Nguum Athamgilgad Nge Mada’ Ko Ngiyal’ Ni Kam Marod Ngak Got!
“Pi tafager rog, . . . nguum athamgilgad ni ba’ madgun Got u wun’med mu um t’ongad ko marus nge mada’ ko ngiyal’ ni kam marod ngak Got.”—FILIPPI 2:12, New World Translation.
1, 2. Mang boch e lem ko girdi’ ni ke n’igin ni ngar lemnaged ni dabiyog ni ngar gagiyegnaged e yafas rorad?
“ARAM rogon nni gargelnagem fa?” Aram e deer ni bay u keru’ ba ke magazine nib gilbuguwan. Ma tanggin e pi thin nem e bay e pi thin ney ni: “Pangim, nge rarogom nge pi n’en ni kam turguy ko yafas rom. Yibe fil boch ban’en e ngiyal’ ney ni be dag ni kan gargelnagdad ni aram rogon.” Pi thin ni aram rogon e ma n’igin nge lemnag e girdi’ ni dabiyog ni ngar gagiyegnaged e yafas rorad.
2 Ma yugu boch e girdi’ e ma lemnag nib kireb rogon ni chugliyrad e gallabthir rorad ma aram fan ni dariy e falfalan’ ko yafas rorad. Yad be lemnag ni wol rorad ni ngar ngongolgad ni bod e gallabthir rorad, ma ngar folgad ko lem rorad nib kireb, ma dabra pared nib yul’yul’ ku Jehovah—mi yad turguy boch ban’en nib kireb. Aram rogon ni yog e Bible fa? Boch e girdi’ nib mich ko teliw e yad ma yog ni aram rogon ni be yog e Bible, ni aram e machib ni predestination. Rogon e re machib nem e kab kakrom ma ke m’ay i dugliy rok Got gubin ban’en ko yafas rom.
3. Mang boch e thin ko Bible ni ma pi’ e athamgil nga lanin’uy u morngaagen rogon nrayog ni ngad turguyed e gabul nge langleth ni fan ngodad?
3 Pi n’ey nib thilthil e bay ban’en ni taareb rogorad riy ni: Dabiyog ni ngam mel’eg e n’en ni ngam rin’ ara mu gagiyegnag e yafas rom. Re lem nem e ma k’aring ni nge mulan’uy ma ma gelnag e magawon. Proverbs 24:10 e be gaar: “Ke mulan’um ko rofen ni ke magafan’um fa? Aram e ra m’ay gelngim.” Machane yibe pi’ e athamgil nga lanin’dad ya rogon ni yog e Bible e rayog ni ngad ‘athamgilgad nge mada’ ko ngiyal’ ni ka darod ngak Got.’ (Filippi 2:12, NW) Uw rogon ni nge gel e michan’ rodad ko re machib ney ko Bible?
Fare Maruwel ko “Dimow Naun” Ni Gad Ma Rin’ u Fithik’dad
4. Be weliy 1 Korinth 3:10-15 u morngaagen e dimow naun ko pi n’en ndabi yik’, machane de sor fan ko mang?
4 Mu lemnag fare fanathin rok apostal Paul ni bay ko 1 Korinth 3:10-15. Be weliy u morngaagen mmit e maruwel ko Kristiano ko dimow naun, ma rayog ni ngan puluwnag e re fanathin nem ko machib u fithik’dad nge machib ni gad ma tay. Ere be yog ni piin ni kar filed ban’en ngak be’ mar skulnaged e mil fan ngorad ko ra pigpig faanem ku Jehovah ma ra par nib yul’yul’ ngak fa? Danga’. Be tamilangnag Paul fene ga’ fan e en ni be fil ban’en ngak be’ ni nge rin’ fare maruwel ko dimow naun nib fel’ rogon. Machane kad filed ko fa binem e thin ni gathi be yog ni dabiyog rok fa en ni kan skulnag ni nge turguy ban’en. Rriyul’, fanathin rok Paul e be tamilangnag fare maruwel ni gad ma tay ngak yugu boch e girdi’, ma gathi ngad ubunged gadad. Be m’ug ni aram rogon ya ke weliy Paul u morngaagen e maruwel ko dimow naun ndan rin’ nib fel’ rogon ma ke magay fa en ni toy ni kab fas. Machane ku be puluwnag e Bible e pi thin ni aram rogon ko maruwel ni gad ma rin’ ni fan ngodad.
