Be Gagiyegnag Kristus E Ulung Rok

“Ma dab mpaged talin ni gubin ngiyal’ ma gu ba’ romed, nge yan i mada’ nga tomren e fayleng.”​—Matthew 28:20.

1, 2. (a) Nap’an ni be pi’ fare motochiyel ni ngan pingeg e girdi’ ngar manged pi gachalpen, mang e ke micheg Jesus ni kefini fas ko yam’ ngak pi gachalpen? (b) Uw rogon ni be gagiyeg Jesus fare ulung ko Kristiano nib pasig?

U M’ON ni nge yan Jesus Kristus nga tharmiy, e ir e en Tagagiyegnagdad ni kan faseg ko yam’, me m’ug ngak pi gachalpen me yog ni gaar: “Kan pag fan urngin ban’en ngog u tharmiy ngu but’. Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup, mi gimed fil ngorad rogon ni nguur folgad u gubin e tin ni ku gog ngomed ni nguum rin’ed. Ma dab mpaged talin ni gubin ngiyal’ ma gu ba’ romed, nge yan i mada’ nga tomren e fayleng.”​—Matthew 23:10; 28:18-20.

² Gathi ke mus ni pi’ Jesus ngak pi gachalpen fare maruwel ni ra ayuweg e yafas ni ngan pingeg e girdi’ ngar manged pi gachalpen machane ku i micheg ni ba’ rorad. Tin ni buch rok e piin Kristiano kakrom, ni kan yoloy nga babyor ni Acts u lan fare Bible, e ri be dag ni i fanay Kristus fare mat’awun ni kan pi’ ngak ni fan ni nge gagiyegnag fare ulung ni kefin ni tabab. I l’og fare “ta ayuw” ni kan micheg​—ni fare kan ni thothup—​ni fan ni nge gelnag e pi gachalpen nge pow’iy e maruwel rorad. (John 16:7; Acts 2:4, 33; 13:2-4; 16:6-10) Jesus ni ani kan faseg ko yam’ e ke fanay e pi engel ni yad bay u tan pa’ ni ngara ayuweged pi gachalpen. (Acts 5:19; 8:26; 10:3-8, 22; 12:7-11; 27:23, 24; 1 Peter 3:22) Maku, ani Tagagiyegnadad e ke pi’ e ayuw ngak fare ulung me turguy boch e pumoon ni ngar manged bang ko fare Governing Body.​—Acts 1:20, 24-26; 6:1-6; 8:5, 14-17.

3. Mang boch e deer e yira weliy ko re article ney?

³ Machane, uwrarogon e ngiyal’ ney, ni ka nog e “tungun e re m’ag ney ngay”? Uw rogon ni be pow’iy Jesus Kristus e ulung e kristiano e chiney? Ma uw rogon ni ngada daged ni gad baadag rogon ni be gagiyeg?

Fare Masta Bay e Sib Rok nib Yul’yul’

4. (a) Mini’ e piin ni yad bang ko ulung ni kan nog e “fare tapigpig nib yul’yul’ mab gonop ngorad”? (b) Mang e ke pag fare Masta fan ngak fare sib ni nge rin’?

⁴ Nap’an ni be yiiynag Jesus murung’agen fare pow ko ngiyal’ ni ba’, i yog ni gaar: “Ere mini’ e en ir fare tapigpig nib yul’yul’ ma ba gonop? I ir e en ni masta rok e ke tay ni nge mil fan e tin ni ka bay e tapigpig ngak, ni nge pi’ garad ko ngiyal’ ni yima pi’ riy. Rib ga’ ba falfalan’ nra tay e re tapigpig nem ni faanra sul e masta rok nga tabinaw me pirieg ni ereray e n’en ni be rin’! Nggog ngomed nrib mudugil nra tay fare masta fare tapigpig ni ir e nge mil fan urngin ban’en rok ngak.” (Matthew 24:45-47) Fare “masta” ir e Tagagiyegnagdad, ni ir Jesus Kristus, ma ke dugliy “fare tapigpig nib yul’yul’ mab gonop”​—ni fare dowef ko Kristiano u fayleng ni kan dugliyrad—​ni nge mil fan ngorad urngin ban’en rok u roy u fayleng.

