Ra Diin Me Yib Angin Ngodad?
IMMOY l’agruw e pagel nib salap ni yow be fl’eg rogon ba masin nib mit rogon yaan min skengnag. Ma rib tomgin ni yib e nifeng nib gel nge chelchel fare masin iyan nga lang, meni aw nga but’ me kireb. Ke mulan’ fagali pagel ma dakur nongow ngorow. Ya athamgil ni kar tew ko re masin nem e ke m’ay fan.
Orville nge Wilbur Wright fithingaaan e gali pumoon nem ma n’en ni buch ko rofen nem ko pul ni October ko 1900 e gathi aram e yay nsom’on ni ke buch ban’en ni aram rogon u nap’an ni kar guyew rogon ni ngar fl’egew e masin ni ra yan nga lang. Boor e duw ni kar maruweliyew e re n’em ma boor e salpiy ni kar piew ni fan ngay.
Ma tomur riy me yib angin e athamgil ni kar tew. Ya nap’an e December 17, 1903, u Kitty Hawk, North Carolina, U.S.A., ma fagali walag ni Wright e kar fl’egew ba masin ni bay e motor riy ni ke yan nga lang me par u lang ni 12 e second—ni aram ba ngiyal’ nib ngoch, machane kan thiliyeg rarogon e fayleng ni manemus!
Ra nge yib angin ban’en ma ba t’uf ni nguun athamgiliy ma ngan k’adan’uy. Demtrug ko yibe guy rogon ni ngan salap ko non nib mit e thin, ara ngan fil rogon ba mit e maruwel, ara ngan m’ag fager ngak be’, ma ke mus nrayog e pi n’en nem ni faanra ran athamgiliy. Ke gaar Charles Templeton: “Mereb guruy ko ragag guruy ma fan ni ke yib angin ngak be’ e bochan taa ban’en: ya kan tay e maruwel nib gel ni nge yog ban’en.” Ma ke yog Leonard Pitts, Jr. ni gaar: “Gad ma weliy murung’agen felngin be’ nib salap ara ba cheg ni fan nga ban’en, ma gad ma yog ni ke fel’ waathan be’, machane dad lemnaged e pi n’en nth’abi ga’ fan. Ni aram e maruwel nib gel nge fa yu ngiyal’ ni de m’ag e n’en ni kan rin’. Nge urngin e ngiyal’ ni kan tabab ko maruwel ni ri kakadabul nge yan i mada’ ko nep’.”
Aram e n’en ni be weliy e Bible ni gaar: “Fa en ni ir e ta maruwel aram e cha’ ni ra gagiyeg.” (Proverbs 12:24, NW) Be’ nib ta maruwel e ra athamgil iyan. Aram e n’en nib t’uf ni ngad rin’ed ni nge yib angin e n’en ni gad be rin’.
[Picture Credit Line on page 3]
U.S. National Archives photo