Liyor Ko Pi Kristiano U Daken E Kan Ni Thothup Nge Tin Riyul’

“Got e Kan, ma piin ni yad be liyor ngak e thingara liyorgad ngak u daken e kan ni thothup ngo fithik’ e tin riyul’.”​—JOHN 4:24, NW.

1. Miti ni ngan e liyor e ma falan’nag Got?

FAK JEHOVAH ni kari maagirag rok, ni Jesus Kristus, e dag ni rib tamilang rogon e liyor ni ma falan’nag e Chitamangin nu tharmiy. Nap’an ni be machib ni rib fel’ rogon ngak be’ ni ppin nu Samaria u tooben ba luwed u charen fare mach nu Sychar, me yog Jesus ni gaar: “Gimed be liyor ko n’en ni dam nanged; ma gamad e gamad be liyor ko n’en ni gamad manang, ya kanawoen min thap ngak Got e yib rok piyu Jew. Machane, fare awa e be yib, ni aram e chiney, e piin riyul’ ni yad be liyor e bay ur liyorgad ngak e ani Chitamangiy u daken e kan ni thothup ngo fithik’ e tin riyul’, ya ba mutrug, ni ani Chitamangiy e be changarnag e piin ni aram rogon ni ngar liyorgad ngak. Got e ba Kan, ma piin ngaur liyorgad ngak e thingara liyorgad u daken e kan ni thothup ngo fithik’ e tin riyul’.” (John 4:22-24, NW) Mang fan e pi thin nem u wan’dad?

2. Daken e mang e ke ta’ yu Samaria e liyor rorad ngay?

² Piyu Samaria e bay e lem rorad ni de puluw nga rogon e liyor ku Got. Yad baadag e tini kan thagthagnag ni kemus ni fa lal ken nem e babyor nib m’on ko Babyor ni Thothup​—ni lal ke babyor ney e kemus ni tini yad e ra piliyeged e yad ma fanay, ni yima yog ni Samaritan Pentateuch. Yugu aram rogon ni piyu Samaria e gathi ri yad manang Got, ma piyu Jew e kan pag fan ngorad e tamilangan’ ko Thin rok Got. (Roma 3:1, 2) Ere rayog ni nge falfalan’ piyu Jew nib yul’yul’ nge ku boch e girdi’ ko n’en baadag Jehovah. Machane mang e n’en ni be yog e re n’eney ni thingar rin’ed?

3. Mang e n’en nib t’uf ni nge yog ni bochan ni nge yog ni ngan liyor ku Got “u daken e kan ni thothup ngo fithik’ e tin riyul’”?

³ Ra ngani falan’nag Jehovah, ma mang e thingari rin’ piyu Jew, piyu Samaria, nge ku boch e girdi’ ni kakrom? Thingar kur liyorgad ngak “u daken e kan ni thothup nge tin riyul’.” Ma ri ku arrogodad. Yugu aram rogon ni pigpig ku Got e thingar ni gelnigey ngay ara ngan pasig ngay, ma nge k’aring ba gum’ircha’ nib sug ko t’ufeg nge michan’, ma liyor ngak Got u daken e kan ni thothup e rib t’uf ni nge yog ngodad e kan ni thothup rok ma gad pag nga i pow’iydad. U daken e fol Bible ma yibe fol ko Thin rok Got, ma gelngidad, ara lem rodad e thingar ni puluweg ko lem rok. (1 Korinth 2:8-12) Ma liyor rodad ni nge fel’ u wan’ Jehovah, e thingar ni ta’ ngak u fithik’ e yul’yul’. Thingari puluw ko Thin rok Got, ni fare Bible, ni be dag murung’agen nge tin nib m’agan’ ngay.

Tin Riyul’ e Rayog i Pirieg

4. Uw rogon ni ma lemnag boch e girdi’ e tin riyul’?

⁴ Be’ ni be fil e philosophy e ke sum nga laniyan’ ni tin ni rib riyul’ e ban’en ni dabiyog ni nge yog ko girdi’. Ku aram rogon be’ nu Sweden nib tayol babyor ni Alf Ahlberg e yoloy ni gaar: “Boor e deer ko piin ni llowan’ e dabiyog ni ngan pi’ e fulweg riy ni rib puluw.” Machane boch e girdi’ e yad ma yog ni kemus ni chuchugur ko tin riyul’ e ba’, ere ba riyul’ ni aram rogon? Gathi aram rogon ni yog Jesus Kristus.

