Fel’ngin Pangiy nib Fel’ e Be War Iyan

“TINIR e ban’en e der ma buch,” aray rogon ni yog Helmut Schmidt, ni immoy ni reb e tayugang ko am nu Chiyamen. Kari kireban’ nga yu pa’ i oloboch e chiney ni aram e sasalyeb ni rib gel ni be rin’ e pi tayugang ko am ni aram e n’en baga’ ni yibe weliy murung’agen. “Yalen pangiy nib fel’ e ke m’ay ni bochan e chogow,” aray rogon ni yog.

Boor e girdi’ ni taareban’rad ko re moon ney. ­Falngin pangiy nib fel’ ni sum ko thin rok Got, ni fare Bible, ni ir e ke n’uw nap’an ma baga’ ni ir e uni fanay ni i powiydad ko tin nib mat’aw nge tin ni de mat’aw e ­kan dariyfannag. Ni ku aray rogon ku yungin baaray ni ki yad ma yog ni yad boch e Kristiano.

Baga’ Fan Pangiy nib Fel’ ni Bay u Bible?

Pangiy nib fel’ ni rogon ni be fil e Bible e ba muun ngay e yul’yul’ nge mat’aw. Meere, sa-salap, nge saliyeb, nge ngongol ni sabanban e ir e kari gel ni ke garer i yan. Fare babyor ni The Times nu London e be yog ni piin ni detectives “e rib mudugil ni kar chaariyed e salpiy ni oren e yan i mada’ ko £100,000 ba ngiyal’ ni bochan e nge yog ni kur pied ni chuway bayay fapi falay nib kireb fa min thang e mich ko kireb ni be ngongliy e pi girdi’ ni tolang ko pi girdi’ nib kireb nem.” Ma yu Austria e yi be yog ni insurance riy e baga’ ni goo sabanban nge sasalyeb e yad be tay. Ma yu Chiyamene girdien e science ara pi llowan’ e ra gingad nib tomgin ko marus u nap’an ni feni pirieg e girdi’ ni ma gaweg murung’agen ban’en “reb e kireb ni rib ga’ ni kan sasalapiy ni rib gel e tamra’ riy ko llowan’ nu Chiyamen.” Reb e professor ni, reb e tin “th’abi llowan’ u fithik’ e pi tayugang nu Chiyamen,” e ni pirieg ni be sasalapiy ara be sunmiy boch ban’en nga i yog ni googsur.

Rogon ni be yog e Bible e pangiy nib fel’ e kub muun ngay e yul’yul’ ko mabgol, nib ban’en nni lemnag nib m’ag ni nge par ni dabi dar. Me ere ke yoor wu’ e mabgol ni ke dar u court. Fare simbung ko Katholic ni Christ in der Gegenwart (The Contemporary Christian) e be yog “ni ki mus ‘ngak yu’ Switzerland, ni dabuyrad ni ma thil yalrad ma be wer e mabgol riy ni be munmun ma be yoor i yan.” U Netherlands, e 33 pasent ko yu wu’ i mabgol riy e be dar. Bay reb e bpin ni guy rogon e thil ni be tay e ngongol u Chiyamen u lan fa in ni baaray e duw ni ke yan me yoloy rogon e lem rok ni gaar: “Mabgol e chiney e yib e changar ngay ni gowa ban’en ni ke kakrom ni ke pag nap’an. Girdi’ e dakir leay be’ ni nap’an e yafas.”

Machane, ku bokum milyon e girdi’ e be lemnag ni rogon kanawoen e ngongol nib fel’ ni be fil e Bible ni ngan pagan’uy ngay e baga’ fan ma kab m’ag ko yafas rorad e chiney. Bay ba wu’ i mabgol ni yow ma par ko mathil u Swiss-German ni ra piriegew ni faan yow ra fil rogon ni nga ur pirew ni yow be fol u rogon pangiy ni bay u Bible mar parew ni ke gel boch e falfalan’ rorow. Ma rogon ni yow be lemnag, “e kemus ni taareb e fonow ni ma pow’iy urngin ban’en ko yafas. Re fonow nem ni ma pow’iydad e Bible.”

Uw rogon ni ga be lemnag? Rayog ni fare Bible e ir e baga’ fan ni nga i pow’iydad? Rogon pangiy nib fel’ ni bay u Bible e ba m’ag ko chiney fa dangay?