Ngan Liyor Ku Got U Fithik’ E Tin Tiyul’

Ra nge felan’ Got ko liyor ma thingari tor ko tin riyul’. (John 4:23) Be tamilangnag e Bible ni girdi’ ni be liyor u fithik’ e tin riyul’ e yad bang ko “fare ulung rok fare Got ni be par nib fas, nre ulung nem e ir e duga’ me ir e be dunubiy fare thin nib riyul’.” (1 Timothy 3:15) Fa piin ni yad fare ulung rok Got e gathi ke mus nib mich u wan’rad e Thin Rok Got ya ku yad ma par nib puluw ngay ma yad ma weliy morngaagen u ga’ngin e fayleng.​—Matthew 24:14; Roma 10:9-15.

RIB lingagil e Pi Mich Rok Jehovah ko machib ni yad be tay ni yad ma fil e thin ko Bible ngak e girdi’, ma yibe rin’ u boor ko 200 e binaw. Yad ma fil e Bible ma yad ma machibnag ni ereram e tin riyul’, ma darir uneged e lem ko girdi’ ngay. Ga manang e machib rorad ni bay ko Bible fa? Boor e girdi’ e dubrad ni ngar motoyilgad ko Pi Mich Rok Jehovah ya boor ban’en nib kireb ni kan weliy u morngaagrad. Machane yibe pining e piin nib yul’yul’ ni ngar turguyed ko uw rogon e n’en ni be machibnag e Pi Mich ni ir e tin riyul’ fa danga’. Aram ban’en ni baga’ fan nsusun ndabi turguy be’ u daken e dugdugthin. Boor e piin ni kar fl’eged i yaliy e machib ko Pi Mich Rok Jehovah ma baga’ angin ni yib ngorad.

Tamilangan’uy ko Tin Riyul’ e Ma Ayuwegey Ndab Kun Rus Ngay

Mu lemnag Eugenia. Kan chugliy u lan e tabinaw ni ri yad ba mich ko Katolik. Chitamangin e reb e girdi’ ni ke fl’eg rogon e wub rok fare papa nu Roma nga Mexico ko duw ni 1979. Nap’an ni be par Eugenia ko boch e fager rok, me mada’nag e Pi Mich Rok Jehovah. Mar ayuweged ni nge fl’eg i yaliy e n’en ni be yog e Bible. Ke gaar: “Som’on ma kug rus. Kug pirieg e tin riyul’! Ma kug nang ni ba googsur urngin ban’en ni ke michan’ug ngay faram. Ma girdi’ rog nge pi fager rog, ni yad e piin nib t’uf rog​—e yad gubin e kar olobochgad. Kug dada ko marus. Ma kug fitheg ko ra uw rogon u wan’ e girdi’ rog e n’en ni kug pirieg. Ke ayuwegneg Jehovah ma munmun ma ke felan’ug ko pi n’en ni gu be fil. Reb e rran ma kug turguy ni nggu non ko reb e girdi’ ni ir e fager ko tabinaw rog, ni reb e professor ko theology. Kug weliy ngak ni gu ba adag ni nggu nang e tin riyul’. Ma aram e gaar, ‘Faanra ga ba adag ni ngam nang e tin riyul’ ma ngam gayiy e Pi Mich Rok Jehovah.’”

Ma ke buch u rogon ni lemnag Eugenia ya kan tuluf u tabinaw rok. Machane Pi Mich Rok Jehovah e ke ayuweg ko tirok Got ban’en. Ke gaar: “Kan gelnag lanin’ug nggu par nib mudugil ko tin riyul’. Kug nang ni aram ban’en nib fel’ ni ngan par nib mudugil. Ma rib baga’ fan e ayuw ni pi’ e Pi Mich Rok Jehovah ngog. Kug nang ni gub t’uf rok girdien e ulung ni Kristiano. Kug par nib chugur ko ulung rok Got ma aram e ke ayuwegneg ni dab kugu rus ni nggu par ni goo gag.”

Ku mu lemnag yugu be’. Ba yalen ko tabinaw rok Sabrina ni ngar filed e Bible u taabang u gubin ngiyal’. Ma riyul’ gowa bay e ‘teliw ko tabinaw’ rorad. Ke mecham ni nge chag ko girdi’ ko yugu boch e teliw ni fan ni nge tamilangnag e oloboch rorad. Nap’an ni fith reb e Pi Mich Rok Jehovah ko ba adag ni ngar filew e Bible u taabang ma ke yog ni ba adag ya ke lemnag ni nge micheg ni gathi ir e tin riyul’. Ke weliy morngaagen ni gaar: “Ke pag reb e duw ni kug filew e Bible ma kug rus ni nggu war ko ‘tin riyul’ rog.’ Ya mom rog ni nggu tamilangnag e kireb ko pi yuraba i teliw, machane de mom ni nggu yodorom ko yay ney.”