5. Mang fan ni yib Jesus nga fayleng?

⁵ Nga ayugu da susun niged ni gadad be guy e re n’en nib baaray ni ngan weliy: Nap’an ko tabolngin e duw ni 33 C.E., ni sak’iy Jesus u p’eowchen e Governor nu Roma ni Pontius Pilate. Me yog Jesus ngak Pilate ni gaar: “Bochan e re n’eney ma ku gub nga fayleng, ni aram e thingar gu dag e mich ko tin riyul’.” Me fith Pilate ni gaar: “Mang e tin riyul’?” Ma de sonnag e n’en ningki yog Jesus.​—John 18:36-38.

6. (a) Uw rogon ni kan weliy fan e “tin riyul’”? (b) Mang e n’en ni pi’ Jesus ngak pi gachalpen ni ngar rin’ed?

⁶ “Tin riyul’” e kan weliy fan ni “kenggin e pi n’en nib riyul’, nge n’en ma buch nge thin ni be micheg ban’en.” (Webster’s Ninth New Collegiate Dictionary) Machane, i micheg Jesus e tin riyul’ ni fan ko urngin ban’en? Danga’. Bay e tin riyul’ u laniyan’ nib mudugil. I yog ngak pi gachalpen ni ngar weliyed e pi n’en ni riyul’ nem, ya yog ngorad ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare kan ni thothup mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20) U m’on “ni nge mus e re m’ag ney,” ma tin riyul’ i gachalpen Jesus e yad ra weliy “e tin riyul’ ko fare thin nib fel’” u ga’ngin yang e fayleng. (Galatia 2:14) Re n’eney e yira rin’ ni bochan e nge bi m’ug nib riyul’ e thin rok Jesus ni gaar: “Ma re thin rok Got ney nib fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomuren e fayleng.” (Matthew 24:14) Ere rib ga’ fan ni ngad nanged e piin ni be fil ngak urngin e nam e tin riyul’ ni aram e yad be machibnag fare thin nib fel’ ni fan ko fare Gil’ilungun.

Rogon Me Yog ni Da Filed e Tin Riyul’

7. Uw rogon ni ga ra micheg ni Jehovah e ir e yib e tin riyul’ rok?

⁷ Jehovah e ir e yib rok e tin nib spiritual nib riyul’. Riyul’, ya fare psalmist i David e pining ku Jehovah “fare Got ko tin riyul’.” (Psalm 31:5; 43:3) Miki micheg Jesus ni thin ko Chitamangin e ba riyul’, ma ki weliy ngan nang ni gaar: “Pi profet e ra yoloyed ni lungurad, Got e bayi machibnag urngin e girdi’. Urngin e piin nrung’aged e thin ko en ni Chitamangiy me mit e tin ni ke yog ngorad e bay ra bad ngog.” (John 6:45; 17:17; Isaiah 54:13) Ere rib tamilang, ni piin ni yad be gaweg e tin riyul’ e ri ra skulnagrad Jehovah, ni en ni Th’abi Fel’ rogon ni ma fil ban’en. (Isaiah 30:20, 21) Piin ni yad ma gay e tin riyul’ e ba t’uf ni nge yog ngorad “fare tamilangan’ rok Got.” (Proverbs 2:5) Me Jehovah e u fithik’ e t’ufeg rok ma ke fil ara ke pi’ e tin riyul’ ni boor rogon kanawoen.

8. Mang boch e kanawo’ ni ke fil ara ke pi’ Got e tin riyul’ riy?

⁸ Ni bod rogon, nu daken e pi engel e i pi’ Got e pi Motochiyel riy ngak piyu Israel. (Galatia 3:19) Mu daken e pi lik’ay, e i micheg e pi towath riy ngak fa gali patriarchs ni Abraham nge Jakob. (Genesis 15:12-16; 28:10-19) Ma ki non u tharmiy, ni bod ko fa ngiyal’ nni taufenag Jesus ma pi thin ney ni yira falfalan’ ngay e ni rung’ag u fayleng ni gaar: “Ereray Fakag nib t’uf rog ni kari felan’ug ngak.” (Matthew 3:17) Ku arrogodad ni ku rayog ni nge falan’dad ni bochan ni Got e ke pi’ e tin riyul’ ni ke thagthagnag ngak e piin ur yoloyed fare Bible. (2 Timothy 3:16, 17) Gad ra fil e Thin rok Got, ma aram e rayog ngodad e “michan’ ko tin nib riyul’.”​—2 Thessalonika 2:13.