5, 6. (a) U lan reb e changar rok Apostal John ni kan piliyeg, ma mang e be yip’ fan “fa medlip ley i ban’en ni yima tay e magal nga daken ni kan ngongliy ko gol” nge fa “medlip e t’uf”? (b) Fare n’en ni be dag fa “medlip e t’uf” ni bay u ba’ ni mat’aw i pa’ Jesus e be yip’ fan e mang?

⁵ Fare babyor u Bible ni Revelation e be dag ni Jesus Kristus e be gagiyegnag fare tapigpig nib yul’yul’ mab gonop. Nap’an ni kan piliyeg e changar rok John ni apostal u murung’agen “fare rran rok Somol,” me guy “medlip ley i ban’en ni yima tay e magal nga daken ni kan ngongliy ko gol. Ma ba’ be’ ni ke sak’iy u fithik’ fa yu ley i n’en ni bod fak e girdi’” ni “ba’ medlip i t’uf u lan e ba’ ni mat’aw i pa’.” I tamilangnag Jesus ngak John murung’agen e n’en ni ke pig e changar rok ke guy, ni gaar: “Baaray e n’en nib thothup nda nnang fan ni murung’agen fa medlip i t’uf ni baaray ni ga be guy u lan e ba’ ni mat’aw i paag, nge fa medlip ley i tagil’ e magal ni baaray ni kan ngongliy ko gol: re medlip i t’uf ney e ereray fa medlip i engel ko fa medlip i galesiya, ma medlip ley i tagil’ e magal ney e fa medlip i galesiya.”​—Revelation 1:1, 10-20.

⁶ “Fa medlip ley i ban’en ni yima tay e magal nga daken ni kan ngongliy ko gol” e be yip’ fan urngin e ulung ko piin Kristiano ni bay ko “fare rran rok Somol,” ni tabab ko duw ni 1914. Machane uw rogon “fa medlip i t’uf”? Bin som’mon i fan, e yad e piin ni piilal ni kan dugliyrad ni fare kan ni thothup e fakayrad, ma kara ayuweged fapi ulung ko fa bin som’mon e chibog.a Piin ni piilal e ur moyed u lan ba’ ni mat’aw i pa’ Jesus​—ni ir e be pow’iy ma be gagiyegnagrad. Arrogon, Kristus Jesus e ir e be gagiyegnag e piin ni ka nog e sib ngorad. Machane chiney, e ke buchuw e piin ni piilal ni kan dugliyrad. Uw rogon ma rayog rok Kristus ni nge gagiyegnag e pi ulung ko Pi Mich Rok Jehovah ni ke pag 93,000 e chiney u ga’ngin yang e fayleng?

7. (a) Uw rogon ni be fanay Jesus fare Governing Body ni fan ni nge gagiyegnag fapi ulung u fayleng ni polo’? (b) Mang fan ni rayog ni nga nog ni fapi Kristiano ni ma ayuweg e ulung e kan ni thothup e ke dugliyrad?