5. Mang boch e thin ko Bible ni be dag ni pi Kristiano e thingara rin’ed e maruwel ko “dimow naun” u fithik’rad?
5 Mu lemnag Jude 20, 21 ni be gaar: “Gimed e pi tafager rog, e nguum gelniged gimed ko mich romed nib th’abi thothup. Um meybilgad ngak Got u fithik’ gelngin fare kan ni thothup, um pired ni gimed ba t’uf rok Got.” Fare bugithin ni Greek ni “ubung” ni fanay Jude e ba taareb rogon ko fa bin ni fanay Paul u 1 Korinth guruy ni 3, machane n’en ni be tamilangnag Jude e ngad ubunged gadad u daken e def ko michan’ rodad. Nap’an ni yoloy Luke fare fananthin rok Jesus u morngaagen fare moon ni ke toy e naun rok nga daken e war, me fanay fare bugithin ni Greek ni taareb rogon ko fare bugithin ni “def” ni fanay Paul ko maruwel ko dimow naun ko Kristiano. (Luke 6:48, 49) Miki fanay Paul e fanathin u morngaagen e “def” nib mudugil u nap’an ni ke yog ko pi Kristiano ni ngar mon’oggad i yan ko tirok Got ban’en. Arrogon, be skulnagdad e Thin Rok Got ni ngad fl’eged e maruwel ko “dimow naun” u fithik’dad.—Efesus 3:15-19; Kolose 1:23; 2:7.
6. (a) Mu weliy ko ra uw rogon ma ra reb e Kristiano ma ra yib wenegan ngak e maruwel ni dimow naun ni gathi goo taabe’ e ke rin’. (b) Mang e mil fan ngak ra reb i gachalpen?
6 Dimow naun ko Kristiano e ke mus ntaabe’ e nge rin’ fa? Mu lemnag ni ga be toy e naun. Rayog ni ngam man ngak be’ ni architect ni nge yaannag e naun rom. Ma yugu demtrug ni kam finey ni boor e maruwel riy ni ngam rin’ ni goo gur, machane ga ma pi’ puluwon be’ nib contractor ni nge ayuwegem nge yog ngom rogon ni ngan rin’ mab fel’. Ma faanra ke tay faanem e def ni rib mudugil, ma ra ayuwegem ngam nang fan rogon i toy, ma ra yog ngom e pi n’en ni ngam chuw’iy ko naun, ma dabi siy ni ga ra yog nib fel’ e maruwel ni ke tay. Machane faanra mu dariy fannag e n’en ni ke yog, ma ga chuw’iy e pi n’en nib sobut’ puluwon machane gathi rib fel’, fa dam fol ko n’en ni kan yaannag ko babyor? Dabi siy ni dabiyog ni ngam mog nib kireb fa en ni contractor ara en ni architect ni faanra ke puth fare naun! Ku aram rogon ra reb e Kristiano ni ke ubing boch e girdi’. Ma Jehovah ir fare architect ni ga’. Ma tay tanggin e pi Kristiano nib yul’yul’ ni yad ma “maruwel rok Got u taabang” mi yad ubing be’ ni be fil e Bible. (1 Korinth 3:9) Machane fa en ni yibe skulnag e ku ir e ba l’ag ngay. Ma tomur riy e ir e mmil fan ngak e kanawo’ rok. (Roma 14:12) Faanra ba adag ni nge yog felngin e Kristiano ngak, ma thingari athamgil nib elmirin ni nge yog ngak, me ubing e pi n’em u fithik’.—2 Peter 1:5-8.
