Falfalan’ Ni Dariy N’umngin Nap’an Bay U Tharmiy Ra Bay U Fayleng?

FALFALAN’ rom, baga’ ni be yan u rarogon e gin ni ga ma par riy fa? Boor e girdi’ e yad be yog ni falfalan’ e baga’ ni ma yan u rogon fene rib fel’ fithik’ i dowey, nge rogon e yafas ni bay fan, nge rogon nib fel’ thildad boch e girdi’. Reb e thin u lan e Bible e ka nog ni aray rogon: “Kab fel’ ni ngan kay ba plet i yasay ni bay e t’ufeg riy ko reb e dabiy ko garbaw nib chag e fanenikan ngay.”​—Proverbs 15:17, New World Translation.

Rib kireban’, ya re fayleng ni tafedad ney e ran weliy ma kab kakrom i yib ma immoy e fanenikay, bugel, nge yugu boch e kireb. Machane uw rogon u tharmiy, fa gin giyow ko kan, ni aram e gin ni boor e girdi’ ni yad be athapeg ni nga ranod ngay u tomren ni kar m’ad? Ka immoy gubin ngiyal’ ni tagil’ e gapas nge gapas laniyan’, ndariy e n’en ni be yib i magawonnag, nrogon ni baga’ ni yima lemnag?

Be fil e Bible ni Got e ir e be par u tharmiy nib muun bokum milyon e kan ngak ni ka nog e engel ngorad. (Matthew 18:10; Revelation 5:11) Pi n’ey e ka nog ni yad “pi fak Got.” (Job 38:4, 7, NW) Bod e girdi’, pi engel e ku bay e puf rogon rorad ni ngar rin’ed e tin ni yad baadag; gathi yad bod e robot. Ere ran weliy, ma pi engel e ku rayog rorad ni ngar mel’eged ko ngar rin’ed e fel’ fa ngar rin’ed e kireb. Pi engel yad ra mel’eg ni ngar rin’ed e kireb? Sana ra gin boch e girdi’ ni faanra yad ra nang ni bokum e biyu’ e duw kakrom, ma bay boch e engel ni ke yodorom, bin riyul’ riy, e kar denengad nib togopluw ku Got​—kar thum’gad nga wuru’ i mat’awrad ni pi’ Got ngorad!​—Jude 6.

Pi Tatogopuluw u Tharmiy

Denen e ke sum u giyow ko kan ni bochan e ke togopuluw reb e engel, ni ir e yib i mang Satan (Toogor) nge Moonyan’ (Tagathibthib). Re engel ney ni immoy ko somm’on ni i fol e mel’eg ni nge rin’ e kireb ko puf rogon rok’ ni aram e tin baadag. Yin i tomren miki yib i k’aring boch e engel ni ngar kirebgad, ere taw nga nap’an Noah, ni aram e ngiyal’ ni yib fare ran ni tharey e fayleng, ma boor i yad e ra uned ku Satan ngar togopluwgad ku Got.​—Genesis 6:2, footnote; 2 Peter 2:4.

Pi engel ney ni kar denengad e dan chuwegrad u tharmiy e chi ngiyal’ nem. Machane, i k’adan Jehovah u puluwrad​—u lan bbiyu’—​e duw. Ma, nap’an ni m’ay e k’adan’ rok Jehovah ngak e pi ta rin’ e kireb ney, ma kan “tharbograd” nga wuru’ yu tharmiy, aram e ra tomren ma ran thangrad. Ma aram me non ba lam u tharmiy ni gaar: “ “Ere mu falfalan’gad e pi tharmiy, ni gimed urngin e piin ni gimed be par u wur!” (Revelation 12:7-12) Ere rib gagiyel, ni pi engel nra pared ni yad ba yul’yul’ e ra falfalan’gad nib gel, ya kan chuweg e piin ni yad ma k’aring e wagey u tharmiy.!

Ran lemnag urngin e pi thin ney ni gathi ri yi manang morngaagen, ma rib magagiyel nri dabi yog e bin riyul’ e gapas nde mutrug e ngiyal’ ni faanra siyeg e piin i sunmiyrad Got kenggin e motochiyel rok. (Isaiah 57:20, 21; Jeremiah 14:19, 20) Ma reb e pa’ e, faanra gad gubin ni gad ra fol ko pi motochiyel rok Got, ma rayog ni nge par e gapas u fithik’dad. (Psalm 119:165; Isaiah 48:17, 18) Ma faanra gubin e girdi’ e yad ra t’ufeg mar folgad ku Got muur t’ufeged yad, ma re fayleng ney e gathi ra mang bang nib fel’, ma falfalan’ e par riy? Fulweg ni ke pi e Bible e arrogon!

Machane uw rogon e piin ni yad ba gelan’ ni dubrad ni ngar thilyeged e ngongol rorad nib kireb? Yad ra par ni dariy n’umngin nap’an ni yad be kirebnag e gapas ko piin ni yad baadag ni ngar rin’ed e tin nib m’agan’ Got ngay? Ri danga’, yi Got e ir e ke rin’ e tin nib m’agan’ ngay ngak fapi engel nib kireb u tharmiy, maku ra rin’ e tin nib m’agan’ ngay ngak e piin ni yad ba kireb u roy u fayleng.