⁷ Taab rogon ko fa bin som’mon e chibog, ma reb e ulung nib achichig ko piin ni pumoon ni bay rogorad ni yad bang ko piin ni piilal ni kan dugliyrad e yad be pigpig e chiney ni aram fare Governing Body, ni yad owchen fare tapigpig nib yul’yul’ mab gonop. Ani Tagagiyegnagdad e be fanay e re Governing Body ney ni nge dugliy e piin ni bay rogorad​—ndemtrug ko kan dugliyrad ko kan ni thothup fa danga’—​ni ngar manged piin ni piilal u lan e ulung. Bochan e re n’ey, ma fare kan ni thothup, ni ke pi’ Jehovah mat’awon ngak Jesus ni nge fanay, e be rin’ e maruwel rok ni rib ga’ fan. (Acts 2:32, 33) Som’mon, ma pi piilal ney e susun ni nge yog ngorad e pi n’en ni kan dag ko Thin rok Got, ni kan ni thothup e ke thagthagnag. (1 Timothy 3:1-7; Titus 1:5-9; 2 Peter 1:20, 21) Tomren e meybil ma fini weliy min dugliy e en ni nge mang piilal ko ulung u tan e ayuw ko kan ni thothup. Maku, en ni kan dugliy e nge dag wom’engin e re kan ni thothup nem. (Galatia 5:22, 23) Ere fonow ni pi’ Paul e ba m’ag ko urngin e piin ni piilal, ndemtrug ko kan dugliyrad fa danga’: “Mu ayuweged gimed nge fare ulung i saf ni fare Kan ni Thothup e ke taymed ni nguum ayuweged.” (Acts 20:28) Piin ni kan dugliyrad ni ngar manged piin piilal e fare Governing Body be pow’iyrad ma yad baadag ni ngara ayuweged e ulung. Arfan, ni bay rodad Kristus e chiney ma gagiyegnag fare ulung nib pasig.

8. Uw rogon ni ma fanay Kristus e pi engel ni nge pow’iy pi gachalpen?

⁸ Maku be fanay Jesus e pi engel ni nge pow’iy e pi gachalpen e chiney. Rogon ni yog ko fare fanathin u murung’agen e wheat nge pan, ma ra lebug fare maruwel ni mukun woldug u “tomuren e re m’ag ney.” Ra fanay fare Masta mini’ ni fan ni nge kunuy e woldug? “Fapi engel e ra kunuy e woldug,” rogon ni yog Kristus. Me ulul ngay ni gaar: “En ni Fak e girdi’ e bayi l’og e pi engel rok ngar kunuyed urngin e piin ni yad be waliy e girdi’ ngar denengad, nge urngin e piin ni yad be ngongliy e kireb ni kar maathukgad nga fithik’ e piin ni Got e be gagiyegnagrad.” (Matthew 13:37-41) Maku, bod rogon ni pow’iy reb e engel Filip ni nge pirieg fare Ethiopian eunuch, ere bay boor e mich riy ni be dag ni ma fanay Kristus e pi engel e ngiyal’ ney ni ngar pow’iyed fare maruwel ko tin riyul’ e Kristiano ni ngar pirieged e piin nib yul’yul’.​—Acts 8:26, 27; Revelation 14:6.

9. (a) U daken e mang e be gagiyegnag Kristus e ulung ni Kristiano riy e chiney? (b) Mang deer e ba t’uf ni ngada fal’eged i lemnag nfaan manga gad baadag ni nge fel’ rogodad ko gagiyeg ni ma tay Kristus?

⁹ Uw feni fel’ ni ngan nang ni Jesus Kristus e be gagiyegnag pi gachalpen e chiney u daken fare Governing Body, nge fare kan ni thothup, nge fapi engel! Yugu aram rogon ni boch ko pi tapigpig rok Jehovah e ra par nib dar ko fare Governing Body nbochan e togopuluw ni keb ngorad ara bochan yugu boch ban’en, ma ka be par ni be gagiyegnagrad Kristus u daken fare kan ni thothup ngu daken e ayuw ko pi engel. Machane, ra fel’ rogodad u rogon ni be gagiyeg ni ke mus nfaanra ba m’agan’dad ngay. Uw rogon ni ngada daged ni ba m’agan’dad nga rogon ni be gagiyeg Kristus?

“Mu Fol . . . Mu Par u Tan Pa’ Be’”