7. Mang boch e magawon ni ma yib ko pi Kristiano, ma mang e rayog ni nge fl’eg lanin’rad?
7 Ere dariy fan rogon nni gargelegdad, ara rogon i chugliydad, ara rogon ni kan skulnagdad fa? Ri danga’. Ya Thin Rok Got e be tamilangnag ni ra reb e pi n’ey ma baga’ fan ma ba’ wenegan ni ma yib riy. Kan gargelnagdad ni gadad e ta denen ma gad ba adag boch ban’en nib kireb mab mo’maw ni ngad chamgad ko pi n’en nem. (Psalm 51:5; Roma 5:12; 7:21-23) Ma rogon ni chugliy e gallabthir e bitir e rayog ni nge gagiyegnag laniyan’ e bitir—u rogon nib fel’ fab kireb. (Proverbs 22:6; Kolose 3:21) I puwan’ Jesus ko pi tayugang ko teliw ni Jew ya ke kireb wenegan ni yib ko girdi’ ko machib rorad. (Matthew 23:13, 15) Ngiyal’ ney ma pi n’en nem e ke yib wenegan ngodad. Susun, boch e girdi’ rok Got e kar magawongad ni bochan ni boor e magawon rorad u nap’an ni yad bitir. Aram e piin nib t’uf ni ngad runguyed yad ma ngad golgad ngorad. Ma rayog ni nge gapas lanin’rad ko thin ko Bible ni be yog ni gathi dabi siy ni yad ra ngongol nib taareb rogon ko gallabthir rorad ni kar olobochgad ara dar yul’yul’gad. Mu lemnag boch e pilung nu Judah kakrom ni be tamilangnag e re n’ey.
Pi Pilung nu Judah—Kar Turguyed e N’en ni Ngar Rin’ed
8. Mang kanawo’ nib kireb ni ke dag e chitamangin Jotham, machane mang e rayog ni nge mel’eg?
8 Ke mang Uzziah e pilung nu Judah u nap’an ni ke 16 e duw rok ma ke gagiyeg u lan 52 e duw. N’umngin nap’an e gagiyeg rok ma ke “rin’ e tin nib mat’aw u p’eowchen Jehovah, nrogon ni i rin’ Amaziah ni chitamangin.” (2 Kings 15:3) I flaabnag Jehovah e cha’ nem ma boor e nam ni ke gel ngay ko mahl. Machane bay e kireban’ riy ya ke tolangan’ Uzziah. Ke ufanthin me togopluw ngak Jehovah ya ke pi’ e incense u daken e altar u lan e tempel, ma kari mus ni piin prist e bay rogon rorad. Kan puwan’ ngak Uzziah ma ke damumuw. Ma aram min tamra’nag—ya ke yib e daraw ngak ma thingari par u bang ngoo ir u n’umngin nap’an e yafas rok. (2 Kronicles 26:16-23) Uw rogon e re n’ey u wan’ Jothan ni fak? Rayog ni nge pag ni nge suwey e chitamangin laniyan’ me dabuy e n’en ni rin’ Jehovah. Ma girdi’ ko ngiyal’ nem ni be un ko machib ngoogsur e ku rayog ni ngar suweyed laniyan’ ko kireb. (2 Kings 15:4) Machane i turguy Jotham e n’en ni nge rin’. “Ke par ni be rin’ e n’en nib mat’aw u p’eowchen Jehovah.”—2 Kronicles 27:2.
