Maruwel Rom E Ra I Par Nib Mudugil Ni Dabi Yik’?

“Ra be’ ma thingari ayuw nga rogon e naun ni be toy nga daken [e def].”​—1 KORINTH 3:10.

1. Mang e ma athapeg e pi Kristiano nib yul’yul’ ko girdi’ ni yad be pingeg ngar manged pi gachalpen Jesus?

BA wu’ i mabgol ni Kristiano ni yow be sap ko bitir rorow ni ka fin ni gargeleg. Bay reb e publisher ni be guy u owchen e Bible study rok ni ri baadag ni nge nang e thin riyul’. Reb e piilal ni bay u daken e stage e ke guy be’ nib biech u fithik’ e pi tayengeg ni be tiyan’ ni nge pithig e Bible rok nge guy e pi thin riy. Pi tapigpig nib yul’yul’ ney e bay e athap u gum’ercharad. Dabi siy ni yad be lemnag, ‘Cha’ ney e ra pigpig ngak Jehovah nge par nib t’uf Got rok​—ma ra i par nib yul’yul’ ngak fa?’ Ba mudugil ni gathi yugu ra buch. Ya ba t’uf ni ngan ayuweg.

2. Mang e yoloy apostal Paul ni nge puguran ngak e pi Kristiano nu Israel ni baga’fan e maruwel ko machib, ma ngad yaliyed gadad ko mang?

² Ke tamilangnag apostal Paul, ni ir reb e tamachib nib salap, ni baga’fan e maruwel ko machib nge maruwel ni ngan pingeg e girdi’ ngar manged pi gachalpen Jesus ko ngiyal’ ni i yoloy ni gaar: “Ke n’uw nap’an ni kam rung’aged e thin rok Got nrayog ni ngam manged boch e tamachib.” (Hebrews 5:12) Gathi kari mon’og e pi Kristiano ni i yog Jesus e pi thin nem ngorad ni yugu aram rogon ni ke mich Got u wan’rad nib n’uw nap’an. Dawori bung rogorad ni ngar machibnaged yugu boch e girdi’, ma ba t’uf ni ngan tamilangnag e thin riyul’ ngorad. Ngiyal’ ney ma ra fel’ rogodad ni ngad yaliyed gadad ko uw rogon ni gad ba salap ni ngad machibnaged fare thin nib fel’ ma ngad guyed rogon ni ngad mon’oggad iyan. Yafos ko girdi’ e ba l’ag ngay. Ere mang e rayog ni ngad rin’ed ni ngad mon’oggad iyan?

3. (a) Ke taarebnag apostal Paul e maruwel ni ngan pingeg e girdi’ ngar manged pi gachalpen Kristus ko mang? (b) Gadad e pi Kristiano ni gadad bod e girdi’ ni ma dimow naun, ere mang tow’ath ni bay rodad?

³ Ke pi’ Paul reb e fanathin me taarebnag e maruwel ni ngan pingeg e girdi’ ngar manged pi gachalpen Jesus ko maruwel ni dimow naun. I yog ni gaar: “Ya gamow nga bayang ni gamow be maruwel rok Got u taabang, ma gimed e gimed e milay’ rok Got ni gimed e naun rok Got.” (1 Korinth 3:9, New World Translation) Ere gad be un ko reb e maruwel ni dimow naun ma ba l’ag e girdi’ ngay; gad ma ayuwegrad ni ngar manged pi gachalpen Kristus. Gad be maruwel u taabang e An ni “ke sunumeg urngin ban’en.” (Hebrews 3:4) Ri gad ba tow’ath! Ngad guyed ko uw rogon nrayog ni nge ayuwegdad e pi fonow ni pi’ Paul ngak piyu Korinth ngad salapgad iyan ko maruwel rodad. Gad ra tiyan’dad nga rogon ni ngad salapgad ko machib.​—2 Timothy 4:2.

Ngan Ngongliy e Def nib Mat’aw

4. (a) Miti mang e maruwel ni tay Paul ni nge ayuweg e girdi’ ngar manged pi gachalpen Jesus? (b) Mang fan nrayog ni ngan nog ni manang Jesus nge pi girdi’ ni kar motoyilgad ku Jesus ni yad manang ni baga’fan e def nib manigil?