10. Uw rogon ni ngada daged ni gad be tayfan e piin ni piilal u lan e ulung?

¹⁰ En Tagagiyegnagdad e ke pi’ ko ulung e “taw’ath ni fapi pumoon”​—“boch e tamachib, ma boch e ta chugul saf nge fapi sensey.” (Efesus 4:8, 11, 12) Rogon ni gad be lemnagrad nge ngongol ni gad ma dag ngorad e be dag nib tamilang ni ba m’agan’dad nga rogon ni be gagiyegnagdad Kristus. Ba puluw ni ‘gad ma pining e magar’ ngak e pumoon ni kar ilalgad ko tirok Got ni Kristus e ke pi’. (Kolose 3:15) Maku ngada ted farad. “Piin ni piilal ni be ayuwegmed nib fel’ rogon e bay rogorad ni ngan tayfarad ni l’agruw yay,” aram e n’en ni ke yoloy Paul ni apostal. (1 Timothy 5:17, NW) Uw rogon ma rayog ni ngada daged ni gad be pining e magar ma gad be tayfan e piin pumoon ni kar ilalgad ni bod e​—piin piilal, ara piin ni ma guy—​fare ulung? Ke fulweg Paul ni gaar: “Mu folgad rok e piin ni ma yog e thin ngomed ma ngam pared u tan pa’rad.” (Hebrews 13:17, NW) Arrogon, ba t’uf ni ngada folgad rorad ma ngada pared u tan pa’rad, ma ngad folgad rorad.

11. Mang fan ni ngan tay fan e piin piilal e bang ko fare yaram ko par rodad ni rogon e piin ni kan taufenag?

¹¹ Ani Tagagiyegnagdad e ba flont. Ma piin ni ke pi’ e taw’ath ngorad e danga’. Ere yu ngiyal’ e yad ma oloboch. Machane, baga’ fan ni ngada pared nib yul’yul’ ko yaram rok Kristus. Riyul’, ni gad ra ngongol nrogon ni kada ognaged gadad ma kan taufenagdad ma be yip’ fan ni ba riyul’ u wan’dad fare mat’awuy ni kan ni thothup e ke turguy u lan e ulung ma ba m’agan’dad ni ngada pared u tan pa’ be’. Rogon ni kan taufenagdad ‘u fithingan fare kan ni thothup’ e gad be dag riy ngak e girdi’ ni gad manang ko mang e kan ni thothup ma gad manang e maruwel ni be rin’ nib puluw ko tin nib m’agan’ Jehovah ngay. (Matthew 28:19) Re taufe nem e be yip’ fan ni gad ra fol ko fare kan ni thothup ma dabda rin’ed ban’en ni ra taleg e maruwel rok u fithik’ pi gachalpen Kristus. Bochan ni baga’ fan e maruwel ni ma ta’ fare kan ni thothup u nap’an ni yira yog fithingan be’ min dugliy ni nge mang piilal, gad ba yul’yul’ uw rogon ni kada ognaged gadad nfaanra dabda folgad ko yaram rok e piin piilal u lan e ulung?

12. Mang boch ban’en ni be dag ni dan tay fan mat’awuy ni ke weliy Jude, ma mang e be fil ngodad?

¹² Bay e thin u Bible ni be dag ngodad feni ga’fan ni ngan fol min par u tan pa’ be’. Nap’an ni be weliy Jude ni reb i gachalpen murung’agen e piin ni ma yog e thin ni kireb nib togopuluw ko fapi pumoon ni kan dugliyrad u lan e ulung, me yog dalip ban’en ni be ginangey, ni gaar: “Kar gafgowgad! Ya kar leked fare pa’ i kanawo’ ni yan Kain riy; kar folgad ko oloboch ni fan ko salpiy, ni bod e n’en ni rin’ Balaam; ma kan gechignagrad ni bochan e togopuluw ni kar tiyed ni bod e togopuluw ni ta’ Korah!” (Jude 11) Ke dariy fannag Kain e fonow ni pi’ Jehovah u fithik’ e t’ufeg me m’agan’ ngay ni nge fol ko lem rok ni ri be fanenikay be’. (Genesis 4:4-8) Yugu aram rogon ni ke ginang Got Balaam ni boor yay, maku be guy rogon ni nge buch waathan e girdi’ rok Got ni fan ni ngan pi’ boch e salpiy ngak. (Numbers 22:5-28, 32-34; Deuteronomy 23:5) Ffel’ e maruwel rok Korah u Israel, machane i lemnag ni de gaman. Me k’aring e girdi’ ni ngar togopuluwgad ngak e tapigpig ku Got i Moses, ni ir e en th’abi sobut’an’ u fayleng. (Numbers 12:3; 16:1-3, 32, 33) Keb e gafgow ngak Kain, Balaam, nge Korah nib gel. Rib tamilang ni pi n’eney e be fil ngodad ni ngada motoyilgad ko fonow rok e piin ni ke pi’ Jehovah ngorad boch e maruwel ma nguud ted farad!