9. Mang boch ban’en nib fel’ ni rayog ni nge suwey laniyan’ Ahaz machane uw rogon e yafas rok?
9 I gagiyeg Jotham u lan 16 e duw, ma ke par nib yul’yul’ ku Jehovah. Ere manigil e kanawo’ ni dag ku Ahaz ni fak ya ir ba matam nib yul’yul’. Ma ka bay yugu boch e girdi’ nib fel’ ni be ayuweg Ahaz. Ya ke par ko ngiyal’ ni bay e pi profet nib yul’yul’ ni Isaiah, nge Hosea, nge Mikah. Machane ke kireb e n’en ni ke turguy ni nge rin’. “De rin’ e tin nib mat’aw u p’eowchen Jehovah ni bod David ni chitamangin.” Ke fl’eg boch e liyos ni yaan Baal me liyor ngorad miki pi’ boch pi fak ni maligach ngan urfeg u daken e altar ko pi got ngoogsur. Yugu demtrug ni boor e piin nib fel’ ni be ayuweg ma de mang reb e pilung nib fel’ ma de par nib yul’yul’ ku Jehovah.—2 Kronicles 28:1-4.
10. Miti mang matam Ahaz, machane mang e ke turguy Hezekiah ni fak?
10 Rogon nib sor fan ko bin riyul’ e liyor ma dariy reb e matam ni kab gel e kireb ku Ahaz. Machane de yog rok Hezekiah ni fak ni nge mel’eg e chitamangin! Ma pi fak Ahaz e ke li’ me pi’ ni maligach ku Baal aram pi walagen Hezekiah. Ere dabi siy ni ra fol Hezekiah rok ma dabi yul’yul’ ngak Jehovah fa? Danga’, ya ke mang Hezekiah reb e pilung nu Judah ni rib manigil—ba yul’yul’, mab gonop, mab gol. “Ba’Jehovah rok.” (2 Kings 18:3-7) Ma yibe lemnag ni nap’an ni kab pagal Hezekiah min thagthagnag nga laniyan’ ni nge yoloy e bin 119 e tang ko Psalm. Faanra er rogon, ma de mo’maw ni ngan nang ko mang fan ni ke yoloy e pi thin ney ni gaar: “Kug par ni dabiyog ni nggu mol ni bochan ni gu be par ni ke kireban’ug.” (Psalm 119:28, NW) Yugu aram rogon ni ke par ni boor ban’en ni be kirebnagan’, machane me pag Hezekiah e Thin rok Jehovah nge gagiyegnag e yafas rok. Be yog ko Psalm 119:105 ni gaar: “Thin rom e ba magal ni be pow’iyeg, me ir e tamilang ko kanawo’ ni gu be yan riy.” Arrogon, i turguy Hezekiah e n’en ni nge rin’—ni aram e tin mat’aw ban’en.
11. (a) Uw fene gel e kireb rok Manesseh nib togopluw ngak Jehovah ni yugu aram rogon ni chitamangin e be’ nib fel’? (b) Mang e ke turguy Manasseh u tungun e yafas rok, ma mang e rayog ni ngad filed riy?
11 Machane ma yib bagayad e tin th’abi fel’ e pilung nu Judah u bagayad e tin th’abi kireb. I mon’ognag Manasseh ni fak Hezekiah e liyor ko liyos, nge taman bey, nge cham nib elmirin. Be weliy e Bible ni “kii par Jehovah ni be non ku Manasseh nge girdi’ rok,” u daken e pi profet. (2 Kronicles 33:10, NW) Rogon ni yog piyu Jew ma ke dabuy Manasseh e re n’em ma aram me yog ni ngan sey Isaiah nge ruw raba’. (Mu taarebnag ko Hebrews 11:37.) Ma yugu demtrug nib riyul’ e re n’em fa danga’ ma de motoyil Manasseh ko fonow ni yib rok Got. Ma ke urfeg pi fak ni ka yad ba fas nib maligach, ni bod ni rin’ Ahaz ni tutuw rok. Machane re moon ney ni kari kireb, e ke kalngan’ me pi’ keru’ ko kireb ni be rin’ u nap’an ni ke yib e magawon ngak. (2 Kronicles 33:1-6, 11-20) Kanawo’ ni dag e be fil ngodad ni be’ ni ke turguy ni nge rin’ e kireb e gathi dabkiyog ni nge fel’. Ya rayog ni nge thil.