Tin Riyul’ nge Fak Got

9. Uw rogon ni ke fanay Got Fak ni nge dag e tin riyul’?

⁹ Rib ga’ ni ke fanay Got Fak, ni Jesus Kristus, ni nge dag e tin riyul’ ko girdi’. (Hebrews 1:1-3) Rriyul, ya Jesus e weliy e tin riyul’ u reb e kanawo’ ni dariy be’ ni ka e rin’. (John 7:46) Ni ku tomuren ni yan nga tharmiy, mi ki dag e tin riyul’ ni yib rok e Chitamangin. Ni bod rogon, apostal John ni gu’ “e n’en ni dag Jesus Kristus, ni Got e pi’ ngak, ni nge dag ngak e pi sib rok e pi n’en ni bayi buch ni dabki n’uw nap’an.”​—Revelation 1:1-3.

10, 11. (a) Pi n’en nib riyul’ ni i micheg Jesus e ba l’eg ko mang? (b) Uw rogon ni fal’eg Jesus e tin riyul’ ngebi m’ug ni ke riyul’?

¹⁰ I yog Jesus ngak Pontius Pilate ni ke yib nga fayleng ni nge dag e mich ko tin riyul’. Nap’an e machib rok, me dag Jesus ni pi n’en riyul nem e ba l’eg rogon ko ngan tamilangnag feni tolang Jehovah u daken gil’ilungun Got ni Kristus e Pilung riy. Machane ngan dag e mich ko tin riyul’ e ka boor ban’en ni kub t’uf ni nge rin’ Jesus gathi goo machib nge ngan fil ban’en ko girdi’. Ya ki fal’eg Jesus e re thin ni riyul’ nem nge ngal’ nib riyul’ ni bochan ni ir rok e lebuguy. Aram fan, me yoloy apostal Paul ni gaar: “Ere dariy be’ ni nge ngongliy e motochiyel u murung’agen e n’en ni ngam ked ara n’en ni ngam garbodgad ngay ara pi rran nib thothup, ara madenom ni yima tay ko m’ug e pul ara sabbath. Ya urngin e pi n’ey e kemus ni tagalul’ ko pi n’en ni ka ba’ nga m’on ni bay fini m’ug; ma bin ni ir riy e Kristus.”​—Kolose 2:16, 17.

¹¹ Reb e kanawo’ ni tin riyul’ e m’ug riy ni ke riyul’ e re gi n’en ni ngan gargelnag Jesus riy ni aram yu Bethlehem nni nog u m’on ni gargelnag. (Mikah 5:2; Luke 2:4-11) Tin riyul’ ni ki bi m’ug ni ku ke riyul’ e fapi thin ko yiiy rok Daniel u murung’agen ni ra bi m’ug fare Messiah u tomuren 69 e ‘wik ni aram e duw.’ I buch e binem ko ngiyal’ ni pi’ Jesus ir ku Got u daken e taufe nni ta’ ngak min puog e kan ni thothup rok Got nga daken ni rib puluw ko ngiyal’ ni ke may i yog ni ra buch riy u lan e duw, ni 29 C.E. (Daniel 9:25; Luke 3:1, 21, 22) Re riyul’ nem e taaboch me m’ug ni ke riyul’ ko machib rok Jesus ni pi’ e tamilangan’ ni ir be’ ni ma weliy murung’agen Gil’ilungun. (Isaiah 9:1, 2, 6, 7; 61:1, 2; Matthew 4:13-17; Luke 4:18-21) Maku e ri tay ni ki m’ug ni ke riyul’ e yam’ ni tay nge fas ko yam’ ni tay.​—Psalm 168-11; Isaiah 53:5, 8, 11, 12; Matthew 20:28; John 1:29; Acts 2:25-31.

12. Mang fan ni rayog rok Jesus ni nge yog, ni ‘Gag e tin riyul’’?

¹² Bochan ni Jesus Kristus e ir kenggin e tin riyul’, ma aram e rayog ni nge gaar: “I gag e kanawo’, me gag e tin riyul’, me gag e yafos; dariy be’ nrayog ni nge yan ngak e en ni Chitamangiy ya kemus ni gag e ra yan rog ngak.” (John 14:6) Girdi’ e ke puf rogorad ko liyor ngak Got u nap’an ni yad ra tayrad “ko baan riyul’” ni aram e ngar folgad ko tini rin’ Jesus ko pi n’en nib m’agan Got ngay. (John 8:32-36; 18:37) Bochan ni piin ni yad bod e saf e kar adaged e tin riyul’ mar leked Kristus u fithik’ e michan, e rayog ngorad e yafas ni manemus.​—John 10:24-28.