⁴ Ra nge par e naun nib mudugil ma ba t’uf e def nib gel. Ere yol Paul ni gaar: “Gu maruwel ko salap ni pi’ Got ngog nguug ngongliy e maruwel rok e girdi’ nib salap ko dimow naun mu gu ngongliy e def.” (1 Korinth 3:10) Ku taareb rogon e fanathin ni yog Jesus Kristus u murung’agen e naun ni de mithmith ko ngiyal’ ni ke yib e yoko’ ya fa en ni toy e naun e ke toy nga daken e war. (Luke 6:47-49) Manang Jesus ni baga’fan e def. Ya immoy u nap’an ni sunumeg Jehovah e fayleng.a (Proverbs 8:29-31) Maku girdi’ ni ur motoyilgad ku Jesus e ur nanged ni baga’fan e def nib manigil. Ke mus ni naun ni kan toy u daken e def nib mudugil e rayog ni nge par ni nge dabi mithmith ko ngiyal’ nra sugubur e lul’ nge yib e ran nga daken e binaw ara ngiyal’ ni yib e durru’ u Palestine. Machane, mang fan fare def ni yog Paul u murung’agen?

5. Mini’ e def ko fare ulung i Kristiano, ma mang e kan yiiynag u murung’agen?

⁵ Yog Paul ni gaar: “Ke m’ay i tay rok Got ni Jesus Kristus e ke mus e taare def, ma dakuriy yugu reb e def nrayog ni ngan ngongliy nga bayang.” (1 Korinth 3:11) Gathi aram e yay ni som’on ni kan taarebnag Jesus ko reb e def. Ya kan yiiynag u Isaiah 28:16 ni gaar: “Baaray e n’en ni be yog Jehovah ni be gaar: ‘Nggu tay ba def nga lan yu Zion, ni ba def ni bay i par nib mudugil ma ba gel. Bay gu tay ba malang nga fithik’ ni nge mang gelngin, me ir e ba th’abi ga’ fan.’” M’agan’ Jehovah ngay ni nge mang Fak e def ko ulung ni Kristiano.​—Psalm 118:22; Efesus 2:19-22; 1 Peter 2:4-6.

6. Uw rogon ni i ngongliy Paul e def nib manigil ko pi Kristiano u Korinth?

⁶ Mang e def ko urngin e Kristiano? I yog Paul, ni dakuriy yugu reb e def nrayog ni ngan ngongliy ya goo Jesus Kristus e def ni i tamilangnag e Thin rok Got. Dabi siy ni i ngongliy Paul e def. U Korinth ma kari gel ni kan tay fan e llowan’ ko girdi’, machane de guy Paul rogon ni nge ufanthin u mit e girdi’ nib gonop ko fayleng. Ya i machibnag Paul ni “Kristus e richibiy nga ba ley i gek’iy,” ni yugu aram rogon ni ke lemnag girdien e pi nam ni thin ko “balyang u wan’rad.” (1 Korinth 1:23) I machibnag Paul ni Jesus e ir bin ni baga’fan u fiti’ laniyan’ Jehovah.​—2 Korinth 1:20; Kolose 2:2, 3.

7. Mang e rayog ni ngad filed ko pi thin ni yog Paul ni “gu maruwel ko salap ni pi’ Got”?

⁷ Yog Paul ni i machibnag e girdi’ ni gaar, “gu maruwel ko salap ni pi’ Got.” Pi thin rok e gathi ba tolangan’. Ya i tamilangnag e tow’ath ni pi’ Jehovah ngak​—ni nge yarmiy ara pow’iy e maruwel. (1 Korinth 12:28) Ngiyal’ ney ma dariy e tow’ath rodad ni ngad ngongliyed e maangang ni bod e pi Kristiano u nap’an e bin som’on e chibog. Sana dabda lemnaged ni gad e pi tamachib nib salap. Machane er rogodad. Ya amu lemnag ni: Ma pi’ Jehovah e kan ni thothup ni nge ayuwegdad. (Mu taarebnag ko Luke 12:11, 12.) Ba t’uf Jehovah rodad ma gad be tay fan e tamilangan’ ko Thin Rok. Pi n’en ney e ba tow’ath nib manigil nrayog ni ngad fanayed ni ngad machibnaged yugu boch e girdi’. Nguuda athamgilgad ni ngad toyed e def nib mudugil.