13. Mang fapi flaab ni ke yiiynag Isaiah ni profet ni fan ko piin ni kar folgad ko fare yaram u murung’agen e piin piilal?

¹³ Mini’ e dabun ni ngeb e flaab ngak nbochan fare yaram ko gagiyeg nib fel’ ni ke tababnag e ani Tagagiyegnagdad u lan fare ulung ko Kristiano? I yiiy fare profet ni Isaiah murung’agen e flaab, ni gaar: “Am sap! Ra gagiyeg reb e pilung ni fan ni nge mat’awnag urngin ban’en; ma piin fak e pilung, e ngara gagiyeggad ni fan ni ngara yal’uweged urngin ban’en. Ra bagayad ma bayi par ni bod ba manaf ni ngan naf ngay ko nifeng nge yoko’, yad bod e yu pa’ i lul’ ni bay u daken bangi ted nder tugul ban’en riy, ma yad bod e tagalul’ u ba war ni ba ga’ ni ba ga’ ni bay u daken bangi ted nder tugul ban’en riy.” (Isaiah 32:1, 2) Ra reb e piilal ma ba t’uf nra mang bang ni “tagil’” e ayuw nra ayuwegey ndariy e riya’ riy. Yugu aram rogon nib mo’maw’ ni ngada pared u tan pa’ e piin ni bay mat’awrad, ngada meybilgad ma aram e rayog ni ngada manged e piin ma fol ma gad par u tan pa’ e piin ni Got e ke dugliyrad ni bay mat’awrad u lan e ulung.

Uwrogon ni Nge Par e Piin Piilal u Tan Pa’ Kristus Nrogon ni Ma Gagiyeg

14, 15. Uw rogon ni nge dag e piin ni be ayuweg e ulung ni yad be par u tan e gagiyeg ni ma tay Kristus?

¹⁴ Urngin e Kristiano​—ni baga’ ni piin ni piilal—​e thingara folgad uw rogon ni be gagiyeg Kristus. Piin ni be ayuweg e ulung, ara piin piilal, e bay mat’awrad u lan e ulung. Machane gathi yad be guy rogon ni ngar ‘suweyed e michan’ ko pi walagrad’ mu u ra gagiyegnaged e yafas rorad. (2 Korinth 1:24) Piin piilal e nguur folgad ko thin rok Jesus ni gaar: “Gimed manang ni pi pilung e baga’ lungurad u puluwon e girdi’, ma piin ni yad be yog e thin rorad e yad be gagiyegnagrad. Machane gimed e gathi ereram rogon e n’en ni ngam rin’ed.” (Matthew 20:25-27) Rogon ni be rin’ e piin piilal e maruwel rorad, e yad be pigpig ngak yugu boch e girdi’ u fithik’ e yul’yul’.

¹⁵ Kan fonownag e piin Kristiano ni gaar: “Um tafinayniged fa piinem ni yad e u rogned e thin romed, . . . ma ngiyal’ ni gimed be lemnag angin pangirad ma nguum folwokgad ko michan’ rorad.” (Hebrews 13:7) Kan fonownagrad ni aram rogon ni gathi bochan ni piin piilal e yad be yog e thin. I yog Jesus ni gaar: “Taareb e en ni Tagagiyegnagmed, i Kristus.” (Matthew 23:10, NW) Michan’ ko piin piilal e ngan folwok riy ya bochan ni yad be folwok rok e en nriyul’ ni ir e en Tagagiyegnagdad, i Kristus. (1 Korinth 11:1) Mu lemnag boch e kanawo’ ko piin piilal ni yad be athamgil ni ngar boded Kristus yab fel’ e tha’ u thilrad yugu boch e girdi’ u lan e ulung.