13. Ngad fal’eged i lemnag e tin riyul’ ko Bible ko dalip i mang ban’en?

¹³ Fare kenggin e pi n’en nib riyul’ ni pi’ Jesus nge pi gachalpen nni thagthagnag e ir e ke fal’eg rogon e michan’ ko tin riyul’ e Kristiano. Piin ni “yad be fol ko michan’” e aram e “yad be fol ko tin riyul’.” (Acts 6:7; 3 John 3, 4) Ere, mini’ e be fol ko tin riyul’ e chiney? I mini’ e rriyul’ ni be fil ngak urngin e pi nam e tin riyul’? Rogon ni ngad pied e fulweg ko tinem e deer, e aram e ngada changargad ko tin som’mon e Kristiano ma gadad fal’eg i guy e tin riyul’ ko Bible nib l’eg rogon ko (1) pi machib, (2) rogon ni yibe liyor, nge bin (3) rogon ngongolen bagadad nge bagadad.

Tin Riyul’ nge Michan’

14, 15. Mang e n’en ni rayog ni nga mog ko u rogon e Bible u wan’ e tin som’mon e Kristiano nge Pi Mich Rok Jehovah?

¹⁴ Thin rok Jehovah ni kan yoloy e rib ga’ fan u wan’ e tin som’mon e Kristiano. (John 17:17) Aram e fol ko machib rorad nge ngongol rorad. Clement nu Alexandria ko bin ni l’agruw nge dalip e chibog e gaar: “Piin ni yad be athamgiliy i lek e tin th’abi fel’ e dabra talgad i gaweg e tin riyul’, nge taw ko ngiyal’ ni ke yog e mich ngorad ko pi n’en nib mich u wan’rad ni bay u Bible.”

¹⁵ Pi Mich rok Jehovah, e taareb rogorad ko tin som’mon e Kristiano ri yad ma ta’ fan e Bible nib gel. Ba mich u wan’rad ni “urngin e thin riy e Got e thagthagnag ma baga’ fan ni ngaun i fil.” (2 Timothy 3:16, NW) Ere ngada lemnaged in e pi n’en ni ma mich u wan’ e tin som’mon e Kristiano ma gadad be lemnag e n’en ni ke fil e pi tapigpig rok Jehovah e ngiyal’ ney ni bochan ni yad ma fanay e Bible ni ir e babyor ni th’abi ga’ fan rorad.

N’en Riyul’ u Murung’agen e Yaal

16. Mang e tin riyul’ u murung’agen e yaal?

¹⁶ Bochan nib mich u wan’rad e pi n’en ni ka nog u Bible, ma tin som’mon e Kristiano e ur filed e tin riyul’ u murung’agen e yaal. Yad manang ni “girdi’ e yib i mang ba yaal nib fas” u nap’an ni sunmiy Got. (Genesis 2:7) Maku boch, e ba mich u wan’rad ni girdi’ e aram e yaal ma ra yim’. (Ezekiel 18:4; James 5:20) Maku yad manang ‘ni yam’ e dakuriy ban’en ni ka manang.’​—Eklesiastes 9:5, 10.

17. Uw rogon ni ga ra weliy murung’agen e athap ko piin ni kar m’ad?

¹⁷ Yugu aram rogon, ma pi gachalpen Jesus ni som’mon e immoy fare athap nib riyul’ u wan’rad ni yam’ ni yad bay u wan’ Got e yira fasegrad ko yam’, ara ni fulwegrad ko yafas. Re michan’ nem e ri tamilangnag Paul, ni weliy ni gaar: “Bay e athap rog ngak Got . . . ni bay e fas ko yam’ ko girdi’ nib mat’aw nge tin ni de mat’aw.” (Acts 24:15, NW) Ki mada’ nga boch nga tomur riy, me Minucius Felix ni ma yog ni ir reb e Kristiano e yoloy ni gaar: “Mini’ e ba aliliy ara ri de nang ban’en ni rayog rok ni nge yog ni girdi’, ni ngongliyrad Got, e dabiyog ni ngaki fal’egrad bayay ngar biechgad?” Pi Mich rok Jehovah, e ku taareb rogorad ko tin som’mon e Kristiano ke mich u wan’rad e tin riyul’ nu Bible u murung’agen e yaal ko girdi’, nge yam’, nge fas ko yam’. Ngada lemnaged e chiney ko uw rogon nge mini’ Got nge Kristus.