8. Uw rogon ni ngad ted Kristus ni ir e def ko girdi’ ni gad be ayuweg ni ngar manged pi gachalpen Jesus?

⁸ Faan gad ra tay Kristus ni ir e def, ma dabda machibnaged ni ir e bitir ni bay u lan ba dabiy ko gamanman, ara yow Jehovah e yow taa be’ ni trinitas. Danga’, machib nde puluw ko Bible e aram def ko Kristiano ni googsur. Gad ma machibnag ni ir e re pumoon ni bin th’abi fel’ ni immoy u fayleng, me pi’ e yafos rok nib flont ni fan ngodad, ma ke Pilungnag Jehovah u tharmiy e ngiyal’ ney. (Roma 5:8; Revelation 11:15) Maku gad ma guy rogon ni ngad mithmitheged e girdi’ ni ngar leked luwan’ ay Jesus ma ngar folwokgad ko ngongol rok. (1 Peter 2:21) Gad baadag ni nge mithmithegrad e ngongol nib pasig ni tay Jesus ko machib, nge gol ni tay ngak e girdi’ nib gafgow, nge runguy ni tay ngak e pi tadenen ni ke kireban’rad, nge rogon nder rus ko pi skeng ni i yib ngak. Riyul’ ni Jesus e ir e def nib gilbuguwan. Machane mang e ka bay?

Ngan Maruwel ko Tin nib Mat’aw

9. Yugu aram rogon ni Paul e i ngongliy e def ko pi Kristiano, machane mang ni ke magafan’ ko piin ni i machibnag ma kar uned ko tin riyul’?

⁹ I yoloy Paul ni gaar: “Boch e girdi’ e bayi maruwel ko gol, ara silber, ara malang nib tolang puluwon ngar dimowgad nga daken e re def nem; ma boch e girdi’ e bayi maruwel ko ren, ara pan, ara kenggin e komey. Ma ra be’ ma bay ni guy felngin e maruwel rok ko chirofen ni bay fin nchuweg e upong u daken, ni aram e Chirofen ni bayi sul Kristus riy. Ya nifiy ko re Rran nem e bayi dag rogon e maruwel rok urngin e girdi’ ni baaray rogon: nifiy e bayi sikengnag e maruwel rorad nge be’ me m’ug e bin riyul’ i felngin e maruwel rok.” (1 Korinth 3:12, 13) Mang fan e pi thin rok Paul nem? Amu lemnag e n’en ni be buch riy. I maruwel Paul ni nge ngongliy e def. Nap’an ni yan ko maruwel ko missionary, i milekag nga reb e mach nge nga reb, ni nge machibnag e girdi’ ndawora rung’aged murung’agen Kristus. (Roma 15:20) Faani fol e girdi’ ko thin riyul’ ma aram me sum e pi ulung. Kari runguy Paul e pi cha’nem ni yad ba yul’yul’. (2 Korinth 11:28, 29) Machane, thingari milekag iyan ni bochan e maruwel rok. Ere tomren ni ke ngongliy e def u Korinth ko 18 e pul, me chuw u rom ni fan ni nge machib u boch e mach. Machane i lemnag u rogon ni be fol e girdi’ ko maruwel ni ke tay u rom.​—Acts 18:8-11; 1 Korinth 3:6.

10, 11. (a) Uw rogon ni i taarebnag Paul nga boch ban’en ni yima fanay ko dimow naun? (b) Mang boch ban’en ni kan fanay u Korinth ko dimow naun? (c) Miti mang e naun ni ra magay ko nifiy, ma mang e yibe fil ngak e pi Kristiano ni yad be ayuweg yugu boch e girdi’ ni ngar manged pi gachalpen Kristus?

¹⁰ De fel’ e maruwel ni tay boch e girdi’ ko def ni i ngongliy Paul u Korinth. Ni nge tamilangnag e magawon, ma i taarebnag Paul l’agruw mit e naun ni toy: reb e ni toy ko gol, silber, nge boch e malang nib tolang puluwon; ma reb ni toy ko ren, pan, nge kenggin e komey. Rayog ni ngan ubung e naun ko tin nib manigil, nge tin nib gel, nge tin ni dabi yik; ara rayog ni ngan ubung e naun nib papey min toy ko tin nra kireb nib papey, nge tin ni dabi par nib n’uw nap’an, nge tin nrayog ni nge yik. Dabi siy ni immoy l’agruw mit e naun riy u lan e mach ni Korinth. Immoy e pi temple ni baga’ ni kan ngongliy ko malang ni rib baga’ mab tolang puluwon, ma kan tay e gol nge silber nga daken ni nge fel’ usun.b Sana immoy e pi naun nib ga’ ney u talang ko nochi naun nge market nni ngongliy ko ren nge pan.