12. Mang e ke turguy Amon nge Josiah ni fak nib math keru’ reb nga reb ni fan ko pigpig ku Jehovah?
12 Amon ni fak Manasseh e boor ban’en nrayog ni nge fil rok e chitamangin ni ke kalngan’. Machane ke turguy ni nge rin’ e tin kireb. Ke “yoor e kireb ni i rin’” Amon nge mada’ ko ngiyal’ ni kan li’ kem’. Ma Josaih ni fak e ba math keru’ ngak. I turguy Josiah ni nge fil ban’en ko n’en ni buch rok e tutuw rok. I tabab ko gagiyeg u nap’an ni ke meruk e duw rok. Nap’an ni ke 16, me tabab ni nge gayiy Jehovah ma ke mang reb e pilung nib yul’yul’ mab fel’ e kanawo’ ni dag. (2 Kronicles 33:20–34:5) Ke turguy ban’en—ma ke turguy e bin nib mat’aw e n’en ni nge rin’.
13. (a) Mang e gad be fil ko pi pilung nu Judah ni kad weliyed morngaagen? (b) Uw fene ga’ fan e ayuw ni ma pi’ e gallabthir ko bitir?
13 Bay ban’en nib baga’ fan ko re n’ey ni gad be fil ko fa medlip i pilung nu Judah. Tin th’abi kireb e pilung e kar diyennaged e tin th’abi fel’ e bitir, ma tin th’abi fel’ e pilung e kar diyennaged e tin th’abi kireb e bitir. (Mu taarebnag ko Eklesiastes 2:18-21.) Gathi aram e dariy fan ni nge llowan’ag e gallabthir e bitir rorad. Ya pi gallabthir ni ma skulnag e bitir rorad u rogon kanawoen Jehovah e yad be ayuweg e bitir rorad ngar manged e pi tapigpig rok Jehovah nib yul’yul’. (Deuteronomy 6:6, 7) Machane boch e bitir, e yugu aram rogon nib yul’yul’ e gallabthir rorad machane ka yad ma turguy ni nga ranod ko kanawo’ nib kireb. Ma yugu boch e bitir e yugu aram rogon ni gallabthir rorad e dar ayuweged yad nib fel’ rogon, machane kar turguyed ni ngar pigpiggad ku Jehovah mar t’ufeged. Ma ke fel’ e yafas rorad ya ke flaabnagrad Jehovah. Yu ngiyal’ ma ga ma lemnag ko uw rogon ni faan mang e gur? Mu lemnag boch e n’en ni yog Jehovah ni be micheg ni rayog ni mu turguy ni ngam rin’ e tin mat’aw!
Ma Pagan’ Jehovah Ngom!
14. Uw rogon ni gad manang ni manang Jehovah fan e gin ni gad ma mus riy?
14 Ma guy Jehovah urngin ban’en. Proverbs 15:3 e be gaar: “I [Jehovah] e be guy urngin ban’en ni yibe rin’ u gubin yang, ndemtrug ko tin nib fel’ ara tin nib kireb e gadad be rin’ machane be par ni ke yip’ owchen ngodad.” Ki yog David ni Pilung u morngaagen Jehovah ni gaar: “Ma dawor ni gargelegeg ma ga be guyeg. Pi rran ni kam sunmiy ni fan ngog e gubin ni goo bay u lan e birom e babyor u m’on ndawori tabab reb e pi rran nem.” (Psalm 139:16) Ere manang Jehovah thibngim ni ga be athamgil ni ngam cham ngay—ndemtrug ko ni gargelnigem ni aram rogon fa kan suwey lanin’um ko boch ban’en ni de yog ni ngam gagiyegnag. Manang fan ko mang wenegan ni yib ngom ni bochan. Ma manang fan e gin ni ga ra mus riy ni kab fel’ nga rogon ni ga manang. Ma ma runguydad. Ere der ma yog ni ngad rin’ed ban’en ndabiyog rodad.—Psalm 103:13, 14.
