch i awochngin e tin riyul’ ni gad ma wereg ni ma mul nga marichlen e milay’, ara nga daken yu thal i but’ ni bay u daken e war, ara nga fithik’ e pan ni bay rachangalen, machane ka bay boch ni ma wer nga daken e but’ nib yong’ol ma ma ilal nge yib wom’engin nib pire’. (Matt. 13:18-23) Ba pagan’dad ni faan gad ra athamgiliy i rin’ e re maruwel ney ma ra tow’athnagdad Jehovah.—Ps. 126:6.
4. Mang fan nsusun e ngaud ‘sonnaged fare rran’ rok Jehovah?
4 Immoy boch e girdi’ u Judah nra lemnaged ndabi rin’ Jehovah ban’en ko kireb ni i buch. Machane, i tamilangnag Jehovah ko girdi’ ni ke chugur fare rran rok. (Zef. 1:12, 14) Ma yigoo piin ni yad ra gay Got e aram e piin ni yad ra magey ni yad ba fas. (Zef. 3:12, 17) Ere, nap’an ni gad be “sonnag fare rran” rok Jehovah, ma ngad athamgilgad ni ngaud pigpiggad e pi tapigpig rok Got u taabang ni gad ba felfelan’ mab taareban’dad!—Zef. 3:8, 9.