Ba Fayleng ni Kan Klinnag ke Biech

“Tharmiy e tagil’ig, ma fayleng e gu ma gifeg e rifrif u eg ngay,” aram e n’en ni yog Got. (Isaiah 66:1) Bochan ni ir e cha’ nth’abi tolang ko pi n’en nib thothup, ere dabi pag Got e gini ma “gifeg e ririf u ay ngay” ni nge alitnag e piin nib kireb ni dariy n’umngin nap’an. (Isaiah 6:1-3; Revelation 4:8) Bod rogon ni chuweg e pi kan nib kireb u tharmiy, e ku aram rogon nra chuweg u fayleng e piin nib kireb, ni bod rogon ni be dag e thin nu Bible ni baaray:

“Piin nib pagan’rad ngak Somol e bay ur pired u daken e nam u fithik’ e gapas, machane piin ni yad ba kireb e bay ni tulufrad ngar chuwgad u daken e nam.”​—Psalm 37:9.

“Piin nib fel’ e ngongol rorad e yad ra par u lang e fayleng, ma piin ni dariy e kireb ni kan pirieg rorad e yad ra magay u lan ni dariy n’umngin nap’an. Machane piin ni yad ba kireb, e ran thirifrad u but’ u daken e fayleng; ma piin ni dariy e yul’yul’ rorad, e ran chuwegrad riy.”​—Proverbs 2:21, 22.

“Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay, machane en nra rin’ e tin nib m’agan’ Got ngay e ra par nib fos ndariy n’umngin nap’an.”​—1 John 2:17.

Ra Magay e Re Fayleng Ney nib Gapas, Fa?

Yugu aram rogon ni be dag e Thin u Bible ni bay gelngin Got ni rayog ni nge taleg e pi kireb ma bay e gin ra mus ngay, uw rogon ni rayog ni nge pagan’dad ni pi kireb, ni ran chuweg, e dabki sul biyay? Ni bod, tomren fare Ran ni Tharey e fayleng ko ngiyal’ u nap’an Noah, ki sum biyay e kireb nge yan i taw nga ba ngiyal’ ni nge buchuwnag e kireb rorad ni aram e ke thilyeg e thin rorad.​—Genesis 11:1-8.

Bin nib ga’ fan e thingari ga’ e pagan’ rodad ni pi kireb e dabki sum biyay ni faanra fayleng e dabki par u tan e gagiyeg ko girdi’ ni bod rogon ni immoy u tomren fare Ran ni Tharey e fayleng. Ya, fare Am rok Got e ra gagiyegnag. Be gagiyeg u tharmiy, ma kemus ni re Am ney e ra par ni be gagiyeg uroy u fayleng. (Daniel 2:44; 7:13, 14) Ra chuweg nib machreg e cha’ ni be guy rogon ni nge sulweg e kireb. (Isaiah 65:20) Bin riyul’ riy, ra thang facha’ ni ir tapgin urngin e kireb​—ir Satan ni Moonyan’—​nib muun ngay e pi demon, nge pi kan ni kireb ni kar folwokgad rok.​—Roma 16:20.

Mang Fan ni Bay Boch e Girdi’ ni Nga Ranod Nga Tharmiy

Boor e piin ni yad ma bieg e Bible, e yad be lemnag fapi thin rok Jesus ni gaar: “Pire’ e singgil ni bay u lan e naun rok e Chitamag . . . . Nggu wan gu ngongliy tagil’med.” (John 14:2, 3) Re ney e gathi be togopluw ko fare lem ni bay e yafos ni dariy n’umngin nap’an u paradis u fayleng?

Pi machib ney e dar togopluw reb nga reb. Bin riyul’ riy, e ra reb ma be ayuweg reb. Ran tababnag, ma i yog e Bible ni bay urngin e namba ko Kristiano nib yul’yul’​—ni aram e, yad 144,000—​e kan fasegrad ni yad e kan ni ngar pared u tharmiy. Mang fan ni kan pi’ e re tawaath ney nrib fel’ ngorad? Bochan e kar ngongliyed ba ulung i girdi’ ni ke guy John ni ke pig e changar rok ni aram e “kar fosgad mi yad gagiyeg ni yad e pilung ni yad be un ku Kristus u lan bbiyu’ e duw.” (Revelation 14:1, 3; 20:4-6) Ran taarebnag rogon ko bokum bilyon e girdi’ ni bay u fayleng, ma fare 144,000 e riyul’ ni aram “fachi ulung.”​—Luke 12:32.

Ngad Mel’eged​—Yafos ara Yam’

Mang e thingar da rin’ed nge yog nda feked e tawaath ko par ni dariy n’umngin nap’an u lan e Paradis u fayleng? Bin somm’on e kanawo’ e ngad filed e thin rok Got, ni aram fare Bible nib Thothup. Ma be gaar, “Baara’ ira’ e yafos ndariy n’umngin nap’an,” rogon ni yog Jesus u lan e meybil rok, “ni aram e nge nangem e girdi’, ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.”​—John 17:3.

Ra ngad paged e re nangan’ nem ni nge maruwel u fithik’dad ma aram reb e kanawo’ ko falfalan’ ndariy n’umngin nap’an. (James 1:22-24) Piin ni yad be par u tan e pi Thin Rok’ Got nem e bay e athap rorad ni ngar guyed e re fayleng ney ni ra mang Paradis, ni bod rogon ni ke yiiynag e Bible.