15. (a) Mang e rayog ni nge fl’eg laniyan’ e piin ni kan rin’ ban’en nib kireb ngorad ni pumey? (b) Mang e ke tay Jehovah nib mil fan ngodad ma aram e be tay fadad?
15 Machane ku der lemnag Jehovah ni dabiyog ni ngad gagiyegnaged e pi n’en ni ma buch ngodad. Faanra bay boch ban’en nib kireb ni ke buch ngodad faram ma rayog ni nge fl’eg lanin’dad ni ngad nanged ni ma fanenikay Jehovah e ngongol nib kireb ni kan rin’ ngodad ni pumey. (Psalm 11:5; Roma 12:19) Machane aram e dabi yib wenegan nib kireb ngodad nfaanra gad ra chel ma gad turguy ni ngad rin’ed boch ban’en nib kireb fa? Ri danga’. Ya be gaar e Thin Rok: “Ra be’ ma ba’ gilban ni be fek.” (Galatia 6:5) Ma tay fan Jehovah e tin ni sunmiy ya mmil fan ngorad ni ngar turguyed ni ngar rin’ed e tin mat’aw mar pigpiggad ngak. Aram rogon ni yog Moses ngak fare nam nu Israel ni gaar: “Chiney e kug taymed ni ngam dugliyed ko yafos e nge yib ngomed fa yam’, fa nge fal’eg Got waathmed fa nge bucheg waathmed. Nggu non ko tharmiy nge fayleng ni ngar mangew mich ko bin ni bay mu turguyed ni ngeb ngomed. Mu turguyed e yafos ni ir e nge yib ngomed.” (Deuteronomy 30:19) Ke pagan’ Jehovah ngodad ni rayog ni ngad turguyed e tin mat’aw ban’en ni ngad rin’ed. Uw rogon ni gad manang?
16. Uw rogon nrayog ni ngad gelgad ni ngad ‘athamgilgad ngad thapgad ngak Got’?
16 Mu lemnag e n’en ni yoloy apostal Paul ni gaar: “Ere pi tafager rog, . . . Nguum athamgilgad ni ba’ madgun Got u wun’med mu um t’ongad ko marus nge mada’ ko ngiyal’ ni kam marod ngak Got, yi Got e gubin ngiyal’ ni be maruwel u fithik’ i lanin’med ni be pingeg lanin’med ni nge m’agan’med ngay ni ngam folgad ko tin ni be finey.” (Filippi 2:12, 13, NW) Fare bugithin ni Greek ni kan piliyeg ni ‘athamgil’ e bsor fan nga ban’en ni ngan rin’ nge m’ay. Ere dariy bagadad ni wol rok ni nge mul ara nge tal u ban’en. I pagan’ Jehovah Got ngodad ni rayog ni ngad mu’naged fare maruwel ni ke pi’ ngodad ni ngad rin’ed—ni maruwel ni be thapegdad ngak—ya faanra danga’ ma dabi thagthagnag e pi thin nem nga laniyan’ be’. Machane uw rogon nrayog ni ngad gelgad? Dabiyog ni ngad rin’ed u gelngidad. Ya faan manga bay gelngidad ma de t’uf ni nge yib “madgun Got u wun’[dad] mu u[d] t’ongad ko marus.” Machane be ‘maruwel [Jehovah] u fithik’ i lanin’[dad],’ ya kan ni thothup e ma maruwel u lanin’dad nge gum’erchadad, “be pingeg lanin’[dad] ni nge m’agan’[dad] ngay ni nga[d] folgad ko tin ni be finey.” Yibe pi’ e ayuw ngodad me ere bay tapgin ni dabda turguyed e tin nib mat’aw ni ngad rin’ed ko yafas rodad ma gad par riy fa? Danga!—Luke 11:13.