¹¹ Mang e ra buch ko pi naun nem ni faanra yik? Ba gagiyel e fulweg riy u nap’an Paul ni bod rogon e ngiyal’ ney. Ke gel General Mummius nu Roma ngak piyu Korinth me urfeg ni polo’ ko duw ni 146 B.C.E. Dabi siy ni ke yik me puth nga but’ e pi naun ni kan ngongliy ko ren, pan, nge kenggin e wheat. Mang e ke buch ko pi naun ni kan ngongliy ko malang nge gol nge silber? Dariy e maruwar riy ni de puth nga but’. Sana ke guy e girdi’ ni ke fanay Paul ko machib rok e pi naun nem ni de puth nga but’​—ni aram e pi naun nib mudugil ni ke magay ko magothgoth ma kab gel ko pi naun ni ke puth nga but’. Ere ri bpuluw e n’en ni i yog Paul! Nap’an ni ngad filed e thin riyul’ ngak e girdi’ ma ba t’uf ni ngad lemnaged ni gadad e piin ni ma dimow naun. Gad baadag ni ngad fanayed e tin th’abi gel ni fan ni nge par nib n’uw nap’an. Ya aram rogon nra i par e maruwel ni kad ted nib n’uw nap’an. Mang e be yip’ fan e tin th’abi gel, ma mang ni baga’fan ni ngad fanayed?

Ra Magay e Maruwel Rom ni Dabi Yik’ Fa?

12. Uw rogon ni ngongliy boch e Kristiano u Korinth e maruwel rorad nde fel’ rogon?

¹² I lemnag Paul ni de rin’ e pi Kristiano u Korinth e maruwel rorad nib fel’ rogon. Mang e magawon riy? Be dag e thin rok Paul ni i par e ulung nib ruw raba’, ma kan tay fan pangin e girdi’ ni yugu aram rogon ni aram e riya’ ko ulung ni nge par ni taareb. Boch e girdi’ e ke lungurad, “I gag e gub muun ngak Paul,” ma be’ e ke gaar, “I gag e gub muun ngak Apollos.” Boch i yad e ur pired nib tolangan’ ni bochan e gonop rorad. Wenegan ni yib e ke gel e lem ko girdi’, ma lem rorad e bod e bitir ko tirok Got ban’en, ma ke garer iyan e ‘awan’ nge maluag thin.’ (1 Korinth 1:12; 3:1-4, 18) Ke gagiyel e pi lem nem ko machib ni kan tay u lan e ulung nge u mit e tabinaw. Ere wenegan ni yib e dan ngongliy e maruwel ni ngan pingeg e girdi’ ngar manged pi gachalpen Kristus nib fel’ rogon, ni bod rogon ni kan toy e naun ko ren nge pan nde gel. Dabiyog ni nge magay ko “nifiy.” Mang e be yip’ fan e nifiy ni i weliy Paul u murung’agen?

13. Mang e be yip’ fan e nifiy ko fanathin ni pi’ Paul, ma mang e susun ni nge tamilang u wan’ e pi Kristiano?

¹³ Bay e nifiy ni ma yib ko yafos rodad​—ni aram e skeng ko michan’ rodad. (John 15:20; James 1:2, 3) Ba t’uf ni nge nang e pi Kristiano u Korinth, ni bod rogodad e ngiyal’ ney, ni ra yib e skeng ngak gubin e girdi’ ni gad ra fil e thin riyul’ ngak. Faanra dabda filed e thin riyul’ ngorad nib fel’ rogon ma rayog ni nge yib wenegan. I ginang Paul ni gaar: “Faanra dabi yik’ e n’en ni ke toy be’ nga daken e re def nem, ma ba’ puluwon ni rayog ngak. Machane faanra yik’ e tin ni maruweliy be’, ma aram e dabiyog puluwon ngak, machane ir e ke thap, nsusun e mil u fithik’ e nifiy nge thay.”c​—1 Korinth 3:14, 15.

14. (a) Uw rogon nrayog ni nge par e Kristiano ni bod be’ ni ke thay urngin e chugum rok ni bochan e nifiy, ma uw rogon nrayog ni nge thap? (b) Uw rogon ni ngad siyeged ni dabi buch ngodad ni bod ni ke thay e chugum rodad?