16. Yugu aram rogon ni bay mat’awun Jesus, uw rogon e ngongol rok ngak pi gachalpen?

¹⁶ Yugu aram rogon ni kab fel’ Jesus ko girdi’ ni dawora flontgad u gubin e kanawo’ ma bay mat’awun ni dabiyog ni ngan taareb rogonnag ko Chitamangin ni ir e ke pi’ ngak, ma de pag rogon ni i rin’ ban’en ngak pi gachalpen. De suruy laniyan’ e girdi’ ni be motoyil ngak ni bochan e tamilangan’ rok nib pag rogon. I dag Jesus ni be lemnagrad ma be runguy pi gachalpen, ni be lemnag e tin nib t’uf rorad nrogon ni yad girdi’. (Matthew 15:32; 26:40, 41; Mark 6:31) De ning ngak pi gachalpen e tin ni dabiyog rorad, ma de pi’ ngorad ban’en nib pag rogon tomalngin. (John 16:12) Jesus e ba “munguy mab sobut’an’.” Ere dabni gin ngay, ni boor e girdi’ ni pirieg ni ir be’ ni ma baudeg lanin’uy.​—Matthew 11:28-30.

17. Susun uw rogon e ngongol ni ra dag e piin piilal ni bod rogon Kristus ni de pagrogon e tha’ u thilrad yugu boch e girdi’ u lan e ulung?

¹⁷ Faanra Kristus ni fare Tagagiyeg e i dag ni de pagrogon ni ma rin’ ban’en, me ere susun ri aram rogon e piin ni be gagiyegnag fare ulung! Arrogon, ngar koled ayuwngirad ni dabra fanayed mat’awrad nib pag rogon ni kan pag fan ngorad. Ma “dabura u nongad,” ni fan ni nga nog e sorok ngorad. (1 Korinth 2:1, 2) Yad be athamgil ni nga rogned e thin riyul’ u Bible nrogon nib mom ngu fithik’ e yul’yul’. Maku, piin piilal e yad be athamgil ni dabura lemnaged nib pag rogon e n’en ni rayog ni nge rin’ yugu boch e girdi’ mu ur lemnaged e tin nib t’uf rorad. (Filippi 4:5) Bochan ni yad manang e ni ra be’ ma bay ban’en ni dabiyog rok ma aram fan ni yad ma lemnag e pi n’en ney u fithik’ e t’ufeg ko ngiyal’ ni yad ma rin’ ban’en ngak pi walagrad. (1 Peter 4:8) Ma gathi riyul’ ni piin piilal ni rib sobut’ lanin’rad mab munguy e riyul’ ni yad ma baudeg lanin’uy? Ri aram rogon.

18. Mang e ra fil e piin piilal uw rogon e ngongol rok Jesus ngak fapi bitir?

¹⁸ Mom ni nge non e girdi’ ngak Jesus ni mus ko piin nib gafgow. Mu lemnag e fulweg ni ke pi’ u nap’an ni ke puwan’ pi gachalpen ngak e girdi’ ya “kara feked e bitir rorad” i yib ngak. “Mpaged e pi bitir nir ngar bad ngog! aram e n’en ni yog Jesus, me ulul ngay ni gaar, “dab mu taleged yad.” Ngemu’ “ke kunuy Jesus fapi bitir me tay pa’ nga dakenrad, me tabab i flaabnagrad.” (Mark 10:13-16) Ba t’uf e girdi’ rok Jesus mab gol, ma baadag yugu boch e girdi’ daken. De rus e girdi’ ngak. Musko fapi bitir mab mom rorad ni ngar chuchugurgad ngak. Piin ni piilal e kub mom rorad ni ngar bad ngak, ma faan yad ra dag e t’ufeg rorad nge gol, ngak yugu boch e girdi’​—ma musko bitir—​ma ku ra mom ni ngara chuchugurgad ngorad.

