Fare Bugithin ni “Kristiano” Be M’ay Fan?

RA ngan mang e Kristiano ma mang e be yip’ fan? Uw rogon ni ga ra fulweg? Kan fith e girdi’ u gubin e nam nib thilthil ko re deer ney, ma baaray boch e fulweg ni kar pied:

“Ngad leked luwan ay Jesus ma gad rin’ e tin ni i rin’.”

“Ngad manged e girdi’ nib fel’ ma gad gol ngak boch e girdi’.”

“Nge michan’dad ni Kristus e ir e Somol ma ra Thapegey.”

“Nga darod ko Misa, min Rosario, ma gad kay fare Komunion nib Thothup.”

“Der mich uwun’ug ni thingar mu un nga galesiya ni ngam mang reb e Kristiano.”

Mus ko dictionary ma boor mab thilthil fan ni be pi’. Riyul’, ra reb e babyor ma bay ragag nib thilthil ni fan fare bugithin ni “Kristiano”, ni bin som’on e “nge michan’uy ara ngad manged bang ko fare teliw rok Jesus Kristus” nge bin migid e “be nib badke ffel’ e ngongol rok’.” Dabda gingad ngay ni boor girdi’ e yad ra pirieg ni dabiyog rorad ni ngar rogned fan ni ngan mang Kristiano.

Lem ni Goo Ngan Pag Ban’en

Ngiyal’ ney, u fithik’ e piin yad badke Kristiano​—ni mus ngak’ e piin ni yad taab teliw—​ma rayog ni ngad pirieged boor e lem nib thilthil u morngaagen fapi thin ni kan thagthagnag u lan e Bible, ara fapi thin ko evolution, ara galesiya ni ma un ko thin ko sasalap ko am, fa rogon nra weliy be’ e thin nriyul’ ni ke fil ngak boch e girdi’. U morngaagen e ngongol, ma bay boch e thin ni kan weliy ni bod e ma li’bitir u meyal, pumoon ni be darngalnag e pumoon, nge l’agruw ni’ ni yow be par u taabang ni dawor ra mabgol, e baga’ ni ma k’aring e togopuluw. Ere bin riyul’ riy e baadag e girdi’ e yafas nib puf rogon.

Bod e biney, i yog reb e babyor ko Christian Century u morngaagen reb e ulung ko galesiya ko Protestant, ni kafin ra tawaliyed mat’awrad ni yad e galesiya ni “rayog ni ngar mel’eged be’ ni pumoon ni ma darngalnag e pumoon ni nge mang reb e elder ko governing board rorad.” Boch e girdi’ ni ma fil morngaagen e teliw e kar rogned ni michan’ ngak Jesus e dariy rogon ko athap rodad. Ke michan’rad ni pi Jew, nge pi Muslim, nge yugu boch “e rayog rorad ni ngar ranod nga tharmiy [ni bod e pi Kristiano],” biney e yib ku reb e babyor ni yoloy e The New York Times.

Mu lemnag ni faan rayog rom, be’ ni lek e lem ko Marx e be gelnag fan gelngin e siyobay fa be’ ni bay ko fare ulung i girdi’ ni ma gagiyegnag e nam e be gelnag e lem ni taa be’ e nge yog e thin ko nam fa be’ ni ma tiyan’ ko pi n’en nib liyegdad e ba fel’ u wan’ ni ngan li’ e gek’iy. Sana ga ra gaar: “Cha’ nem e dabiyog ni ngari mang be’ ni ma lek e lem ko Marx ara be’ ni ma un ko fare ulung ko girdi’ ni be gagiyeg ara be’ ni ma tiyan’ ko pi n’en nib liyegdad,”​—ma rib riyul’ e thin ni kam mog. Machane, ga ra lemnag u rogon e changar ko piin ni yad be yog ni yad e Kristiano e ngiyal’ ney, ga ra guy ni lem rorad e rib palog ma baga’ nib togopuluw ko n’en ni fil Jesus Kristus, ni ir e cha’ ni Sunmeg e Kristiano. Ere mang e be yog e pi n’ey u morngaagen rogon e Kristiano ni yad be tay?​—1 Korinth 1:10.

Fare lem ni ngan thilyeg rarogon e machib ni nge taareb rogon e lem ko girdi’ e ba n’uw nap’an, ma gad ra guy fan. Uw rogon e lem ku Got nge Jesus Kristus u morngaagen e nem ni ke thil? Rayog ko pi galesiya ni yad ma yog e machib ni da ni yib rok Kristus ni ngar rogned ni yad e Kristiano? Pi deer ney e ran weliy ko bin migid e article.