¹⁴ Rib tamilang e pi thin nem! Rayog ni nge kireban’um ku be’ ni kam athamgil ni ngam ayuweg ni nge mang gachalpen Jesus, machane ra taaboch ma ra war ko arar rok ni ke wawliy ara togopuluw ni ke yib ngak ma munmun me digey e kanawo’ ko tin riyul’. Taareb laniyan’dad Paul ya i yog nra kireban’dad ko ngiyal’ nra buch ni aram rogon. Sana rib gel e kireban’ riy nrayog ni ngan nog ni bod rogon ni “mil u fithik’ e nifiy”​—ni bod e pumoon ni thay urngin e chugum rok ni bochan e nifiy. Uw rogon nrayog ni ngad siyeged e re n’ey? Ngan toy e naun ko tin nib gel ban’en nrayog ni nge par nib n’uw nap’an! Faanra gad ra machibnag e girdi’ ni nge taw e thin riyul’ nga gum’ercharad, nge mithmithegrad ni ngar ted fan e felngin e Kristiano ni bod e gonop, me yib madgun Jehovah u wan’rad, nge bin riyul’ e michan’, ma aram ma gad be toy ko tin nib gel nra par nib n’uw nap’an. (Psalm 19:9, 10; Proverbs 3:13-15; 1 Peter 1:6, 7) Piin nrayog e pi felngin ney ngorad e yad ra ulul ni ngar rin’ed e tin nib m’agan’ Got ngay; bay e athap rorad ni nguur pired ni yad ba fas ndariy n’umngin nap’an. (1 John 2:17) Machane, uw rogon ni ngad maruwelgad nge puluw ko fanathin rok Paul? Baaray boch e kanawo’.

15. Uw rogon ni ngad siyeged ni ngad maruwelgad nde fel’ rogon ko girdi’ ni gad ma fil e Bible ngorad?

¹⁵ Nap’an ni ngad filed e Bible ngak e girdi’, ma susun ni dabkuda ted ni kab tolang e girdi’ ku Jehovah Got. Dabda nameged ni ngad filed ngorad ni ngar sapgad ngodad ko gonop rodad. Ya gad baadag ni ngar sapgad ku Jehovah, nge Thin rok, nge ulung rok ni nge pow’iyrad. Me ere, dab dogned e lem rodad ko ngiyal’ ni ngar fithed e deer ngodad. Ngad filed ngorad ni ngar gayed e fulweg, ni ngar fanayed e Bible nge boch e babyor ni ke ngongliy “fare tagpigpig nib yul’yul’ mab gonop.” (Matthew 24:45-47) Dabda lemnaged ni girdi’ ni gad be fil e Bible ngorad e yad pi gachalpdad. Faanra baadag e girdi’ ni ngar ayuweged yad ma dabda awan’gad ngorad, ya susun ni ngad pied e athamgil nga laniyan’ e pi Bible study rodad ni ngar ‘chaggad’ ngak yugu boch e girdi’, ngar nanged yad mar ted fan urngin e girdi’ u lan e ulung.​—2 Korinth 6:12, 13.

16. Uw rogon nrayog ni nge ayuweg e piin ni piilal e girdi’ ngar ubunged yad ko tin nib gel nra magay ko nifiy?

¹⁶ Maku baga’fan e maruwel ni ma tay e piin ni piilal ni ngar ayuweged e girdi’ ngar manged pi gachalpen Jesus. Nap’an ni ngar welthingad u lan e ulung, mar guyed rogon ni ngar ubunged e girdi’ ko tin nib gel nra magay ko nifiy. Ba thil salaprad, nge gonop rorad, nge pangirad, machane dabra guyed rogon ni ngar manged e girdi’ rorad u lan e ulung. (Mu taarebnag ko Acts 20:29, 30.) Dad nanged ko mang fan ni yog boch e girdi’ u Korinth ni, “Gag e gub muun ngak Paul” ara, “Gag e gub muun ngak Apollos.” Machane ra mudugilan’dad ni gali piilal nem nib yul’yul’ e dar guyew rogon ni ngar mon’ognagew e lem ni ngan ruw raba’nag e ulung. De lemnag Paul ni ir e ba sorok ni bochan e pi thin nem; ya i togopluw ko pi thin nem. (1 Korinth 3:5-7) Ku aram rogon e ngiyal’ ney, piin ni piilal e yad ma tiyan’rad ni ngar gafaliyed “fare ran’ i saf rok Got.” (1 Peter 5:2) Gathi fen e girdi’. Ere piin ni piilal e yad ma par nib mudugil ni ngar togopluwgad ko lem ni taa be’ e ra gagiyegnag fare ran’ i saf ara fare ulung i piilal. Faanra yad baadag ni ngar yul’yul’gad ngar ayuweged girdien e ulung, mar ayuweged e pi saf ni ngar pigpiggad ku Jehovah u polo’ e yafos rorad, ma aram ma yad be ubung e girdi’ ko tin nib gel nra magay ko nifiy.

