“Tin Riyul E Bayi Ayuwegmed Nge Dab Kum Pired Ni Gimed E Sib”

“Bay mu nanged e tin riyul’, ma tin riyul’ e ir e bayi ayuwegmed nge dab kum pired ni gimed e sib.” Aram e n’en ni yog Jesus u nap’an ni be machibnag e girdi’ ni boor u lan fare tempel u Jerusalem. (John 8:32) Manang e pi apostal rok Jesus ni tin ni be yog e ereram e tin riyul’. Ya ur guyed boor ban’en ni be micheg ni sensey rorad e yib u tharmiy.

MACHANE ngiyal’ ney e mo’maw ko girdi’ ni ngar nanged e tin riyul’ ni weliy Jesus morngaagen. Bod rogon nap’an Isaiah ni profet ma bay e “piin ni be yog e tin nib fel’ ban’en e ba kireb ma tin nib kireb e yad be yog nib fel’, ma yad be tay e talumor nga luwan e tamilang nge tamilang nga luwan e lumor, ma yad be tay e tin nib mooy ban’en nga luwan e tin nib athibthib nge tin nib athibthib ban’en nga luwan e tin nib mooy.” (Isaiah 5:20, New World Translation) Ngiyal’ ney ma boor e lem ko girdi’ nib thil thil, nge ku arrogon e llowan’ nge par ni yibe mon’ognag, me ere boor e girdi’ e be lemnag ni dariy ban’en nib mudugil ya gubin ban’en e ma tor nga ban’en ma dakuriy e tin riyul’.

Nap’an ni yog Jesus ko girdi’ ni tin riyul’ e ra ayuwegrad nge dab kur pared ni yad e sib, ma ur gaargad: “Gamad owchen Abraham, ma dawor gu manged sib rok be’ biid. Ere mang fan ni ga be yog ni be lungum, ‘Bayi ayuwegmed nge dab kum pired ni gimed e sib’?” (John 8:33) Dar lemnaged nib t’uf ni ngan ayuwegrad ndabkura pared ni yad e sib. Machane ke weliy Jesus ni gaar: “Nggog e tin riyul’ ngomed: Urngin e girdi’ ni yad be denen e ra bagayad ma ke mang sib ko denen.” (John 8:34) Fa tin riyul’ ni weliy Jesus morngaagen e rayog ni nge pithig e girdi’ ndabkura pared ni yad e sib ko denen. Yog Jesus ni gaar: “Ere faanra ayuwegmed e en ni Fak ngam pired ni gathi ki gimed e sib, ma aram e kari mudugil ni kam pired ni gathi ki gimed e sib.” (John 8:36) Ere fa tin riyul’ ni be pithig e girdi’ ndabkura pared ni yad e sib aram e tin riyul’ u morngaagen Jesus Kristus ni ir Fak Got. Kari mus e kanawo’ ni rayog ni nge pithigey ko denen nge yam’ e aram e nge michan’uy ngak Jesus nge maligach ni pi’ ni aram e yafas rok nib flont.

Bay biyay ni yog Jesus ni gaar: “Mu fil ngorad e tin nib riyul’, ni er e thin rom ngam pingegrad ngay ngar pired ni girdiem.” (John 17:17) Fare thin rok Got ni bay ko Bible e aram e tin riyul’ ni rayog ni ngan pithig e girdi’ ndabkura rusgad ko lem nib machmach nge liyor ngoogsur. Bible e bay e thin riyul’ riy u morngaagen Jesus Kristus, ni ma pow’iy e girdi’ iyan nge michan’rad ngak ma ma pithig e kanawo’ nge yog ni nge l’agan’rad ko gabul nge langleth. Rib fel’ ni ngan nang e tin riyul’ ni Thin Rok Got!

Uw fene ga’ fan ko ngiyal’ ney ni ngan nang e tin riyul’? Boor e teliw ko ngiyal’ ney ni yad ma yog ni yad be fol ko Bible, machane be suwey lanin’rad e lem nge yalen ko girdi’. Ma boor e pi tayugang ko teliw e ka baga’ fan u wan’rad ni ngar fel’gad u wan’ e girdi’ ni yoor ko bin ni nge puluw e thin rorad ko Bible. Boch e girdi’ e be lemnag ni ke felan’ Got ko urngin mit e liyor ni yibe tay ngak, ya yad ba yul’yul’. Machane yog Jesus Kristus ni gaar: “Machane re ngiyal’ nem e ka be yib ni ke taw ngaray, ni piin nriyul’ ni yad be meybil e bay ra meybilgad ngak e en ni Chitamangiy u daken e ayuw ko kan ni thothup ngu fithik’ e yul’yul’. Ereray e piin ni yad ma meybil ni ba adag e Chitamangiy ni ngar meybilgad ngak.”​—John 4:23.

Faanra gad ba adag ni ngad liyorgad ku Got u rogon nib m’agan ngay, ma thingarda nanged e tin riyul’. Aram ban’en ni baga’ fan. Ya falfalan’ rodad e be tor nga daken. Ere gubin e girdi’ ma susun ni nge fith ir ko: ‘Ke felan’ Got ko liyor ni gu be tay ngak fa? Rriyul’ ni gu ba adag ni nggu nang e tin riyul’ ko Thin Rok Got fa? Fa kug rus ko mang e ra tamilangnag ngog nfaanra nggu fil boch?’