17. Mang boch ban’en nrayog ni ngad thiliyeged rodad, ma uw rogon ni ma ayuwegdad Jehovah riy?
17 Bay boch ban’en ni thingarda gelgad ngay—sana kad uned ko boch e ngongol nib kireb u n’umngin nap’an e yafas rodad ma aram e rayog ni nge suwey lanin’dad nge kireb. Machane rayog ni ngad gelgad ko pi n’ey u gelngin e kan ni thothup rok Jehovah! I yoloy Paul ngak e pi Kristiano u Korinth ni Thin Rok Got e ba gel ni rayog ni nge kirebnag e “tin nde riyul’ ni be togopluwnag e girdi’ ngak Got.” (2 Korinth 10:4) Ma rriyul’, nrayog ni nge ayuwegdad Jehovah ngad thiliyeged boch ban’en rodad. Be yog ko Thin Rok ni ngad “n’iged pangi[dad] ni kakrom” ma nga don’ed nga “daken[dad] e bin nib beech i g[adad] ni Got e sunumeg ni bod ir, ma ke gagiyel u daken e bin riyul’ e wok nib yal’uw ma mmat’aw.” (Efesus 4:22-24) Rriyul’ ni rayog ni nge ayuwegdad e kan ni thothup rok Jehovah ngad thiliyeged gadad ni aram rogon? Dabi siy! Kan ni thothup rok Got e ma sunmeg u fithik’dad wom’engin—pi felngin nib fel’ ni gad ba adag ni nge yog ngodad. Bin som’on e pi felngin ney e t’ufeg.—Galatia 5:22, 23.
18. Mang e rayog ni nge turguy yug reb e girdi’, ma mang e susun ni nge mudugilan’dad ngay ni ngad rin’ed?
18 Aram e thin nriyul’ ni ma pithigdad nge puf rogodad. Rogon ni ma t’ufeg Jehovah Got e tin ni sunmiy e dariy e gin ni ma mus riy, ma kan sunmegdad ni bod yaan. (Genesis 1:26; 1 John 4:8) Ere rayog ni ngad turguyed ni nge t’uf Jehovah rodad. Ma re t’ufeg nem—ma gathi yafas rodad faram, ma gathi ngongol nib kireb ni kad filed ni ngad rin’ed, ma gathi thibngidad ni gargelegdad riy—e aram e n’en nra ayuwegdad ko gabul nge langleth. Ba t’uf ni nge t’ufeg Adam nge Efa Jehovah Got ma aram e rayog ngar parew nib yul’yul’ u lan fare milay’ nu Eden. T’ufeg ni aram rogon e aram e n’en nib t’uf ma gad magay nib fas u nap’an e Armageddon ma ngad gelgad ko bin tomur e skeng u tomren fare Biyu’ e Duw ko Gagiyeg rok Kristus. (Revelation 7:14; 20:5, 7-10) Ra bagadad ni yug demtrug rarogon, ma rayog ni nge yog e re t’ufeg nem ngak. (Matthew 22:37; 1 Korinth 13:13) Nge mudugilan’dad ni nge t’uf Jehovah rodad ma gad ubing ban’en nga daken e re def nem ndariy n’umngin nap’an.
Uw Rogon u Wan’um?
◻ Mang boch e lem ni ba math keru’ ko n’en ni yog e Bible u morngaagen rogon nra be’ ma mil fan e yafas rok ngak?
◻ Mang maruwel ko dimow naun ni thingari rin’ reb e Kristiano nge reb u fithik’ i laniyan’rad?
◻ Uw rogon ni be dag e pi pilung nu Judah ni ra be’ ma ir rok ni nge turguy e n’en nra rin’?
◻ Uw rogon ni ma micheg Jehovah ni rayog ni ngad turguyed e tin mat’aw ni ngad rin’ed ko yafas rodad, ni yugu demtrug e tin nib kireb ni be n’en ni nge suwey lanin’dad?
[Sasing ko page 28]
Rogon e yafas rom nga m’on e kan dugliy u nap’an nni gargelnigem fa?
[Sasing ko page 30]
I turguy Josiah ni Pilung ni nge pigpig ku Got ni yugu aram rogon nib kireb e kanawo’ ni dag e chitamangin ngak