Bochan ni ke rus Sabrina me tal ko fol Bible ko Pi Mich Rok Jehovah. Machane munmun me lemnag ni de gaman e tirok Got ban’en rok. Ere ke turguy ni nge fil e Bible biyay me felan’ ko tin riyul’ ni be fil. Ke mon’og Sabrina iyan me adag ni nge weliy ngak yugu boch e girdi’ e tin ni be fil. Ma ke fith ko rayog ni nge un ko Pi Mich u nap’an ni yad ma yan ko machib u mit e tabinaw iyan. Ke weliy Sabrina ni gaar: “U m’on ni kan nog nrayog ni nggu un ko Pi Mich Rok Jehovah ko machib ma kan fitheg ni: ‘Ri gab adag ni ngam mang reb e Mich Rok Jehovah fa?’ Kug fulweg: ‘Danga’!’ Ke yib e marus ngog biyay.” Machane i ulul Sabrina ni nge un ko urngin e muulung me guy e girdi’ rok Got nge rogon ni yad ma fol ko thin ko Bible me munmun ma kari nang u wan’ ni ereray e tin riyul’. Ma aram me un ko taufe ma chiney e ma wereg e machib nib full-time.

Mang Fan ni Ri Ba Thil?

Sana ra fith be’, ‘Mang fan ni ri ba thil e machib ko Pi Mich Rok Jehovah ko yugu boch e teliw?’ Faanra ga ra yaliy e n’en ni ke michan’rad ngay ma ra ayuwegem ni ngam nang ni yad e pi Kristiano nib yul’yul’, ma ri yad ma fl’eg i yaliy e thin ko Bible. Gamad be piningem ni ngam pithig e Bible rom ngam poy e pi thin ni bay u lang ni aram e be tamilangnag e n’en ni ke michan’rad ngay.

Faanra ngam yaliy e pi n’en ni ke michan’ e Pi Mich Rok Jehovah ngay nge rogon ni yad ma fol ko thin nu Bible, ma rayog ni nge yib e flaab ngom ni bay ko tin riyul’. (John 17:17) Dariy tapgin ni ngan rus ko tin riyul’. Mu lemnag e n’en ni micheg Jesus ni gaar: “Bay mu nanged e tin riyul’, ma tin riyul’ e ir e bayi ayuwegmed ni nge dab kum pired ni gimed e sib.”​—John 8:32.

[Sasing ko page 5]

Ma wereg e Pi Mich Rok Jehovah e thin riyul’ ko Bible ngak e girdi’ u boor ko 200 e binaw

[Kahol ko page 6]

BOCH BAN’EN NI KE MICHAN’ E PI MICH ROK JEHOVAH NGAY

◯ Jehovah e ir fare Got nth’abi ga’. Yu ken nsom’on e Bible e bay e ngochol rok riy nib pag e 7,000 yay.​—Psalm 83:18.

◯ Jesus Kristus e ir Fak Got, ni ke yib nga fayleng ni nge pi’ e yafas rok ni fan ko girdi’. (John 3:16, 17) Pi Mich Rok Jehovah e ma fol ko machib rok Jesus Kristus nrogon ni bay ko fapi Gospel.

◯ Fithingan e Pi Mich Rok Jehovah e bay ko Isaiah 43:10 ni be yog: “Begaar Jehovah, ‘Gimed e mich rog.’”

◯ Fare Gil’ilungun ni be yibilay e girdi’ ko fare “Meybil Rok Somol” e aram ba am ni bay u tharmiy ma dabki n’uw nap’an ma ra chuweg urngin e gafgow nge amith u fayleng ma ra yibnag fare Paradis ni be weliy e Bible morngaagen.​—Isaiah 9:6, 7; Daniel 2:44; Matthew 6:9, 10; Revelation 21:3, 4.

◯ Urngin e piin nra rin’ e tin nib m’agan’ Got ngay e rayog ni ngar uned ko pi flaab ni bay ko Gil’ilungun Got ndariy n’umngin nap’an.​—John 17:3; 1 John 2:17.

◯ Pi Kristiano e thingara ngongolgad nib puluw ko Bible. Thingara athamgilgad ni ngar pared nib yul’yul’, mab biech mab machalbog e ngongol rorad, mar t’ufeged e en ni migid ngorad.​—Matthew 22:39; John 13:35; 1 Korinth 6:9, 10.