Tin Riyul’ nge Trinitas

18, 19. Mang fan ni rayog ni nga nog ni Trinitas e gathi ban’en ni ma fil e Bible?

¹⁸ Tin som’mon e Kristiano e da ur lemnaged Got, nge Kristus, nge kan ni thothup ni Trinitas. Rogon ni yog e The Encyclopædia Britannica e gaar: “De m’ug fare bugithin ni Trinitas ara machiben nni weliy u lan fare New Testament, ara guy rogon Jesus nge pi gachalpen ni nga rogned ni de puluw e Shema [ba meybil ni Hebrew] u lan e Old Testament ni gaar: ‘Mu rungaag, O Israel: Fare Somol ni Got rodad e ri taareb e Somol’ (Deut. 6:4, NW).” Pi Kristiano e da ur liyorgad ko fa dalip Got rok yu Roma ara yugu boch e got. Ke fel’ u wan’rad e n’en ni yog Jesus ni yi goo Jehovah e ir e ngaun liyor ngak. (Matthew 4:10) Maku reb, e ke mich u wan’rad e pi thin rok Kristus ni gaar: “Chitamag e kab ga’ ngog.” (John 14:28, NW) Pi Mich rok Jehovah e ku aram rogon e lem rorad e chiney.

¹⁹ Tin som’mon i pi gachalpen Jesus e rri tamilangniged e thil u thilin Got, nge Kristus, nge kan ni thothup. Riyul’, ya yad ma taufenag pi gachalpen (1) nga fithingan e Chitamangiy, (2) nge fithingan Fak, nge (3) fithingan e kan ni thothup, gathi fithingan e Trinitas. Pi Mich rok Jehovah e ku aram rogon ni yad ma fil e tin riyul’ nu Bible ni aram e be dag e thil u thilin Got, nge Fak, nge kan ni thothup.​—Matthew 28:19.

Tin Riyul’ nge Taufe

20. Mang tamilangan’ e ba t’uf ko piin ni ke mudugil ni ngan taufenagrad?

²⁰ I pi’ Jesus mat’awun pi gachalpeg ni nga ranod ngar filed ko girdi’ e tin riyul’ ngar manged pi gachalpen. Ra nge bung rogorad ko taufe, ma ba t’uf rorad e tamilangan’ ko tin nib ga’ fan ko Bible. Ni bod rogon, ni thingar ra nanged e liw nge mat’awun e Chitamangin nge Fak, ni Jesus Kristus. (John 3:16) Ma piin ni ke mudugil ni ngan taufenagrad e kub t’uf ni ngar nanged fan ni kan ni thothup e gathi ba girdi’ ya gelngin Got ni ma maruwel.​—Genesis 1:2, footnote.

21, 22. Mang fan ni ga ra yog ni taufe e fen e piin ni ke michan’rad?

²¹ Tin som’mon e Kristiano e kemus ni yad ma taufenag e piin ni ke tamilangan’rad nge piin kar kalgadngan’rad kar pied keru’rad ko kireb ni ur rin’ed ma kar pied yad ni polo’ ngak Got ni ngar rin’ed e tin nib m’agan’ ngay. Girdi’ nu Jew nge piin ni gathi yad piyu Jew ni ra muulung gad nga Jerusalem ko Pentekost 33 C.E. e goo ke tamilangan’rad kar nanged fare Hebrew Scriptures. Nap’an nni rung’ag ni welthin apostal Peter ni murung’agen Jesus ni ir fare Messiah, ma gonapan 3,000 “e mit nga gum’ircharad e thin rok” mi “ni taufenagrad.”​—Acts 2:41; 3:19–4:4; 10:34-38.