19. Mang e ba l’ag ngay ni faanra bay e “lem rok Kristus,” ma mang e ba t’uf ni ngan athamgiliy ni ngan rin’?

¹⁹ Feni fel’ rogon ni nge folwok e piin ni piilal rok Kristus Jesus e be yan u rogon feni yoor e tin ni yad manang murung’agen. “Mini’ e manang e lem rok Jehovah, ma rayog rok ni nge fil ban’en ngak?” i fith Paul ni aram rogon. Ngemu’ me ulul ngay ni gaar: “Machane gadad e laniyan’ Kristus e ba’ rodad.” (1 Korinth 2:16) Rogon ni nge yog laniyan’ Kristus e ba t’uf ni ngan nang rogon ni ma lemnag ban’en nge urngin yang ko wok rok ni fan ni ngada nanged e n’en nra rin’ u nap’an ni ra yib reb e magawon ngak. Mu susunnag e tin ni baaray ni yira nang e en Tagagiyegnagdad nib fel’ rogon! Arrogon, ba t’uf ni ngada tiyan’dad ko thin ko fare Gospel ma ngada suguyed lanin’dad ko tamilangan’ u murung’agen e yafas rok nge tin ni i rin’. Nap’an nra athamgil e piin piilal ni nguur folwokgad rok Kristus ni rogon ni ma gagiyeg, ma girdi’ u lan e ulung e ku yad ra adag ni ngara folwokgad ko michan’ rorad. Ma piin piilal e ra falfalan’rad ni ngar guyed yugu boch e girdi’ ni be lek luwan ay e en Tagagiyeg u fithik’ e falfalan’.

Nguun Par u Tan Pa’ Kristus Nrogon ni Ir e En Tagagiyeg

20, 21. Rogon ni gad be sap nga m’on ko fa bin nib biech e fayleng ni kan micheg, ma mang e thingarda dugliyed?

²⁰ Baga’ fan ni gadad gubin e ngada pared ni gad bay u tan pa’ Kristus nrogon ni be gagiyeg. Chiney ni ke chuchugur fare tomur ko re m’ag ney, ma par rodad e ba taareb rogon ko n’en ni buch rok piyu Israel u daken fare Tagpas nu Moab ko duw ni 1473 B.C.E. Kara tawgad nga mathil ko Fare Binaw ni Kan Micheg, mu daken Moses ni profet, i yog Got ni gaar: “Gur [Joshua] e ngam fek e pi girdi’ ney ngam marod nga lan e re nam nem ni Somol e micheg ngak pi chitamangirad ni nge pi’ ngorad.” (Deuteronomy 31:7, 8) Kan dugliy Joshua nge mang en ta yog e thin. Rogon ni ra yog rok piyu Israel ni nga ranod nga lan fare Binaw ni kan Micheg e thingara pared ni yad be fol u rogon ni be pow’iyrad Joshua.

²¹ Be yog e Bible ngodad ni gaar: “Ri taareb e en Tagagiyeg, ni fare Kristus.” Kemus ni Kristus e ra pow’iydad nga lan fa bin nib biech e fayleng ni tin nib mat’aw ban’en e ra par riy. (2 Peter 3:13) Ere ngada dugliyed ni ngada pared u tan e gagiyeg ni ma tay Kristus u urngin yang ko yafas rodad.

[Footnote]

Ka Ga Manang?

• Uw rogon ni i gagiyegnag Kristus fare ulung kakrom?

• Uw rogon ni be gagiyegnag Kristus e ulung rok ko ngiyal’ ney?

• Mang fan ni thingarda pared u tan pa’ e piin ni ma ayuweg fare ulung?

• Mang boch e kanawo’ nrayog ko piin piilal ni gara daged ni Kristus e ir e en Tagagiyegnagdad?

[Picture on page 15]

Be gagiyegnag Kristus e ulung rok ma be kol e piin ni be ayuweg e ulung ko ba’ ni mat’aw i pa’

[Pictures on page 16]

“Mu folgad rok e piin ni ma pow’iymed ma ngam pared u tan pa’rad”

[Picture on page 18]

Ba t’uf e girdi’ rok Jesus ma mom ni ngara chuchugurgad ngak. Piin piilal ni Kristiano e yad be athamgil ni ngar boded ir