17. Uw rogon nra ubung e gallabthir ni Kristiano e bitir rorad ko tin nib gel nra magay ko nifiy?

¹⁷ Pi Kristiano ni yad e gallabthir e ku yad ma lemnag e re n’ey. Yad baadag ni nge par e bitir rorad nib fos ndariy n’umngin nap’an! Aram fan ni yad ma athamgil ni ngar “filed” kenggin e Thin rok Got nga laniyan’ e bitir rorad nge taw nga gum’ercharad. (Deuteronomy 6:6, 7) Yad baadag ni nge puf e thin riyul’ u wan’ e pi bitir rorad, ngar nanged ni thin riyul’ e gathi ke mus ni aram e pi motochiyel ara tin nib riyul’, machane aram rogon nrayog e yafos nib falfalan’, mab tow’ath, mab polo’ ngorad. (1 Timothy 1:11) Ra ngan chuguliy e bitir ni nge mang gachalpen Jesus, ma ba t’uf rok e gallabthir ni ngar fanayed e tin nib gel nra magay ko nifiy. Yad ma maruwel e bitir rorad u taabang, ni ngar ayuweged yad ngar chuweged rorad e ngongol ni ma fanenikay Jehovah mar ngongliyed e ngongol ni baadag Got.​—Galatia 5:22, 23.

Mini’ e Mmil Fan Ngak?

18. Faanra digey reb e gachalpen Jesus e tin riyul’ ma mang fan ni gathi kireb rok fa en ni ke fil e Bible ngak?

¹⁸ Ke sum reb e deer nib ga’fan ko pi thin ni gad be fil. Faanra war be’ ni gad be ayuweg ni nge mang gachalpen Jesus me digey e tin riyul’, ma aram e dad rin’ed e maruwel rodad nib fel’ rogon​—ma kad ubunged ko ren nge pan ni gathi rib fel’ fa? Danga’, de mudugil. Pi thin rok Paul e be puguran ngodad nib mil fan ngodad ni ngad uned i pingeg e girdi’ ngar manged pi gachalpen Jesus. Gad baadag ni ngad rin’ed urngin ban’en nrayog rodad ni ngad ubunged e girdi’ nib fel’ rogon. Machane gathi be yog e Thin Rok Got nib mil fan ngodad nib polo’ ma ngar da pired nib kireb e nangan’ rodad ni bochan ni ke digey e tin riyul’. Bay yugu boch ban’en nib l’ag ngay. Ya amu lemnag e n’en ni yog Paul u murung’agen e tamachib nde rin’ e maruwel rok nib fel’ rogon ni nge maruweliy i ubung: “Ma aram e dabiyog puluwon ngak, machane ir e ke thap.” (1 Korinth 3:15) Faanra thap e cha’nem ngak Got​—machane ke “yik’” pangin e Kristiano ni kad athamgilgad ni ngad ubunged ko skeng ni bod e nifiy​—ma mang e susun ni ngad lemnaged? Ma lemnag Jehovah ni ra be’ mab mil fan ngak e n’en ni ra dugliy ko ra fol rok Got me par nib yul’yul’ fa danga’.

19. Mang e gad ra fil ko bin migid e article?

¹⁹ Rib ga’fan e n’en nib mil fan ngak be’. Ya gad gubin e gad ba l’ag ngay. Mang e be fil e Bible u murung’agen e re n’ey? Fa bin migid e article e ra tamilangnag.

[Boch e Thin nra Tamilangnag Murung’agen]

Uw Rogon e Fulweg ni Ngam Pi?

◻ Mang e def ko fa bin riyul’ e Kristiano, ma uw rogon ni yima ngongliy?

◻ Mang e rayog ni ngad filed ko pi n’en nib thilthil ni kan fanay ni ngan toy e naun?

◻ Mang e be yip’ fan e “nifiy”, ma uw rogon nrayog ni nge n’igin ni nge thay e chugum rok e girdi’?

◻ Uw rogon ni ma ubung e pi tamachib ko Bible, piin ni piilal, nge pi gallabthir e girdi’ ko tin nib gel ndabi yik’ ko nifiy?

[Sasing ko page 22]

U boor e mach kakrom, ma immoy riy e naun nni ngongliy ko malang nge ren nge pan