²² Taufe ko Kristiano fen e piin ni ke michan’rad. Girdi’ nu Samaria e ra adaged e tin riyul’, ma “nap’an ni mich u wan’rad Filip, ni i weliy murung’agen fare thin nib fel’ ni murung’agen fare gil’ilungun Got nge fithingan Jesus Kristus, ma aram ma ranod ni ngan taufenagrad, ni yad gubin ni pumoon ma ppin.” (Acts 8:12) Bod fare Ethiopian eunuch ni ba yul’yul’ ma kan pingeg ma bay e tamilangan’ rok Jehovah rok, nap’an ni mich u wan’ e n’en ni yog Filip u murung’agen ni ke riyul’ fare yiiy u murung’agen fare Messiah, ma aram min taufenag. (Acts 8:34-36) Tomur riy, me yog Peter ngak Kornelius nge ku boch e girdi’ ni gathi yad piyu Israel ni “cha’ ni ba’ madgun [Got] rok ma be maruweliy e tin nib mat’aw e ra fel’ u wan’” nge ku urngin e girdi’ ni ke mich Jesus Kristus u wan’rad e yira n’ag fan e denen rorad. (Acts 10:35, 43; 11:18) Urngin e pi n’eney e ba m’ag ko n’en ni yog Jesus ni ngan pingeg e girdi’ ngar ‘manged pi gachalpen, min fil ngorad ni ngaur rin’ed urngin e tin ni ke yog ngorad.’ (Matthew 28:19, 20; Acts 1:8) Aray e pi n’en ni be rin’ e Pi Mich rok Jehovah ma kemus ni piin ni yad ma taufenag e piin ni ke yog e tamilangan’ ngorad ko tin baga’ fan nu Bible ma ka ra ognaged yad ngak Got.

23, 24. Uw rogon e bin nib puluw nga rogon e taufe ko Kristiano?

²³ Chulthag be’ nga ar nge chape ran u daken e aram e bin nib puluw i kanawoen e taufe ko piin ni ke michan’rad. Tomuren ni kan taufenag Jesus u lan e lul’ nu Jordan, me yib nga “lang nge chuw u fithik’ e ran.” (Mark 1:10) Fa cha’ nu Ethiopia ni ba eunuch e ni taufenag u “lan bangi ran.” Ir nge Filip “e ranow nga lan fare ngi ran” ngemu’ “mar chuwgow u fithik’.” (Acts 8:36-40) Rogon ni Thin rok Got e ke pethuy e taufe ko ngan k’eyagey ni be yip’ fan ban’en e ku be dag ni ngan chulthag be’ nga ar ni polo’ u nap’an e taufe.​—Roma 6:4-6; Kolose 2:12.

²⁴ Fare babyor ni The Oxford Companion to the Bible e be gaar: “Rogon yaan e taufe ni ba’ ko New Testament e be dag ni girdi’ ni un taufenag e ni chulthag nga ar nga fithik’ e ran.” Ma rogon ni be yog fare French work Larousse du XX^e Siècle (Paris, 1928), e “tin som’mon e Kristiano e yad ma taufe ni yima lithagrad nga ar ko yungin ni yira pirieg e ran riy.” Ma fare ke babyor ni After Jesus​—The Triumph of Christianity e kan yoloy ni gaar: “N’en th’abi som’mon ni yima rin’ ko [taufe] ba t’uf ni nga nog ngan nang e michan’ rok, me migid min lithag nga ar nga fithik’ e ran u fithingan Jesus.”

25. Mang e yira weliy murung’agen ko bin migid e article?

²⁵ Tin nib m’on ban’en ni fan ko machib ni ba’ u lan e Bible nge n’en ni ma rin’ e tin som’mon e Kristiano e kemus ni aram rogon. Rayog ni nge m’ug boch ban’en ni taareb rogon ko machib rorad nge rogon e michan’ rok e Pi Mich Rok Jehovah. Bin migid e thin e gad ra weliy boch e kanawo’ ni ra dag e piin ni yad be fil e tin riyul’ ko girdi’.

Uw Rogon ni Ga Ra Fulweg?

• Miti ni ngan e liyor e ba t’uf ni ngan ta’ ku Got?

• Uw rogon ni tin riyul’ e ke bi m’ug nib riyul’ ni bochan Jesus Kristus?

• Mang e tin riyul’ u murung’agen e yaal nge yam’?

• Uw rogon ni ma taufe e piin Kristiano, ma mang e ba t’uf ni nge rin’ e piin nge un ko taufe?

[Picture on page 11]

I yog Jesus ngak Pilate ni gaar: ‘Kugub ni nga gu micheg e tin riyul’’

[Picture on page 12]

Rayog ni ngam weliy ko mang fan ni yog Jesus ni gaar: ‘I gag e tin riyul’’?

[Picture on page 13]

Mang e tin riyul’ u murung’agen e taufe ko Kristiano?