Ri Mini’ Got?

UW ROGON ni ga ra fulweg e re deer ney? Boor e girdi’ ni ba mich u wan’rad ni bay Got, ere yad ma yul’yul’ ngak maku yad ma rus ngak. Machane, ri ku boor e girdi’ ni gathi ri yad manang Got. Faanra ba mich Got u wan’um, ma uw rogon ni ga ra fulweg e pi deer ni baaray nga but’?

1. Uw rarogon Got?

2. Bay fithingan Got fa dariy?

3. Jesus e Got ni Gubin Ma Rayog Rok, fa?

4. Ma lemnageg Got?

5. Urngin mit e liyor ma ba m’agan’ Got ngay?

Faanra mu fith e pi deer ney ko girdi’ ma ba thilthil rogon ni yad ra fulweg. Ere arfan ni boor ban’en ni kan tunguy yibe weliy u murung’agen Got.

Rib Ga’ Fan e Fulweg Riy

Nap’an ni be non Jesus Kristus ngak be’ nib pin ni ba mich Got u wan’ u tooben ba luwed me tamilangnag feni ga’ fan ni ngan nang e tin riyul’ u murung’agen Got. Re pin nu Samaria ney e ba mich u wan’ ni Jesus reb e profet. Machane bay ban’en ni be magawonnag laniyan’. Ba thil e michan’ rok Jesus ko michan’ rok. Nap’an ni nang Jesus ni aray e n’en ni be lemnag me gaar ngak: “Ri da mu nanged e en ni gimed be meybil ngak.” (John 4:19-22) Ri ba tamilang ni n’en ni be yog Jesus u roy e gathi gubin e girdi’ ni yad ma yog ni yad manang Got e rriyul’ ni yad manang Got ni ba fel’ rogon.

Ere, gur, n’en ni be yog Jesus u roy e dariy be’ nrayog ni nge nang Got ni ba fel’ rogon? Danga’. I ulul Jesus ngay ni gaar: “Piin nriyul’ ni yad be meybil e bay ra meybilgad ngak e en ni Chitamangiy u daken [“gelngin nib thothup,” NW] ngu fithik’ e yul’yul’.” (John 4:23) Gur bagayad e piin ni ma meybil ngak Got u daken gelngin nib thothup ngu “fithik’ e yul’yul’”?

Ri ba ga’ fan ni nge mudugil e fulweg rom ko re deer ney. Mang fan? I tamilangnag Jesus ko meybil rok feni ga’ fan ni nge yog e bin riyul’ e tamilangan’ ngodad ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” (John 17:3) Ere, athap rom boch nga m’on e be yan u rogon feni ri ga manang e tin riyul’ u murung’agen Got!

Gur, rayog ni ngada nanged e tin riyul’ u murung’agen Got? Rayog! Ni uw rogon? I yog Jesus ni gaar: “I gag e kanawo’, me gag e tin riyul’, me gag e yafos; dariy be’ nrayog ni nge yan ngak e en ni Chitamangiy ya ke mus ni gag e ra yan rog ngak.” (John 14:6) Ki yog ni gaar: “Dariy be’ ni manang ko mini’ e en ni Chitamangiy, ya ke mus ni en ni Fak e manang, nge piin ni ba adag e en ni Fak nem ni ngar nanged e Chitamangin.”​—Luke 10:22.

Kemus nu daken e n’en ni fil Jesus Kristus ni Fak Got e gad ra nang Got riy. Ya ke micheg Jesus ngodad ni gaar: “Bay mu nanged e tin riyul’, ma tin riyul’ e ir e bayi ayuwegmed nge dab kum pired ni gimed e sib.”​—John 8:31, 32.

Ere, uw rogon ni fulweg Jesus fa lal i deer ni faan kan fith ko som’on?

[Picture on page 4]

Ga ma liyor ngak ba Got ni dam nang?