Pi Tamachib E Kar Rogned Boch E Thin

Ke Mon’og yu Namibia ko Tirok Got Ban’en

FARE thin nib fel’ u murung’agen Gil’ilungun Got e ke taw nga Namibia ko Duw ni 1920. Ka nap’an e ngiyal’ nem, ma bokum miraay e girdi’ nib yul’yul’ gum’ircha’rad e falfalan’rad ko thin rok Got ni be dag rogon ni ngan thap ngak. Boch ban’en ni ke buch u rom e ra dag ko uw rogon ni be kunuy Jehovah e piin nib fel’ nga lan e ulung rok.​—Haggai 2:7.

◻ I Paulus, ni reb e tamilay’ ni ma par u northeastern Namibia, e ke mada’nag e Pi Mich rok Jehovah ni som’om u nap’an ni yan nga Windhoek, ni aram fare mach ni baga’ u rom. Chi ngiyal’ nem ma rib pay ni ke mich uwan’ Paulus ni ke pirieg e tin riyul’. Ke sul nga tabinaw rok ni be fek fare ke babyor ni You Can Live Forever in Paradise on Earth. Me ere, nap’an ni be milekag i yan nga Rundu, ni aram fare mach ni rib chuchugur ko gin ni bay e Kingdom Hall riy, me pirieg e Pi Mich u rom me wenig ngorad ni nga ur bad ra guyed.

Machane, kaygi palog e re gin’em ni nge yib e Pi Mich rok Jehovah ngay ni gubin e wik ni ngar filed Paulus e Bible. De mulan’, ma aram me tabab Paulus ni nge fil e Bible ni goo ir. Maku, ke machibnag e tin ni ke fil e Thin rok Got ngak yugu boch e girdi’ u fithik’ e pasig. De n’uw nap’an, ma ke sum reb e ulung ko fol Bible u rom. Ma nap’an ni ke rung’ag e chi ulung ni baachichig nem ko radio ni bay e assembly ni baga’ ko Pi Mich rok Jehovah ni yira tay u Rundu, ma kar chagiyed e salpiy rorad ni buchuw nga taabang min yarmiy e melikag rorad ni ngar uned ko re muulung nem.

Kari felan’rad ni ngar chaggad e Pi Mich rok Jehovah ko yay ni som’on! Kan yarmiy ni boch e walag ni bay rogorad ni ngar guyed e re ulung n’ey u gubin ngiyal’. Chiney, ma bay nel’ e publisher ko fare binaw ni ma par Paulus riy.

◻ Kan pug e tafinay rok Johanna ni nge adag fithingan Got ko ngiyal’ ni ke rung’ag be’ ni be yog e thin nib kireb u murung’agen e Pi Mich rok Jehovah. Ke lemnag e n’en ni ke buch, me gaar: “Yay ni som’on ni kug rung’ag fithingan Jehovah, ma ke mit nga lolugeg ma ke magay u lanin’ug, ma kug tabab ni nggu lemnag ko mini’ Jehovah. Gamow e pumoon rog e gamow be par ko gin ni ba chuchugur ko Walvis Bay u l’ay u Namibia. Fayanem ma kugu warow nga mach, ma kug guy e Pi Mich rok Jehovah ni yad be wereg fare babyor ni Watchtower u kanawo’. Ma ke yog ngog ba ken ma kug ning ni ngan fil e Bible ngog, ya bay boor e deer rog. Kug yor ko ngiyal’ ni karogned ngog ni dabiyog ni ngara bad ni ngan guyeg ya ke kireb e karro rorad. Dawori n’uw nap’an u tomren ma ke yim’ e pumoon rog, ma kugu wan nga Keetmanshoop ni nggu par u rom. Reb e special pioneer (full-time evangelizer) e kan l’og nga ram ni fan ni nge machibnag e girdi’ u rom, me pi’ reb e babyor ngog ni The Truth That Leads to Eternal Life. Ka nap’an e tabolngin, ma kug poy ni thin nriyul’ e ram.

“Ma munmun, ma kan piningeg ni nggu un ko machib, machane kug magawon ya gu ma rus ko girdi’. Nap’an ni yibe machib u mit e tabinaw iyan, ma kug meybil ku Jehovah ni kab fel’ ni ko bin ni nggu machibnag be’. Ma nap’an ni kug un ko machib u kanawo’, ma kugu wan nga reb e kanawo’ ni ba achichig ni nggu mith riy, ya gu be athapeg ni nge dabi guyeg be’. Munmun, me yib gelngig ni nggu pi’ reb e babyor ngak be’ ni be yan u kanawo’, ya ke mus ni aram e tayim ni nggog boch e thin. Re rran nem, ma kug weliy ngak e girdi’ ni boor u murung’agen e athap rog ni kug fil u Bible ni bochan Jehovah ni ke ayuwegeg.

“Chiney, u tomren ni ke yan 12 e duw, ma yugu aram rogon ni gu ba gafgow, machane kab t’uf rog fare maruwel ni pioneer ma ma yib ngog e falfalan’ nib gel ni bochan ni gu ma wereg e thin riyul’ ngak yugu boch e girdi’.”